Neh 1
1
Re' Nehemías xub'an rutiij chikiij i rutinamiit Jerusaleem
1Re' taqe q'orik wili xnutz'ihb'aaj i hin, hin i Nehemías rak'uun i Hacalías, re' noq juninaq haab' chik rokiik chi reyil i Artajerjes chupaam i poh Quisleu re' noq wilkiin chupaam i tinamit Susa, re' wilik wii' chi taaq'anik i reey. 2Xponik wuuk' i was Hanani, ruch'ihil taqe i kiib' ixib' i winaq xi elik reje Judá. Eh xnupahqaaj keh nik' wach noq wilkeeb' i aj Judío xi k'amarik reje Babilonia, eh xi sutinik wo' chik cho Jerusaleem. Eh xnupahqaaj wo' hoq nik' wach noq wilik i Jerusaleem. 3Eh re' keh je' wili xkiq'or weh: Re' taqe aj Judío xi sutinik cho Jerusaleem ti' i k'achi' kikiik wii' k'ixb'ilaal i k'ahchi' kik'ulum, re' tz'aq kotimaj wii' riij i tinamit Jerusaleem ch'a'lojinaq wach ak'al, eh k'ahtinaq taqe ru puertahiil, inki taqe.
4Noq xb'iraj i taqe i q'orik wili, ma' k'isiin ta xtib'ik nuk'ux, xnutzunaa' wiib' chi oq'ik. Eh xnub'an nutiij chuwach i kiib' ixib' q'iij chi ma' nub'anam ta nuwa' nuhaa' chuwach i Dios wilik cho pan taxaaj. 5Je' wili xnuq'or panutiij: QaJaaw Dios wilkaat pan taxaaj xa re' wo' hat i Dios nim awajaawriik xiik' naah yohb'aalil awach. Ruum re' hat i na a'n chi juneliik i ayejaam wach. Eh inaketelaaj kiwach taqe i kik'axwik aweh, eh inki a'n taqe ruq'or aak'uhb'aal. 6QaJaaw Dios chab'iraj tii chakoj tii rehtaal chib'ih jariik i nupahqaaj aweh i hin, hin awaj kamanoom. Re' hin chi q'iij chi aq'ab', inupahqaaj kuyb'al kimahk aweh i wuch aj Israel, re' taqe awaj kamanoom. Korik wo' hoq noq ximahkunik chawach i hin, je' wo' taqe i awach weh. 7Xti korik wo' hoq chi xiik' naah yib'kiil wach qohb'anik chawach. Ma' qa a'n taj i ruq'or taqe aak'uhb'aal je' wo' hoq i qataq'ab'jiik i na a'n, je' wo' hoq i qoh atijeej wii', re' taqe aak'uhb'aal xakanaa' reh i Moisés awaj kamanoom. 8K'oloq panak'ux i xaq'or reh i Moisés chi wila' re' hoj xoj mahkunik chawach xaq'or chi naa atukem qawach chupaam i ju'jun chi tokoom tinamit. 9Eh xaq'or wo' hoq chi wila' xojsutinik wo' chik awuuk' wixqanimaj wo' chik taqe aak'uhb'aal, wila' xqa a'n taqe i ruq'or. Xaq'or chi naa wo' chik kooj ak'amam cho chupaam i santo laj tinamit asik'im cho wach chi aa ye'aab', atoob' ta atukem naq chik qawach chupaam taqe i tokoom tinamit wilkeeb' sut i wach ak'al.
10Je' aj re' noq re' hat QaJaaw Dios maqoh sahchik panak'ux ruum hoj wo' aatinamiit xoj ako'leej chaloq ruuk' i runimaal awajaawriik. 11QaJaaw Dios i nupahqaaj aweh chi nee ta tiinab'iraj nutiij nee ta tii nayeew weh i nupahqaaj aweh i hin awaj kamanoom. Re' inqaaj i hoj re' chi naaqaye'em aloq'il, qoh atoob'eej reh chi nee nelik korik chi qawach ineenqapahqaaj ree reey. Neeta naq i ruketelaaj qawach i reey kinki panutiij, chupaam i ye'aab' re' re' i hin, hin naq ye'el ruhaa' i reey.
Currently Selected:
Neh 1: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.