OPETAIA 1
1
Sa tukuna ni ra na vakacacani na kai Itomi e na vuku ni nodra yaloviavialevu, kei na nodra cati ira na wekadra na Jekope, 1-16. Ena vakabulai ko ira na Jekope, ka gumatua vei ira na nodra meca, 17-21.
A raivotu i Opetaia.
1Sa kaya vakaoqo na Turaga ko Jiova e na vuku i Itomi; E dua nai rogorogo eda sa rogoca maivei Jiova, ia sa dua na mata sa talai ki na veimatanitu; Dou tu cake, me da mai tu cake me veivaluti kaya.
2Raica, au sa vakalailaitaki iko e na kedra maliwa na veimatanitu: ko sa beci vakalevu. 3Sa vakacalai iko na viavialevu ni lomamu, ko iko ka tiko e na qara ni uluvatu, ka sa cecere na nomu i tikotiko; ka sa kaya e lomamu, O cei me na kauti au sobu ki na qele? 4Kevaka ko tiko vakacecere me vaka na ikeli, ka viritu na nomu sova e na maliwa ni kalokalo, ia ka'u na kauti iko sobu maikeri, sa kaya ko Jiova. 5Ke ra lako mai vei iko na daubutako se na daukove e na bogi, (ulei na nomu muduki laivi!) era na sega li ni butakoca ga na ka e rauti ira? ke ra lako mai vei iko na dauvetia na vua-ni-vaini, era na sega li ni vakavoca eso na vua-ni-vaini?
6Na kena qarai na ka nei Iso! sa qarai e na nona yasana vuni! 7Era sa kauti iko ko ira kece na nomu i to ki nai yalayala ni vanua: era vakaisini iko, ka rawai iko, ko ira na wekamu; ko ira era kana vata kei iko era cakava nai cori e rukumu; sa sega vua na vuku.
8Me'u na sega li ni vakarusai ira tani na tamata vuku mai Itomi, kei ira na yalomatua mai na ulu-ni-vanua nei Iso, e na siga ko ya, sa kaya ko Jiova? 9Ka ra na taqaya na nomu qaqa, ko iko Temani, me ra dui vakamatei mai na ulu-ni-vanua nei Iso ka oti kece kina. 10E na vuku ni nomu i valavala kaukauwa vua na tacimu ko Jekope, ko na luvuci sara e na madua, ia ko na muduki laivi ka tawa mudu. 11E na siga ko sa tu tani kina, na siga sa vakabobulataka kina na nonai valu ko ira na kai tani, ka ra curu ko ira na meca ki na nona matamata-ni-koro, ka vakawiri madigi kei Jerusalemi, ko iko talega ko sa vaka e dua vei ira.
12Ia mo kakua ni vakaraica na kena siga na tacimu e na siga sa yacovi koya kina na ka tani; mo kakua talega ni marau ni yaco na ca kivei Juta e na siga ko ya; mo kakua talega ni vosa vakaviavialevu e na siga era rarawa kina: 13Mo kakua talega ni curu ki na nodra matamata-ni-koro na noqu tamata e na siga era ca kina; io mo kakua ni vakaraica na nodra rarawa e na siga era ca kina; mo kakua talega ni kovea na nodra i yau e na siga era ca kina; 14mo kakua talega ni tu e na basoga ni sala mo muduki ira na kai nona era dro bula; mo kakua talega ni soli ira na kai nona sa vo e na siga era rarawa kina.
15Ni sa voleka mai na siga i Jiova vei ira kece na veimatanitu: ka me vaka na ka ko sa cakava, ena caka vakakina vei iko: na kemui sau ena lauta na ulumu. 16Me vaka dou a gunu e na noqu ulu-ni-vanua tabu, era na gunu kece tiko vakakina na lewe ni veimatanitu, io, era na gunu, ka tiloma sara, ka ra na yaco me vaka era a sega ga.
17Ia e na ulu-ni-vanua ko Saioni ena tiko na kena vo era dro bula, ena yalosavasava talega; ia na mataqali i Jekope ena taukena na nodra vanua. 18Ia na mataqali i Jekope ena yaco me bukawaqa, kei na mataqali i Josefa me yameyame ni bukawaqa, kei na mataqali i Iso me vu-ni-sila, ka ra na vakawaqa, ka vakayavuna; ena sega talega e vo vei ira na mataqali i Iso; ni ka tukuna na ka oqo ko Jiova. 19Ka ra na taukena na ulu-ni-vanua i Iso ko ira mai na mata ni ceva; kei ira mai na buca era na taukena na kai Filisitia; era na taukena talega na veiwere nei Ifireimi, kei na veiwere mai Samaria: ia ko Penijamini ena taukeni Kiliati. 20Ia ko ira sa bobula vei ira na mataivalu oqo, na Isireli, era tiko vata kei ira na kai Kenani, ka yacovi Sarifaci; kei ira era sa bobula vei ira na kai Jerusalemi era tiko mai Sifarati, era na taukena na veikoro e na mata ni ceva. 21Ka ra na lako cake mai eso nai vakabula ki na ulu-ni-vanua ko Saioni me lewa na ulu-ni-vanua i Iso; ia na matanitu ena qai nei Jiova.
Currently Selected:
OPETAIA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific