2 Butrus 1
1
1Jawaab minni ana Simʼaan Butrus abid Isa al-Masiih wa rasuulah. Wa naktib leeku intu al-naas al-ligiitu al-iimaan be sabab adaalit Isa al-Masiih Ilaahna wa munajjiina. Wa iimaanku indah nafs al-khiima misil iimaanna. 2Aleekum al-salaam wa l-rahma be katara be sabab irfitku le Allah wa Rabbina Isa.
Haal al-naas al-Allah naadaahum
3Wa akiid Rabbina antaana be gudurtah al-ilaahiiye kulla cheyy al-aniina hawjaaniin leyah le niʼiichu be l-takhwa. Wa da yabga be irfitna leyah hu al-naadaana fi derbah be kheerah al-majiid. 4Wa be da, hu antaana barakatah al-khiimitha kabiire bilheen al-awwal waaʼad beeha. Achaan be l-baraka di, intu tichaaruku fi l-tabiiʼa al-ilaahiiye wa tamurgu min al-fasaad al-mawjuud fi l-dunya be sabab al-chahwa.
5Wa achaan da, gummu be kulla juhudku achaan tiziidu fi l-iimaan, al-kheer. Wa tiziidu fi l-kheer, al-maʼrafa. 6Wa tiziidu fi l-maʼrafa, sabbitiin al-nafs. Wa tiziidu fi sabbitiin al-nafs, al-sabur. Wa tiziidu fi l-sabur, al-takhwa. 7Wa tiziidu fi l-takhwa, al-khuuwa. Wa tiziidu fi l-khuuwa, al-mahabba. 8Wa kan induku al-achya dool wa gaaʼidiin yiziidu foogku be katara, khalaas tabgo naafʼiin wa talgo maʼrafa ziyaada fi Rabbina Isa al-Masiih. 9Wa ayyi naadum al-ma indah al-achya dool, hu misil naadum amyaan. Al-naadum da ma chaayif adiil wa hu nisi kadar Allah tahharah min zunuubah al-awwal.
10Achaan da, ya akhwaani, sawwu juhud be ziyaada achaan be haalku di tiʼakkudu kadar Allah azalaaku wa naadaaku fi derbah. Wa kan tisawwu misil ana gultah, abadan ma tamurgu min al-derib al-adiil da. 11Wa be misil da, Allah yaftah leeku baab wasiiʼ le tadkhulu fi l-mamlaka al-abadiiye wa hi mamlakat Rabbina Isa al-Masiih munajjiina.
12Akiid taʼarfu al-kalaam da wa gaaʼidiin saabtiin fi l-hagg al-ballakhooh leeku. Wa laakin nidoor daayman nizakkirku beyah. 13Achaan wakit ana lissaaʼ gaaʼid hayy, waajib nizakkirku le ma tanso. 14Naʼarif ana numuut gariib achaan Rabbina Isa al-Masiih ooraani be kalaam akiid. 15Wa nisawwi juhud achaan baʼad ana faaragt al-dunya, tagdaro tifakkuru fi l-kalaam da fi ayyi wakit.
Al-chahaada wa l-anbiya
16Wa l-kalaam al-ballakhnaah leeku al-bukhuss gudrat Rabbina Isa al-Masiih wa jaytah, da ma hije saakit misil al-hije al-tuwaal al-yihajjuuh al-naas. Be l-aks, aniina chifna azamatah be uyuunna wa chahadna leyah. 17Aniina mawjuudiin wakit Allah abuuh antaah charaf wa majd, wakit al-hiss ja leyah min al-Majiid wa l-Aziim wa gaal : «Da bas Ibni al-nihibbah. Wa ana farhaan beyah bilheen.»#1:17 Al-kalaam da talgooh fi Matta 17:5. 18Aniina zaatna simiʼna al-hiss al-jaayi min al-sama da wakit aniina maʼa Isa fi l-jabal al-mukhaddas.
19Wa be da, aniina muʼakkidiin ziyaada kadar kalaam al-anbiya sahiih. Wa khalaas, waajib tukhuttu baalku le kalaamhum al-misil deyy al-yidawwi fi bakaan adlam lahaddi l-wata tabga misil nahaar wa najmat al-fajur tatlaʼ fi guluubku. 20Wa gubbaal kulla cheyy, waajib taʼarfu kadar ma fi kalaam min kalaam al-anbiya al-gaaʼid fi l-Kitaab da, ja min fikir nabi. 21Achaan kalaam al-anbiya abadan ma ja min niiyit insaan laakin al-Ruuh al-Khudduus bas lazza al-rujaal dool wa humman hajjo kalaam naazil min Allah.
Currently Selected:
2 Butrus 1: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.