JEMESA 1
1
A WASE I. Sa vakarota ko Jemesa me ra reki na tamata lotu ni ra sa vakararawataki, 1-12. Oi keda ga eda sa vakatekivuna na ca, ia sa vu ni ka vinaka na Kalou, 13-18. Me da daurogoca, ka vakananuma ka muria na vosa ni Kalou; kevaka eda sega ni vakakina sa lasu na noda lotu, 19-27.
1Koi au ko Jemesa, nai talatala ni Kalou kei na Turaga ko Jisu Karisito sa loloma yani vei ira na yavusa e tinikarua era sa Duiveiseyaki.
2Oi kemudou na wekaqu, dou nanuma me ka ni reki sara, ni dou sa lutu ki na ka e vuqa sa dauveivakatovolei; 3ni dou sa kila sa vakatubura na dauvosota na vakatovolei ni nomudou vakabauta. 4Ia me tini vinaka na cakacaka ni dauvosota, mo dou vinaka taucoko sara kina, me kakua na ka e yali.
5Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua. 6Ia me kerekere e na vakabauta, me kakua ni vakatitiqa: ko koya sa vakatitiqa, sa vaka na ua ni waitui, sa cagina e na cagi ka veitubuyaki. 7Ia me kakua ni nanuma na tamata ko ya ni na rawata e dua na ka mai vua na Turaga: 8a tamata lomalomarua, sa yamekemeke e na nonai valavala kecega.
9Ia me reki na tamata dravudravua e na nona laveti cake: 10kei koya e vutuniyau, e na nona malumalumu mai: ni na takali ga ko koya me vaka na se ni co. 11Ni sa cabe cake na siga kei na cagi katakata, ka sa vakaraqosataka sara na co, a sa mira na sena, a sa seavu na kena rairai vinaka: ena malai yani vakakina na tamata vutuniyau e na nonai valavala. 12Sa kalougata na tamata sa vosota ni sa vakatovolei, io, ni sa vakatovolei oti, ena rawata nai sala ni bula o koya sa yalataka na Turaga kivei ira sa lomani koya.
13Ni sa dauveretaki e dua, me kakua ni kaya, Sa dauveretaki au na Kalou: ni sa sega ni dauveretaki rawa na Kalou ki na ka ca, a sa sega ni dauveretaka e dua na tamata ko koya: 14ia sa dauveretaki na tamata yadua, ni sa vecei koya na nona garogaro ca ka bacani koya. 15Ni sa qai kunekune na garogaro ca, sa vakasucuma kina nai valavala ca: a sa oti nai valavala ca, sa qai vakasucuma na mate.
16Dou kakua ni cala, oi kemudou na wekaqu lomani. 17Sa lako maicake nai solisoli vinaka kecega kei nai solisoli kecega e yaga sara, a sa lako sobu mai vua na Tama ni rarama, a sa sega vua na veivukiyaki, se yaloyalo ni veigoleyaki. 18Sa vakatuburi keda ko koya e na nona lewa ga e na vosa ni dina, me da vaka nai sevu ni veika sa bulia ko koya.
19O koya oqo, oi kemudou na wekaqu lomani, mo dou kusarawa yadua me vakarorogo, mo dou berabera ga ni vosa, mo dou berabera ni cudru: 20ni sa sega ni vakatubura na ka e dodonu vua na Kalou na cudru ni tamata. 21O koya oqo mo dou qai biuta tani na dukadukali kei na ka ca e uasivi tu, ka vakabauta e na yalomalua na vosa sa tei e na lomamudou, ko ya sa vakabula rawa na yalomudou.
22Ia dou muria na vosa ka kakua ni rogoca walega, ka vakaisini kemudou kina vakai kemudou. 23Ia kevaka e dua sa rogoca walega na vosa, ka sega ni muria, sa tautauvata kei na tamata sa laki ilova na mata ni yagona e nai iloilo: 24ni sa laki ilovi koya, a sa qai lako tani yani, a sa guilecava vakasauri se sa vakaevei nai valavala ni yagona. 25Ia ko koya sa vakaraica matua na vunau vinaka sara, na vunau ni veisereki, ka tu dei kina, sa sega ni daurogoca ka guilecava, ia sa kitaka talega na cakacaka, ena kalougata kina ko koya oqo e na nona cakacaka.
26Kevaka e dua vei kemudou sa nanuma sa lotu, ia ka sega ni tarova na yamena, a sa dauvakaisina talega na yalona, sa ka walega na nona lotu na tamata oqo. 27Na lotu savasava ka sega ni cala e mata ni Kalou ko Tamada sa vakaoqo, Me sa dauraici ira na luveniyali kei ira na yada, ni ra sa rarawa, me sa qarauni koya talega me kakua ni tauvi koya na duka ni ka vakavuravura.
Currently Selected:
JEMESA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific