2 Juan 1
1
Jun k'olbebl tu'n apostl Juan
1Akine ansyan, in xi ntz'ibane teya erman xu'j, cyuc'ix ke tala sc'o'maj tu'n Dios; ax toc c'ujla'n keye wu'ne, ex mya nok o'cx wu'ne, ax icx cyu'n cycyakil keju ojtzki'n ju yol axix toc cyu'n. 2C'ujla'n keye wu'ne tu'n tlaj ju yol axix toc at tuj kanmi ex ax ctel kuc'il te jumajx. 3Ctzajel k'o'n xtalbil cyeye tu'n Kman Dios ex tu'n Jesucrist aju Tc'wa'l, ex ctzajel k'ak'an cyc'u'j cyi'je, ex tu'n tke'xix cyc'u'je, tu'nju ma che oc lpe'ye ti'j ju yol axix toc ex at cyc'ujlalile.
Aju mandamyent tu'n tten kc'ujlalil
4Nimxix ma chin tzalaje tu'nju ma wile junjun tala in che oc lpe' ti'j ju yol axix toc, ic tza'nx ju mandamyent tzaj tma'n Kman Dios ke. 5Ja'lotzun chin cubsale twitza erman xu'j, tu'n kc'ujlante kib kxolx. Mya jun ac'aj mandamyent in xi ntz'ibane teya, nok o'cx aju mandamyent at kuc'il atxix t-xe tnejel. 6Ka c'ujla'n Dios ku'n, che japunel ke tmandamyent ku'n. Axtzun tmandamyent jlu ic tza'n o cybiye atxix t-xe tnejel, tu'n tten cyc'ujlalile.
Keju in che sbun
7Porque nimcu in che bet tuj tcyakil twitz tx'otx', in cyma'n ka mya ax toc xjal te Jesucrist tej tul tzalu twitz tx'otx'. Akeju in che k'mante jlu sbul ke ex aj k'oj ke ti'j Crist. 8Ten cycwente cyi'je tu'n mi'n tnaj twitz cyak'unbene, nok o'cx tz'oc tililx cyu'ne tu'n cyc'monteye jun twi cyc'u'je tz'aklxix.
9Ka at jun xjal nne'l txalpuj ex minti' in cyaj ten tuj t-xnak'tzbil Crist, minti' Dios tuc'il; atzun teju ma cyaj ten tuj t-xnak'tzbil Crist, atzunju at Kman Dios tuc'il ex at Tc'wa'l Dios tuc'il. 10Ka at jun xjal ma pon cyuc'ile ex mya a xnak'tzbil lu in tma'n, mi'n tz'ocx cyc'mo'ne tuj cyjaye ex mi'n txi cyk'olbe'ne; 11porque alcyeju ma txi k'olben te, at toclen ti'j ju tbinchben xjal mya ba'n lu.
Jun yol te mancbil
12At nimcu tu'n t-xi nma'ne cyeye, pero mi'n wajbile tu'n t-xi ntz'ibane tuj u'j ex tu'n tint; porque ximan wu'ne tu'n nxi'ye cyuc'ile ex tu'n nyoline cyuc'ile ex tu'n toc kque'yin kwitz, tu'ntzun ktzalaj nimxix.
13In xi k'olbe'na cyu'n ke tal termaniya aju sc'o'maj tu'n Dios. Icxwitju.
Currently Selected:
2 Juan 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993