Mal 1
1
Is camc'ulal Dios yin Israel
1A ton wal k'anej Jehová ti' max yal cham Malaquías bay conob Israel.
2Chi yalon Jehová axca ti': Ay wal in camc'ulal e yin, quin chi. Palta ayex ti', caywal ti' che yut tak'wok e ba axca ti': ¿Tzet chi yun jojtaknen elok, tatol ay a camc'ulal jin? quex chi. Palta ayin chi wala': ¿Man mi tok tol yuẍtak ba Esaú yetok Jacob? Palta max in camc'ulnej Jacob, 3axa Esaú max in cabc'ulnej can elok. Axa tx'otx' siquilal tx'otx' bay cajan eb yinatil Esaú, max wutcantok yin tz'inan tx'otx'al, axac'al no xolakteal no' cajan bay tu', quin chi, ẍi Jehová.
4Ta a eb edomita, is yinatil Esaú, chi alon axca ti': Caxc'al max on uchlaytok, palta ok co ca watx'nej aj co conob junelxa, ta ẍi eb, cax chi tak'wi Jehová Cham Yajaw yin Masanil axca ti': Ayin ok wuch lajwok junelxa, caxc'al chi ca watx'nej aj eb. A nación eb tu', ok yal eb anima yin axca ti': Nación caw wal yob, c'al Nación tol ayoc yowal c'ul Jehová yiban yin tojbalk'inal, ẍi eb. 5Ayex israel ex ti', ok cam wal e yiloni, cax ok e yalon axca ti': A wal Jehová ti', yelxac'al miman yayji oc Cham bay masanil yulyibank'inal ti', man asannejok bay yul co mojon, quex chi, ẍi Jehová.
Chi ak'lay cuenta eb sacerdote yuj Jehová
6Chi yalon c'apax Jehová, Cham Yajaw yin Masanil bay eb sacerdote axca ti': A eb c'ajolej, ay yelapnok is mam eb yul sat; eb chekbej, ay c'apax yelapnok is patrón eb yul sat. Yuj tu', tatol mamej in ayex e yaloni, ¿tzet yuj xan tol c'am pax welapnok yul e sat? Yetok c'apaxok, tatol E yajawil in e yaloni, ¿tzet yuj xan c'am pax welapnok yul e sat? Ayex ti', tol chin e yintaknej elok, cax chito wal e yalon pax axca ti': ¿Tzet chi yun pax ach jintaknen elok? quex chi. 7Ayex ti' che yitek ixim pan man is mojalilok bay waltar, cax chito wal e k'anleni: ¿Tzetto wal yin chi oc co mul ayach? quex chi. Ayex ti' chi oc e mul, yujtol a waltar che yintaknej elok. 8¿Xin ta man yobok, ta che yak' no no' yin xajanbalil, no' c'am chi je' yilwi, no' k'ajil, c'al no' ya'ay? Iektok juntzan no no' tu' e sabalok bay eb e yajawil. ¿Ok mi wal tzaloj eb e yetok? ¿Ok mi wal cha eb ayex che na'? 9Chi yal eb anima ayex: Ex sacerdote, k'anek bay Dios, yet watx' chi ok' c'ul jin, ẍi eb conob. Ta ok e yak' juntzan e yofrenda tu' axca tu' ayin, Jehová Yajaw in yin Masanil, tokwal ok in cha' yin tzalojc'ulalil. 10Matawal a junok ex ayex ti' che makchej is puertail templo, yet watx' man nabaok chi oc k'ak'al waltar. Yujtol ayin Jehová in, Yajaw in yin Masanil, caw wal c'am in tzalojc'ulal e yetok, tamwal oktoc'al in cha e yofrenda tu'. 11Ayin caw chi wala' tol miman welapnok yul sat masanil nacionlak bay yulyibank'inal, cax chi yak'on tz'a eb xajanbal, c'al yak'on eb is yofrenda ayin yin is mojalil, yujtol miman welapnok yul sat eb. 12Palta ayex ti', c'am welapnok yul e sat, yet che yaloni, tol c'am yelapnok waltar, a ton yet che yak'on juntzan loj yin xajanbalil ayin, tol yobxa yul e sat. 13Ayex ti' che yal c'apax axca ti': Mayal ispay el juntzan ti' juj, quex chi, cax chex aj ch'anajok. Lajwi tu' che yak'on e xajanbal ayin, no' tol elk'anebil e yuj, no' k'ajil, c'al no' ya'ay, ¿tom che na' tol ok in cha' juntzan tu' ayex? 14Ayin miman rey in, ay is may wayji oc xol masanil nacionlak, xan catabnebil junok mactxel tol chi yak' is ti' yak'on junok no' is calnel tol caw wal watx' yin xajanbalil, cax chi q'uexoni, axa junok no' ay is tacnakil chi yak'a', ẍi Jehová Cham Yajaw yin Masanil.
Currently Selected:
Mal 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989