1 San Juan 3
3
Yomporpaꞌ eꞌñe poechemereshaꞌ peney
1Theꞌ sapaꞌ xhosaña eꞌñe kothapeꞌcherreꞌ, Yomporpaꞌ atarrkaꞌye nanak morrentenya. Ña eꞌñe poemorrenteñothey ñapaꞌ eꞌñe poechemer peney, ñeñthoꞌmarña yapaꞌ eꞌñe poꞌñoxh Yomporenaꞌtarey. Ñeñthoꞌmarña acheñeneshaꞌ arr patsro ñeñth ama ameꞌñetso ñetñapaꞌ ama eseshayeꞌ eñotenayeña ñeñth ateth yokthapeꞌchyen Yomporekop tharroꞌmar Yomporpaꞌxhoꞌña ama eseshayeꞌ eñotenaye ñeñth ateth kothapeꞌchen ña. 2Oꞌch masheñneshachaꞌ ñamha noxhaneshachaꞌ oꞌch alla noterrserr, theꞌña yapaꞌ eꞌñe poꞌñoxh poechemer peney Yompor. Amaꞌt ama eꞌñe eñotatenyaꞌ errotheneychaꞌña ya esempowañen tharraña yapaꞌ eꞌñe yeñoteñ ñerraꞌm esempo orrterra Jesucristo, yañapaꞌ eꞌñech atthey yamha ñerraꞌm ña tharroꞌmar allempo yapaꞌ yenterchaꞌ ñeñth ateth atarr kowentena ña. 3Allowen ñeñth ateth ameꞌñetsa, ñetña eꞌñe poeyemteñothet kowameꞌteñet, atthoña ñetpaꞌ eꞌñech kowen aꞌkowentatarethterret ñamet eꞌñech atthet ñerraꞌm Jesucristo ñeñth eꞌñe kowenareꞌ es orrtatyets.
4Allowen erraꞌtsen ochñaꞌtetspaꞌ ñeñthñapaꞌ xha athpareꞌtenan Yompor poꞌñoñ ñeñth ateth anareth. Tharroꞌmar ñerraꞌm esempo yathpareꞌten ñoñets ñeñth ateth anareth, ñeñthña yapaꞌ xhach yeyoren yoꞌchñar. 5Sapaꞌ eꞌñe señoteñ Cristo ñapaꞌ tharroꞌmar wapa arr patsro ñach awanerreꞌ ya yoꞌchñar amaꞌt ñapaꞌ ama eñalle poꞌchñar amaꞌt koñeꞌtha. 6Ñeñthoꞌmarña allowen eseshaꞌch parrokmaterreꞌ Cristo, ñetñapaꞌ ama xhoyeꞌ ochñaꞌtareꞌteneto. Tharroꞌmar ñeñth atarr ochñaꞌtareꞌtetspaꞌ ñeñthñapaꞌ ama poentaranoña Cristo, ama xheññañoña poeyoxhro ñeñth ateth pena Cristo. 7Nechemerneshachaꞌ sapaꞌ señochepaꞌch ñeñthchaꞌ ateth noterrserr theꞌ, allochñapaꞌ atthoch amach eseshaꞌ seshkërraye. Poꞌñoxh ñeñth orrtatyeneꞌ ñeñth eꞌñe pokteꞌ enten Yompor, ñeñthña poꞌñoxhpaꞌ eꞌñe kowen acheñer, eꞌñech ateth pena ñerraꞌm Cristo ñeñth eꞌñe pokteꞌ es phaꞌyets. 8Tharraña ñeñth xhokma orrtatyeneꞌ ñeñth ama pokteyeꞌ enteno Yompor, ñeñthña acheñerpaꞌ poꞌñoxh oneñethenaꞌtar, tharroꞌmar oneñethpaꞌ eꞌñe awathotheñ ñapaꞌ aña orrtatyes ñeñth amaꞌt mameshapaꞌ ama pokteyeꞌ enteno Yompor. Ñeñthoꞌmarña Yompor Poechemerpaꞌ wapa, allochñapaꞌ ñach eꞌnwerreꞌ ateth phatseꞌtyena oneñeth.
9Alloweney ñeñthey poꞌñoxh eñalleterrtsa Yomporothpaꞌ amach alloꞌna yoꞌchñaꞌtareꞌtneno tharroꞌmar yapaꞌ oꞌ yeyxherrñañ ñeñth ateth pena Yompor Parets. Yapaꞌ poꞌñoxhpaꞌ oꞌ yeꞌñalleterra Yomporoth ñeñthoꞌmarña amach errothenoth alla yoꞌchñaꞌtareꞌterreꞌthe. 10Arrpaꞌ atthoña yeñoteñña ñeñth Yomporenaꞌtar ñamha ñeñth oneñethenaꞌtar. Allowen ñeñth ama pokteyeꞌ es orrtatyetso ñeñth ama morrentenaye pamoꞌtseshaꞌ, ñetñapaꞌ amakaꞌye Yomporenaꞌtareyayeto.
