2 Corintios 12
12
Attho Pablopaꞌ aꞌtapatarethta Yompor poeꞌntaño ñeñth eꞌñe pomaꞌptañowa
1Ñeñth attho señosatseꞌtatyenen eꞌñe kowen nokpa, ñeñthpaꞌ ama es sherbeno. Tharraña amaꞌt attheñpaꞌ oꞌch alla neserrpareꞌtaterrserr attho Yepartseshar ñaña es negatyeneꞌ ñeñthña es neñotatyeneꞌ. 2-3Ñewa, napaꞌ neñoteñ na poesheñarrana ñeñthen ameꞌñenaya Cristo theꞌpaꞌ oꞌ met xharraꞌ poechena paꞌtats char, allempoña napaꞌ aꞌtapaten Yompor poeꞌntaño ñeñth eꞌñe pomaꞌptañowa. Napaꞌ ama neñoteñe, ñatoꞌ oratheꞌ nechtso aꞌtapatarethen, amapaꞌ ñatoꞌ nekamkëñothatheꞌ aꞌtapatnet. Ñeñthpaꞌ Yomporña eñoteneꞌ. Napaꞌ eꞌñe neñoteñ poꞌñoxh aꞌtapatarethen Yompor poeꞌntaño all atarr nanak kosheñtsoꞌtsaꞌyenet. 4Ñoñets ñeñth neꞌmoenaꞌ allpaꞌ ama aserrpareꞌteno tharroꞌmar ya arromñathey ama pokteyaye oꞌch yeserrpareꞌt allo. 5Ñeñth ateth apharetheneñ allempo, ñeñthpaꞌ eꞌñe pokteñ oꞌch kowen neñoseñ eꞌñe nokpa, tharraña amach ateth nephatsto, añachña nokshena attho ama awamenkathoyenayeꞌ entenno acheñeneshaꞌ. 6Ñewa, ñeñth ateth apharetheneñ allempo ñeñthpaꞌ eꞌñe pokteñ oꞌch kowen neñoseñ eꞌñe nokop, ñeñthpaꞌ ama xhoyeꞌ notatseꞌteno, tharroꞌmar ñeñthpaꞌ eꞌñe poꞌñoxh ateth apharethen. Tharraña napaꞌ ama nemno oꞌch kowen neños eꞌñe nokpa. Añachña nemnen ñeñthchaꞌ kowen entapretennet ñeñth eꞌñe allpona entapretennet ñeñth ateth es nephaꞌyen kowen ñamha ñeñth eꞌñe allpona eꞌmhñotapretennet ñeñth ateth eꞌñe kowen neserrpareꞌten.
7Attho Yepartseshar ñaña es negatyeneꞌ ñeñthña es neñotatyeneꞌ ñeñthpaꞌ atarr kowen nanak yenteñ. Tharraña napaꞌ atthoch amach noksheno eꞌñe nañeñapaꞌ Yomporña nemnateneꞌ eꞌñe nechtso ñeñthña atarr nemoeroxhtatameꞌteneꞌ nanak. Ñeñth attho nanak nemoeroxhtena, napaꞌ ateth nenteñ ñerraꞌmrratheꞌ aj nechtsotampena ñeñthpaꞌ oneñetheshothña wennana ñeñthña atarr atserr nepeneꞌ. Atthoña Yomporpaꞌ ama moenatenno oꞌch nokshena eꞌñe nañeña. 8Napaꞌ oꞌ maꞌpocheꞌtats nenamoeñ Yompor aꞌwañamperrnepaꞌ ñeñth atarr nemoeroxhtateneꞌ. 9Tharraña ñapaꞌ awoꞌt otenen: “Amach naꞌwañamphsatsterrpe, tharraña napaꞌ attha xhokma atarr nemoerenpha, phapaꞌ ñeñthaña pepalltena. Tharroꞌmar ñeñth ama eñalle eꞌñe ña poꞌwamenkpaꞌ ñeñthchaꞌña orrtateneꞌ na newamenk.” Ñeñthpaꞌ ateth otenen Yompor. Ñeñthoꞌmarña attho napaꞌ ama eñalle eꞌñe na newamenk, ñeñthpaꞌ ñeñthña atarr nokshateneꞌ na, tharroꞌmar neñoteñ ñerraꞌm atthenpaꞌ Cristo poꞌwamenkña ñeñth nechorrenaya; ñeñthña norrtatenpaꞌ, ama noyaye newamenk, ñeñthpaꞌ Cristo. 10Ñeñthoꞌmarña napaꞌ añ atarr nokshateneꞌ attho napaꞌ ama awamenkathoyenayayno ñamha attho atarr penknaꞌntatennet tharroꞌmar ama esoyeꞌ entenneto. Ñamha napaꞌ añña nokshateneꞌ ñeñth allpon atarr echarrareꞌ nentyen, ñamha attho xhokmach kothareꞌtennet, ñamha amaꞌt allpon ñeñth newenoya ñeñthña atarr nokshateneꞌ. Eꞌñe pokteꞌ nenteñ oꞌch nemoeroxhta Cristokop. Tharroꞌmar neñoteñ ñerraꞌm esempo ama awamenkathoyenayeꞌ yenteno eꞌñe ya, allempoña Cristopaꞌ awamenkath peney.
Attho Pablopaꞌ atarr llekënana corintoꞌmarneshaꞌ ñeñth ameꞌnetsa
11Sapaꞌ attho señosatseꞌtatyenen eꞌñe kowen ñeñth eꞌñe nokpa, tharraña amaꞌt attheñpaꞌ napaꞌ eꞌñe poꞌñoxh notatseꞌtyen, tharroꞌmar napaꞌ ama nepallteno oꞌch neños eꞌñe kowen ñeñth eꞌñe nokpa. Añña palltetsa sa oꞌch señosapreten kowen ñeñth eꞌñe nokpa. Tharroꞌmar sapaꞌ señotenen atarr asherbhoyenen. Amaꞌt poꞌpotantañ ñeñth atarr seꞌmhñotateneꞌ atarr ommoꞌchenetañ, ñetpaꞌ allsensarethetoꞌ Yomporeshoth, ñetpaꞌ atarroꞌ nanak sherbenet, elloña napaꞌ atarr asherben entenen Yompor, amaꞌt napaꞌ ama esoyeꞌ nenteno. 12Tharroꞌmar awañmoꞌcha allempo naꞌpoena sesho, napaꞌ allña norrtatyesonas Yompor poꞌwamenk ñeñth atarr echarrareꞌ ñeñth sapaꞌ amaꞌt awathapaꞌ ama sentare ñeñthchaꞌña señotateꞌ ñeñthpaꞌ Parets poꞌwamenk ñamha ñeñthchaꞌ señotateꞌ napaꞌ poꞌñoxh Yomporña nellsenseneꞌ. Ñeñthoꞌmarña eꞌñe kowen naꞌwantennas ñeñth atarr thorrapoꞌ sentyen. 13Atthekma es norrtatyennas ñeñth ateth nephaꞌyes poꞌpotantañ ñeñth pameꞌñeñothet apxhaꞌyetsa allemeñ anetsoꞌmar. Añña ama naꞌtsrreꞌmoxhtanaꞌtaso es senamareꞌtyeseꞌ. Tharraña ñerraꞌm ama pokteyeꞌ sentono ñeñth kowenareꞌ nephonaspaꞌ, ñewa, ñatoꞌ oꞌch sephretnerren.
14Theꞌpaꞌ pomaꞌpocheñopaꞌ oꞌch awerrnerr sesho. Atthekmach nephowerrerr, amach naꞌtsrreꞌmoxhtanaꞌtaso es senamareꞌteꞌ ñeñth nepalltena na. Tharroꞌmar napaꞌ ama añeyeꞌ neꞌneno ñeñthchaꞌ es sapoen na; napaꞌ añña nemnen oꞌch sepomwa sañeña Cristesho. Tharroꞌmar napaꞌ ateth nentenes ñerraꞌmrratheꞌ poꞌñoxh eꞌñe nechemer nepenes. Ñewa, cheshaneshaꞌpaꞌ ama añeyeꞌ pallteneto oꞌch es aꞌyapaxhet ñeñthchaꞌ aññoꞌtet pamoꞌmtayekop. Añña nanak palltetsa, pamoꞌmteꞌchña es aꞌyapaxhets ñeñth poechemereshakop. 15Ñeñthoꞌmarña eꞌñe noksheñeshaꞌ oꞌch nepomwa eꞌñe nañeña ñeñthpaꞌ eꞌñech sokop. Allochñapaꞌ atthoch sekeshperra samha. Ñamha allpon nechyen, eꞌñe noksheñeshaꞌpaꞌ oꞌch nepomyeñ eꞌñe sokop. Amaꞌt napaꞌ elloña atarr nemorrentensa sañapaꞌ oꞌwañ eꞌñeyeꞌ semorrentenna na.
16Sapaꞌ señotenen napaꞌ ama naꞌtsrreꞌmoxhtanaꞌtaso es senamareꞌteꞌ ñeñth eꞌñe nokop. Tharraña sapaꞌ xhatheꞌ sotenapañ napaꞌ atarrtheꞌ neñoteñ atthoch neshkareꞌtas ñeñth eꞌñe poꞌpoñeꞌttsokma shekareꞌteñets. 17Ñeñth nemña awañmoꞌcha epsheña sesho, xhatheꞌ sotenapañ ñeñthpaꞌ tharrekpatheꞌ atthoch shekareꞌtaset. 18Ñewa, na theꞌpaꞌ oꞌ nesechach masheñ Tito ñeñthchaꞌ tatsa sesho, epoet poꞌpsheñeñ masheñ oꞌ nemñanet epsheñoꞌmaret sesho. Sapaꞌ xhatheꞌ sotenapañ masheñ Titopaꞌ oꞌch shekareꞌtensaꞌ. Amaꞌt señoteñeña yapaꞌ atthekma kowen yokthapeꞌchen yeyoxhro epan masheñ Tito ñamha atthekma es yephaꞌyennas eꞌñe kowen.
19Sapaꞌ xhatheꞌ sotenapañ añekpatheꞌ neñen kowen nokop allochñapaꞌ atthoch oꞌch alla kowen sentwerren. Tharraña eꞌñe nemorrenteñothes masheñneshachaꞌ ñamha noxhaneshachaꞌ oꞌch notas, ñeñthpaꞌ ama nokpayaye. Añekopña notenes ñeñth eꞌñe sokop allochñapaꞌ oꞌch alla womenk seperr seyoxher Yomporekop. Napaꞌ eꞌñe neyemteñoth Cristo, Yomporñapaꞌ entenen ñeñth ateth notenes. 20Tharroꞌmar eꞌñe nellkëñothes sa noten, ñatoꞌ esempoch nexherr sesho, ñerraꞌm atthera nentyeswerrserr ñeñth ateth sephatseꞌtyena, napaꞌ ñeñthchaꞌña atarr nellkatwerrayerr sesho. Atthoña ñerraꞌm sentapoerren nellkëñeshaꞌ nexherr seshopaꞌ ñeñthchaꞌña sellkateꞌ samha. Ñatoꞌ oꞌch nentwerrserr atthera seꞌmoñeꞌtannena, atthera es seyeꞌchapretannena, atthera saꞌtsrreꞌmareꞌtatannena sañeña atthoch oꞌch saꞌmhchaꞌtarethta; ñatoꞌ atthera sesasareꞌtannaꞌtyena, atthera saꞌmethareꞌtamphsannena, ñamha eꞌñe poesheñaꞌttsos atthera atarr kowen sentena sañeña, ñatoꞌ atthera seꞌmoñeꞌtannaꞌteñothpaꞌ secheꞌxhameꞌtannaꞌtyena. 21Ñamha napaꞌ nellkëñothes sa noten, ñerraꞌm esempo nexherrerr sesho poꞌpocheñopaꞌ ñatoꞌrraña oꞌtheꞌ alla penknaꞌntaterrnerr Yompor eꞌñe soꞌmara. Tharroꞌmar ñatoꞌ patantaꞌttsos ama sekexhpoeno ñeñth ama pokteyeꞌ enteno Yompor ñeñth ateth seyxhaꞌyen sa sosyaꞌtsañexhno, ñamha attho sechtaꞌyeñ koyaneshaxhno ñeñth ama sethaporeyaye, ñamha koyaneshaꞌpaꞌxhoꞌña agënan yakma ñeñth ama poerrollareyaye, ñamha attho sayomhatseꞌtyena ñeñth poꞌñoxh ama ateth aphapawoyaye. Ñatoꞌ atthera sephatseꞌtyena ateth sepeꞌth awath ama llekatensoña soꞌchñar atthoch sokthapeꞌcherr etserra kowen. Ñeñthoꞌmarña ñerraꞌm esempo nexherrerr sesho ñerraꞌm atthera nentwerrserr, nellkëñothpaꞌ xhatheꞌ neyaꞌnaꞌtwerres.
Currently Selected:
2 Corintios 12: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.