1 ጴፂሮሳ ኪታ 2
2
ዴዑዋ ሹቻኔ ጌሻ ኣሳ
1ሄዋ ዲራው፥ ሂንቴፔ ኢታቴ ኡባ፥ ጪሚያዋ ኡባ፥ ሎዓ ማላቲያ ኢታቴ፥ ቃናቲያኔ ዚጊርሳ ኡባ ዲጊቴ። 2-3ጎዳይ ኬካ ጊዴዳዋ ሂንቴ ዴዑዋን ቤዔዳዋ ጊዶፔ፥ ሃዒ ዬሌቴዳ ጋጪኖ ናናቱዋዳን፥ ኡሺዴ ዲጫናዉኔ ኣታናው ፂሎ ጊዴዳ ኣያና ማ ላሞቲቴ። #ማዝ 34፡8
4ጎዳኮ ዴዖ ሹቻኮ ሺቂቴ። ኣሳይ ኣ ኢፄዳ፤ ሺን ፆሳ ማታን ኢ ዶሬቴዳ ኣልዖ። 5ሂንቴካ ቃሲ ዴዖ ሹቻዳን፥ ጌሻ ቄሳ ጊዲዴ፥ ዬሱሲ ኪሪስቶሳ ባጋና ፆሳ ናሼቺያ ኣያና ያርሹዋ ፆሳው ያርሻናው፥ ሂንቴ ሂንቴ ሁጴው ኣያና ኬዳን ኬፄቲቴ። 6ኣዪሲ ጎፔ፥ ፆሳ ማፃፋይ፥ «ቤዒቴ፥ ታኒ ፂዮኔ ጊያ ካታማን ጎሊያ ጎዳ ፃጱዋ ሚኒሲያ፥ ዶሬቴዳ፥ ኣልዖ ሹቻ ዎይ፤ ኣኒ ኣማኒያ ኦኒኔ ዬላቴና» ያጌ። #ኢሳ 28፡16 7ሄዋ ዲራው፥ ሃ ሹቻይ ሂንቴንቶ ኣማኒያዋንቶ ዳሮ ኣልዓ፤ ሺን ኣማኔናዋንቶ፥ «ጊምቢያዋንቱ ካዳ ሹቻይ ጎዳ ፃጱዋ ሚኒሲያ፥ ኡባፔ ኣያ ሹቻ ጊዴዳ» ያጌ። 8ቃሲካ፥ «ሃ ሹቻይ ኣሳ ቢያ ሹቻኔ ኣሳ ኩንዲሲያ ዛላ» ያጌ፤ ኡንቱንቱ ፆሳ ቃላ ኣማኔና ዲራው፥ ኡንቱንቶ ካሴና ቆፌቴዳዋዳን ቤቴዲኖ። #ኢሳ 8፡14-15
9ሺን ፆሳይ ማፔ ማላሊሲያ ባሬ ፖዖ ሂንቴና ፄሴዳ፤ ሂንቴ ኣ ኦራ ኦሱዋ ኦዳናው ዶሬቴዳ ዛሬ፤ ሂንቴ ካቲያ ቄሳቱዋ፤ ጌሻ ኣሳኔ ፆሳሲ ቡዞ ኣሳ። #ኬስ 19፡5-6፤ ኢሳ 43፡20፣ 21፤ ዛር 4፡20፤ 7፡6፤ 14፡2፤ ቲት 2፡14፤ ኢሳ 9፡2 10ሂንቴ ካሴ ፆሳ ኣሳ ጊዲኪታ፤ ሺን ሃዒ ሂንቴ ኣ ኣሳ፤ ሂንቴ ካሴ ማሮቴ ኣኪቤይኪታ፤ ሺን ሃዒ ማሮቴ ኣኬዲታ። #ሆስ 2፡23
ፆሳ ኣይላቱዋ
11ታ ዳባቶ፥ ሂንቴ ሃ ሳዓን ኢማኔ ቤቴ ጊዲዴ ዴዒያዋንታ ጊዴዳዋዳን፥ ኡባ ዎዴ ሂንቴ ሼምፑዋና ኦሌቲያ ኣሳቴ ኣሙዋፔ ሂንቴ ሃካና ማላ፥ ታኒ ሂንቴና ዎሳይ። 12ኣሜኔና ኣሳይ ሂንቴና ኢታባ ኦያዋንቱዳን ዚጊሪያ ዎዴ፥ ኪሪስቶሲ ዪያ ጋላሲ ሂንቴ ሎዖ ኦሱዋ ኡንቱንቱ ኣኬኪዴ፥ ፆሳ ጋላታና ማላ፥ ሂንቴ ዴዑዋ ኡንቱንቱ ጊዶን ሎይ ናጊቴ።
13ጎዳ ዲራው፥ ኣሳ ሂጊያ ኡባው ሞዴቲቴ፤ ካቲካ ኡባፔ ቦላ ጊዲያ ዲራው፥ ኣው ሞዴቲቴ። 14ቃሲ ጋዲያ ሞዲያዋንቶካ ሞዴቲቴ። ኣዪሲ ጎፔ፥ ኡንቱንቱ ኢታባ ኦያዋንታ ሙራናዉኔ ሎዖባ ኦያዋንታ ጋላታናው ካቲያፔ ኪቴቴዲኖ። 15ኣዪሲ ጎፔ፥ ፆሳይ ሂንቴ ሂንቴ ሎዖ ኦሱዋን ካያ ኤያ ኣሳቱዋ ሃሳያ ጮዑ ኡዳናዋ ኮዬ። 16ኣይሌቴፔ ኬሲዴ፥ ፆሳ ኣዪሊያዳን ዴዒቴፔ ኣቲን፥ ሄ ኣዪሌቴፔ ኬሴዳዋ ኢታቴ ጌንያዋ ኦፒቴ። 17ኣሳ ኡባ ቦንቺቴ። ሂንቴ ኢሻቱዋ ሲቂቴ። ፆሳው ያዪቴ። ካቲያ ቦንቺቴ።
ኪሪስቶሳ ጋኬዳ ሜቱዋ ሌሚሱዋ
18ኣይላቶ፥ ሂንቴ ሎዖ ጎዳቱዋ ፃላላዉኔ ኣሺኬ ጎዳቱዋ ፃላላው ጊዴናን፥ ኢታቶካ ዳሮ ያዪዴ ሞዴቲቴ። 19ኣዪሲ ጎፔ፥ ኣሳይ ናቂያ ዎዴ ዋዬቲያ ኡራይ ፆሳ ቆፒዴ፥ ኦጌ ባይናን ናቄቶፔ ፆሳይ ኣ ኣንጃና። 20ኣዪሲ ጎፔ፥ ሂንቴ ናጋራ ኦና፥ ሂንቴና ዴቺያ ዎዴ፥ ሂንቴ ዳንዳዮፔ፥ ሂንቴንቶ ኣይ ጋላታይ ዴዒ? ሺን ሎዖባ ኦዴ ዋዪያ ሂንቴ ዳንዳዮፔ፥ ፆሳይ ሂንቴና ሄዎ ኣንጃና። 21ፆሳይ ሂንቴና ፄሴዳዌ ሄዋ ዲራሳ፤ ኣዪሲ ጎፔ፥ ኪሪስቶሲ ሂንቴንቶ ዋዬቴ፤ ሂንቴ ኣ ቃታማ ካላና ማላ፥ ሂንቴንቶ ሌሚሱዋ ጊዴዳ። 22ናጋራ ኢ ኦቤና፤ ባሬ ዶናፔ ዎርዱዋ ሃሳዪቤና። #ኢሳ 53፡9 23ኣሳይ ባሬና ቦሪያ ዎዴ፥ ዛሪዴ ቦሪቤና፤ ዋዬቲያ ዎዴካ ማንዲቤና። ሺን ፂሉዋ ፒርዲያ ፆሳው ባሬና ኣዴ ኢሜዳ። #ኢሳ 53፡7 24ኑኒ ናጋራው ሃዪቂዴ፥ ፂሎቴው ዴዓና ማላ፥ ኪሪስቶሲ ባሬ ሁጴው ባሬ ኣሹዋን ኑ ናጋራ ማስቃሊያን ቶኬዳ፤ ሂንቴ ኣ ማይን ፓፄዲታ። #ኢሳ 53፡5 25ኣዪሲ ጎፔ፥ ሂንቴ ኦጊ ባሌዳ ዶርሳ ማላ፤ ሺን ሃዒ ሂንቴ ሼምፑዋ ሄሚያዋኮኔ ናጊያዋኮ ሲሜዲታ። #ኢሳ 53፡6
Currently Selected:
1 ጴፂሮሳ ኪታ 2: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa