2 Ts 1
1
Is yichbanil carta Pablo
1Ajun Silvano yetok Timoteo wetok ayin Pablo in ti', cax chi waontok jun carta ti' ayex, ex creyente aj Tesalónica. Yet exxa co Mam Dios, yet exxa c'apax Cham Jajawil Jesucristo. 2Yak'okabc'al co Mam Dios, yetok Cham Jajawil Jesucristo is watx'c'ulal ayex bay tu'. Yak'okab c'apax is junc'ulal ayex.
Yailal ok cha' eb yob is beybal yet ok jay Cristo
3Ex wuẍtak, ex wanab, yowalilc'alta' chi jal yuj diosal bay Dios e yuj. Moj jalon yuj diosal tu' e yuj, yujtol junjun c'u che yac'al oc Dios yin e c'ul. Yetok c'apaxok, yelxac'al lanan e camc'ulnelen e ba. 4Ayon jun chex ec' jal watx'il xol eb creyente bay junjun yiglesia Dios, yujtol xiwil tzet chi alay oc e yiban, xiwil yailal lanan e yiloni; palta caw wal tec'an che yut e yaon oc e c'ul yin Dios, cax lanan e yak'on techajok. 5Cayton tu' chi yun txecloj elok, tol tojolc'al chon yut beyc'ulnen Dios. Chi yaltek e yuj tol e moj e yoc yul k'ab Dios, Cham lanan e yaben yail yuj tu'.
6A eb chex etnen tinani', a Dios ok aon oc yailal eb. Bayc'al ijan ton chi yut Dios axca tu'. 7Lanan ton e yaben yail jetok, palta ok on yiel Dios xol yailal tu' yet ok jay Cham Jajawil Jesús. Ok tit Cham bay satcan yetok eb yángel xiwil is yipalil. Ok ayol Cham xol jun k'ak' chi chaw xak. 8A yet tu' ok yaoc yailal eb maj ojtaknen el Dios, c'al eb maj iken k'anejal yet colbanilej aycan yuj Cham Jajawil Jesús. 9Ok tokcan eb bay c'aybanilal yin tojbalk'inal. Ok ilay el eb c'atan Cham Jajawil tu', yet watx' c'amxa oxlajon bak'in ok yil eb is watx'ilal Cham, c'al is yipalil. 10A yet jun c'ual yet ok jay Cham Jajawil tu', caw wal miman yelapnok Cham yul co sat ayon yet onxa Cham ti', ok ji can Cham mac on creyente onxa ti'. Ay e yalon e yet yin jun tu' yujtol max e yaoc yin e c'ul jun abix ec' albilcan ayex juj.
11Yuj ton jun tu' xan chon txajlic'al e yuj. Chi co k'anon bay co Diosal e yuj, yet watx', watx'okabc'al ex yul sat, yujtol a' awtenej ex oc yetok. Chi co k'anon c'apaxok yet watx' chi yak' yipalil ayex, yet watx' che beybalnej masanil tzet watx' axca che yochej, c'al yin e mulnajil che yun bay, yujtol che yaoc yin e c'ul. 12Ta caytu' che beybalnej, ok al-lay watx' k'anej yin Cham Jajawil Jesucristo e yuj, cax ok ex yalon c'apax Cristo watx'il. Caytu' ok ex eloc axca tu', yujtol a co Diosal, c'al Cham Jajawil Jesucristo ok tx'ox watx'c'ulal ayex.
Currently Selected:
2 Ts 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989