1 ዮሃኒሳ ኪታ 2
2
ኪሪስቶሲ ኑሲ ጋናቲያዋ
1ታ ናቶ፥ ናጋራ ሂንቴ ኦናዳን፥ ታኒ ሃዋ ሂንቴንቶ ፃፋይ፤ ሺን ኦኒኔ ናጋራ ኦፔ፥ ኣዉዋ ማታን ኑሲ ጋናቲያ ዬሱሲ ኪሪስቶሲ፥ ፂሉ፥ ዴዔ። 2ቃሲ ኑኒ ኑ ናጋራ ኣቶ ጌቴቱሳ ኪሪስቶሳ ባጋና ዴሜቶ፤ ኪሪስቶሲ ያርሼቴዳዌ ኣሳ ኡባ ናጋራ ዲጋናሳፔ ኣቲን፥ ኑ ናጋራ ፃላላ ዲጋናሳ ጊዴና።
3ኑኒ ፆሳ ኣዛዙዋ ናጎፔ፥ ቱሙ ኣ ኤሪያዋ ሄዋን ሻካናው ዳንዳዬቶ። 4ኢቲ ኡራይ፥ «ታኒ ኣ ኤራይ» ጊዴ፥ ቃሲ ኣ ኣዛዙዋ ናጌናን ኣጎፔ፥ ሄ ኡራይ ዎርዱዋ፤ ቱማቴይካ ኣኒ ባዋ። 5ሺን ኣ ቃላው ኣዛዜቲያ ኦና ጊዶፔኔ፥ ሄ ኡራይ ፆሳ ሲቂያዌ ቱሙ ፖሌቴዳ። ኑኒ ፆሳን ዴዒያዋ ሃዌ ኑና ኤሪሴ። ሄዌካ፥ 6«ታኒ፥ ፆሳን ዴዓይ» ጊያ ኦኒኔ ኪሪስቶሲ ዴዔዳዋዳን ዴዓናው ቤሴ።
ኦራ ኣዛዙዋ
7ታ ሲቃቶ፥ ታኒ ሂንቴንቶ ኮዪሩዋፔ ዴዒያ ኤጫ ኣዛዙዋ ፃፋይፔ ኣቲን፥ ኦራ ኣዛዙዋ ፃፊኬ፤ ሄ ኤጫ ኣዛዙ ሂንቴ ሲሴዳ ቃላ። #ዮህ 13፡34 8ጊዶፔካ፥ ታኒ ሂንቴንቶ ላዔንዋ ኦራ ኣዛዙዋ ፃፋይ፤ ሄ ኣዛዙዋ ቱማቴይካ ኪሪስቶሳኒኔ ሂንቴናን ቤቴ። ኣዪሲ ጎፔ፥ ማይ ዬ፤ ቱሙ ፖዑ ሃዒ ፖዔ።
9ፖዑዋን ዴዓይ ጊዴ፥ ባሬ ኢሻ ኢፂያ ኦኒኔ ሃኖ ጋካናሲካ ማኒ ዴዔ። 10ባሬ ኢሻ ሲቂያ ኦኒኔ ፖዑዋን ዴዔ፤ ሄ ኡራን ሃራ ኡራ ቢያባይ ኣያይኔ ባዋ። 11ሺን ባሬ ኢሻ ኢፂያ ኦኒኔ ማኒ ዴዔ፤ ማኒ ሃሜቴ። ማይ ኣ ኣይፊያ ቆቂሲ ዎዳ ዲራው፥ ሃቃ ቢንቶኔ ኤሬና።
12ታ ናቶ፥ ፆሳይ ኪሪስቶሳ ሱን ዲራው፥
ሂንቴ ናጋራ ኣቶ ያጌዳ ዲራው፥ ታኒ
ሂንቴንቶ ፃፋይ።
13ኣዎቶ፥ ኮዪሩዋፔ ዴዒያዋ ሂንቴ ኤሬዳ ዲራው፥
ሂንቴንቶ ፃፋይ።
ያላጋቶ፥
ፃላሂያ ካፑዋ ሂንቴ ፆኔዳ ዲራው፥
ሂንቴንቶ ፃፋይ።
ጉ ናቶ፥ ፆሳ ኣዉዋ ሂንቴ ኤሬዳ ዲራው፥
ሂንቴንቶ ፃፋይ።
14ኣዎቶ፥ ኮዪሩዋፔ ዴዒያዋ ሂንቴ ኤሬዳ ዲራው፥
ሂንቴንቶ ፃፋይ።
ያላጋቶ፥
ሂንቴ ሚኖ ጊዲያ ዲራዉኔ
ፆሳ ቃላይ ሂንቴናን ዴዒያ ዲራው፥
ቃሲ ፃላሂያ ካፑዋ ሂንቴ ፆኔዳ ዲራው፥
ሂንቴንቶ ፃፋይ።
15ሃ ኣላሚያ ዎይ ኣላሚያን ዴዒያ ኣያኔ ሲቆፒቴ። ሂንቴ ሃ ኣላሚያ ሲቆፔ፥ ፆሳ ሲቁ ሂንቴናን ባዋ። 16ኣዪሲ ጎፔ፥ ሃ ኣላሚያን ዴዒያ ኡባባይ፥ ሄዌካ፡ ኣሳቴ ኣሙ፥ ኣዪፊያን ፄሊዴ ካጄሊያዌኔ ባሬ ዴዒያዋን ጬቄቲያዌ ሃ ኣላሚያፔ ዬዳዋፔ ኣቲን፥ ፆሳፔ ዪቤና። 17ሃ ኣላሚኔ ሃ ኣላሚያን ኣሳይ ኣሞቲያ ኡባባይ ኣና። ሺን ፆሳይ ጌዳዋ ኦያ ኡራይ ሜናው ዴዓና።
ኪሪስቶሳ ኤቄቲያዋፔ ናጌቲያዋ
18ታ ናቶ፥ ዎዲያ ዉርሴይ ማታቴዳ፤ ኪሪስቶሳ ኤቄቲያዌ ሲንፔ ያናዋ ሂንቴ ሲሴዳዋዳን፥ ሃራይ ኣቶ ሃዒካ ኣ ኤቄቲያዋንቱ ጮራቱ ዴንዴዲኖ። ሄዋ ዲራው፥ ዎዲያ ዉርሴይ ማታቴዳዋ ኑኒ ሄዋን ኤሬቶ። 19ሃ ኤቄቲያዋንቱ ኑ ባጋ ጊዴና ዲራው፥ ኑ ጊዶፔ ኬሴዲኖ፤ ኣዪሲ ጎፔ፥ ኡንቱንቱ ኑ ባጋ ጊዲያባ ጊዲንቶኔ፥ ኑ ጊዶን ዴዓና፤ ሺን ኡንቱንቱፔ ኦኒኔ ኑ ባጋ ጊዴናዌ ኤሬታና ማላ፥ ኑ ጊዶፔ ኬሴዲኖ።
20ሺን ኪሪስቶሲ ሂንቴ ቦላ ጌሻ ኣያና ጉሴዳ፤ ቃሲ ሂንቴ ኡባይ ቱሙዋ ኤሪታ። 21ቱሙዋ ሂንቴ ኤሪያ ዲራዉኔ ቃሲ ቱሙዋን ዎርዱ ኣያይኔ ባዪናዋ ሂንቴ ኤሪያ ዲራው፥ ታኒ ሂንቴንቶ ፃፋይፔ ኣቲን፥ ቱሙዋ ሂንቴ ኤሬና ዲራው ፃፊኬ።
22ዬሱሲ ኦኬቴዳ ኪሪስቶሳ ጊዲያዋ ኤሪኬ ጊያ ኡራፔ ኣቲን፥ ዎርዱ ኦኔ? ሄዌ ፆሳ ኣዉዋኔ ናዓ ኤሪኬ ጊያዌ ኪሪስቶሳ ኤቄቲያዋ። 23ፆሳ ናዓ ኤሪኬ ጊያ ኦናኔ ፆሳ ኣዉካ ኤሬና፤ ፆሳ ናዓ ኤራይ ጊያ ኦናኔ ቃሲ ፆሳ ኣዉካ ኤሬ።
24ሄዋ ዲራው፥ ኮዪሩዋፔ ሂንቴ ሲሴዳዋ ሂንቴ ዎዛናን ሚኒሲዴ ናጊቴ። ኮዪሩዋፔ ሲሴዳዋ ሂንቴ ናጎፔ፥ ሂንቴንቶ ቃሲ ፆሳ ናዓናኔ ፆሳ ኣዉዋና ኢቲፔቴይ ዴዓና። 25ቃሲ ኪሪስቶሲ ባሬ ሁጴው ኑሲ ኢማና ጌዳዌ ሜና ዴዑዋ።
26ታኒ ሃዋ ሂንቴንቶ ሄ ሂንቴና ባሌያ ኣሳቱዋ ዲራው ፃፋዲ። 27ሺን ኪሪስቶሲ ሂንቴ ቦላ ባሬ ጌሻ ኣያና ጉሴዳ። ጌሻ ኣያናይ ሂንቴናን ዴዒያ ዲራው፥ ኦኒኔ ሂንቴና ታማሪሳና ኮሼና፤ ኣዪሲ ጎፔ፥ ኣ ጌሻ ኣያናይ ሂንቴና ኡባባ ታማሪሴ። ኢ ታማሪሲያዌ ቱሙዋፔ ኣቲን ዎርዱዋ ጊዴና። ሄዋ ዲራው ኣያና ጌሻ ቲሚርቴው ኣዛዜቲዴ፥ ኪሪስቶሳና ኢቲፔቴን ዴዒቴ።
28ታ ናቶ፥ ቃሲ ኢ ቆንጪያ ዎዴ፥ ኑኒ ያሺ ባዪናዋንታ ጊዳናዳኒኔ፥ ኣ ዩሳ ጋላሲ ኣ ሲንን ኑኒ ዬላቴናዳን፥ ኣናና ኢቲፔቴን ዴዒቴ። 29ኪሪስቶሲ ፂሎ ጊዲያዋ ሂንቴ ኤሮፔ፥ ፂሎባ ኦያ ኡባይ ፆሳ ናዓ ጊዲያዋ ኤራናው ቤሴ።
Currently Selected:
1 ዮሃኒሳ ኪታ 2: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa