ሉቃሳ 23
23
ጲላፆሲ ዬሱሳ ኦቼዳ
(ማት 27፡1፣ 2፣ 11-14፤ ማር 15፡1-5፤ ዮህ 18፡28-38)
1ሄዋን ሺቄዳ ኡባቱካ ኢቲፔ ዴንዲዴ፥ ዬሱሳ ጲላፆሳኮ ኣፌዲኖ። 2ኡንቱንቱካ፥ «ሃቢታኒ ኑ ኣሳ ባሌዴ፥ ኣሳይ ሮሜ ቢታ ካዉዋ ቄሳራው ጊራ ኢሜና ማላ ዲጊዴ፥ ቃሲ፥ ‹ታኒ ካቲያ› ያጊሺን ዴሜዶ» ያጊዴ ሞቱዋ ዶሜዲኖ።
3ጲላፆሲካ ዬሱሳ፥ «ሃዎ፥ ኣዪሁዳቱዋ ካቲ ኔኔ?» ያጊዴ ኦቼዳ።
ዬሱሲ ዛሪዴ ኣ፥ «ኔኒ ጋ ዴዓሳ» ያጌዳ። 4ጲላፆሲ ቄሳቱዋ ካፓቱዋሲኔ ኣሳሲ ኦዲዴ፥ «ታኒ ሃ ቢታኒያ ቦላን ኣይኔ ኢታ ኦሱዋ ዴማ ቤይኬ» ያጌዳ።
5ጊዶፔ ኣቲን ኡንቱንቱ፥ «ሃ ቢታኒ ጋሊላፔ ዶሚዴ፥ ሃራይ ኣቶ ሃዋ ጋካናዉካ፥ ዪሁዳ ጋዲያ ኡባ ባሬ ቲሚርቲያን ቃዴ ዴዔ» ያጊዴ ሚኒሲ ኦዴዲኖ።
ዬሱሲ ሄሮዲሳ ሲን ሺቄዳ
6ጲላፆሲካ ሃዋ ሲሲዴ፥ «ኢ ጋሊላ ኣሴ?» ያጊዴ ኤራናው ኦቼዳ። 7ጲላፆሲ ሄሮዲሴ ሞዲያ ጋዲያፔ ዬሱሲ ዬዳዋ ኤሬዳ ዎዴ፥ ሄሮዲሴካ ቃይ ሄዎዲያን ዬሩሳላሜን ዴዒያ ዲራው፥ ኣኮ ዬሱሳ ዬዴዳ።
8ሄሮዲሴ ዳሮ ዎዲያፔ ዶሚዴ ዬሱሳ ቤዓናው ኣሞቲ ዴዒያ ዲራው፥ ኣ ቤዔዳ ዎዴ ዳሮፔ ናሼቴዳ። ዬሱሳ ዋሪያ ሲሴዳዋ ዲራው፥ ኢ ኦራባ ኦሺን ቤዓናው ሂዶታን ጋሚዔዳ። 9ሄሮዲሴ ዬሱሳ ዳሮባ ኦቼዳ፤ ሺን ዬሱሲ ኣው ኣያኔ ዛሪቤና። 10ቄሳቱዋ ካፓቱኔ ሙሴ ሂጊያ ታማሪሲያዋንቱ ሄዋን ኤቂዴ፥ ዬሱሳ ሎይ ሞቲዴ ዴዒኖ። 11ሄሮዲሴኔ ኣ ዎታዳራቱ ዬሱሳ ካዴ፥ ኣ ቦላ ቂሊጬዲኖ። ቦንቼቴዳ ማዩዋ ኣ ማዪዚዴ፥ ጲላፆሳኮ ዛሪዴ ዬዴዲኖ። 12ሄሮዲሴኔ ጲላፆሲ ሃዋፔ ካሴና ሞርኪያን ዴዒኖ፤ ሺን ሄ ጋላሲ ሲጌቴዲኖ።
ዬሱሳ ሃይቃና ማላ ሞቴዲኖ
(ማት 27፡15-26፤ ማር 15፡6-15፤ ዮህ 18፡39-19፡16)
13ጲላፆሲ ቄሳቱዋ ካፓቱዋ፥ ኣዪሲያዋንታኔ ሃራ ጮራ ኣሳ ኢቲፔ ፄሲዴ፥ 14ሃዋዳን ያጌዳ፥ « ‹ሃ ቢታኒ ኣሳ ማካላቴው ዴን›፥ ያጊዴ ታኮ ኣሄዲታ፤ ታካ ሂንቴንቱ ሲንን ቢዳ ፄላዴ፥ ሂንቴንቱ ሺሼዳ ሞቱዋን ኢቲ ባላኔ ኣ ቦላን ዴማ ቤይኬ። 15ቃሲ ሄሮዲሴካ ኣ ቦላን ኣይኔ ዴሚቤና ዲራው፥ ሃ ኑኮ ዛሪ ዬዴዳ፤ ሂንቴንቱ ቤዒያዋዳንካ፥ ሃቢታኒ ኣ ሃይቆ ጋያባ ኣይኔ ኡዲቤና። 16ሃዋ ዲራው ታኒ ኣ ሙራዴ ቢላና» ያጌዳ። 17#23፡17 ሃ ፓይዱ፥ «ጲላፆሳው ፓሲጋ ባላ ቦንቹዋ ጋላሳን ኢቲ ኡራ ቃሹዋፔ ቢሊያ ዶያይ ዴዔ» ያጌ። ሺን፥ ዳውሮዋ ጌሻ ማፃፋ ኦራ ጫቁዋ ጊዱዋን ሃ ፓይዱ ፃፌቲ ቤና ጋሱ፥ ሃራ ጌሻ ማፃፋቱዋ ቢሌቱዋን ኡባቱዋንካ ፃፌቲ ቤና ዲራሳ።
18ኣሳይ ኡባይ ኢቲፔ ጊዲዴ፥ «ሃ ቢታኒያ ያ ዲጋ! ባርባና ጊያ ዬሱሳ ኑሲ ቢላ!» ያጊዴ ጫቦቴዲኖ። 19ባርባን ካታማን ዋላሳ ዴንዴ፥ ኣሳ ዎዳ ዲራው፥ ቃሼቴዳዋ።
20ጲላፆሲ ዬሱሳ ቢላናው ኮዪዴ፥ ኣሳው ላዔዋ ጉጂዴ ሃሳዬዳ። 21ሺን ኡንቱንቱ፥ «ማስቃሊያ ቦላ ሚሲማሪያን ሻዴ ካቃ! ካቃ!» ያጊ ዋሴዲኖ።
22ጲላፆሲካ ሄዜንዋ ኡንቱንታ፥ «ኣያው? ሃቢታኒ ኦዳ ኢታ ኦሱ ኣዬ? ታኒ ኣ ሃይቆ ጋያ ናቁዋ ኣይኔ ኣፔ ዴማቤይኬ፤ ሃዋ ዲራው፥ ኣ ሙራዴ ቢላ ዬዳና» ያጌዳ። 23ሺን ኡንቱንቱ ባሬንቱ ኮሻ ቁ ኦዴ፥ ካቄታናዳን ዳሪ ዋሴዲኖ። ኡንቱንቱ ዋሱካ ጲላፆሳ ቆፋ ላሜዳ። 24ሃዋ ዲራው፥ ጲላፆሲካ ኡንቱንቱ ኦሻይ ሲማናዳን ዬሱሳ ቦላን ፒርዴዳ። 25ኣሳ ማካላው ዴንዴኔ ሼምፑዋ ዎዴ፥ ቃሼቴዳ ቢታኒያ ቢሌታናዳን ኡንቱንቱ ዎሶ ዲራው፥ ሄ ቢታኒያ ቢሌዳ። ሺን ዬሱሳ ባሬንቱ ሼኒያዳን ኮዮዋ ኦና ማላ፥ ኣ ኢሜዳ።
ዬሱሲ ማስቃሊያን ካቄቴዳ
(ማት 27፡31-44፤ ማር 15፡21-32፤ ዮህ 19፡17-27)
26ዬሱሳ ኦይቂ ኣፊዴ ዴዒሺን፥ ሲሞና ጌቴቲያ ቄሬና ቢታኒ ሄራፔ ዪዴ ዴዒሺን ዴሚዴ፥ ማስቃሊያ ቶሲዴ ዬሱሳና ባና ማላ ኡዴዲኖ። 27ዳሮ ጮራ ኣሳይኔ ዬኪያ ማጫዋንቱ ጉዬና ካሊኖ። 28ዬሱሲ ጉዬ ሲሚዴ ኡንቱንቶ፥ «ሂንቴኖ፥ ዬሩሳላሜ ማጫዋንቶ፥ ሂንቴንቱ ሁጴዉኔ ሂንቴንቱ ናናው ዬኪቴፔ ኣቲን፥ ታው ዬኮፒቴ፤ 29‹ማን ጊዴዳዋንቱኔ ዬሊቤና ኡሉ፥ ንቤና ንይ፥ ኣንጄቴዳዋንታ› ጌቴቲያ ዎዲ ያናዋ። 30ሄ ዎዲያን፥ ‹ዞዛቶ፥ ኑ ቦላ ዎዲቴ፤ ዙኩላቱዋካ፥ ኑና ቆሲቴ› ያጋኒታ። #ሆስ 10፡8፤ ሳፅ 6፡16 31ሲሚ ቃዬ ሚን ሃዋዳን ሃኖፔ፥ ሜላ ሚን ዋናናዌ?» ያጌዳ።
32ዬሱሳና ኢቲፔ ካቄታና ማላ፥ ኢታ ኦሱዋ ኦዳ ሃራ ላዑ ኣሳቱዋካ ኣፌዲኖ። 33ቄራኔው ጌቴቲያሳ ጋኬዳ ዎዲያን፥ ዬሱሳ ካቄዲኖ። ኢታ ኦዋንታካ፥ ኢቱዋ ኡሼቻና፥ ዮኩዋ ሃዲርሳና ካቄዲኖ።
34ዬሱሲ፥ «ታ ኣቦ፥ ኡንቱንቱ ባሬንቱ ኦያዋ ኤሬና ዲራው፥ ኡንቱንቱ ናጋራ ኣቶ ጋ» ያጌዳ።
ኡንቱንቱካ ኣ ማዩዋ ሳማ ዬጌቲዴ ጊሼቲ ኣኬዲኖ። 35ኣሳይ ኤቂ ፄሊሺን፥ ጋዲያ ሞዲያዋንቱ፥ «ሃራንታ ኣሼ፤ ፆሳን ዶሬቴዳ ኪሪስቶሲ ኣ ጊዶፔ፥ ኣኔ ባሬ ሁጲያ ኣሼኔ?» ያጊዴ ቂሊጬዲኖ።
36ቃሲ ዎታዳራቱካ ሺቂዴ ቂሊጬዲኖ፤ ጫሜዳ ዎዪኒያ ኤሳ ኣው ኣሂ ኢሚዴ፥ 37«ሃዎ፥ ኔኒ ኣዪሁዳ ካቲያ ጊዶፔ፥ ኔ ሁጲያ ኣሻ!» ያጌዲኖ።
38ሁጲሳናካ፥ «ሃዌ ኣዪሁዳ ካቲያ» ያጊያ ፃፉዋ ፃፌዲኖ። 39ኢታ ኦዴ ካቄቴዳዋንቱፔ ኢቱ፥ ቦሪዲኔ ቶቺዴ፥ «ሃዎ ኔኒ ኪሪስቶሳ ጊዲኪ? ኣኔ ኣ ጊዶፔ፥ ኔ ሁጲያኔ ኑና ኣሻ» ያጌዳ።
40ዮኩ ቃይ ኣ፥ «ኔኒ ሃዋ ማላቲያ ፒርዳ ቦላ ዴዓዴካ ፆሳው ያዪኪ? 41ኑኒ ኪቴቴዳ ባላን ሙራ ኣኪዴ ዴዔቶ፤ ኑሲ ቤሲያ ሙራ ቦላን ዴዔቶ፤ ሺን ሃ ቢታኒ ኢቲ ኢታባኔ ኦቤና» ያጊ ዛሬዳ።
42ኢ ዬሱሳ፥ «ኔኒ ኔ ካዉቴ ዎልቃን ዪያ ዎዴ፥ ታና ቆፓ» ያጌዳ። 43ዬሱሲካ፥ «ታኒ ኔው ቱሙዋ ኦዳይ፥ ሃቼ ታናና ኢቲፔ ጋናቲያን ዴዓናሳ» ያጌዳ።
ዬሱሳ ሃይቁዋ
(ማት 27፡45-56፤ ማር 15፡33-41፤ ዮህ 19፡28-30)
44ሄ ዎዴ ኡሱፑን ሳቴ ጊዲያ ኬና፤ ሄዋፔ ኡዱፑ ሳቲያ ጋካናው፥ ቢታ ኡባ ቦላን ማ ጊዴዳ። 45ኣዋይካ ባሬ ፖዑዋ ዲጌዳ፤ ጌሻ ጎሊያ ጋሪዱካ ፔቲዴ ላዑዋ ኬሴዳ። 46ዬሱሲካ ዳሮ ቁ ጌዳ ቃላን ዋሲዴ፥ «ታ ኣቦ፥ ታኒ ታ ሼምፑዋ ኔ ኩሺያን ኣ ኢማይ!» ያጊ ሲሞዋፔ ጉዪያን ኢ ሃይቄዳ።
47ፄቱዋ ካፑ ሃኔዳ ዬዉዋ ቤዔዳ ዎዴ፥ «ሃ ቢታኒ ቱማካ ፂሎ ኣሳ» ያጊዴ ፆሳ ጋላቴዳ። 48ሃዋ ቤዓናው ኢቲሳ ሺቄዳ ኣሳይ ኡባይ ሃኔዳ ዬዉዋ ቤዒዴ፥ ባሬንቱ ቲራ ባቂዴ ሲሜዲኖ። 49ዬሱሳ ኤሪያ ኣሳይ ኡባይኔ ጋሊላፔ ዶሚዴ ኣ ካሌዳ ማጫዋንቱ ሃዋ ፄሊዴ፥ ሃኩዋን ኤቄዲኖ።
ዬሱሲ ሞጌቴዳ
(ማት 27፡57-61፤ ማር 15፡42-47፤ ዮህ 19፡38-42)
50ኣዪሁዳ ሻንጋቱዋ ጊዴዳዋንቱፔ ኢቱ፥ ዮሴፋ ጌቴቲያ ሎዓኔ ፂሎ ቢታኒ ዴዔ። 51ሃ ቢታኒ ሻንጋቱዋ ማቁዋኔ ኡንቱንቱ ኦሱዋን ኢቲፔቴ ኦቤና። ፆሳ ካዉቴ ዩሳ ሂዶታን ናጊዴ ዴዔ። 52ዮሴፎካ ጲላፆሳኮ ቢዴ፥ ዬሱሳ ኣኃ ኣካናው ዎሴዳ። 53ኣካናዳን ጌቴቶዋፔ ጉዬ፥ ኣኃ ቦላፔ ዎዴ፥ ሎዖ ሞጉዋ ማዩዋን ፃፂዴ፥ ሹቻፔ ዎጬቲዴ ሜቴዳ፥ ኦኒኔ ካሴ ሞጌቲ ቤና ኦላ ጊዶን ዎዳ። 54ጋላሳይካ ሳምባታ ሞካናው ጊጊያ ጋላሳ፤ ሳምባታይካ ጌላና ሃኔ።
55ጋሊላፔ ዶሚዴ ዬሱሳና ኢቲፔ ዬዳ ማጫዋንቱ ካሊዴ፥ ዱፉዋን ኣ ኣኃ ዎቲዴ ዎዲኖንቶ ቤዔዲኖ። 56ኡንቱንቱ ሃዋፔ ሶይ ሲሚዴ፥ ሺቱዋኔ ኦኪያዋ ኣኃው ጊጊሴዲኖ።
ሂጊያ ማራዳን ሳምባታ ጋላሲ ሼምፔዲኖ።
Currently Selected:
ሉቃሳ 23: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa