ቆላሲያሳ 1
1
1ታኒ ጳዉሎሲ፥ ፆሳ ሼኒያን ኪሪስቶሲ ዬሱሲ ኪቴዳዋ ጊዴዳዌኔ ኑ ኢሻይ ፂሞቶሲ፥ 2ቆላሲያሳ ጊያ ካታማን ዴዒያ ፆሳ ናናቶ፥ ኪሪስቶሳን ኣማኔቴዳ ኢሻቶ ሃ ዳቢዳቢያ ፃፌቶ።
ፆሳ ኑ ኣዉዋፔኔ ጎዳ ዬሱሲ ኪሪስቶሳፔ፥ ኣ ኬካቴዪኔ ሳሮቴይ ሂንቴንቶ ጊዶ።
ጳዉሎሲ ዎሴዳ ጋላታ ዎሳ
3ኑኒ ሂንቴንቶ ዎሲዴ፥ ኑ ጎዳ ዬሱሲ ኪሪስቶሳ ኣዉዋ፥ ፆሳ ኡባ ዎዴ ጋላቴቶ። 4ኣዪሲ ጎፔ፥ ኑኒ ኪሪስቶሲ ዬሱሳ ሂንቴንቱ ኣማኒያዋኔ ፆሳ ኣሳቱዋ ኡባ ሲቂያዋ ሲሴዶ። 5ቱሙ ኪታይ ዎንጋላይ ኮዪሮ ሂንቴኮ ዬዳ ዎዴ፥ ፆሳይ ሲንፔ ኢማና ጌዳዋ ሲሴዲታ። ሲሚ ሂንቴንቱ ኣማኑኔ ሲቁ ሳሉዋን ጊጊዴ ናጊያ፥ ፆሳይ ሲንፔ ኢማና ጌዳዋን ዶሜቴዳ። 6ሄ ዎንጌሊ ሂንቴኮ ጋኬዳ፤ ሂንቴንቱ ኣ ሲሶዴፔኔ ፆሳ ኣ ኬካቴ ቱማቴን ኤሮዴፔ ዶሚዴ፥ ሂንቴንቱ ጊዶን ዴዒያዋዳንካ፥ ቢታ ኡባን ኣንጁዋ ኣሄኔ ኡባሳ ኣኬ።
7ሂንቴንቱ ሄዋ ኑናና ኢቲፔ ቆማ ጊዴዳ ሲቆ ኤፓፊራፔ ታማሬዲታ፤ ኢ ኑ ዲራው ኪሪስቶሳው ኣማኔቲዴ ኦያዌ፥ 8ፆሳ ኣያናን ሃራቱዋ ሂንቴንቱ ሲቂያዋ ኑሲ ኦዴዳ።
9ሄዋ ዲራው፥ ኑኒ ቃሲ ሄዋ ሲሴዳ ጋላሳፔ ዶሚዴ፥ ፆሳይ ሂንቴንቶ ባሬ ሼኒያ ኤሪያ ኤራቴ፥ ፆሳ ኣያናይ ኢሚያ ኣዳ ኤራቴናኔ ኣኬካና ኢቲፔ ኩንዴ ኢማናዳን፥ ኡባ ዎዴ ባሌናን ፆሳ ዎሴቶ። 10ሄዋፔ ጉዪያን፥ ጎዳይ ኮዪያዋዳን ሂንቴንቱ ዴዓናዉኔ፥ ኡባ ዎዴ ኣ ናሼቺያባ ኦናው ዳንዳያና፤ ሂንቴንቱ ኦያ ሎዖ ኦሱዋ ኡባን ሂንቴንቱ ዴዑ ጎዓና ዴዒያዋ ጊዳናዋ፤ ቃሲ ፆሳ ኤሪያዋን ዲጪ ዲጪ ባኒታ።
11ሂንቴንቱ ኡባባኒ ናሼቻን ጌንጫናዳኒኔ ዳንዳያናዳን፥ ፆሳይ ባሬ ቦንቹዋ ጊታቴዳን ኢሚያ ዎልቃ ኡባን ሚኒቴ። 12ቃሲ ፆሳ ናናቶ ጊጌዳ ፖዖ ካዉቴ ላታናው፥ ኑና ዳንዳዪሴዳ ፆሳ ኣዉዋ ጋላቲቴ። 13ኢ ኑና ማ ዎልቃፔ ኣሺዴ፥ ባሬ ሲቂያ ናዓ ካዉቴኮ ፒንዳ። 14ቃሲ ኢ ባሬ ናዓን ኑና ዎዚዴ፥ ኑ ናጋራ ኣቶ ጌዳ።
ኪሪስቶሳ ፆሳቴኔ ኣ ኦሱዋ
15ኪሪስቶሲ ቤቴና ፆሳ ቆንጪሲያዋ፤ ኢ ሜቴዳዋ ኡባፔ ኣያ ባይራ ናዓ። 16ኣዪሲ ጎፔ፥ ኡባባይካ ኣኒ ሜቴዳ፤ ቤቲያዋንቱ፥ ቤቴናዋንቱ፥ ኣያናቱዋፔ ቤቲያ ዎልቃይኔ ጎዳቴይ፥ ቃቴይኔ ማታይ፥ ሳሉዋኒኔ ሳዓን ዴዒያ ኡባባይካ ኣኒኔ ኣው ሜቴዳ። 17ኢ ኡባባፔ ካሴ ዴዔዳ፤ ኡባባይካ ኣኒ ባሬ ሳዓ ሳዓ ኦይቂዴ ዴዔ። 18ኢ ባሬ ሁጴው፥ ዎሳ ጎሌው ሁጴኔ ዴዖ፤ ኢ ኡባፔ ቦላ ጊዳና ማላ፥ ካሴቲዴ ሃዪቁዋፔ ዴንዴዳ ባዪራ ናዓ ጊዴዳ።
19ኣዪሲ ጎፔ፥ ፆሳይ ኮዬዳዋዳን፥ ኣኒ ፆሳቴ ኩሜንይ ዴዔ። 20ያቲና ፆሳይ ኪሪስቶሳ ባጋና ኡባባ ባሬናና ሲጌናው ዬዉዋ ቃቼዳ፤ ባሬ ናዓይ ማስቃሊያ ቦላን ጉሴዳ ሱን ሳሉዋኒኔ ሳዓን ዴዒያ ኡባባ ባሬናና ሲጌዳ።
21ሃዋፔ ካሴ፥ ሂንቴንቱ ኢታባ ቆፔዳ ዲራዉኔ ኦዳ ዲራው፥ ፆሳፔ ሻኬቲዴ፥ ኣናና ሞርኬቴዲታ። 22ሺን ፆሳይ ሃዒ ሂንቴንታ ፖኮባይ ባዪናዋንታኔ ቃሲ ጌሻቱዋ ኦዴ፥ ባሬ ሲን ሺሻናው፥ ባሬ ናዓ ሃዪቄዳዋ ኣሳቴን ባሬናና ሂንቴንታ ሲጌዳ። 23ሄዌ ሂንቴንቱ ቱሙ ኣማኑዋን ሚኒ ኤቂዴ፥ ሚሺራቹዋ ቃላ ሲሲዴ፥ ሲንፔ ኣካና ጌዳዋፔ ቃፄናን ሚኒዴ ዴዖፔ ሃናና፤ ሄ ዎንጋላ ሚሺራቹ ሳዓን ዴዒያ ሜታ ኡባ ማታን ኦዴቴዳ። ታኒ ጳዉሎሲካ ሚሺራቹዋ ቃላ ኦዲያዋ ጊዳዲ።
ጳዉሎሲ ዬሱሲ ኪቴዳዋ ጊዲዴ ኦዳ ኦሱዋ
24ታኒ ሂንቴንቶ ዋዬቴዳ ዲራው፥ ሃዒ ናሼታይ፤ ኪሪስቶሲ ባሬ ሁጴው፥ ሄዋ ጊያዌ ዎሳ ጎሌው፥ ዋዬቲሺን ፓጬዳዋ ታኒ ታ ቦላ ሳኩዋን ኩንይ። 25ፆሳይ ታና ሂንቴንታ ማዲያዋኔ ኣ ቃላ ፖላዴ ኦዲያ ኣሺካሬቴ ኪታ ታው ኢሜዳ። 26ሃ ቃላይ ሃዋፔ ካሴ ባጋ ኡባን፥ ኣሳ ኡባው ኤሬቴናን ጌሚዴ ዴዔ፤ ሺን ባሬና ኣማኒያዋንቶ ፆሳይ ሃዒ ቆንጪሴዳ። 27ፆሳይ ኣዪሁዳ ጊዴና ኣሳው ዎዳ ሃ ኣሳው ቆንጪቤና ቦንቹዋኔ ዱሬ ዬዉ ኣዬንቶ ጌሻቱዋ ኤሪሳናው ኮዬዳ፤ ሃ ኣሳው ሃዒ ቆንጬዳዌ ኣዬ ጎፔ፥ ኪሪስቶሲ ሂንቴንቱን ዴዒያዋ፤ ሄዋ ጊያዌ ፆሳ ቦንቹዋ ኣናና ሂንቴንቱ ኣካናዋ።
28ሄዋ ዲራው፥ ኑኒ ኣሳ ኡባው ኪሪስቶሳዋ ኦዴቶ፤ ኣሳ ኡባ ኪሪስቶሳን ኩሜን ኣሳ ኦዴ፥ ፆሳኮ ሺሻና ማላ፥ ኑሲ ኣዳ ኤራቴ ኡባን ሂንቴንታ ሴሬቶኔ ታማሪሴቶ። 29ታኒ ሃዋ ፖላናው፥ ታናን ኦያ ኪሪስቶሲ ታው ኢሚያ ዎልቃን ባፄታይኔ ዳቡራይ።
Currently Selected:
ቆላሲያሳ 1: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa