Jn 9
9
Nak max jakchajcan sat yuj Jesús
1Axa yet junel, ayoc Jesús yin beyil yetok eb is cuywom, max yilon eb jun winak c'am chi je' yilwi yettaxc'alta' max alji. 2Axa k'anlen eb cuywom tu' axca ti':
—Meẍtol, ¿tzetlaj yuj xan c'am chi je' yilwi jun winak ti' yintax yaljubal? ¿Ami eb mamej txutxej ay is mul, ma a nak ay is mul? ẍi eb bay Jesús.
3—A jun winak ti', man yujok mul is mam ma is txutx, xan caytu' yayji, tamwal yuj c'apax is mul nak, palta tol chi yochej Dios chi tx'ox is mayk'ak'al yin nak, xan caytu' yayji. 4Yowalil chin watx'nej is mulnajil Cham max in chekontek, yak'ban ayto c'u. Yujtol a yet mayal toj c'u, c'amxa mac chi je' mulnaji. 5Yet ayinto ec' yulyibank'inal ti', axca sakk'inalok eb anima wayji, ẍi Jesús bay eb.
6Max lajwi yalon juntzan ti', axa tzubli ay sat tx'otx' tu', cax max watx'nen jab tz'otz'ew yetok tzub tu'. Axa joonoc yin bak' sat nak c'am chi je' yilwi tu'. 7Lajwi tu', max yalon bay nak:
—Asi' bay a' najab pean ajok, a' chi yik Siloé. A tu' cha tx'ajil a sat tu', ẍi bay nak. (Siloé chi yal elapnok, Ibiltek.)
Lajwic'al tu', max toj nak tx'ajon el sat bay a' tu'. Axa yet max meltzoji, chixa je' yilwi. 8Axa eb is vecino nak, c'al jantak eb max ilon nak yin k'anoj limosna, a eb max alon axca ti':
—A jun winak ti', cochwal tol a jun chi ay chotan k'anoj limosna, ẍi eb.
9—A ton nak, ẍi juntzanxa.
Palta ay juntzanxa chi alon paxok:
—C'amak. Manak. Toc'al mi lajan yili jun ti' yetok nak c'am chi je' yilwi tu', ẍi eb.
Axa yalon nak tu':
—Ayin toni, ẍi bay eb.
10—¿Tzet max yun jakchaj a sat tu xin? ẍi eb bay.
11—A jun winak chi yik Jesús max ak'on jakchajcan in sat ti'. Max watx'nej jab tz'otz'ew, max joonoc yin in bak' sat ti'. Max lajwi tu' max yalon ayin axca ti': Asi' bay a' najab pean ajok, a' chi yik Siloé. A tu' cha tx'ajil a sat bay yul a', ẍi ayin. Axa bet in tx'ajon el in sat ti'. Caytu' max yun jakchajcanok, ẍi nak.
12—¿Baytal ay jun winak tu' tinani'? ẍi eb bay.
—Man wojtakok, ẍi bay eb.
A eb fariseo max k'anlen tzet max yun jakchaj sat nak
13Lajwi tu', max ilaytok nak yuj eb bay eb fariseo. 14C'ual xewilal yet max jakchajcan sat nak yuj jab tz'otz'ew max watx'nej Jesús yetok is tzub. 15Yuj tu' xan max k'anlej eb fariseo tu' bay nak axca ti':
—¿Tzet wal max yun jakchaj a sat tu xin? ẍi eb.
—A Jesús max joon oc jab tz'otz'ew yin in bak' sat ti'. Lajwi tu', max in tx'ajon elok. Yuj tu' xan watx'xa wilwi tinani', ẍi nak.
16Axa yalon jaywan eb fariseo tu' bay nak axca ti':
—A jun winak max jakon a sat tu', man yetok Dios, yujtol c'am chi yikej c'ual xewilal, ẍi eb.
Palta ay jaywanxa eb max alon axca ti':
—Man yobtakwomok Cham Jesús. A junok yobtakwom, ¿xin ta chi je' yuj tx'oxon juntzanok milagro axca juntzan chi tx'ox ti'? ẍi eb.
Xan cab pojan max eloc eb anima tu'. 17Yuj tu' xan max k'anlej eb junelxa bay nak chixa ilwi tu' axca ti':
—Axa ach ach ti', ¿tzet cachi yuj Cham max jakon a sat tu'? ẍi eb bay nak.
—Ayin ti', chekbej Dios yayji in naoni, ẍi nak.
18Palta eb yajaw bay Judea tu', maj cha eb yabej, tatol tolto max ilwi aj nak. A naon eb, tol chi ilwic'altac'a. Catatu bian, max yawten eb is mam c'al is txutx nak. 19Ata wal bay eb max k'anlej el eb axca ti':
—¿A mi nak e yuninal c'am chi ilwi yintax yaljubal che yal ti'? ¿Tzet xan chixa ilwi pax nak xin? ẍi eb bay eb.
20—A ton nak, c'amc'alta' chi ilwi yintax yaljubal. 21Palta man jojtakok tzet max yun jakchaj sat nak. Man c'apax jojtakok mac max jakoncan bay nak. Ilabi, ayxa yabilal nak. ¿Tzet xan manak bay nak che k'anlej e yabej? Ok je' yalon ayex, tzetbil wal max yun jakchajcan sat tu', ẍi eb.
22Cac'al tu' max yut yalon eb, yujtol caw wal chi xiw eb yuj eb yajaw xol eb aj Judea tu', yujtol toxa max yal eb yajaw tu' axca ti': Tatol ay mac ok alonok tol a Jesús, a ton Cham Cristo, ẍi, ok juktej eltok yul nail culto ti', ẍi eb. 23Yuj tu' xan asanc'al jab tu' max yal is mam c'al is txutx nak tu': Ilabi, ayxa yabilal nak, ¿tzet xan manak bay che k'anlej e yabej? ẍic'al eb.
24Lajwi tu xin, max awtelay pax nak chixa ilwi tu' yuj eb junelxa, cax max yalon eb bay axca ti':
—Caw wal yel chal satak Dios, yujtol jojtak, caw wal yobtakwom jun winak chala' tol a' max jakon a sat tu', ẍi eb bay nak.
25—Ayin ti', man wojtakok ta yobtakwom, ma c'amak. C'am chi je' waloni. Asan jun ti' wojtak, tol a yet yalantok, c'am chi je' wilwi jabok, axa tinani', chixa je' wilwi, ẍi nak.
26—Palta, ¿tzet wal max ach yut xin? ¿Tzet max yut jakon a sat ti'? ẍi eb bay nak.
27—Mayal wal ayex tzet max yun jakchaj in sat ti', palta c'am che cha e yab tzet chi wala'. ¿Tzet xan che yochej chi wal pax ayex junelxa? ¿Tom che yochej chex oc is cuywomok c'apaxok? ẍi nak bay eb yajaw tu'.
28A yet max yaben eb juntzan ti', cax max buchwaj aj eb yin nak, max yalon eb axca ti':
—Ach ti', is cuywom ach ton jun winak tu'. A pax ayon ti xin, is cuywom on Moisés. 29Jojtak tol max k'anjabcan Dios bay Moisés tu', palta a Jesús tu', man jojtakok mac ak'nej yikbej, ẍi eb.
30—¡E…! ¿tzet chi yal tu'? Ayex ti', che yala' tol man e yojtakok mac ak'nej yikbej, palta ilabi, max jakchaj pax can in sat ti' yuj. 31Jojtak, caw wal c'am chi yab Dios is txaj eb yob is beybal. Asan eb chi yal ba bay, eb chi iken tzet chi yala', asan eb tu' chi ablay yet. 32Yettaxc'al yichbanil, c'amto junok chi jab k'umal tol chi jak sat junok mac c'am chi je' yilwi yintax yaljubal. 33K'inalok ta man chekbejok Dios Jesús tu', c'am mi jabok tzet chi je' yuj, ẍi nak bay eb.
34—Ach ti', yin mulej aljinak ach, ¿tom chochej ach ok on a cuyu'? ẍi eb bay nak.
Cax max ilay eltok nak yul nail culto tu' yuj eb, cax majxa chaoctok eb xol.
A eb chi jakchajcan sat yin yet Dios
35Axa max yaben Jesús tol max ilay eltek nak max jakchajcan sat tu' bay yul nail culto yuj eb, yuj tu' xan a yet max ilchaj yuj, max yalon bay nak axca ti':
—¿Chim aoc a c'ul yin Cham Chekbiltek yuj Dios xol eb jet animail? ẍi bay nak.
36—Mamin, al ayin mactxel jun tu', yet watx' chi waoc in c'ul yin, ẍi nak.
37—Maxax el yin. Ayin ton chin k'anjab etok ti', ẍi bay nak.
38Lajwi yalon Jesús axca tu xin, max bekon ay jajnaj ba nak satak Cham, cax max yalon nak bay axca ti':
—Mamin, chi waoc in c'ul en, ẍi nak.
39Axa yalon Cham bay nak tu':
—Yuj watx'ji el eb anima wuj, xan max in jay bay yulyibank'inal ti', yujtol ay eb c'am chi je' yilon yet Dios tinani', palta ok jakchaj sat eb tu' wuj. Ay nanxa eb, caw wal chi je' yilon yet Dios naoni, palta a eb tu', axca tol ok etax el sat eb wuj, ẍi Jesús.
40A yet max yaben jaywan eb fariseo ayic' bay tu' juntzan k'anej tu', max yalon eb bay axca ti':
—¿Tom cha na' tol c'am chi je' jilon yet Dios? ẍi eb.
41—Matawal chi nachaj el e yuj tol c'am chi je' e yilon yet Dios, c'am mi chi can e yobtakil e yiban. Palta yujtol che yala' tol chi je' e yilon yet Dios, xan chi can e yobtakil e yiban.
Currently Selected:
Jn 9: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989