Amorrentannaꞌtpawepaꞌch yentannena eꞌñe alloweney
11Añ ñoñetspaꞌ eꞌñe awathotheñ eñotataseteꞌth amorrentannaꞌtpawepaꞌch eꞌñe alloweney. 12Amach ateth yephatsto ateth pha awath Caín, ñapaꞌ oneñethenaꞌtara. Ñañapaꞌ paꞌmoꞌnasheña moetsa. Tharroꞌmarkaꞌyeña moetse ñapaꞌ amakaꞌye kowenayeꞌ kothapeꞌcheꞌthe; paꞌmoꞌnasheñña Abel ñeñth moetsa, ñañapaꞌ eꞌñe kowen kothapeꞌcheꞌth Yomporekop.
13Ñeñthoꞌmarña masheñneshachaꞌ ñamha noxhaneshachaꞌ eꞌñepaꞌch señota sapaꞌ ñeñthoꞌmarchaꞌña eꞌmoñeꞌtasña acheñeneshaꞌ añ patsro ñeñth ama ameꞌñetso. 14Tharraña ya eꞌñe yemorrenteñoth yamoꞌtspaꞌ eꞌñe yeñoteñ yapaꞌ oꞌ yemhtanerrña allchaꞌ eꞌñe poktakma yerromoerreñ. Yapaꞌ oꞌ yexherr allña yapaꞌ korretsayach. Ñeñthña ama moerenayo pamoꞌts ñetñapaꞌ alloꞌtsenareta allchaꞌ eꞌñe rromoerret eꞌñe poktakma. 15Allowen ñeñth xha eꞌmoñeꞌtyenan pamoꞌtspaꞌ ñeñth poꞌñoxhpaꞌ amtsaña enteñña Yompor. Amaꞌt eꞌñe sapaꞌxhoꞌña señoteñ ñeñth amtsañpaꞌ poeyoxhropaꞌ ama eñalleña atthoch ñapaꞌxhoꞌña korretsach thayotheñ eꞌñe errponañowen. 16Arrpaꞌ atthoña eꞌñe yeñoteñña ñeñth ateth penaña eꞌñe poꞌñoxh morrenteñets, atthoña Jesucristopaꞌ aꞌrroya ñañeña atthoch rroma yokop. Yapaꞌxhoꞌña eꞌñepaꞌchña pokteꞌ yeñch oꞌch yaꞌrroya yañeña atthoch yerroma yamoꞌtseshakop. 17Tharraña yaña ñerraꞌm yechyen atthoch eꞌñe kowen yokrrena arr patsro, allempo yenteñ yamoꞌts xha atarr es palltaꞌyenet yañapaꞌ ama yemorrenteño, Yomporpaꞌxhoꞌña amaꞌt eꞌñe mameshapaꞌ amakaꞌye yemorrenteñoña yeyoxhro. 18Amach nechemerneshachaꞌ eꞌñe yeñoñochaya yotannaꞌtatsto atarr yemorrentannena. Xhochña yorrtatyesña yemorrenteña eꞌñe poꞌñoxh ateth es yephaꞌyen poꞌpsheññekop eꞌñe kowen.
Atthoch eꞌñe kowen yeyemtera Yompor
19Alloña yapaꞌ eꞌñech yeñotena yapaꞌ eꞌñe poꞌñoxhey ñeñthey ateth petsa eꞌñe kowen. Ñeñthoꞌmarña yapaꞌ eꞌñech yeñmataten yeyoxher Yomporeshoneth. 20Tharroꞌmar ñerraꞌm ama eꞌñe yeñmañeshokmayeꞌ es yephaꞌyeno Yomporekop, Yomporñapaꞌ elloña eꞌñe poꞌñoxh ateth eñoteney tharroꞌmar ñapaꞌ ña atarr eñotañeshaꞌ. 21Tharraña nechemerneshachaꞌ ñerraꞌm eꞌñe yeñmañeshokmañen es yephaꞌyen Yomporekop ñeñthepñapaꞌ Yomporchaꞌña eꞌñe kowen yeyemtena. 22Attho yameꞌñerrñaña poꞌñoñ ñeñth ateth oteney, ñapaꞌ atarr koshenya; ñeñthoꞌmarña ñerraꞌm es yenamoeñ, ñapaꞌ xhokmach eꞌñe poꞌñoxh apoeney. 23Yompor poꞌñoñoth ateth oteney oꞌch eꞌñe kowen yameꞌñerrñaña Poechemer ñeñth Jesucristo. Ñamha oteney amoerannaꞌterrapoꞌch alloweney, ateth oteneyña ña. 24Erraꞌtsenchaꞌ eꞌñe kowen ameꞌñenaya Yompor poꞌñoñ ñeñth ateth oteney, ñetñapaꞌ eꞌñe parrokmatenet epoet Yompor. Ñeñthoꞌmarña yeñoteñ yeparrokmaten, Parets Poekamkëñoth ñeñth chorratenya ñeñthña yeñotateneꞌña eꞌñe yeparrokmateña Yompor.
Currently Selected:
1 San Juan 3: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.