2 Corint 1
1
Xi ttz'iban apostl Pablo jun u'j cye ocslal tuj Corint
1Akine Pablo, apostl kine te Jesucrist nok tu'n tajbil Dios, ex tuc'ix erman Timotey at wuc'ile. In xi ktz'ibane cyeye akeye ocslal ate'ye tuj tnam Corint, etzan keye tu'n Dios, cyuc'ix cycyakil ocslal ate' tuj tcyakil tx'otx' Acaya. 2Awt Kman Dios tuc'ix Kajaw Jesucrist che k'onte xtalbil cyeye ex tu'n tke'xix cyc'u'je.
Aju yajbil te Pablo
3Knimsa'nctz tbi Dios aju Tman Kajaw Jesucrist, atzunte Mambajju cucx in k'ak'an tc'u'j ki'j, ex atzunte Diosju cucx in tk'ukba'n kc'u'j. 4In tk'ukba'n Dios kc'u'j tuj tcyakil yajbil ke, tu'ntzun tbant kk'ukbante cyc'u'j keju in che yajlanjtz, ic tza'n ke ma k'ukbanjtz kc'u'j tu'n Dios. 5Porque ic tza'n nim in ko yajlanjtz tu'n tlaj ocslal ko' ti'j Crist, ax icxtzun nim in k'ukbanjtz kc'u'j tu'nx Crist. 6Cyja'tzun, ka ma ko yajlanjtze, at tajben jlu tu'n tk'ukbanjtz cyc'u'je ex tu'n cyclete; ex ka ma k'ukbanjtz kc'u'je tu'n Dios, ax icx at tajben jlu tu'n tk'ukbanjtz cyc'u'je; cyja'tzun in k'ukbanjtzxix cyc'u'je tu'n tic'x cyu'ne ic tza'nx keye nnic'x ku'ne. 7Ma ke'xix kc'u'je cyi'je; porque bi'n ku'ne, ic tza'n in che yajlanjtze junx kuc'ile, ax icxtzun ck'ukbanjtzel cyc'u'je tu'n Dios junx kuc'ile.
8Erman, kajbile tu'n cybinteye ti'j ju yajbil keye tzaj tuj Asia. Mer ic tza'n tjak' jun iktz o cub betz'ane, minti' kipaye ex o kmaye ka tu'n knaje. 9Ex o kna'ye mer ic tza'n otok cub ksentense tu'n kcyime. Pero tzaj ju yajbil lu ki'je tu'n mi'n toc ke' kc'u'je ki'jxe, nok o'cx tu'n toc ke' kc'u'je ti'j Dios aju in che jaw ank'in cyimni tu'n. 10O clettzune tu'n Dios tuj jun camic xobajilxix, ax icx ja'lo in ko clete tu'n, ex k'ukl kc'u'je ti'j Dios cucx ko cletele tu'n. 11Ax icx cyeye che onine ki'je tuj na'j Dios; porque ka at nimcu erman in che na'n Dios ki'je, ax icx nimcu erman cxel cyk'o'n chjonte te Dios tu'nju t-xtalbil Dios in tzaj tk'o'n keye, tu'nju cucx in che na'ne Dios ki'je.
Tiku'n yaj xi' Pablo tuj Corint
12Atzun jlu in ko tzalaje ti'j: Ax kanmiye in k'mante tza'n ktene, ma ko tene cyxol xjal ax icx cyxole yalnix ti'j knable ex junx kyole, tu'n Dios in tzaj tk'o'n jlu, ma ko tene cyxole minti' xko oc lpe'ye ti'j cynabl xjal, nok o'cx ke' kc'u'je ti'j t-xtalbil Dios. 13Porque minti' in xi ntz'ibane juntl yol cyeye, nok o'cx in xi ntz'ibane aju in jaw cysch'i'ne ex nne'l cynic'e ti'j; ex k'ukl nc'u'je ti'j, c'elel baj cynic'e ti'j tcyakil. 14Ic tza'n ma tz'el ch'in cynic'e ti'j tu'n cytzalaje ki'je, ax icx keye tu'n ktzalaje cyi'je tuj tk'ijlalil oc tul Kajaw Jesús.
15Atzun jlu k'ukl nc'u'je ti'j; cyja'tzun cub nximane nej tu'n nxi'ye cyuc'ile tu'ntzun cytzalaje oc ntene cab maj cyuc'ile. 16Cub nximane tu'n wic'e cyuc'ile oc nxi'ye tuj Macedonia, octzun wajtze tuj Macedonia tu'n wul meltz'aje juntl maj cyuc'ile, ex tu'n ttzaj cyk'o'ne ch'in onbil weye tu'n tajben tuj nbeye oc nxi'ye tuj tx'otx' Judey. 17Aju nximbetze lu, ¿nokpelo elacyim cub nximane? ¿Apetzun cub nximane tu'n t-xi nma'ne tu'n nxi'ye, ex ya mi'n chinxtle, ic tza'n in cybincha'n xjal? 18Pero ate Dios ax toc testiw wi'je, aju kyole in xi kma'ne cyeye minti' in meltz'aje'. 19Porque akine tuc'ix Sílvano ex Timotey xi kpacba'ne tkanil ti'j Jesucrist cyxole, aju Tc'wa'l Dios; ate Jesucrist minti' meltz'aje' tyol; junx tyol ex axix toc. 20Porque tcyakilju tzaj ttziyan Dios ax toc ex in japun nok tu'n Crist; cyja'tzun nok tu'n Jesucrist in xi kk'o'ne chjonte te Dios ex in kma'ne: Icxwitju. 21Axte Dios in cyuwsante ke tu'nju ocslal ko' ti'j Crist, ex ax ma tzaj k'onte koclen. 22Ex ax Dios ma tz'oc k'onte sey ki'j, ex ma tzaj tk'o'n ju Xewbaj Xjan tuj kanmi, atzun jun señ jlu tu'n ttzaj tk'o'n mastl ke.
23Ax Dios ma tz'oc nk'o'ne te testiw wi'je, na'nx nxi'ye juntl maj tuj Corint tu'n mi'n ttzaj cybise wu'ne. Lu Dios in que'yin ka mya ax toc nyole. 24Myatzun kajbile tu'n koc tene cawil cyeye ti'j cyocslable, porque wa'l keye tuj cyocslable; nok o'cx kajbile tu'n konine cyuc'ile tu'n tten cytzalajbile.
Currently Selected:
2 Corint 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993