1 San Juan 1
1
Jesucristo ñeñth poꞌñoñ pen Yompor, yañapaꞌ allochña eꞌñe yokrrerra
1Theꞌpaꞌ oꞌch neserrpareꞌtatas arr nekellkoth ñeñth ateth pena Jesucristo; ñapaꞌ xhokma eñall amaꞌt awathotheñ amaꞌt allempo ama ayexhkatarethtenaꞌ pats. Ñeñthña yapaꞌ eꞌñe yeꞌmeꞌth ateth serrpareꞌtatyesyeꞌth allempo orrtosa arr patsro, amaꞌt ya yeklloyothpaꞌ eꞌñe yeñcheꞌth eꞌñe allameꞌtets, amaꞌt eꞌñe ya yotothpaꞌ yaꞌphllaꞌyeseꞌth. Ñeñthña Jesucristo ñapaꞌ ñeñthña poꞌñoñ penña Pompor Parets tharroꞌmar ñach eꞌñe eñotaterreꞌña acheñeneshaꞌ ateth oten Pompor Parets. Ñeñthña ña poꞌñoñpaꞌ poꞌñoxh yapaꞌ allochña korretsayach. 2Ñeñthña Jesucristo allempo acheñetos arr patsro yañapaꞌ eꞌñe yeñcheꞌth. Ñeñthoꞌmarña theꞌ yapaꞌxhoꞌña xhokma yeñotatenes samha. Ñeñthoꞌmarña yeserrpareꞌtatenes ñeñthña Cristopaꞌ ñeñth alloch yokrrena amaꞌt thayotheñ eꞌñe errponañowen. Ña awathpaꞌ eꞌñe parroꞌtsen epoet Pompor Parets. Theꞌña attho orrtosnaya arr patsro yapaꞌ eꞌñe yeñcheꞌth eꞌñe yeꞌmeꞌth ateth serrpareꞌtatyesyeꞌth. Ñeñthoꞌmarña theꞌ ya ñeñth ateth yentyeseꞌth, ñeñth ateth yeꞌmyesoñeꞌth, theꞌñapaꞌ oꞌch yeserrpareꞌtatas samha. 3Allochñapaꞌ atthoch alloweney yeparrokmaterr epay Yompor Parets ñamha Poechemer ñeñth Jesucristo. 4Ñeñthoꞌmarña nekellkënnas ñeñth eꞌñe poꞌñoxh yeñoten atthochña sapaꞌxhoꞌña oꞌch eꞌñe soksherra samha.
Yomporpaꞌ añ tomaꞌntena poetareꞌ tharroꞌmar ñapaꞌ eꞌñech kowen es orrtatyen
5Añ ñoñets ñeñth yeꞌmapretyeseꞌth Jesucristo, theꞌñapaꞌ oꞌch yeserrpareꞌtatas. Ñeñthpaꞌ ateth eñotateney: Yomporpaꞌ ña eꞌñe kowenareꞌ es phaꞌyets, ñapaꞌ eꞌñe ateth pena ñerraꞌm poetareꞌ eꞌñech kowen yenteñ. Ñapaꞌ amaꞌt mameshapaꞌ ama orrtatenanoña ñeñth ama kowenayaye; ñeñthoꞌmarña yoten, ñeshopaꞌ amaꞌt koñeꞌthapaꞌ ama eñalleña chekmeteꞌ. 6Yapaꞌ amaꞌt yoteneñ oꞌ eꞌñe yeparrokmaterr epay Yompor, tharraña ñerraꞌm ora yorrtatyen ñeñth ama kowenayeꞌ enteno ña, yañapaꞌ attha yeshkën. Ñeñthoꞌmarchaꞌña xhach yottena ñerraꞌm chekmeta yechopeꞌchen tharroꞌmar ama eꞌñe yeyxhenaꞌ ñeñth eꞌñe poꞌñoxh kowen enten Yompor. 7Tharraña ñerraꞌm eꞌñe kowenareꞌ es yorrtatyen ateth pena Yompor, ñeñthñapaꞌ eꞌñe ateth yepena ñerraꞌmrratheꞌ arr yechopeꞌchen poetaro eꞌñe alloꞌtseney epay Yompor. Atthoña alloweney eꞌñech kowen yeparrokmatwen ñamha Yompor Poechemer ñeñth Jesucristo ña poꞌrrasoña xhokma eꞌshennayña allowen yoꞌchñar.
8Tharraña ñerraꞌm xha yoten, “napaꞌ amakaꞌye eñalle noꞌchñar”, ñeñthñapaꞌ yañeñakaꞌye shekëtsa tharroꞌmar Yompor pokthaphña ñeñth eꞌñe poꞌñoxh kowenpaꞌ amakaꞌye xhennayoña yeyoxhro. 9Tharraña ñerraꞌm xho yaꞌmethen yoꞌchñar, Yomporñapaꞌ eꞌñech peretnaꞌwerrnay allowen yoꞌchñar, eꞌñech eꞌshowerrnay allowen ñeñth ama pokteyeꞌ entapretenye tharroꞌmar ñapaꞌ ama poenesho poꞌñoñ, ñapaꞌ eꞌñe pokteꞌ es pen, ñeñthoꞌmarña ñapaꞌ xhokmach peretnerrey. 10Ñamha ñerraꞌm xha yoten, “napaꞌ ama noꞌchñaꞌtpeno”, Yomporñapaꞌ xha yottatateñ ñerraꞌmrratheꞌ ñapaꞌ atarr ashkañ tharroꞌmar poꞌñoñpaꞌ ateth oteney ya alloweneypaꞌ eꞌñe yoꞌchñaꞌtwen. Ñeñthña poꞌñoñpaꞌ yañapaꞌ amaꞌt eꞌñe mameshapaꞌ ama xhappennayoña yeyoxhro.
Currently Selected:
1 San Juan 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.