KALATIA 1
1
Sa tukuna ko Paula sa kurabui ni ra sa biuta nai tukutuku-vinaka sa tukuni oti vei ira, 110. Sa qai tukuna na nonai valavala ni sa bera ni vakabauti Jisu, kei na ka sa qai kitaka ni sa vakabauta, 1124.
1O Paula nai apositolo, (e segai maivei ira na tamata, se e nai lesilesi vakatamata, e nai lesilesi ga i Jisu Karisito, kei na Kalou ko Tamana, o koya ka vakaturi koya cake mai na mate;) 2kei ira kecega na mataveiwekani sa tiko vei au, kivei ira na veisoqosoqo lewe ni lotu mai Kalatia: 3Me nomudou na loloma kei na vakacegu mai vua na Kalou ko Tamada, kei na noda Turaga ko Jisu Karisito, 4o koya ka soli koya e na vuku ni nodai valavala ca, me vakabulai keda kina mai na vuravura ca oqo, me vaka na loma ni Kalou ko Tamada: 5me nona na vakarokoroko ka sega ni mudu. Emeni.
6Au sa kurabui ni dou sa vuki tani vakatotolo vakaoqo ki na dua tani nai tukutuku-vinaka, mo dou biuti koya ka kacivi kemudou e na loloma i Karisito: 7ia ka sa sega dina ni dua tani; ia ka so era sa vakararawataki kemudou, ka via vakatanitaka nai tukutuku-vinaka kei Karisito. 8Ia kevaka koi keitou, se dua na agilose mai lomalagi, sa vunautaka vei kemudou e dua tani nai tukutuku-vinaka sa sega ni vaka oqori keitou a vunautaka vei kemudou, me rusa ko koya. 9Me vaka na ka keitou a kaya eliu, au sa qai kaya tale vakakina, Kevaka e dua na tamata sa vunautaka vei kemudou e dua tani nai tukutuku-vinaka sa sega ni vaka na ka dou sa vakabauta, me rusa ko koya. 10Ia, kau sa qai vakalomavinakataki cei, na tamata, se na Kalou? seu segata beka me ra vinakati au ko ira na tamata? kevaka sa ka ga me ra vinakati au ko ira na tamata, au na qai sega ni talatala nei Karisito.
11Ia kau sa vakatakila vei kemudou, na veiwekani, ni sa sega ni ka vakatamata nai tukutuku-vinaka kau a vunautaka: 12niu a sega ni rawata mai vua e dua na tamata, seu vakatavulici kina, ia sa yaco vei au ni sa vakaraitaka ko Jisu Karisito. 13Ni dou a rogoca na noqu i valavala eliu e na nodra lotu na Jiu ka niu a vakacacana vakalevu sara nai soqosoqo lewe ni lotu ni Kalou, ka vaqeavutaka: 14ia kau sa uasivi cake e na lotu vaka-Jiu vei ira na kai noqu era lewe vuqa era taba vata kei au, niu sa gumatua vakalevu sara tiko e na nodra i tukuni na noqu qase.
15Ia ni sa vinaka vua na Kalou, o koya sa lesi au, mai na kete i tinaqu, ka qai kacivi au e na nona loloma walega, 16me vakatakila na Luvena ki na lomaqu, meu vunautaki koya vei ira na veimatanitu tani; au sa qai sega ni bose kei ira na tamata, 17seu lako cake ki Jerusalemi vei ira era sai apositolo taumada vei au; ia kau sa lako sara ki Arepea, ka lesu tale ki Tamasiko. 18Ia ni sa oti e tolu na yabaki, au sa qai lako cake ki Jerusalemi me keirau veikilai kei Kifa, ka keirau a tiko vata ka bogi tinikalima: 19ia kau sa sega ni raica e dua tani tale vei ira nai apositolo, ko Jemesa ga na tacina na Turaga. 20Ia na ka kau sa qai vola vei kemudou, raica, e na mata ni Kalou, au sa sega ni lasu. 21Au sa qai lako ki na veiyasana mai Siria kei Silisia; 22a ra sa sega tiko ni kila na mataqu ko ira na veisoqosoqo lewe ni lotu mai Jutia era sa tu vata kei Karisito: 23era sa rogoca ga, O koya ka vakacacani keda eliu, sa qai vunautaka na vakabauta ka vaqeavutaka eliu. 24A ra sa vakarokorokotaka na Kalou e na vukuqu.
Currently Selected:
KALATIA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific