3 San Juan 1
1
Attho Juanpaꞌ eñotenan Gayopaꞌ eꞌñe kowen ameꞌñena
1Oꞌch, masheñe Gayo, nekellkonaph añ carta, napaꞌ na ñeñthen pompor pen allowen ñeñth ameꞌñenaya Yompor. Oꞌch notaph, napaꞌ eꞌñe poꞌñoxh atarr nemoerenpha.
2Ñewa, masheñe, xhokma nemaꞌyochampenpha allochñapaꞌ Yomporpaꞌ eꞌñech aꞌnatenpha. Eꞌñepaꞌch kowen pewomhchena, tharroꞌmar napaꞌ neñoteneph eꞌñe pekamkëñothpaꞌ eꞌñe kowen phokthapeꞌchen Yomporekop. 3Oꞌch notaph, napaꞌ atarr noksha allempo werra masheñneshaꞌ peshoth. Ñetpaꞌ ateth serrpareꞌtatwerrnet phapaꞌ eꞌñoꞌ poꞌñoxh kowen phameꞌñena, eꞌñoꞌ kowen phokthapeꞌcheññañ Yompor poꞌñoñ ñeñth eꞌñe poꞌñoxh ateth oteney. 4Allempo neꞌmareꞌtas attho sapaꞌ eꞌñe kowen sokthapeꞌchen ñeñth eꞌñe poꞌñoxh ateth oteney Yompor poꞌñoñ, napaꞌ ñeñthña atarr nokshateneꞌ; ama eñalle poꞌpoñ ñeñth ateth atarr nokshateneꞌ. Napaꞌ eꞌñe ateth nentenes ñerraꞌmrratheꞌ nechemeres ñeñthoꞌmarña napaꞌ atarr nokshensa.
5Ñewa, masheñe oꞌch notaph, phapaꞌ eꞌñe pokteꞌ ateth pepena ñeñth attho phagëñ eꞌñe kowen pepakllo masheñneshaꞌ ñeñth wapyetsa poꞌpoñ anetsoth. 6Awaña allempo yapxhena alloweney ñeñthey ameꞌñetsa, ñetñapaꞌ ateth serrpareꞌtatwerryet attho phapaꞌ eꞌñe kowen pemoerapanet. Ñamha oꞌch notaph, xhokmach peyenpoenanet, phapanetchaꞌ ñeñth palltenet atthoch anerret Yompor poꞌñoñ poꞌpoñ anetso. Ñerraꞌm ateth pepenapaꞌ ñeñthpaꞌ eꞌñech pokteꞌ enteneph Yompor tharroꞌmar ñetpaꞌ Yompor sherbenet. 7Ñewa, ñetpaꞌ oꞌ awanmoet atthoch serrpareꞌteññañetaꞌ Jesucristo poꞌñoñ tharraña ñetpaꞌ ama moeneñeto oꞌch es apapanet ñamha ñeñth ama ameꞌñetso. 8Ñeñthoꞌmarña yapaꞌ eꞌñe pokteꞌ oꞌch es yapapanet tharroꞌmar ñeñthpaꞌ atthoña yethorrapretenanetña Yompor poꞌñoñ.
Attho Diótrefespaꞌ amaꞌt mameshapaꞌ ama kowenayeꞌ entenano ñeñth ameꞌñetsa
9Oꞌch noterrperr poꞌpoñ. Oꞌ nekellkaꞌwa carta allowenakop ñeñth apxhetsa all phaꞌnetsro. Oꞌ notwanet ora allpon ateth notwaph arr necartoth, tharraña Diótrefespaꞌ xha achmhareꞌtey. Ñapaꞌ eꞌñe pommoꞌcheñoth eꞌñe ñañeñapaꞌ aña moenen oꞌch pomnaren phaꞌyenan acheñeneshaꞌ ñeñth oꞌ ameꞌñerrana Yompor, ñeñthoꞌmarña ama eꞌmhñotenye. 10Ñeñthoꞌmarña esempoch nexhap peshopaꞌ oꞌch neyerpatosanet ñeñth ateth pena Diótrefes. Ñapaꞌ xhokma tomaꞌtampeney atthach eñosatseꞌtyen yokop. Ama ñeñthayaya ateth peno, elloña ama agënano masheñneshaxhno ñeñth aneneꞌ Yompor poꞌñoñ. Ama agënaneto ñamha ama moenatenano acheñeneshaꞌ oꞌch agëñet ñamet masheñneshaxhno. Ñerraꞌm eseshaꞌña agënawetpaꞌ ñañapaꞌ oꞌchxhoꞌ moeñoꞌterranet arroth all sapxhena.
11Ñewa, masheñe, phapaꞌ amach peyxhapretatsto ñeñth ateth pentapreten ñeñth ama pokteyaye. Phapaꞌ añchaꞌña peyxhaꞌ ñeñth pentapreten attho eꞌñe pokteꞌ es phaꞌyenet. Ñeñthoꞌmarña ateth noteneph tharroꞌmar erraꞌtsen ñeñth eꞌñe pokteꞌ es petspaꞌ ñeñthkaꞌyeña Yompor poeyochreshaꞌ; ñeñthña ama pokteyeꞌ es phaꞌyetso ñeñthña amaꞌt mameshapaꞌ ama eñotenanoña Yompor.
Attho eꞌñe kowen orrtaten Demetrio
12Ñewa, oꞌch notaph ñamha poꞌpsheññekop ñeñthpaꞌ añ paꞌsoꞌcheñ Demetrio. Ñaña poꞌñoxhpaꞌ eꞌñe kowen enteñ allowen acheñeneshaꞌ. Ñapaꞌ eꞌñe ateth pena ateth oten Yompor poꞌñoñ ñeñth eꞌñe poꞌñoxh kowen. Ñeñthoꞌmarña yapaꞌxhoꞌña yeñoteñ ñapaꞌ eꞌñe kowen acheñer. Ñewa, phapaꞌ eꞌñe peñoteney ñerraꞌm errothen yoten, ñeñthpaꞌ eꞌñech poꞌñoxh ateth.
13Shontemeñ ñeñthchaꞌ notapeñpaꞌ tharraña amach eꞌñe notwape añ necartoth. 14Tharroꞌmar napaꞌ atarr nemneñ awenepoña nexhap pesho. Ñerraꞌm esempoch nexhappaꞌ allempochña eꞌñe yeserrpareꞌtatannaꞌta parro.
15Ñeñth arroꞌtsaꞌyen masheñneshaꞌ ñetpaꞌxhoꞌña womhchaꞌtenpet ñeñthara añ necartoth. Phañapaꞌ oꞌch pewomhchaꞌtyesanet eꞌñe poesheñaꞌttsokma masheñneshaꞌ ñeñth parroꞌtseneph. Theꞌpaꞌ ñeñthach notaph, masheñe, Yomporepaꞌchña phaꞌnatenaya. Allowa.
Juan
Currently Selected:
3 San Juan 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.