2 SAMUELA 1
1
Sa mai tukuna na mate i Saula vei Tevita e dua na Amalekaiti, ka kauta vei Tevita na nonai sala vakaturaga, 1-10. Sa tagi ko Tevita, ka sa mokuta na Amalekaiti, ni sa kaya sa vakamatei Saula, 11-16. Sa lelevaki Saula kei Jonacani ko Tevita, 17-27.
1Ia ni sa mate ko Saula, ka sa lesu mai ko Tevita ni sa mokuti ira oti na Amalekaiti, ka sa tiko bogi rua mai Sikilaki ko Tevita; 2e nai katolu ni siga, raica, sa lako mai e dua na tamata mai nai tikotiko ni valu nei Saula, a sa kadresu na nonai sulu, a sa kaburaki ki na uluna na qele: ia ni sa lako mai vei Tevita, sa cuva ki na qele ko koya, ka vakarokoroko. 3A sa kaya vua ko Tevita, O sa lako maivei? A sa kaya vua ko koya, Au sa dro bula mai na nodra i tikotiko na Isireli. 4A sa kaya vua ko Tevita, A cava na ka sa caka? Mo tukuna mada mai vei au. A sa kaya ko koya, Era sa dro mai nai valu ko ira na tamata, a sa lewe vuqa vei ira na tamata sa bale mate; a sa mate talega ko Saula kei Jonacani na luvena.
5A sa kaya ko Tevita vua na cauravou ka mai tukuna vua, O sa kila vakaevei ni sa mate ko Saula kei Jonacani na luvena? 6A sa kaya ko koya na cauravou sa tukutuku tiko vua, Ni'u a lako loa mai na ulu-ni-vanua ko Kilipoa, raica, sa tokoni koya e na nona moto ko Saula, ka raica, sa cici muri koya voleka na qiqi-ni-valu kei ira na tamata sa vodo ose: 7ia ni sa rai ki muri ko koya, sa kunei au, a sa kacivi au, ka'u a kaya, Oi au saka. 8A sa kaya vei au, O cei ko iko? ka'u a kaya vua, Koi au saka e dua vei ira na Amalekaiti. 9A sa kaya vei au, Mo mai tu mada e tikiqu, ka vakamatei au: ni sa kani au na rarawa levu, ni sa vo tiko vei au na noqu bula. 10Ia ka'u a tu e tikina, ka vakamatei koya, ni'u a kila ena sega ni bula rawa ni sa bale tu: ia ka'u a taura nai sala vakaturaga sa vakaisala kina, kei na qato sa vaqato kina na ligana, ia ka'u a kauta mai ki ke vei kemuni na noqu turaga.
11A sa taura na nonai sulu ko Tevita, ka dresulaka, ka ra kitaka vaka talega kina na tamata kece era tiko vata kaya: 12a ra sa tagi ka yaso, ka lolo ka yakavi mada, e na vuku i Saula, e na vuku talega i Jonacani na luvena, e na vukudra talega na tamata i Jiova, e na vukudra talega na mataqali i Isireli; ni ra a bale e nai seleiwau.
13A sa kaya ko Tevita vua na cauravou ka mai tukutuku vua, A kai vei ko iko? A sa kaya ko koya, Koi au saka na luve ni dua na kai tani, na Amalekaiti. 14A sa kaya vua ko Tevita, E vakaevei ni ko a sega ni rere ni dodoka yani na ligamu mo vakamatei koya ka lumuta ko Jiova? 15A sa kaciva e dua vei ira na cauravou ko Tevita, ka kaya, Mo toro mada vua mo yaviti koya. A sa mokuta mate ko koya. 16A sa kaya vua ko Tevita, Sa baleti iko ga na nomu mate; ni sa beitaki iko na gusumu, ni ko sa kaya, Au sa vakamatei koya ka lumuta ko Jiova.
17A sa lelevaki Saula, kei Jonacani na luvena, ko Tevita e na lele oqo: 18a sa vakarota me vakatavulici vei ira na Juta Na sere ni dakai: raica, sa volai e nai vola i Jeseri: 19Sa vuetaki na nodra i ukuuku na Isireli e na nomu veitikina cecere! Ulei! sa bale ko ira na kaukauwa! 20Dou kakua ni tukuna mai Kaca, Dou kakua ni vakarogoya e na veisalatu mai Asikiloni: De ra reki na nodra goneyalewa na kai Filisitia, De ra wate na nodra goneyalewa na tamata sa sega ni cili. 21Oi kemudou na ulu-ni-vanua ko Kilipoa, Me kakua na tegu me kakua na uca e tauci kemudou, me kakua na veiwere ni veimadrali; Ni sa biu tani maikina vakavelavela na nodra i sasabai na qaqa; Nai sasabai i Saula, me vaka sa sega ni lumuti tu e na waiwai. 22Mai na nodra dra era sa moku, mai na nodra uro na qaqa, Sa sega ni gole tani na dakai i Jonacani, Ka sega ni lesu wale nai seleiwau i Saula 23Ko Saula kei Jonacani, erau sa veilomani ka dauveivinakati ni rau sa bula, Ka rau sa sega ni tawase ni rau sa mate: Erau a vakatotolo, ka berabera na ikeli, Erau a kaukauwa, ka malumalumu na laioni. 24Oi kemudou na goneyalewa ni Isireli, dou tagicaki Saula, O koya ka vakaisulutaki kemudou e nai sulu kulakula ka uasivi, O koya ka vakaiukuukutaka na nomudou i sulu e na koula. 25Ulei! era sa bale na kaukauwa e na kedra maliwa nai valu! Sa vakabalei ko Jonacani e na nomu veitikina cecere! 26Au sa rarawa vakalevu e na vukumu, na wekaqu Jonacani: O sa vinaka sara vei au: Sa ka veivakurabuitaki na nomu loloma vei au, Sa ka lailai na nodra loloma na yalewa. 27Ulei, era sa bale na kaukauwa, Ka rusa nai yaragi ni valu.
Currently Selected:
2 SAMUELA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific