San Lucas 10
10
Attho Jesúspaꞌ moeñan poeyochreshaꞌ ñeñth kanxhrroch xharrasheña ñeñthchaꞌ otatsa
1Allempoña Partseshaꞌpaꞌ alla llesenserranerr poꞌpotantañ poeyochreshaꞌ kanxhrroch xharrasheña ñeñthchaꞌ otrraꞌtatsa oꞌch serrpareꞌtyesnomoet. Ñetpaꞌ atethchaꞌ phaꞌnmoet eꞌñech epsheñaꞌttsokma tet. Arrchaꞌ taꞌyeset ora allowen anetsoꞌmar ñamha amaꞌt allampañoꞌmar; allochñapaꞌ allchaꞌ oñem ñamha tsapathoneth Jesús. 2Ama awanenetaꞌ Jesúsñapaꞌ ateth otanet:
—Shonteꞌ narmets ñeñth nanak ellomhreꞌtets ñeñthchaꞌ aꞌyapaxhetañ. Tharraña atarwasañña ñeñthchaꞌ aꞌyapaxheꞌpaꞌ ama atarr atonayaye. Theꞌpaꞌ añchaꞌña sanamoñ pamoꞌmteꞌ moeñanepaꞌña ñeñthchaꞌ aꞌyapaxherrets paꞌmro. Ñeñthpaꞌ ateth tomaꞌntatanet Jesús attho atarr shonteꞌ acheñeneshaꞌ ñeñthchaꞌ ameꞌñerrtsañ tharraña ñeñthchaꞌ ameꞌñaterrawetpaꞌ ama atarr atonayaye. Añchaꞌña yenam Yompor ñeñth Yamoꞌmteꞌ yepen moeñanepaꞌña paꞌtarwasañer ñeñthchaꞌ thorraꞌyerrtsa ñokop allemeñ anetsoꞌmar. 3Ñamha sapaꞌ ñerraꞌm oꞌch awes theꞌpaꞌ señochchaꞌ poꞌñoxh xhokmach eñall ñeñthchaꞌ seꞌmoñeꞌteꞌ amaꞌt sapaꞌ amach xho erroth sepenanetañe ñet. Ñeñthoꞌmarña notenes theꞌpaꞌ oꞌch nemñas eꞌñech atthes ñerraꞌm carnero oꞌch awoꞌ alloꞌtsen maꞌyarroxhno. 4Ñamha amach sanmatsto kelle, amaꞌt sebolsa, amaꞌt poꞌptaña sesapatpaꞌ amach sanmatsche. Oꞌch awes semaꞌyorñekma. Amaꞌt eseshaꞌch sewomhchaꞌtyesnom thoñoꞌmarpaꞌ amach alla soꞌchtatsto. 5Allempoch sexhap amaꞌt erraꞌtsena anetsro all sesen, amaꞌt erraꞌtsena pokoll allchaꞌ sexhappaꞌ ñanomchaꞌ ateth sephosa. Eꞌñe sewomhchaꞌteñoth ñeñth apakllatheshaꞌpaꞌ oꞌch senamatosñañ Yompor paꞌnateña. Ñerraꞌm ñetña poꞌñoxh eꞌneññañet Yompor paꞌnateña, Yomporñapaꞌ aꞌnatenanetchaꞌ. 6Tharraña ñerraꞌm ñetña ama eꞌneññañeto Yompor paꞌnateñapaꞌ Yomporñapaꞌ oꞌch alla apoerres sa paꞌnateña. 7Ñeñthe pokollro allchaꞌ eꞌñe kowen agapaset allach saꞌposa. Ñeñth rrenet ñet ñeñthchaꞌ rratapaset, ñeñthach serros samha. Tharroꞌmar ñeñthes thorretsa eꞌñe pokteꞌ atethchaꞌ tsaꞌtenset. Amach sommareꞌtyesatsto allemeñ pokolloꞌmar, allach eꞌñe sommosa poepawarro. 8Amaꞌt erraꞌtsena anetsro allchaꞌ sexherrerr allchaꞌ eꞌñe kowen agërrseterr, amaꞌt errothena rreñets apasetpaꞌ ñeñthach serros. 9Allñapaꞌ saꞌkrratyesoschaꞌ ñamha ñeñth atsnaꞌtyets. Allchaꞌ seserrpareꞌtatyesosanet, atethchaꞌ sotos: “Theꞌpaꞌ oꞌ yexhapatonas Yompor poꞌkowenña ñeñth attho ayochreshathtena ña. Aña palltetsa oꞌch sameꞌñera atthoch eꞌñe xhaponasa seyoxhro.” 10Tharraña ñerraꞌm erra anetsro allchaꞌ sexhap ñeñth alloꞌmarneshaꞌña ama kowenayeꞌ agapaseto, allña thoño allekma chopeñeꞌchyenet ñet oꞌch señotatnomanet. Ñeñthpaꞌ atethchaꞌ sotnomanet: 11“Amaꞌt pats ñeñth oꞌ cheta yetko arr saꞌnetsro, theꞌñapaꞌ oꞌch yepaꞌshetkaꞌtyesnoma atthoch señoch sapaꞌ amaꞌt mameshapaꞌ ama pokteyeꞌ entenso Yompor. Tharraña amaꞌt attheñpaꞌ theꞌpaꞌ oꞌch neñotatnomoes Yompor poꞌkowenña awtsa xhaponasañ ñeñth attho ayochreshathtena ña.”
12Allempoña Jesúspaꞌ alla oterranerr poeyochreshaꞌ allempo ama senetaꞌ:
—Poꞌñoxh theꞌpaꞌ oꞌch notas, esempowañen allempoch aꞌkrarethetwerra allowen acheñeneshaꞌpaꞌ añ anetsoꞌmarneshaꞌ ñeñth ama kowenayeꞌ sagapaye theꞌ, nanakchaꞌ yoroxhenoꞌtsenterret allempo. Amaꞌt sodomoꞌmarneshaꞌpaꞌ amach tama yoroxhenoꞌtsenterreto ateth ñerraꞌm ñeñth anetsoꞌmarneshaꞌ ñeñth ama kowenayeꞌ sagapaye theꞌ.
Attho Jesúspaꞌ eños epoꞌmar anetsokop all ama ameꞌñyeto
(Mt. 11.20-24)
13Allempoña Jesúspaꞌ alla oterrerr:
—Nanakchaꞌ llekëñtsoꞌtsaꞌyenes coraziñoꞌmarneshachaꞌ; nanakchaꞌ llekëñtsoꞌtsaꞌyenes samha betsaidoꞌmarneshachaꞌ. Tharroꞌmar amaꞌt atarr norrtatyennaseñ nepartsoña sesho, sañapaꞌ amaña sokthapeꞌchwerroña ello kowen Yomporekop. Ñerraꞌm arrchaꞌña norrtatañ nepartsoña tiroꞌmarneshesho ñamha sidónoꞌmarneshesho, ñetñapaꞌ awathotheñtheꞌ kothapeꞌcherretañ eꞌñe kowen Yomporekop. Ñetpaꞌ atthochña eꞌñe orrtetañ xha llekatenanet poꞌchñar, kotnasheꞌmach chorraꞌyesetañ, tsapñach epachshemaꞌtyenetañ all anorrxhaꞌtyenet poellkëñothet. 14Ñeñthoꞌmarña theꞌpaꞌ notenes, esempowañen allempoch aꞌkrarethetwerra allowen acheñeneshaꞌpaꞌ tiroꞌmarneshaꞌ ñamha sidónoꞌmarneshaꞌ ñetñapaꞌ amach tama aꞌkoñchatarethterreto allempo. Coraziñoꞌmarneshachaꞌ ñamha betsaidoꞌmarneshachaꞌ saña allempopaꞌ atarrchaꞌ koñchaterrset. 15Ñamha sa capernaumoꞌmarneshachaꞌ xhatheꞌ sotenapañ attho eꞌñe kowen sentyena sañeña, Yomporñapaꞌ allenthach aꞌtapaterres poeꞌntaño. Ñeñthpaꞌ amachkaꞌye attheyeꞌ perrsoña Yompor, allachkaꞌye waporeꞌterres oꞌpono koñchaꞌpoetso.
16Jesúsña allempo ama senaꞌ poeyochreshaꞌ oꞌch serrpareꞌtyenetaꞌ anetsoꞌmar ñañapaꞌ alla oterraneterr:
—Ñerraꞌm eseshaꞌch seꞌmhñotapoeꞌ sa, naꞌnaña eꞌmhñotenet. Tharraña ñerraꞌm eseshaꞌch ama sagapaye sa, naꞌnaña ama agëneto. Ñamha ñerraꞌm eseshaꞌ ama moeno oꞌch agapnet na, Nomporeꞌnaña ama moeneñeto oꞌch agapet tharroꞌmar ñapaꞌ ña nellsenseneꞌ.
Arrpaꞌ allowa ñeñth ateth otan poeyochreshaxhno ñeñth kanxhrroch xharrasheña. Allempoñapaꞌ moeñanet allchaꞌ serrpareꞌtatyesnomoet.
Attho waxherra Jesús poeyochreshaꞌ ñeñth kanxhrroch xharrasheña
17Eꞌñe allponmatatsapaꞌ oꞌ alla waxherra poeyochreshaꞌ ñeñth kanxhrroch xharrasheña. Ñetñapaꞌ eꞌñe poksheñeshokmañen waxhenet Jesúsesho. Ateth serrpareꞌtatweñet:
—Partseshachaꞌ amaꞌt oneñethexhnopaꞌ eꞌñe yexhaꞌnmaxhaꞌtatwe eꞌñe yexhoreꞌteñoth pha pesoꞌchño.
18Ñañapaꞌ otapoenanet:
—Napaꞌ neñchkaꞌye oneñeth allempo aprratamphsarethta poꞌwamenk. Eꞌñe atthemaꞌth ñerraꞌm ñapaꞌ oꞌ xhaꞌnmachet entoth ateth pena meratsteꞌ wetsa entoth oꞌch xhap añe patsro. 19Poꞌñoxhkaꞌye napaꞌ atarr awamenkath nephaꞌyesapas. Amaꞌt allowen ñeñth seꞌmoñeꞌtyeneꞌ sañapaꞌ ñeñthekopña nellsensaꞌyesas allochñapaꞌ atthoch eꞌñe saꞌmchechatyeswenaꞌ allowen paꞌnamen, amaꞌt shechpexhno ñamha yellasoxhno, eꞌñe sathmamaꞌteñothpaꞌ eꞌñe saꞌpephtseꞌtatseꞌtweñaꞌ. Allochñapaꞌ amach eñalleterreꞌthe ñeñthchaꞌ semoeroxhtateꞌ amaꞌt pathrra. 20Amaꞌt atarr awamenkatheseñ attho oꞌ saꞌmchechatyeswawe oneñethexhno, amachña ñeñtha atarr sokshatsto. Añchaꞌña eꞌñe sokshena attho akellkaꞌyesarethes sesoꞌcheñ Yomporesho ñeñth poeꞌntañoꞌtsen.
Attho Jesúspaꞌ atarr poksheñeshaꞌ maꞌyochena
(Mt. 11.25-27; 13.16-17)
21Eꞌñe allempoña Jesúspaꞌ atarr koshateñ Parets Poekamkëñ. Ñeñthoꞌmarña ñapaꞌ eꞌñe poksheñeshoth maꞌyochenana Pompor, ñeñthpaꞌ ateth oten:
—Na Apachaꞌ oꞌch naꞌyeꞌchoxhtatonaph, phapaꞌ pha ñeñtheph atarr ayochreshathtetsa peꞌntaño amaꞌt ñamha arr patsro. Naꞌyeꞌchoxhtatonaph tharroꞌmar ora añexhno ñeñth pekowenña pepen, ñeñthpaꞌ ama arreyeꞌ pexhapateñe poeyoxhro ñeñth atarr eñotañ entyetsa. Phapaꞌ aña pexhapaten poeyoxhreto ñeñth ama eñotañeyeꞌ entetso. Tharroꞌmar Apa eꞌñe pemoereñoth ñeñthpaꞌ atethña eꞌñe pokteꞌ penten pha. Arrpaꞌ allowa ñeñth ateth maꞌyochenana Pompor.
22‘Nompor allowen poꞌkowenña eꞌñe eñotatwenen. Na ñeñthen Poechemerenpaꞌ ama poꞌñoxh eseshayeꞌ neñotenaye, ñapthaña Nompor eñotenen. Nomporpaꞌxhoꞌña ama poꞌnoxh eseshayeꞌ eñotenaye, napthaña na ñeñthen Poechemeren eꞌñe neñoteñ Nompor, ñamha erraꞌtsenchaꞌ ñeñth eꞌñe pokteꞌ nenten na ñeñthen Poechemeren ñeñthñapaꞌ oꞌch neñotater Nompor.
23Allempoñapaꞌ alla kowerranerr poeyochreshaꞌpaꞌ ateth otanet eꞌñe ñokpoeta:
—Atarr kosheñtsoꞌtsaꞌyenes sa tharroꞌmar eꞌñe sa seklloyothpaꞌ oꞌ senterrñañ Yompor poꞌkowenña. 24Poꞌñoxhkaꞌye notenes eꞌñe awathotheñpaꞌ shonteꞌ ñeñth aꞌmhtaꞌyesayeꞌth Yompor poꞌñoñ amaꞌt ñamha ñeñth amhchaꞌtarethtatseꞌth allempo, ñetñapaꞌ atarr moenetañeꞌth oꞌch enterrñañetañ Yompor poꞌkowenña ñeñth oꞌ senterr sa theꞌ. Tharraña allempo ñetpaꞌ amaña eseshayeꞌña enterrapaye Yompor poꞌkowenña. Amaꞌt atarr moenetañeꞌth oꞌch eꞌmhñoterrñañet Yompor poꞌñoñ ñeñth oꞌ seꞌmoerr sa theꞌ tharraña allempo ñetpaꞌ amaña eseshayeꞌña eꞌmoerrapayeña Yompor poꞌñoñ.
Attho atarr kowen orrtatos poesheñarr samarioꞌmarneshaꞌ
25Allempoña poesheñarr ñeñth atarr etsoteneꞌ ñoñets ñeñth ateth anareth judioneshakop, ñaña tantapaꞌ ateth otan Jesús atthoch eñoch errothentheꞌ yexhaten ña, ñeñthpaꞌ ateth och:
—Maestrochaꞌ taꞌ, ¿errothenaꞌtchaꞌ nephaña na eꞌñe kowen atthoch napaꞌ korretsanach eꞌñe thayotheñ amaꞌt errponañowen?
26Jesúsña anaphpaꞌ ateth och:
—¿Errothenaꞌt otenña ñoñets ñeñth ateth anareth awathotheñ? ¿Esoꞌtña ñoñtsor pelleyenña pha ñeñth anareth all?
27Ñañapaꞌ ateth och:
—Ñeñth ñoñetspaꞌ ateth oten: “Atarrchaꞌ yemorrenteña Yeyomporer ñeñth Yepartseshar yepen eꞌñe yeyoxhrokmañen. Ñamha eꞌñe yekamkëñoth yemorreñchach eꞌñe yewamenkowen, amaꞌt ñamha ora yokthaphñowen.” Elloneth poꞌpoñpaꞌ ateth oten: “Atarrchaꞌ yemorrenteña yamoꞌts eꞌñe ateth atarr yemorrentena yañeña.”
28Jesúsñapaꞌ ateth och:
—Atethkaꞌye eꞌñe ateth photen. Ñerraꞌm atethchaꞌ eꞌñe pephowapaꞌ phañapaꞌ korretsaphach eꞌñe thayotheñ amaꞌt errponañowen.
29Ñeñthña acheñerpaꞌ aña atarr moenen oꞌch eꞌñe kowen enteñ Jesús ñamha allowen acheñeneshaꞌ. Ñeñthoꞌmarña alla aꞌphthoꞌterranerr Jesús:
—Ñewa, theꞌpaꞌ oꞌch photen ¿eseshaꞌtña ñeñth eꞌñe poꞌñoxh namoꞌts nepen?
30Atthoch eñotach ñeñth eꞌñe poꞌñoxh amotsoth entetsa ñeñth eꞌñe pamoꞌts phannena, Jesúsñapaꞌ ateth tomaꞌntacha, ñeñthpaꞌ ateth serrpareꞌtach:
—Eñall poesheñarr judioneshaꞌ ñeñth wetsa Jerusaléñoth, ñapaꞌ arr sen Jericó. Thoñoñapaꞌ alla rromaph eñeth eꞌñe poerratamphsatsreꞌtwet amaꞌt paꞌshtam. Atarr atserrpet. Awtsa moetsapoetañ allempoña ñeñth atserrphapoeꞌpaꞌ awanerret. 31Allempoña thematenpaꞌ poesheñarr judioneshaꞌ ñeñth korneshaꞌ ñapaꞌxhoꞌña all oñem. Ñañapaꞌ amaꞌt entospaꞌ attha oñmatseꞌtampesya aꞌyoꞌmarpaꞌ oꞌ metane. 32Allempoña thematenpaꞌ wapa ñamha poꞌpsheñeñ judioneshaꞌ ñeñth levitaneshatets. Ñapaꞌxhoꞌña amaꞌt entospaꞌ attha oñmatseꞌtampesya aꞌyoꞌmar oꞌ metane ñamha. 33Allempoña thematerrerr oꞌ wapa ñamha poesheñarr ñeñth ama judioneshayaye ñeñthpaꞌ samarioꞌmarneshaꞌ. Ñapaꞌ ñeñth pamoꞌtseshaꞌ pen ama amoꞌtstenano judioneshaꞌ. Tharraña ñapaꞌ allempo entosan poesheñarr judioneshaꞌ ñeñth atserrpenetpaꞌ atarr moerosya. 34Allentha ponmosya, shosñañ olivoseꞌ#10.34 Olivo ñeñth tsach alloth yoreñet poerets poeꞌmeroth. ñamha vino allo partosñañ all atserrpeñet.
Allempoñapaꞌ wankërrñañ all atserrpeñet. Tantaterpaꞌ montacha pashanoropaꞌ anemh allchaꞌ mos. Allñapaꞌ all kowamphsos. 35Tsapathñapaꞌ chetaꞌmoenan epa denario apaꞌmoenan apakllatheshaꞌ ateth otaꞌmoeñ: “Theꞌpaꞌ pekwampeschaꞌ, errponchaꞌ phaꞌgastaꞌ ello pekhllayor, napaꞌ netsaꞌtwerrphach esempoch newerra.”
36Jesúsñapaꞌ alla oterranerr ñeñth acheñer:
—Maꞌpsheñoꞌmaretpaꞌ phapaꞌ ¿erraꞌtsenaꞌtña pentenña ñeñth atarr amoꞌtsoth entetsa ñeñth eꞌñe pamoꞌts peneꞌ ñeñth rromaꞌ eñeth?
37Ñeñthña acheñerpaꞌ ateth oterranerr Jesús:
—Añkaꞌye eꞌñe pamoꞌts peneꞌ ñeñth eꞌñe poemoereñoth partatseꞌterreꞌ.
Jesúsñapaꞌ ateth och:
—Theꞌpaꞌ atethchaꞌ peperra phamha. Oꞌch awerrephpaꞌ atarrchaꞌ pemorrentera ora allowen acheñeneshaꞌ.
Allempo Jesúspaꞌ xhap pokollo all yexhena Marta epoet paꞌmoꞌnerr María
38All oñen Jesúspaꞌ oꞌ xhap patherr anetso. Allña poesheñarr koyaneshaꞌ añ paꞌsoꞌcheñ Marta, ñañapaꞌ eꞌñe kowen agapapan Jesús paꞌpakllo. 39Ñeñthña Martapaꞌ eñall ñamha paꞌmoꞌnerr ñeñthpaꞌ añ paꞌsoꞌcheñ María. Maríañapaꞌ all anen Partseshaꞌ Jesús paꞌrrphoth alloth eꞌmhñoteññañ ñeñth ateth serrpareꞌtatenanet. 40Paꞌmoꞌnerrña Martapaꞌ aña eꞌñe maꞌyoxhrena aꞌthoramphseꞌ all poetareꞌtallmeꞌchen. Ñañapaꞌ ponmana Jesúspaꞌ ateth otos:
—Ayochreshathe, amatheꞌ pokteꞌ penteñe naptha neptareꞌtallmeꞌchen; nemoꞌnerrñapaꞌ ama yenpoenno. Theꞌpaꞌ oꞌch phoch aꞌthoramphsapretnepaꞌ nathar.
41Jesúsñapaꞌ ateth och:
—Noxha Marta, shonteꞌ paꞌnamen ñeñth pethorraꞌyena, phapaꞌ ñeñthaña atarr pellkateneꞌ. 42Tharraña eꞌñe pathrraña ñeñth atarr sherbets; ñeñthpaꞌ attho eꞌñe kowen sokshennana neñoñ. Pemoꞌnerr Maríapaꞌ ñapaꞌ ñeñthña atarr eꞌnen. Ñeñthpaꞌ amaꞌt eꞌñe esesha amach errothenoth poerratampereto.
Currently Selected:
San Lucas 10: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.