Kuluusi 1
1
1Jawaab minni ana Buulus rasuul Isa al-Masiih be izin Allah wa daahu naktib maʼa akhuuna Timuutaawus 2leeku intu akhwaanna fi l-Masiih al-saalihiin wa amiiniin al-saakniin fi hillit Kuluusi. Aleekum al-salaam wa l-rahma min Allah abuuna.
Duʼa Buulus wa chukrah
3Nachkuru Allah abu Rabbina Isa al-Masiih. Wa fi ayyi wakit, nasʼalooh leeku 4achaan simiʼna be iimaanku fi l-Masiih Isa wa simiʼna be hubbuku le kulla l-saalihiin. 5Wa intu saabtiin fi iimaanku wa mahabbitku achaan intu gaaʼidiin tarjo be acham al-baraka al-Allah hafadaaha leeku fi l-sama. Wa simiʼtu beeha fi kalaam al-hagg wa hu bichaarat al-Masiih al-ballakhooha leeku min awwal.
6Wa bichaarat al-Masiih gaaʼide tijiib natiija wa tilwazzaʼ fi l-dunya. Wa da misil hi gaaʼide tisawwiih fi usutku min yoom intu simiʼtu be niʼmat Allah wa iriftuuha be sahiih. 7Wa intu simiʼtu bichaarat al-Masiih min khachum habiibna Abfuraas al-hu abd al-Masiih misilna. Hu gaaʼid yakhdim le l-Masiih be amaan wa yimassilna fi usutku. 8Wa hu ooraana be l-mahabba al-ligiituuha min al-Ruuh al-Khudduus.
9Wa achaan da min yoom simiʼna khabar iimaanku, aniina gaaʼidiin nasʼalo leeku Allah. Wa nasʼalo leeku Allah achaan taʼarfu al-hu yidoorah wa talgo hikma wa fihim min al-Ruuh al-Khudduus. 10Wa misil da, taʼarfu kikkeef tiʼiichu be haal al-waajbe le naas al-Rabb wa tisawwu daayman al-cheyy al-hu yarda beyah wa tisawwu kulla amal al-kheer wa taʼarfu Allah be ziyaada.
11Wa fi kulli wakit, khalli Allah yigawwiiku be gudurtah al-majiide achaan tahmalo al-taʼab wa tasburu foogah be farah 12wa tachkuru daayman Allah abuuku al-jaʼalaaku jaahiziin le tichaaruku fi warasat al-saalihiin fi mamlakat al-nuur. 13Aywa, Allah fazaʼaana wa maragaana min muluk al-dalaam wa waddaana fi mamlakat Ibnah al-yiriidah. 14Wa hu bas al-fadaana wa jaab leena khufraan al-zunuub.
Kubuuriiyit al-Masiih
15Al-Masiih hu suurat Allah
al-ma binchaaf.
Hu Ibn Allah gaaʼid gabul al-khaliige
wa mukallaf be kulla cheyy al-Allah khalagah.
16Achaan beyah hu, Allah khalag kulla cheyy
al-fi l-samaawaat wa fi l-ard,
al-binchaaf wa l-ma binchaaf,
wa ayyi makhluug al-indah arch aw muluk
wa kan hu haakim aw kabiir.
Allah khalag kulla cheyy be waasitat Ibnah
wa fi chaanah hu.
17Ibn Allah hu gubbaal kulla cheyy
wa be gudurtah kulla cheyy gaaʼid saabit.
18Hu bas raas al-jisim
wa l-jisim hu ummat al-Masiih.
Wa hu al-bidaaya
wa awwal naadum al-baʼas min ust al-maytiin.
Wa Allah sawwa misil da
achaan Ibnah yabga al-awwal fi kulli cheyy.
19Wa l-Masiih hu misil da
achaan Allah radyaan
kadar kulla sifaatah yagoodu foogah kaamiliin.
20Wa be waasitat al-Masiih,
Allah dawwar yisaalih kulli cheyy maʼaayah,
al-gaaʼidiin fi l-ard aw fi l-samaawaat.
Hu sawwa al-suluh da be damm Ibnah
al-maat fi l-saliib.
21Wa fi l-wakit al-faat, intu ma induku alaakha maʼa Allah wa bigiitu udwaanah be fikirku wa gaaʼidiin tisawwu al-fasaala. 22Wa laakin hassaʼ, Allah sawwa suluh maʼaaku be waasitat Ibnah al-ja be jisim insaani. Wa Ibnah maat le yisawwiiku naas khaassiin wa yigaddimku le Allah bala khata wa bala eeb.
23Wa da kula yabga leeku kan tagoodu saabtiin wa gawiyiin fi l-iimaan wa ma khalleetu achamku al-awwal ligiituuh wakit simiʼtu bichaarat al-Masiih. Wa l-bichaara di, ballakhooha le kulla makhluug fi l-ard wa ana Buulus bigiit khaddaamah achaan niballikh al-bichaara le l-naas.
Khidmit al-rasuul Buulus
24Wa ana farhaan be taʼabi achaan ana gaaʼid natʼab fi chaanku. Wa fi jismi, nahmal kulla l-taʼab al-yigassir le l-Masiih fi chaan ummatah al-hi jismah. 25Ana bigiit khaddaam le jamaaʼat al-muʼminiin achaan Allah kallafaani be l-khidme di wa nakhdim fi chaanku. Wa khidimti hi niballikh kalaam Allah al-kaamil. 26Wa niballikh al-sirr al-Allah abadan ma bayyanah le naas hana ayyi zaman al-faat wa laakin hassaʼ hu bayyanah le naasah al-saalihiin. 27Wa Allah chaal niiye achaan yiʼooriihum kadar al-sirr da yijiib baraka kabiire wa majiide bilheen le kulla l-umam. Wa sirr Allah, hu al-Masiih zaatah yagood fiiku wa da yantiiku acham tadkhulu fi majdah.
28Wa niballukhu al-naas be l-Masiih. Wa nikhabburu ayyi naadum wa niʼallumu ayyi naadum be kulli hikma achaan ayyi insaan yukuun kaamil fi l-Masiih. 29Wa ana gaaʼid natʼab wa nijaahid fi l-khidme di be l-gudra al-hu yantiini min gudurtah al-aziime.
Currently Selected:
Kuluusi 1: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.