ዮሃኒሳ 18
18
ዬሱሲ ባሬ ሞርኬቱዋ ኩሺያን ኦይቄቴዳ
(ማት 26፡47-56፤ ማር 14፡43-50፤ ሉቅ 22፡47-53)
1ዬሱሲ ሄዋ ጊዴ፥ ፆሳ ዎሴዳዋፔ ጉዪያን፥ ባሬና ካሊያዋንቱና ቄዲሮና ጊያ ዛንጋራ ፒኔዳ። ሄ ሳዓን ኣቲኪልቲያ ሳዓይ ዴዔ፤ ዬሱሲኔ ዬሱሳ ካሊያዋንቱ ጌሌዲኖ። 2ዬሱሳ ኣ ኢሜዳ ዪሁዳይ ሄ ሳዓ ኤሬዳ፤ ኣዪሲ ጎፔ፥ ዬሱሲ ኡባ ዎዴ ባሬና ካሊያዋንቱና ሄዋን ሺቄ። 3ሄዋ ዲራው፥ ካሌያ ቄሳቱዋ ካፓቱኔ ፓሪሳዋቱ ዪሁዳና ባናዳን ኢሜዳ ሮማ ዎታዳራቱኔ ጌሻ ጎሊያ ናጊያዋንቱ ኩራዚያ፥ ያቢያኔ ቶራ ኦይቂዴ ሄ ሳዓ ቤዲኖ።
4ዬሱሲ ባሬና ጋካናው ሃኒያ ኡባባ ኤሪዴ፥ ጋፃ ኬሲዴ፥ «ኦና ኮዪቴ?» ያጌዳ
5ኡንቱንቱ ዛሪዴ፥ «ናዚሬቲያ ዬሱሳ ኮዬቶ» ያጌዲኖ።
ዬሱሲ ዛሪዴ፥ «ታኒ ኣ» ያጌዳ።
ዬሱሳ ኣ ኢሜዳ ዪሁዳይካ ሄዋን ኡንቱንቱና ኤቄዳ፤ 6ዬሱሲ፥ «ታኒ ኣ» ጌዳ ዎዴ፥ ኡንቱንቱ ጉዬኮ ሺቂዴ፥ ሳዓን ኩንዴዲኖ። 7ዬሱሲ ቃሲካ፥ «ኦና ኮዪቴ?»
ያጊ ኦቺና ኡንቱንቱ፥ «ናዚሬቲያ ዬሱሳ» ያጌዲኖ።
8ዬሱሲ ዛሪዴ፥ «ታኒ ኣ ጊዲያዋ ሂንቴንቱሲ ኦዳዲ፤ ሲሚ ሂንቴንቱ ታና ኮዪያዋ ጊዶፔ፥ ሃዋንታ ዬዲቴ» ያጌዳ። 9ኢ፥ «ታ ኣቦ፥ ኔኒ ታው ኢሜዳዋንቱፔ ሃራይ ኣቶ፥ ኢቱዋካ ባዪዛቤይኬ» ጌዳዌ ፖሌታና ማላ፥ ሄዋ ጌዳ።
10ሲሞኒ ጴፂሮሳው ማሻይ ዴዔ፤ ኢ ሄ ማሻ ሾዲኔ ቄሳቱዋ ኡባቱዋ ካፑዋ ቆማ ኡሼቻ ሃይ ሾጪዴ፥ ቃንፂ ዬጌዳ። ሄ ቆማ ሱንይ ማልኮሳ። 11ዬሱሲ ጴፂሮሳ፥ «ኔ ማሻ ሾኩዋን ዛራዴ ዎ! ታ ኣቡ ታው ኢሜዳ ሜቱዋ ፁዓ ታኒ ኡሺኪታ?» ያጌዳ።
ዬሱሲ ቄሳቱዋ ካፑዋ ሃና ሲን ሺቄዳ
12ሻላቃይ፥ ዳሮ ዎታዳራቱኔ ቃሲ ጌሻ ጎሊያ ናጊያዋንቱ ዬሱሳ ኦይቂዴ ቃቼዲኖ። 13ኮይሮ ዬሱሳ ሃናኮ ኣፌዲኖ፤ ሃኒ ሄ ላይ ቄሳቱዋ ካፓቱዋ ጊዴዳ ቃያፋ ቦሉዋ። 14«ኣሳ ኡባ ዲራው፥ ኢቲ ኣሳይ ሃይቂንቶ ሎዓ» ጊዴ ኣዪሁዳቱዋ ዞሬዳዌ ቃያፋ።
ጴፂሮሴ ዬሱሳ ካዴዳ
(ማት 26፡69-70፤ ማር 14፡66-68፤ ሉቅ 22፡55-57)
15ሲሞኒ ጴፂሮሲኔ ሃራ ኢቲ ካሊያዌ ዬሱሳ ካሊዴ ቤዲኖ። ሄ ሃራ ካሊያዋ ቄሳቱዋ ካፑ ኤሬዳ፤ ሄዌ ዬሱሳና ቄሳቱዋ ካፑዋ ዲርሳ ጋርሳ ጌሌዳ። 16ሺን ጴፂሮሴ ካሬና ዲርሳ ፔንጊያን ኤቄዳ። ቄሳቱዋ ኡባቱዋ ካፑ ኤሪያ ሃራ ካሊያዌ ካሬ ኬሲዴ፥ ፔንጊያ ናጊያ ናቲው ኦዲዴ፥ ጴፂሮሳ ዲርሳ ጋርሳ ጌሊሴዳ። 17ፔንጊያ ናጊያ ናታ ጴፂሮሳ፥ «ኔኒ ሃ ቢታኒያ ካሊያዋንቱፔ ኢቱዋ ጊዲኪዬ?» ያጋዱ።
ኢ፥ «ቱይቲ፥ ታኒ ጊዲኬ» ያጌዳ።
18ሳዓይ ሜጊያ ዲራው፥ ኣይላቱኔ ጌሻ ጎሊያ ናጊያዋንቱ ታማ ኤፂዴ፥ ቦንቄዳዋ ዩዪ ኣ ኤቂዴ ካሺኖ፤ ጴፂሮሲካ ኡንቱንቱና ኤቂዴ፥ ሄ ታማ ካሼ።
ቄሳቱዋ ካፑ ዬሱሳ ኦቾ ኦሻ
(ማት 26፡59-66፤ ማር 14፡55-64፤ ሉቅ 22፡66-71)
19ቄሳቱዋ ኡባቱዋ ካፑ፥ ዬሱሳ ካሊያዋንቱባኔ ኣ ቲሚርቲያባ ኦቼዳ። 20ዬሱሲ ኣው ዛሪዴ፥ «ታኒ ኣሳ ኡባው ቆንጪያን ኦዳዲ። ታኒ ኣዪሁዳ ኡባይ ሺቂያ ኣዪሁዳ ዎሳ ጎሌኒኔ ጌሻ ጎሊያን ኡባ ዎዴ ታማሪሳዲ፤ ጌማን ኣዪኔ ሃሳያቤይኬ። 21ያቲና፥ ኔኒ ታና ኣዪሲ ኦቻይ? ታኒ ኦዴዳዋ ሲሴዳ ኣሳ ኦቻ፤ ሄ ኣሳይ ታኒ ኦዴዳዋ ኤሬዳ» ያጌዳ።
22ዬሱሲ ሄዋ ጌዳ ዎዴ፥ ሄዋን ኤቄዳ ዎታዳራቱዋፔ ኢቱ ዬሱሳ ባቂዴ፥ «ቄሳቱዋ ኡባቱዋ ካፑዋ ቦላ ሃዋዳን ዛራይ?» ያጌዳ።
23ዬሱሲ ዛሪዴ፥ «ታኒ ባላባ ሃሳዬዳዋ ጊዶፔ፥ ሃዋን ዴዒያ ኣሳ ኡባው ኦዳ፤ ሺን ታኒ ቱሙዋ ሃሳዬዳዋ ጊዶፔ፥ ታና ኣዪሲ ባቃይ?» ያጌዳ።
24ሄዋ ዲራው፥ ሃኒ፥ ቃሼቲ ኡቴዳ ዬሱሳ፥ ቄሳቱዋ ኡባቱዋ ካፑዋ፥ ቃያፋኮ ዬዴዳ።
ጴፂሮሲ ዬሱሳ ላዔንዋ ካዴዳ
(ማት 26፡71-75፤ ማር 14፡69-72፤ ሉቅ 22፡58-62)
25ጴፂሮሲ ሄዋን ኤቂዴ፥ ታማ ካሼ፤ ሃራንቱ ኣ፥ «ኔኒ ሃ ቢታኒያ ካሊያዋንቱፔ ኢቱዋ ጊዲኪዬ?» ያጌዳ።
ጴፂሮሴ፥ «ቱይቲ፤ ታኒ ጊዲኬ» ያጊዴ ካዴዳ።
26ቄሳቱዋ ኡባቱዋ ካፑዋ ቆማቱዋፔ ኢቱዋ፥ ጴፂሮሴ ሃይ ቃንፄዳ ቢታኒያ ዳቡ ጴፂሮሳ፥ «ታኒ ኔና ኣናና ዳሮ ኣታኪልቲያ ጊዶን ቤዓቤይኪታዬ?» ያጊዴ ኦቼዳ።
27ጴፂሮሴ ቃሲካ ካዴዳ፤ ኤሌካ ኩቱ ዋሲ ኣጌዳ።
ዬሱሲ ጲላፆሳ ሲን ሺቄዳ
(ማት 27፡1-2፣ 11-14፤ ማር 15፡1-5፤ ሉቅ 23፡1-5)
28ኡንቱንቱ ዬሱሳ ቃያፋ ጎሌፔ ሮሜ ኣሳ ኣዪሲያዋ ኦሶ ጎሊያ ኣፌዲኖ። ሳዓይ ዎንታ ጉራ፤ ኣዪሁዳቱ ፓሲጋ ቦንቺያ ጋላሳ ቁማ ማናው፥ ባሬንቱ ሁጲያሲ ቱኔና ማላ፥ ሮሜ ኣሳ ኣዪሲያዋ ኦሶ ጎሊያ ጌሊቤይኪኖ። 29ሄዋ ዲራው፥ ጲላፆሲ ኡንቱንቱኮ ካሬ ኬሲዴ፥ «ሃ ቢታኒያ ሂንቴንቱ ኣያኒ ሞቲቴ?» ያጌዳ።
30ኡንቱንቱ፥ «ኢ ኢታባ ኦቤናዋ ጊዲንቶ፥ ኑኒ ኣ ኔኮ ኣሆኮ» ያጌዲኖ።
31ጲላፆሲ ዛሪዴ ኡንቱንቱሲ፥ «ሂንቴንቱ ኣ ኣፊዴ፥ ሂንቴንቱ ሂጊ ጊያዋዳን፥ ኣ ቦላ ፒርዲቴ» ያጌዳ።
ኣዪሁዳቱ፥ «ኦናኔ ዎያ ማታይ ኑሲ ባዋ» ያጌዲኖ። 32ሃዌ ሃኔዳዌ ዬሱሲ ኣይ ማላ ሃይቁዋ ሃይቃኔንቶ ኤሪሳናው ሃሳዬዳዌ ፖሌታናሳ።
33ጲላፆሲ ባሬ ኦሱዋ ጎሌ ላዔዋ ጌሊዴ፥ ዬሱሳ ፄሲዴ፥ «ኔኒ ኣዪሁዳ ካቴ?» ያጊዴ ኣ ኦቼዳ።
34ዬሱሲ ጲላፆሳ፥ «ሃ ኦሻ ኔኒ ኔፔ ኦቻዪዬ ዎይ ሃራ ኣሳይ ኔው ታባ ኦዴዴ?» ያጌዳ።
35ጲላፆሲ ዛሪዴ፥ «ታና ኣዪሁዳ ኣሳ ጋይ? ኔ ዛሬቱኔ ቄሳቱዋ ካፓቱ ኔና ታው ኣ ኢሜዲኖ፤ ኔኒ ኣያ ኦዲ?» ያጌዳ።
36ዬሱሲ፥ «ታ ካዉቴይ ሃ ኣላሚያና ጊዴና። ታ ካዉቴይ ሃ ኣላሚያና ጊዴዴንቶ፥ ታና ኣዪሁዳቶ ኣ ኢሜናዳን፥ ታው ኦያዋንቱ ታው ኦሌታና፤ ሺን ታ ካዉቴይ ሃ ኣልሚያና ጊዴና» ያጌዳ።
37ሄዋ ዲራው፥ ጲላፆሲ ዬሱሳ፥ «ያቲና፥ ኔኒ ካቴዬ?» ያጊዴ ኦቼዳ።
ዬሱሲ ዛሪዴ፥ «ኔኒ ታና ካቲያ ጋዳ። ታኒ ቱማ ማርካታና ዲራው ዬሌታዲ፤ ቃሲ ሄዋ ዲራው፥ ሃ ኣላሚያ ያዲ። ቱሙዋ ባጋ ጊዴዳ ኦኒኔ ታኒ ጊያዋ ሲሴዳ» ያጌዳ።
38ጲላፆሲ፥ «ቱሙ ኣዬ?» ያጌዳ።
ጲላፆሲ ሄዋ ጌዳዋፔ ጉዪያን፥ ኣዪሁዳቱዋኮ ካሬ ኬሲዴ፥ «ታኒ ኣኒ ኣይ ባላኔ ዴማቤይኬ። 39ሺን ፓሲጋ ቦንቺያ ጋላሲ፥ ኢቲ ኣሳ ታኒ ሂንቴንቱሲ ቃሹዋፔ ቢሊያ ዶያይ ዴዔ፤ ታኒ ሂንቴንቱሲ ኣዪሁዳቱ ካቲያ ቢሊያዋ ኮዪቴ?» ያጌዳ።
40ኡንቱንቱ ዛሪዴ፥ ባሬንቱ ኮሻ ቁ ኡዲዴ፥ «ባርባና ቢላፔ ኣቲን፥ ኣ ጊዴና!» ያጌዲኖ። ሺን ባርባኒ ፓኑዋ።
Currently Selected:
ዮሃኒሳ 18: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa