Kɔlɔnikɔ Maa-ŋuŋ 24
24
Zâla láa soŋ-ƃelai dítii
1Berei ŋí ƃé dí Eelɔŋ ŋɔsuui ŋáa kɔ̀lɛ la. Eelɔŋ ǹônii-sinaai díkɛ̀ náaŋ: Nada, Abiu, Elieza da Itama. 2Kɛ́lɛ Nada da Abiu dí sàa dínaŋ é lɛ́ɛ pâi saâi. Dífe núu-kpune maa sɔlɔ ƃó ní dílɛɛ pâi saâi. Elieza da Itama nɔ́ ƃé lɛ̀ɛ a zâla-laa soŋ-ƃelai. 3Elieza ŋɔsuui su-nuui Zadɔ da Itama ŋɔsuui su-nuui Aimelɛ dí kpɔ̀ŋ Gâloŋ Deeƃé ma a gɛ́ɛ é zâla láa soŋ-ƃelai ŋáa kɔ́lɛ yɛ̂ɛ berei dítii kɛ́ pere è kɛ̀ lai. 4Dí ǹûai ŋí maa kpɛ̀ɛ dí gáa a gɛ́ɛ zinâai kɛ̀ a núu láa túɛ-ƃela Elieza ŋɔsuui sui dí kɛ̀ a dítamaa é tɛ́ɛ Itama ŋɔsuui ŋ̀ɔ-ŋai dîa. Nya ƃe dí Elieza ŋɔsuui ŋáa kɔ̀lɛ gîei puu káo lɔ́ɔlu mɛi da, dí Itama ŋ̀ɔ-ŋai ŋáa kɔlɛ gîei lɔ́ɔlu mɛi saaƃa. 5Elieza da Itama dísuui su-ƃelai da-ni díkɛ̀ tíi kɛ̂i Ŋ̀âla-pɛrɛ Kɛ́tɛi mu da-ni díkɛ tíi kɛ̂i Ɣâla mì. M̀ɛni ma, dí kpɛyɛŋ tòo a gɛ́ɛ dí díŋaa kɔ́lɛ a teniŋ ƃo-pere. 6Elieza ŋɔsuui da Itama ŋɔsuui su-ƃelai díkɛ kpɛyɛŋ toôi tɛi-tɛi. Gɛ́ɛ tí, Liiva-nuui Semaiya, Natɛniɛ ǹóŋ-surɔŋ, è dílaa pɔ̃yɛ Gâloŋ da ǹûa kpaya-kpayai ŋɛ́i-tuɛ. Zâla láa soŋ-nuui Zadɔ, Abiata ǹóŋ Aimelɛ, zâla láa soŋ-ƃelai dísuui mɛi-ƃelai da Liiva-ŋai dísuui mɛi-ƃelai kélee díkɛ̀ naa.
7Gbɛɣɛŋ m̀aa-ŋuŋ è ǹɛ̃ɛ Zeoiari ma, veerɛi é nɛ̃́ɛ Zedaiya ma. 8Zaaƃa ɣelei è ǹɛ̃ɛ Ariŋ ma, ǹáaŋ ɣelei é nɛ̃́ɛ Seoriŋ ma. 9Ǹɔ́ɔlu ɣelei è ǹɛ̃ɛ Makiza ma, m̀ɛi-da ɣelei é nɛ̃́ɛ Mizamiŋ ma. 10M̀ɛi-feerɛ ɣelei è ǹɛ̃ɛ Akozi ma, m̀ɛi saaƃai é nɛ̃́ɛ Abiza ma. 11M̀ɛi náaŋ ɣelei è ǹɛ̃ɛ Zesua ma, buu ɣelei é nɛ̃́ɛ Sekania ma. 12Buu-káo tɔnɔi è ǹɛ̃ɛ a Eliasi ma, buu-káo feerɛi ɣelei é nɛ̃́ɛ Zakiŋ ma. 13Buu-káo saaƃa ɣelei è ǹɛ̃ɛ Upa ma, buu-káo náaŋ ɣelei é nɛ̃́ɛ Zesebea ma. 14Buu-káo lɔ́ɔlu ɣelei è ǹɛ̃ɛ Beega ma, m̀ɛi-da ɣelei é nɛ̃́ɛ a Imɛ ma. 15Buu-káo lɔ́ɔlu m̀ɛi-feerɛ ɣelei è ǹɛ̃ɛ Ɛzi ma, buu-káo lɔ́ɔlu m̀ɛi-saaƃa ɣelei é nɛ̃́ɛ Apize ma. 16Buu-káo lɔ́ɔlu m̀ɛi náaŋ ɣelei è ǹɛ̃ɛ Petaɣia ma, buu-feerɛ ɣelei é nɛ̃ɛ Zeɣesikɛɛ ma. 17Buu-feerɛ káo-tɔnɔ ɣelei è ǹɛ̃ɛ Zakiŋ ma, gáo-feerɛ ɣelei é nɛ̃́ɛ a Gamu ma. 18Buu-feerɛ káo-saaƃa ɣelei è ǹɛ̃ɛ Dilaiya ma, gáo-náaŋ ɣelei é nɛ̃́ɛ Maazia ma.
19Dí ǹûai ŋí ni láa sìɣe yɛ̂ɛ berei dítii-ŋai kɛ́ pere è kɛ̀ la Yâwɛɛ ŋɔpɛ́rɛi mui. Díi-ŋai ŋí kɛ̀ pêre è kɛ̀ nɔ́ yɛ̂ɛ berei dínâŋ Eelɔŋ è wɔ́lɔ mò la dîa a gɛ́ɛ dí díkɛ gɛ̀ yɛ̂ɛ berei Eezuɛ-ŋai Díɣâlai Yâwɛɛ è mò lai.
Liiva ŋɔnuu-suui su-ƃalai ká ŋí kɛ̀
20Liiva-ŋai nuu-suui láa túɛ-ƃelai ƃɛ́ kɛ̀ a:
Amaraŋ ǹônii-sinaai Sebuɛ da Zedeia
21Isia è kɛ̀ a Leabia ǹâŋ.
22Selomi ǹâŋ láa ƃé kɛ̀ a Iza. Selomi ǹóŋ ŋɔloŋ láa ƃé kɛ̀ a Zaa.
23Iburɔŋ ǹônii-sinaai ƃé kɛ̀ a: Zeria, Amaria, Zeɣaziɛ da Zekomeaŋ. Dílaa ká ŋí yɛ̂ɛ berei dímaa sɔlɔ pere è kɛ̀ lai.
24Uziɛ è kɛ̀ a Maka ǹâŋ gɛ́ ƃò a Sami ǹóŋ-loŋ. 25Maka ǹêɣe ƃé kɛ̀ a Isia. Zɛkɛraya ǹâŋ láa kɛ́ ƃò a kùla Isia ǹônii-sinaai sáma.
26Melali ǹônii-sinaai ƃé kɛ̀ a Mali da Musi. Zaaziɛ ǹônii-sinaai ƃé kɛ̀ a Bino. 27Zaaziɛ ǹóŋ Melali è lôŋ-sinaa saaƃa maa sɔlɔ ƃo. Dîa ƃé kɛ̀ a Bino, Soâŋ, Zakɔ da Ibili. 28Maali ǹônii-sinaai láa túɛ-nuui ƃé kɛ̀ a Ilieza nyíi vé lóŋ-surɔŋ da maa sɔlɔ ƃó ní. 29Kesi ǹóniii-sinaai láa-tuɛ nuui ƃé kɛ̀ a Zeramii. 30Musi ǹônii-sinaai ƃé kɛ̀ a: Maali, Ɛdɛ, da Zɛrimɔ. Diai ŋí ƃé kɛ̀ a Liiva ŋɔsuui su-ƃelai.
31Diai kɛ̀ a dínuu-suui su-ƃelai láa túɛ-ƃelai da dílêɣe-ni dí kpɛɣɛŋ tòo a gɛ́ɛ dí dílɛ dítii-ŋai kɛ́ mɛni ma yɛ̂ɛ berei dí díkaayɔ-ŋai kɛ̀ a Eelɔŋ ǹônii-sinaai lɛ̀ lai. Dí mɛnii ŋí kɛ Gâloŋ Deeƃé, Zadɔ, Aimelɛ, zâla láa-soŋ-ƃelai da Liiva-ŋai ŋɛ́i-tuɛ.
Currently Selected:
Kɔlɔnikɔ Maa-ŋuŋ 24: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia