Rom 1
1
Jun k'olbebl tu'n Pablo cye ocslal tuj Rom
1Akine Pablo, majen kine te Jesucrist, txco'maj kine tu'n Dios tu'n woque apostl, ex pa'maj kine tu'n te pacbalte tkanil colbil aju ma tzaj tk'o'n Dios.
2Aju tkanil lu tzaj ttziyan atxix ojtxi cyu'n ke t-sanjel ex in tma'n cyuj ke xjan Tu'jil. 3Aju tkanil colbil lu in yolin ti'j Tc'wa'l Dios, aju Kajaw Jesucrist; oc Jesucrist te xjal tej tul itz'j ti'j tiyjil David. 4Pero el chic'e' tu'n tipumal Dios ka Tc'wa'l Dioste. Ate Xewbaj Xjan tzaj chic'bante tej tjatz ank'in Jesús cyxol cyimni.
5Ex nok tu'n Jesucrist ma nc'ame jun xtalbil ex ma tzaj tk'o'n woclene tu'n woque te apostl, tu'ntzun t-xi cyniman xjal tyol Jesucrist ex tu'n cyocslan ti'j cyuj cycyakil nasyon, tu'ntzun tnimanjtz aju tbi. 6Ax icx cyeye ate'ye cyxol ke jlu, ex o che txconjtze tu'n cyoque tuj tcwent Jesucrist. 7In xi ntz'ibane cyeye cycyakile akeye ate'ye tuj tnam Rom, c'ujla'n keye tu'n Dios, ex ma che txconjtze tu'n cyoque o'cx te Dios. Awt Kman Dios tuc'ix Kajaw Jesucrist che tzaj k'onte xtalbil cyeye ex tu'n tke'xix cyc'u'je.
Tajbil apostl Pablo tu'n t-xi' que'yil cye ocslal tuj Rom
8Tnejelxix in xi nk'o'ne chjonte te Dios aju in chin ajbene te, in xi nk'o'ne chjonte cyi'je cycyakile nok tu'n Jesucrist, porque tuj tcyakil twitz tx'otx' ma tz'el tkanil cyocslable. 9Porque in chin ajbene te Dios tu'n tcyakil wanmiye, in chin pacbane tkanil ba'n in yolin ti'j Tc'wa'l, ex ax Dios testiw wi'je ka cucx in che tzaj nna'ne tuj nna'j Diose. 10In chin cubsane twitz Dios alcye jun tumel tu'n npone cyuc'ile, ba'nwt npone ka ic tajbil Dios. 11Porque wajbile tu'n toc nque'yine cywitze, tu'n t-xi nk'o'ne jun onbil cyeye tuj cyocslable, tu'ntzun cywe'xixe. 12Cyja'tzun oc npone cyuc'ile, cbajel kcyuwsan kib kxolx nok tu'n kocslabl, tu'n cyocslable ex tu'n wocslable.
13Erman waje tu'n cybinteye, nimcu maj o wajbeye tu'n nxi'ye que'yil cyeye pero minti' in ten ambil tu'nju at nim wak'une, o wajbeye tu'n nxi'ye ak'nal cyxole tu'n cyocslan mastl xjal, ic tza'n o bant wu'ne cyuj mastl nasyon cyxol xjal mya judiy ke. 14In nna'ne ka il ti'j tu'n t-xi nma'ne tkanil ba'n cye cycyakil xjal: cye xjal grieg ex cye xjal mya grieg ke, cye xjal aj nabl ex cye xjal mya aj nabl. 15Cyja'tzun, ic tza'n weye, ma cub nximane tuj wanmiye tu'n t-xi nma'ne tkanil colbil ax icx te cyeye akeye ate' tuj tnam Rom.
Aju tipumal tkanil ba'n
16Mlay chin ch'ixwiye tu'n t-xi nma'ne tkanil ba'n aju evangelio, porque tipumal Dioste tu'n cyclet cycyakil xjal akeju ma che ocslan, tnejelxix cye xjal judiy ax icx cye xjal mya judiy ke. 17Porque tu'n tkanil ba'n in yec'unjtz tza'n tten tu'n koc te tz'aklxix tu'n Dios; nok o'cx tu'n kocslabl tu'n koc te tz'aklxix ic tza'n in tma'n tuj Tu'jil: Aju xjal tz'aklxix, tu'n tocslabl c'ank'il.
Cycyakil xjal at cyil
18Porque max tuj cya'j in tzaj tk'o'n Dios castiw cyibaj xjal minti' tchi Dios tuj cywitz ex binchal mya ba'n ke, tu'nju cybinchben mya ba'n mako'n cyu'n aju yol ax toc. 19Cycyakil xjal jacu tz'el cynic' ti'j ka at Dios, porque o tzaj tyec'un Dios cye. 20Masque minti' k'ancha'l te Dios, pero jacu tz'el knic' ti'j ka ma ko cub ten ximal ti'j tcyakilju o tbincha. Cyja'tzun, chic'lxix ta', atxix tej tbant twitz tx'otx' nne'l knic' ti'j ka at Dios ex aju tipumal minti' bajsbil te. Cyja'tzun minti' cycolbil cyib xjal tu'nju minti' in che niman te Dios. 21Masque el cynic' ti'j Dios, pero minti' jaw cynimsa'n tbi, ic tza'n mya Dioste tuj cywitz; ex minti' xi cyk'o'n chjonte te; nok o'cx cub cyximan aju nokx gan, ex e oc minti' cynabl, ex aju cyanmi tuj klolj ta'. 22Oc cyk'on cyib te aj nabl, pero e oc minti' cynabl. 23Cyaj cycolin tu'n cyc'ulun twitz ju Dios ma'xix toclen ex mlay naj, ex e c'ulun twitz tilbilal xjal aju cnajel ex twitz cyilbilal chyu'j, ex twitz cyilbilal jil cyaje cykan, ex twitz cyilbilal lobaj.
24Tu'ntzunju, e je'x ttzokpi'n Dios tu'n cybinchante mya ba'n, tu'n tbaj cytz'ilsan cyib ic tza'nx tajbil cyanmi; cyja'tzun cub cyk'o'n tch'ixwi cyximlal cyxolx. 25Cyaj cyk'o'n aju tyol Dios axix toc ex xi cyniman aju nic'aj yol, e c'ulun cywitz ke tch'isben Dios ex e ajben cye; minti' e c'ulun twitz Dios aju binchalte tcyakil, aju ba'n tu'n tnimanjtz tbi te jumajx. Icxwitju.
26Tu'ntzunju, e je'x ttzokpi'n Dios tu'n cybinchante aju tajbil cychibjal elni ti'j cwent; ke xu'j cyaj cyk'o'n cymojbabl cyib tuc'il cychmil, ex cybincha aju mya k'o'n cye xjal tu'n cybinchante. 27Ax icx cybincha xinak, cyaj cyk'o'n cymojbabl cyib tuc'il cyxu'jil, pon tc'u'j jun ti'j juntl, ex cybincha cyxolx aju ch'ixbajil tbinx, e yaẍin xinak tuc'il juntl xinak, cyja'tzun cub tk'o'n Dios cycastiw tu'nju otok che el tzpet.
28Ex tu'nju minti' cub tuj cywitz tu'n t-xi cyniman Dios, axte Dios cyaj k'onte cye tu'n tel tzpet cynabl tu'n cybinchante aju mya tuj tumel. 29Nojni tuj cyanmi tu'n tcyakil mya ba'n, [aj pajil ke], nimcu mya ba'n in cybincha'n, in pon cyc'u'j ti'j nimcu, mya ba'n ke, at tlo'ch cyc'u'j cyi'j xjal, byol xjal ke, jawni che k'ojin, sbul ke, cucx in che yolin cyi'j cyuc'il ka mya ba'n ke, ẍtak'il yol ke, 30si'mil yol ke, ic'un Dios cyu'n, yasul ke, jawni ke, in jaw cyniman cyib, o'cx in che ximan ti'j alcye mastl mya ba'n tu'n tbant cyu'n, miban che niman te cyman, 31minti' cynabl, minti' in japun cyyol cyu'n, minti' cyc'ujlalil cyi'j xjal, cyc'i' cub cynajsa'n til juntl, minti' tk'ak'bil cyc'u'j ti'j juntl. 32Masque ba'n tley Dios cyu'n jatum in tma'n ka il ti'j tu'n cycyim cycyakil keju in che binchante tcyakil jlu, mya nok o'cx in cybincha'n tcyakil mya ba'n, ax icx in che tzalaj cyi'j txkantl xjal in che binchante mya ba'n.
Currently Selected:
Rom 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993