1 PITA 1
1
Sa vakavinavinaka ko Pita e na vukudra na tamata lotu dina, 19. Sa tukuna ni ra a parofisaitaka na lotu i Jisu ko ira na parofita eliu, 1012. Sa vakarota vei ira me ra gumatua e nai valavala vinaka, ni ra sa qai sucu tale, 1325.
1Oi au ko Pita, nai apositolo i Jisu Karisito, kivei ira era tiko vakavulagi ni ra sa dui se ki Ponito, ki Kalatia, ki Kapatosia, ki Esia, kei Picinia, 2era sa digitaki tu me vaka na nona lewa eliu na Kalou ko Tamada, me ra vakasavasavataki e na Yalo Tabu, me ra talairawarawa kina me kureitaki talega kivei ira na dra i Jisu Karisito: Me vakalevutaki vei kemudou na loloma, kei na vakacegu.
3Me ia na vakavinavinaka vua na Kalou, na Tama ni noda Turaga ko Jisu Karisito, o koya sa vakatuburi keda tale me noda nai nuinui bulabula me vaka na nona loloma levu ni sa tu cake tale mai na mate ko Jisu Karisito, 4me da taukena kina nai votavota sa sega ni ca rawa, a sa sega ni dukadukali, a sa sega ni malai mai, sa maroroi mai lomalagi me nomudou, 5oi kemudou sa maroroi e na kaukauwa ni Kalou e na vuku ni vakabauta ki na bula sa vakarau tu me vakarairaitaki e na gauna maimuri. 6Ia sa ka oqo dou sa reki vakalevu kina, ia e na gauna lekaleka oqo, ke sa yaga, dou sa vakararawataki e na dauvere e vuqa: 7me sa kune kina na nomudou vakabauta ni sa vakatovolei, me talei vakalevu sara ka talei vakalailai na koula sa caca rawa ni sa vakatovolei e na bukawaqa, me ka ni vakavinavinaka, ka me dokai ka me vakacaucautaki, ni na rairai mai ko Jisu Karisito: 8o koya dou a sega ni raica, ia dou sa lomana ga; o koya dou sa sega ni kunea edaidai, ia dou sa vakabauta ga, ka reki e na reki e sega ni cavuti rawa ka vinaka sara: 9ni dou sa rawata na kenai tinitini ni nomudou vakabauta, io, na bula ni yalomudou.
10A bula oqo era sa taroga ko ira na parofita ka vakasaqara matua, o ira era sa parofisaitaka na loloma ena nomudou: 11ni ra sa vakasaqara se gauna cava, se vakaevei na gauna sa vakatakila vei ira na Yalo i Karisito sa tiko e na lomadra, ni sa tukuna mada eliu na rarawa i Karisito kei na ka vinaka sara ena qai muri mai. 12A sa vakatakilai vei ira, ni sa sega walega e na vukudra, ia ena vukuda era sa yaco me rai talatala e na veika sa qai tukuna mai vei kemudou ko ira era sa vunautaka vei kemudou nai tukutuku-vinaka, kei na Yalo Tabu sa talai mai lomalagi; a veika oqo era sa gadreva ko ira na agilose me ra dikeva.
13O koya oqo mo dou qai vauca na tolo ni lomamudou, dou yalomatua, ka vakanuinui tiko me yaco mada nai vakataotioti, mo dou rawata kina na loloma ena kau mai vei kemudou ni na rairai mai ko Jisu Karisito; 14me vaka na gone e dautalairawarawa, dou kakua ni vakatauvatani kemudou kei na gagadre ca eliu ni dou a lialia: 15ia ni sa yalosavasava ko koya sa kacivi kemudou, dou yalosavasava talega koi kemudou e nai valavala kecega; 16ni sa volai, Dou yalosavasava; niu sa yalosavasava koi au.
17Ia kevaka dou sa masu vua, me vaka sa Tamamudou, o koya sa lewai ira yadua me vaka na ka era a cakava, ka sega ni digitaka vakailoa e dua, me sa ia e na rere na nomudou i valavala, e na gauna dou sa vulagi tu kina; 18ni dou sa kila dou a sega ni voli e na veika e caca wale, e na siliva se na koula, mai na nomudou i valavala sesewa dou sa rawata maivei ira na nomudou qase; 19e na dra talei ga i Karisito, me vaka na lami sa sega ni ca e dua na tikina; 20o koya sa lesi eliu sa qai tauyavutaki emuri ko vuravura, a sa qai vakaraitaki e na gauna emuri oqo e na vukumudou, 21ia sai koya dou sa vakabauta kina na Kalou, o koya ka vakaturi koya cake tale mai na mate, ka solia vua nai ukuuku; me sai koya ga na Kalou dou sa vakabauta ka vakanuinui kina.
22Dou vakasavasavataka na yalomudou ni dou sa talairawarawa ki nai vakavuvuli dina e na vuku ni Yalo Tabu, mo dou lomani ira kina na veiwekani e na loloma tawa lasu ia dou veilomani vakai kemudou e na yalosavasava kei na lomakatakata: 23ni dou sa sucu tale, sa segai e na sila e vuca rawa, oqori ga sa tawa vuca rawa, e na vosa ni Kalou, sa bula ka tu dei ka tawa mudu. 24Ni Sa vaka na co na tamata kecega, A sa vaka na se ni co nai ukuuku kecega ni tamata. Sa daumalai na co, a sa mira na sena: 25Ia na vosa ni Kalou sa tu dei ka tawa mudu. Ia oqori na vosa ni tukutuku-vinaka sa vunautaki vei kemudou.
Currently Selected:
1 PITA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific