2 ቆሮንቶሳ 2
2
1ታኒ ላዔንዋ ሂንቴና ካዮዬና ማላ፥ ሂንቴኮ ቤናዳን፥ ታ ቆፋ ቃቻዲ። 2ኣዪሲ ጎፔ፥ ታኒ ሂንቴና ካዮዪያዋ ጊዶፔ፥ ሃ ታኒ ካዮዬዳ ሂንቴ ታና ናሼቻናፔ ኣቲን፥ ኦኔ ታና ናሼቻናዌ? 3ታኒ ሂንቴንቶ ሄ ዳቢዳቢያ ፃፌዳዌ፥ ታና ናሼቻናው ቤሲያ ኣሳቱዋን ታኒ ካዮታናው ሂንቴኮ ባናው ኮያቤናዋሳ፤ ታኒ ናሼቲያ ዎዴ፥ ሂንቴ ኡባይካ ቃሲ ናሼታናዋ ሂንቴ ኡባን ኣማኔታይ። 4ኣዪሲ ጎፔ፥ ታኒ ሂንቴንቶ ዳሮ ዋዪያኒኔ ቱጋን ቃሲ ዳሮ ኣፎና ፃፌዳዌ፥ ሂንቴና ካዮያናሳ ጊዴና፤ ሺን ታኒ ሂንቴና ኡባቱዋ ኣይ ኬና ሲቃይታንቶ ሂንቴ ኤራናዳና።
ባዪዛንቻው ኣቶ ጊያዋ
5ሺን ኢቲ ኡራይ ሃራ ካዮዬዳዋ ጊዶፔ፥ ታኒ ኣ ዬዉዋ ዳሪሳናው ኮዪኬ፤ ኢ ሂንቴና ኡባቱዋ ካዮዬዳፔ ኣቲን፥ ታ ፃላላ ካዮዪቤና። 6ሂንቴፔ ዳሪያ ባጋ ኣሳይ ሄ ቢታኒያ ማላ ኣሳ ሄዋዳን ሙሮፔ፥ ሄ ሙራይ ኣው ጊዳናዋ። 7ሄዋ ዲራው፥ ሄ ቢታኒ ሎይ ካዮቴና ማላ፥ ሂንቴ ኣው ኣቶ ጋናዉኔ ኣ ሜንናው ቤሴ። 8ሄዋ ዲራው፥ ሂንቴ ኣ ሚኒሲዴ ሲቂያዋ ኢ ኤራና ማላ፥ ታኒ ሂንቴና ዎሳይ። 9ኣዪሲ ጎፔ፥ ሂንቴ ታው ኣዛዜታናው ኡባ ዎዴ ጊጊ ኡቴዲቴንቶኔ ቃሲ ፓጪያ ሂንቴ ዳንዳዪንቶ ኤራናው፥ ሄ ዳቢዳቢያ ሂንቴንቶ ፃፋዲ። 10ኢቲ ኡራይ ናቄዳዋ ሂንቴ ኣቶ ጊያ ዎዴ፥ ታኒካ ቃሲ ኣቶ ጋይ፤ ታኒ ኣቶ ጌዳዋ ጊዶፔ፥ ኣቶ ጌዳዋ ኣያኔ ኪሪስቶሳ ሲንን ሂንቴ ዲራው፥ ኣቶ ጋዲ። 11ሴፃናይ ኑኮ ዪዴ፥ ኑና ጪሜና ማላ፥ ታኒ ኣቶ ጋዲ፤ ኣዪሲ ጎፔ፥ ኑኒ ኣ ቆፋ ኤሬቶ።
ኦራ ጫቁዋ ኦሳንቻቱዋ ፆኑዋ
12ታኒ ኪሪስቶሳ ሚሺራቹዋ ቃላ ኦዳናው ፂሮዓዳ ቤዳ ዎዴ፥ ጎዳይ ያኒ ታው ፔንጊያ ዶዪ ዎዳ። 13ታኒ ታ ኢሻ ቲታ ያኒ ዴማቤና ዲራው፥ ታው ኣያናይ ሼምፒቤና። ሄዋ ዲራው፥ ያኒ ዴዒያ ኣሳ፥ «ሳሮ ዴዒቴ» ጋዴ ማቂዶኒያ ባዲ።
14ሺን ኪሪስቶሳ ባጋና ኡባ ዎዴ ኑና ፆኖ ካሌያ ፆሳ፥ ቃሲ ኪሪስቶሳ ቲሚርቲያ ኑ ባጋና ሺቱዋዳን፥ ኡባሳ ጋያዋ ጋላታይ ጋኮ። 15ኣዪሲ ጎፔ፥ ኑኒ ኣቲያ ኣሳ ጊዱዋኒኔ ዪያ ኣሳ ጊዶን ኪሪስቶሲ ፆሳው ያርሺያ ሳዉዋ ቶሺኩ ጊያ ሺቱዋ ማላ። 16ኑኒ ዪያዋንቶ ዜዒያ ሃይቁዋ፤ ቃሲ ኣቲያዋንቶ ዴዑዋ ኢሚያ ሳዊያ ሺቱዋ፤ ያቲና፥ ሄዋ ኦናው ዳንዳዪያዌ ኦኔ? 17ኑኒ ፆሳ ቃላ ጌሎባዳን፥ ዋላኪዴ ዛሊዒያ ሃራ ጮራ ኣሳቱዋ ማላ ጊዶኮ፤ ሺን ፆሳይ ኑና ኪቲና፥ ኣማኔቲዴ ፆሳ ሲንን ኪሪስቶሳ ባጋና ቃላ ኦዴቶ።
Currently Selected:
2 ቆሮንቶሳ 2: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa