MAIKA 1
1
Sa tukuna ko Maika na cudru ni Kalou vei ira na kai Samaria kei na kai Jerusalemi, e na vuku ni nodra qarava na kalou lasu, 1-7. Era na cudruvi kece sara kina na lewe ni vanua, 8-16.
1A vosa i Jiova sa yaco vei Maika na kai Moreseci e na gauna i Jocame, kei Easi, kei Esekaia, eratou tui Juta, ka sa raica ko koya ka baleti Samaria kei Jerusalemi.
2Oi kemudou na veimataqali kecega dou rogoca; ka mo vakarorogo, na vuravura, kei na ka kecega sa tu kina: ia me vakadinadina ki na nomudou ca na Turaga ko Jiova, io na Turaga, mai na nona vale tabu. 3Ia dou raica, sa lako mai na nona yasana ko Jiova, io, ena lako sobu mai ko koya, ka butuka na veiyasana cecere kei vuravura. 4Ena waicala talega na veiulu-ni-vanua e rukuna, ia na veibuca ena wase rua, me vaka na drega ni vola e na mata ni bukawaqa, ka vaka na savu ni wai mai na ulu ni vanua.
5Sa yaco na ka kecega oqo ni sa talaidredre ko Jekope, io, e na vuku ni nodra i valavala ca na mataqali i Isireli. A cava na nodra talaidredre na Jekope? ko Samaria, se segai? a cava talega na nodra veiyasana cecere na Juta? ko Jerusalemi, se segai? 6O koya oqo ka'u na kitaki Samaria kina me sa vaka e dua nai binibini e loma ni were, kei nai teitei e na were-ni-vaini: ia ka'u na sovabiuta na kena veivatu ki na buca, ka vakavotuya na kena yavu. 7Ia na kena matakau kecega ena vorolaki, kei na nonai solisoli kecega ena vakamai e na bukawaqa, kei na kena matakau kecega ka'u na vakacacana: ni sa kumuna mai nai solisoli ni nona dautagane, ka mei solisoli talega ni dautagane ena suka tale kina.
8O koya oqo ka'u na tagi kina, ka qoqolou, au na lako voli ni ka'u sa vakacacani ka luvawale: au na tagi me vaka na koli kila, ka tagi yaso me vaka na ositereji. 9Ni sa sega ni vakabulai rawa na nona mavoa; ni sa tauvi Juta talega; sa yaco sara ko koya na meca ki na nodra matamata-ni-koro na noqu tamata, io, ki Jerusalemi. 10Dou kakua ni tukuna mai Kaca; dou kakua sara ni tagi: mo qiqi voli e na kuvu-ni-soso mai Peci-afira. 11Mo lako voli yani, na kai Sefiri, ka luvawale tu ka madua; sa sega ni lako yani ko ira na kai Seenani; na kena tagi ka ia mai Peci-eseli, sa takali tani kina vei kemudou na tiko dei. 12E dina era sa tagica na vinaka na kai Maroci; ia na ca sa lako sobu maivei Jiova ki na matamata-ni-koro ko Jerusalemi. 13Mo vauca na qiqi-ni-tamata ki na manumanu totolo, ko iko na kai Lakisi: sa vakavuna ko koya nai valavala ca ni goneyalewa ni Saioni, ni sa kune vei iko na nodra talaidredre na Isireli. 14O koya oqo ko na solia kina nai vola ni tawase ki Moreseci-kaca: na veimataqali mai Ekisipi era na lasutaki ira na tui Isireli. 15Ia ko koya talega sa na kemui taukei ka'u na kauta mai vei iko, na kai Maresa: na nodra lagilagi na Isireli ena yaco ki Etulama. 16Mo koti mada, ka me tasi na ulumu e na vukudra na nomu gone ni toko; mo vakalevutaka na nomu ulu cou me vaka na ikeli; ni ra sa kau vakabobula tani vei iko.
Currently Selected:
MAIKA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific