AKEAI 1
1
O Akeai, sa vunauci ira na lewe ni vanua ni ra sa gucataka na tara vale tabu, 1-6. Sa segata me vagumatuataki ira, 7-11. Sa vakaukauwataki ira e na vosa ni yalayala ni Kalou, 12-15.
1E nai karua ni yabaki i Taraiase na tui, e nai kaono ni vula, e nai matai ni siga ni vula, sa yaco na vosa i Jiova vei Akeai na parofita me tukuna vei Serupapeli na luve i Sialitieli, na kovana e Juta, vei Josua talega na luve i Jiosataki, na bete levu, ka vaka, 2Sa kaya vakaoqo ko Jiova ni lewe vuqa, Ko ira na tamata oqo era kaya, Sa sega ni yaco na gauna, na kena gauna me tara kina na vale i Jiova. 3Ia, sa qai yaco na vosa i Jiova vei Akeai na parofita me kaya, 4Sa kena gauna li vei kemudou, mo dou tiko e na nomudou veivale e botani, ia na vale oqo sa rusa koto ga?
5Ia oqo, sa kaya kina ko Jiova ni lewe vuqa; Dou vakananuma mada ki na nomudou i valavala. 6Sa ka levu dou sa kaburaka, ia sa ka lailai dou sa yauta mai; dou sa kana, ka sega ni mamau kina; dou sa gunu, ka sega ni vakacegu kina; dou sa vakaisulu, ka sa sega e dua e katakata kina; ia ko koya sa saumi e na nona cakacaka sa tugana ki na taga sa cicila.
7Sa kaya vakaoqo ko Jiova ni lewe vuqa; Dou vakananuma mada ki na nomudou i valavala. 8Dou la'ki cabe cake ki na ulu-ni-vanua, ka kauta mai na kau, ka tara na vale; ia ka'u na rekitaka, ni'u na vakarokorokotaki kina, sa kaya ko Jiova. 9Dou a nuitaka na ka levu, ka raica, sa ka lailai ga; ia ni dou sa kauta mai ki vale, ka'u sa uvuca. E na vuku ni cava? sa kaya ko Jiova ni lewe vuqa. E na vuku ni noqu vale sa rusa koto, ia koi kemudou, dou sa dui cici yadua ki nona vale. 10O koya oqo sa bureitaka kina na tegu ko lomalagi e cake, ko vuravura talega sa bureitaka na vuana. 11Ia ka'u a kaya me dausiga na vanua, kei na veiulu-ni-vanua, kei na sila, kei na waini vou, kei na waiwai, kei na ka sa vuataka na qele, kei na tamata, kei na manumanu, kei na cakacaka kecega ni liga ni tamata.
12Ia ko Serupapeli na luve i Sialitieli, kei Josua na luve i Jiosataki, na bete levu, kei na kena vo kece ni tamata, era sa qai muria na vosa i Jiova na nodra Kalou, kei na vosa i Akeai na parofita, me vaka na ka sa talai koya kina ko Jiova na nodra Kalou; ka ra sa rere na tamata e na mata i Jiova.
13Sa qai vosa ko Akeai nai talatala i Jiova e na vuku ni ka sa talai koya kina ko Jiova vei ira na tamata, ka kaya, Au sa tiko vata kei kemudou, sa kaya ko Jiova. 14A sa vakauqeta ko Jiova na yalo i Serupapeli na luve i Sialitieli, na kovana e Juta, kei na yalo i Josua na luve i Jiosataki, na bete levu, kei na yalodra na tamata kecega sa vo; ka ra sa mai cakava na cakacaka e na vale i Jiova ni lewe vuqa, na nodra Kalou, 15e nai karuasagavulu ka va ni siga, e nai kaono ni vula, e nai karua ni yabaki i Taraiase na tui.
Currently Selected:
AKEAI 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific