ዮሃኒሳ 19
19
ዎታዳራቱ ዬሱሳ ቦላ ቂሊጬዲኖ
(ማት 27፡27-32፤ ማር 15፡15-21)
1ሄዋፔ ጉዪያን፥ ጲላፆሲ ዬሱሳ ኦይቂዴ፥ ሊሱዋን ሾጬዳ። 2ዎታዳራቱ ኣጉንፔ ኣኪሊሊያ ጊጊሲዴ፥ ኣ ሁጲያን ዎዲኖ፤ ቃሲ ዞዖ ማዩዋካ ኣ ማዪዜዲኖ። 3ኣኮ ሺቂዴ፥ «ኣዪሁዳ ካቴው፥ ሼምፑዋ ጋሚዓ!» ያጊዴ ኣ ሻዪያ ባቄዲኖ።
4ጲላፆሲ ቃሲካ ካሬ ኬሲዴ ኣዪሁዳቱዋ፥ «ቤዒቴ፥ ታኒ ኣኒ ኣይ ባላኔ ዴማቤናዋ ሂንቴንቱ ኤራና ማላ፥ ኣ ሂንቴንቱኮ ካሬ ኬሳና» ያጌዳ። 5ሄዋፔ ጉዪያን፥ ዬሱሲ ኣጉን ኣኪሊሊያ ባሬ ሁጲያን ዎዴ፥ ዞዖ ማዩዋ ማዪዴ፥ ካሬ ኬሴዳ፤ ጲላፆሲ ኣዪሁዳቱዋ፥ «ቢታኒያ ሃዋ ቤዒቴ» ያጌዳ።
6ቄሳቱዋ ካፓቱኔ ዎታዳራቱ ኣ ቤዔዳ ዎዴ፥ ባሬንቱ ኮሻ ቁ ኡዲዴ፥ «ማስቃሊያ ቦላ ሚሲማሪያን ሻዴ ኣ ሱላ! ሱላ!» ያጌዲኖ።
ጲላፆሲ ኡንቱንታ፥ «ሂንቴንቱ ኣ ኣፊዴ፥ ማስቃሊያ ቦላ ሚሲማሪያን ሺዴ ሱሊቴ፤ ኣዪሲ ጎፔ፥ ታኒ ኣይ ባላኔ ዴማቤይኬ» ያጌዳ።
7ኣዪሁዳቱ ዛሪዴ፥ «ኑሲ ሂጊ ዴዔ፤ ኑ ሂጊ ጊያዋዳን፥ ኢ ሃይቃናው ቤሴ፤ ኣዪሲ ጎፔ፥ ኢ ባሬና ፆሳ ናዓ ኦዳ» ያጌዲኖ።
8ጲላፆሲ ሄዋ ሲሴዳ ዎዴ፥ ካሴዋፔ ሎይ ያዬዳ። 9ቃሲካ ጲላፆሲ ባሬ ኦሱዋ ጎሌ ሲሚ ጌሊዴ ዬሱሳ፥ «ኔኒ ሃቃፔ ያዲ?» ያጊዴ ኦቼዳ፤ ሺን ዬሱሲ ኣው ኣይኔ ዛሪቤና። 10ሄዋ ዲራው፥ ጲላፆሲ ኣ፥ «ታው ኦዲኪ? ኔና ቢላናው ዎይ ማስቃሊያ ቦላ ሚሲማሪያን ሻዴ ካቃናው ታው ማታይ ዴዒያዋ ኤሪኪዬ?» ያጌዳ።
11ዬሱሲ፥ «ፆሳይ ኔው ቦላፔ ማታ ኢሚቤናባ ጊዲንቶ፥ ኔው ታ ቦላ ማታይ ዴዔና ሺን። ሄዋ ዲራው፥ ታና ኔው ኣ ኢሜዳዌ ኣያ ናጋራ ኦዳ» ያጌዳ።
ዬሱሳ ሃይቆ ፒርዴዲኖ
(ማት 27፡15-31፤ ማር 15፡6-20፤ ሉቅ 23፡13-25)
12ጲላፆሲ ሄዋ ሲሴዳ ዎዴ፥ ዬሱሳ ቢላናው ኦጊያ ኮዬዳ፤ ሺን ኣዪሁዳቱ ባሬንቱ ኮሻ ቁ ኡዲዴ፥ «ኔኒ ኣ ቢሊያዋ ጊዶፔ፥ ካቲያ ቄሳሬ ዳቦ ጊዳካ! ባሬና ካቲያ ጊያ ኦኒኔ ቄሳሬ ሞርኬ!» ያጌዲኖ።
13ጲላፆሲ ሄዋ ሲሲዴ፥ ዬሱሳ ካሬ ኬሴዳ። ያቲዴ ሹቻ ባሱዋ ጊያ ሳዓን ፒርዳ ኦይዲያን ኡቴዳ፤ ኢብራዪስፄ ቃላን ሄ ሳዓይ ጋይታ ጊያዋ። 14ሄ ጋላሳይ ፓሲጋ ቦንቺያ ጋላሳው ጊጊሲያ ጋላሳ፤ ሳዓይ ኡሱፑን ሳቲያ ሄራ ጊዳናዋ። ጲላፆሲ ኣዪሁዳቱዋ፥ «ሂንቴንቱ ካቲያ ሃዋ ቤዒቴ!» ያጌዳ።
15ኣዪሁዳቱ ባሬንቱ ኮሻ ቁ ኡዲዴ፥ «ዲጋ! ዲጋ! ማስቃሊያ ቦላ ሚሲማሪያን ሻዴ ሱላ!» ያጌዲኖ።
ጲላፆሲ ዛሪዴ፥ «ሂንቴንቱ ካቲያ ታኒ ማስቃሊያ ቦላ ሚሲማሪያን ሻዴ ሱሊያዋ ኮዪቴ?» ያጊዴ ኦቼዳ።
ቄሳቱዋ ካፓቱ፥ «ቄሳሬፔ ሃራ ካቲ ኑሲ ባዋ!» ያጌዲኖ።
16ሄዋፔ ጉዪያን፥ ኡንቱንቱ ማስቃሊያ ቦላ ሚሲማሪያን ሺዴ፥ ዬሱሳ ካቃና ማላ፥ ጲላፆሲ ኡንቱንቱሲ ኣ ኢሜዳ።
ዬሱሳ ሱሌዲኖ
(ማት 27፡32-44፤ ማር 15፡21-32፤ ሉቅ 23፡26-43)
ኡንቱንቱ ዬሱሳ ኦይቂዴ፥ ኣፌዲኖ። 17ዬሱሲ ባሬ ማስቃሊያ ቶኪዴ፥ ጉጊያሳ ጌቴቲያሳ ቤዳ። «ጉጊያሳ» #19፡17 «ጉጊያሳ» ሄዋን ኣሳ ጉጊያ ማላቲ ሜቴዳ ዎጋ ሹቻይ ዴዒያ ዲራው፥ «ጉጊያሳ ጌቴቴዳ»። ጊያዌ ኢብራዪስፄ ቃላን «ጎልጎ» ጊያዋ። 18ኡንቱንቱ ሄ ሳዓን ማስቃሊያ ቦላ ሚሲማሪያን ሺዴ፥ ዬሱሳ ካቄዲኖ፤ ቃሲ ኣናና ሃራ ላዑ ኣሳቱ፥ ኢቱዋ ያ ባጋና ቃሲ ኢቱዋ ሃ ባጋና ዬሱሳ ጊዱዋን ዎዴ፥ ማስቃሊያ ቦላ ሚሲማሪያን ሺዴ ካቄዲኖ። 19ጲላፆሲ ፂፋቲያ ፃፊዴ፥ ማስቃሊያ ቦላ ዎዳ። ኢ ፃፌዳዌ፥ «ኣዪሁዳቱ ካቲያ፥ ናዚሬቲያ ዬሱሳ» ያጌ። 20ዬሱሲ ማስቃሊያ ቦላ ሚሲማሪያን ሼቲዴ ሱሌቴዳ ሳዓይ ካታማ ማታን ዴዒያ ዲራው፥ ዳሮ ኣዪሁዳቱ ሄ ፂፋቲያ ናባቤዲኖ። ፂፋቲ ኢብራዪስፄ ቃላን፥ ሮማይስፄ ቃላኒኔ ጊሪኬ ቃላን ፃፌቴዳ። 21ሄዋ ዲራው፥ ኣዪሁዳ ቄሳቱዋ ካፓቱ ጲላፆሳ፥ « ‹ሃ ቢታኒ ባሬና ኣዪሁዳ ካቲያ ያጌዳ› ጋዴ ፃፋፔ ኣቲን፥ ‹ኣዪሁዳ ካቲያ› ጋዴ ፃፎፓ» ያጌዲኖ።
22ጲላፆሲ፥ «ታኒ ፃፌዳዋ ፃፋ ዲጋዲ» ያጊዴ ዛሬዳ።
23ዎታዳራቱ ማስቃሊያ ቦላ ሚሲማሪያን ሺዴ፥ ዬሱሳ ካቄዳዋፔ ጉዪያን፥ ኣ ማዩዋ ኣኪዴ፥ ኦይዱ ኬሲ ሻኬዲኖ፤ ኢቲ ኢቲ ዎታዳራ ኢቲ ሻኩ ጋኬዳ። ኣ ኣዱሳ ማዩዋካ ኣኬዲኖ፤ ኣዱሳ ማዩ ሃሺያፔ ዶሚዴ፥ ዱጌ ጋካናው ዬዲ ማዬቲያዋፔ ኣቲን፥ ቃንፄቲዴ ሲኬቲቤና። 24ዎታዳራቱ ኢቱ ኢቱዋ፥ «ኦና ጋካኔንቶ፥ ሳማ ዎይ ኤፃ ዬጋናፔ ኣቲን፥ ማዩዋ ፔኮ» ያጌዲኖ። ሄዌ ሃኔዳዌ ፆሳ ማፃፋይ፥ «ታ ማዩዋ ሻኪ ኣኬዲኖ፤ ታ ኣዱሳ ማዩዋን ሳማ ዬጌዲኖ» ጊያዌ ፖሌታናሳ። ሄዋ ዲራው፥ ዎታዳራቱ ሄዋ ኦዲኖ። #ማዝ 22፡18
25ሺን ዬሱሳ ማስቃሊያ ማታን ኣ ዳያ፥ ኣ ኣቲ ሚቻታ፥ ቃሊዮጳ ማቻታ ማይራማኔ ማግዳላ ጌቴቲያ ካታማፔ ዬዳ ማይራማ ኤቄዲኖ። 26ዬሱሲ ባሬ ዳያኔ ኢ ሲቂያ ካሊያዌ ሄዋን ኤቄዳዋንታ ቤዒዴ፥ ባሬ ዳዮ፥ «ሃ ሚሺራቴ፥ ኔ ናዓ ሃዋ ቤዓ!» ያጌዳ።
27ሄዋፔ ጉዪያን፥ ሄ ካሊያዋ «ኔ ዳዮ ሃኖ ቤዓ!» ያጌዳ። ሄ ካሊያዌ ኢዞ ሄ ሳቲያፔ ዶሚዴ፥ ባሬ ሶይ ኣፌዳ።
ዬሱሳ ሃይቁዋ
(ማት 27፡45-56፤ ማር 15፡33-41፤ ሉቅ 23፡44-49)
28ሄዋፔ ጉዪያን፥ ዬሱሲ ኡባባይ ሃዒ ፖሌቴዳዋ ኤሪዴ፥ ፆሳ ማፃፋይ ጌዳዌ ፖሌታና ማላ፥ «ታና ሳሜ» ያጌዳ። #ማዝ 69፡21፤ 22፡15
29ሄ ሳዓን ኢቲ ፁጋ ኩሜዳ ጫላ ዎዪኒያ ኤሳይ ዴዔ። ኡንቱንቱ ኢስፖንጂያ ሄ ዎዪኒያ ኤሳን ዬጊዴ፥ ሂሶጲያ ጌቴቲያ ሚ ፄራን ዎዴ፥ ዬሱሳ ዶናኮ ሺሼዲኖ። 30ዬሱሲ ዎዪኒያ ኤሳ ጋንፂ ቤዔዳዋፔ ጉዪያን፥ «ፖሌቴዳ» ያጌዳ።
ዬሱሳ ሚዪያ ቶራን ጫዴዲኖ
ቃሲ ሄዋፔ ጉዪያን፥ ባሬ ሁጲያ ቶቺዴ፥ ባሬ ሼምፑዋ ኢሜዳ።
31ሄ ጋላሳይ ኣዪሁዳቱዋሲ ጊጌቲያ ጋላሳ #19፡31 ኣዪሁዳቱዋሲ ጊጌቲያ ጋላሳ፡ ፓሲጋይ ሳሚንታፔ ኢቲ ጋላሳ ኣዉዴኔ ጊዳና ዳንዳዬ፤ ሺን ዮሃኒሳ ሚሺራቹ ታማሪሲያዋዳን፥ ፓሲጋ ዎዲ ሃናናው ቤሲያዌ፥ ላይ ላይን ዬሱሲ ማስቃሊያን ካቄቲ ሃይቄዳ ሳምባታና ጊዳና ኮሼ። ጊዲያ ዲራዉኔ ቃሲ ሄ ሳምባታይ ዳሮ ቦንቾ ጊዲያ ዲራው፥ ሳምባታን ኣሳቱዋ ኣኃይ ማስቃሊያ ቦላ ፔሼና ማላ፥ ሱሌቴዳ ኣሳቱዋ ሱዪሊያ ሜንዴ፥ #19፡31 ሱሌቴዳ ኣሳቱዋ ሱዪሊያ ሜንዴ፡ ሃ ዎጋይ ሮሜ ካዉቴ ዎጋዳን፥ ማስቃሊያን ሱሌቴዳ ኣሳቱ ኤሌካ ሃይቃና ማላ ኡዲያ ኦጊያ ጉሳ። ማስቃሊያፔ ዎና ማላ፥ ኣዪሁዳቱ ጲላፆሳ ዎሴዲኖ። 32ሄዋ ዲራው፥ ዎታዳራቱ ዪዴ፥ ዬሱሳና ሱሌቴዳ ኮይሮ ቢታኒያ ሱዪሊያ ሜንዲኖ፤ ቃሲ ኣናና ሱሌቴዳ ላዔ ቢታኒያ ሱዪሊያካ ሜንዲኖ። 33ሺን ዬሱሳኮ ዬዳ ዎዴ ኢ ሃይቂዲጌዳዋ ቤዒዴ፥ ኣ ሱዪሊያ ሜንቤይኪኖ። 34ጊዶፔኔ፥ ዎታዳራቱዋፔ ኢቱ ኣ ሚዪያ ቶራን ጫዴዳ። ኤሌካ ሱይኔ ሃይ ጎጊ ኣጌዳ። 35ሂንቴንቱ ኣማናና ማላ፥ ሃዋ ቤዔዳዌ ማርካቴዳ፤ ኢ ማርካቲያዌካ ቱሙዋ፤ ቃሲ ባሬ ሃሳያይ ቱማ ጊዲያዋ ኢ ኤሬዳ። 36ሄዌ ሃኔዳዌ ፆሳ ማፃፋይ፥ «ኣ ሜቄቱዋፔ ኢቱኔ ሜዔና» ጌዳዌ ፖሌታናሳ። #ኬስ 12፡46፤ ፓይ 9፡12፤ ማዝ 34፡20 37ቃሲካ ፆሳ ማፃፋይ ሃራይ፥ «ኣሳይ ባሬ ጫዴዳዋ ቤዓና» ያጌ። #ዛክ 12፡10፤ ሳፅ 1፡7
ዬሱሲ ሞጌቴዳ
(ማት 27፡57-61፤ ማር 15፡42-47፤ ሉቅ 23፡50-56)
38ሄዋፔ ጉዪያን፥ ኣርማቲያሳ ጌቴቲያ ካታማፔ ዬዳ ዮሴፎ ዬሱሳ ኣኃ ኣኪዴ ኣፋናው ጲላፆሳ ዎሴዳ፤ ዮሴፎ ኣዪሁዳቶ ያዬዳ ዲራው፥ ኣሳይ ኤሬናን ዬሱሳ ካሊያዋ።
ዮሴፎ ዎሲና ጲላፆሲ፥ «ኣፋ» ያጌዳ። ሄዋ ዲራው፥ ዮሴፎ ቢዴ፥ ዬሱሳ ኣኃ ኣፌዳ። 39ቃሲ ኒቆዲሞሲ ሄዋፔ ካሴ ዬሱሳኮ ቃማ ዬዳዌ፥ ካዋራናኔ ጎዳሬ ኡና ዋላኬቴዳ ኦይታማኔ ኢቼሹ ኪሎ ጊራሜ ጊዲያዋ ኬና ሺቱዋ ኦይቂ ኣኪዴ፥ ዮሴፎና ዬዳ። 40ሄ ላዑ ኣሳቱ ዬሱሳ ኣኃ ኣኪዴ፥ ኣዪሁዳቱ ኣኃ ፃፂያ ዎጋዳን፥ ሺቱዋና ጋዴ፥ ሞጉዋ ኣፊላን ፃፄዲኖ። 41ዬሱሲ ማስቃሊያ ቦላ ሚሲማሪያን ሼቲዴ ሱሌቴዳ ሳዓን ዳሮ ኣቲኪልቲያ ሳዓይ ዴዔ፤ ሄ ኣቲኪልቲያ ሳዓ ጊዶን ሹቻ ዎጪ ኬሴዳ ቢሮ ኦኒኔ ሞጌቲቤና ኦራ ዱፉ ዴዔ። 42ሄ ዱፉ ማታን ዴዒያ ዲራዉኔ ቃሲ ኣዪሁዳቱ ሳምባታው ጊጌቲያ ጋላሳ ጊዲያ ዲራው፥ ዬሱሳ ያኒ ዎዲኖ።
Currently Selected:
ዮሃኒሳ 19: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa