Obadaya 1
1
1Ŋ̀orɛ̂-wooi ká ŋí Ɣâla Yâwɛɛ è dɛ̀ɛ Ŋɔlóno-kɛ́-nuui Obadaya pɔ́ é pîlaŋ Idɔŋ lɔii-ŋuŋ mai.
Yâwɛɛ a pâi Idɔŋ kula-maa kɛ̂i
Yâwɛɛ è ŋɔworɛ̂-woo ƃó-nuui tɛ̂ɛ ǹɔii-ŋûŋ-ŋai su,
kú ŋɔworɛ̂-wooi mɛ̀ni ǹyɛɛi,
“Kwaa kúkpîŋ kpɛtɛ! Kwaa lí kú kɔ́ pɛ́lɛ Idɔŋ ma!”
2Yâwɛɛ è lòno Idɔŋ-ƃelai pɔ́ ǹyɛɛi,
“Ŋa pâi íkuro têi ǹɔii-ŋûŋ ŋai sáma.
Núu kélee a pâi ŋ̀ɛ́i naŋînii ímɛi óo Idɔŋ.
3Íyôŋkai a ípɛlɛ
kpɛ́ni fêi, ítaa-lêei káa kɔni yêe ma,
ípɛrɛi kɛ́ ƃò ǹyée tɔɔ-ŋai su.
M̀ɛni ma ƃa mò yɛ̂ɛ,
‘Gbɛ̂ɛ ƃa pɔ̂ri ŋ́gulâi ƃɛ́ é ḿbîlaŋ?’
4Berei máŋ ípɛrɛi káa la ɣelei pere
yɛ̂ɛ kuɛ taai
gɛ́ ƃò bɛmɛlɛŋ-kao-ŋai sámai,
ŋa pâi íkulâi naa í pîlaŋ ǹɔii ma.
5“Tãi ŋuma-ƃela da pâ la ípɛrɛi mu a kpínii,
da sãa siɣe nɔ́ nyii da ŋ̀wɛ̂lii.
Tãi nûa da wúru-ƃa kùla la íkpɔmɔ-kpâlaŋ ŋái,
da a lɛ̂ɛ naa.
Kɛ́lɛ íkpɔara-ƃelai da pâi ílɔii su karâi kpɔ́ kpɔlɔwɔ.
6Kɛ́lɛ da pâi Isɔɔ ŋɔsuui-su-ƃelai kɔlĩŋ kulai díyeei.
7Íkɔlɛ-ma lɔii-ŋuŋ-ŋai nyii-ŋai ka dîa-ni ká kɔ́ kɔ̀ gîe mai, da pâi ípɛlɛ̂i
dí íkpɛ íkpɔɔi lɔii su.
Íƃarâai da pâi ípɛlɛ̂i dí íyee mɛi ɣále.
Íƃarâai nyii-ŋai í làa a diai, da pâi ƃáre tɛ̂i ímɛni ma
nyii ífe pâi gɔ́lɔnîi.”
8Yâwɛɛ ǹyɛɛ,
“Maa ɣêlei tí ŋa pâi Idɔŋ lɔii su karâi, ŋá ŋɔtáre-ƃelai su kara,
mɛni ŋá-kaa fé ŋɔ́nɔ pâi kɛ̂i ǹɔii tí su.
9Óo Temaŋ, íkɔ-kûluƃa-ŋai da pâi yaôi,
ǹyaŋ da pâi Idɔŋ-ƃelai kélee paâi.
Idɔŋ kula-maa kɛ́ sapoi
10“Káai a Idɔŋ-ƃelai, ŋumɛ a pâi kásonîi
ŋ̀wana-lɔ̂ɔ tuai mɛ̂ni ma ká gɛ̀ a kálêɣe Zeeka ŋɔnûai.
Ŋa pâi kásuui kélee kpɛɛ̂i ǹɔii ma wɔ́lɔ-wɔlɔ da wɔ́lɔ-wɔlɔ.
11Maa ɣêlei tí í kɛ̀ tɔɔ̂ni ǹaa kɔlɛ ma
tãi Zerusâlɛŋ ŋɔkpɔara-ƃelai dí Zerusâlɛŋ siɣãŋ wôlo la
dí daai ŋɔtɔɔ-sãai ŋáa kɔ́lɛ
díloai a kpɛɛ̂ŋ toɔɔ.
Í kɛ̀ yɛ̂ɛ dita.
12Kɛ́lɛ maa fé kɛ́ ni a nɛ̃ɛ í yoŋka tée
tã ilêɣe è kɛ̀ la mɛni kpɔlu sui.
Ifêi pɔri lii-nɛ̃ɛ kulai
Zuda ŋɔnûai su-kara mɛni ma.
Ífêi pɔri ɣɛ́lɛ-maa kulâi díkponôi
dimɛni-soli kaai su.
13Ífêi pɔri tɛ̂i ŋánûai dítaai su
tãi mɛni kpɔ̂lu è làa la dîai,
íkɛ yoŋka tèe dímɛi.
Ífêi pɔri máŋ díkɔ̃̂liŋ da siɣêi
tãi dí kɛ̀ la mɛni kpɔ̂lu sui.
14Ifêi pɔri tɔɔ̂i bere tãaŋ lá
a gɛɛ dífe pù.
Ifêi pɔri dísonîi í li a dîa pɔ̂lu díkpɔara-ƃelai pɔ́
tã dí kɛ̀ Mɛni kpɔ̂lu sui.
Ɣâla pâi ǹɔii-ŋûŋ-ŋai dimɛni ŋáa têei
15“Tã a lɛɣɛ tã ńyãai a kánuu-namui,
ŋa pâi ǹɔii-ŋûŋ-ŋai dimɛni ŋáa têei lai.
Idɔŋ, berei í tùa lai,
bere ƃé da pâi tûai la a yá:
íkpɔɔi tua-perei a pâi pûi íŋûa.”
16Kúnuu-namui è mò Zuda-ƃelai dîa ǹyɛɛi,
“Yɛ̂ɛ berei kâ kâkpele la ŋálii-ŋwana kɔɛi su
ŋáyeê maa waai mai,
bere nɔ́ ƃé kâkɔlɛ-ma lɔii-ŋuŋ ŋai kélee da pâi kpêlei la zu
é lɛ́ɛ la zu dísu é kara.
Eezuɛ ŋɔyee-tɛɛ-maa
17“Kɛ́lɛ ǹúu da-ni da pâi pûi dí li Zãiyɔŋ yeei ma,
nàa a pâi kɛ̂i a kwaa maa waa.
Ǹyaŋ Zeeka ŋɔsuui su-ƃelai da pâi seêi ŋɔ́nɔ
ǹɔii ma nyii gáa a dínua pɔlɔ-ŋa pɔɔi.”
18Kúnuu-namui è mò ǹyɛɛi,
“Zeeka da Zosɛ dísuui su-ƃelai da pâi kɛ̂i yɛ̂ɛ ŋɔŋ.
Da pâi Isɔɔ ŋɔsuui su-ƃelai su karâi
yɛ̂ɛ berei ŋɔŋ a kala kèreŋ lai.
Ǹyaŋ Isɔɔ, ŋɔsuui su nuu da fé pâi lɛɛ̂i naa a vúlu.
19“Diai kùla Zuda lɔii kwara-peri, da pâi seêi Idɔŋ yee lɔii ma.
Diai kùla ǹyéei vóloi lii-perei, da pâi seêi Felesia-ŋai dílɔɔi ma.
Eezuɛ ƃelai kpêli-ŋai da pâi Ifiraŋ lɔii siɣêi da ŋɔtaa-leei Sameria.
Bɛŋsima ŋɔsuui su-ƃelai dí sée Gilia yee lɔii ma.
20Zuda-ŋai kùla Eezuɛ lɔii ŋua-perei
da pâi kulâi luɛ-laa su dí pá pôlu dí Fonisia lɔii siɣe
dí séri Zarefa taai kɔlɛ ma.
Zuda-ŋai kùla, Zerusâlɛŋ nyii-ŋai tɛ̀ Sadi taa sui,
da pâi liî pôlu dí daa-ŋai siɣe Zuda lɔii kwára pere.
21Diai Idɔŋ-ŋai yée mɛi ɣàlei,
da pâi tɛɛ̂i Zãiyɔŋ yeei ma dí kɛ́ Idɔŋ-ŋai mɛi.
Ǹyaŋ Kúnuu-namui a pâi kɛ̂i a kâloŋ ŋɔnûai mɛi.”
Currently Selected:
Obadaya 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia