Lev 1
1
Ri ruchojmilal toq niporox chijun ri chikop
1Ri Jehová xroyoj-pe ri Moisés k'a chiri' pa rachoch, y xuya' ri ruchojmilal chire richin chi achike rubanik ri jalajoj ruwech sipanik o kamelabel ri yesuj chire rija', y xubij chi 2tubij chike ri ruwinaq israelita: Wi ta k'o jun chiwe rix nuk'en-pe jun chikop richin nusuj chuwe yin, k'o chi nuk'en-pe jun wákix, o jun karne'l o jun tzuntzun.
3Wi k'o ta jun wineq ri nusuj jun wákix richin niporox chijun, k'o chi jun achij ri kan tz'aqet, y k'o chi xtusuj chiri' chuchi' ri wachoch, 4y xtuya' ri ruq'a' pa ruwi' ri chikop ri xtiporox, y keri' nink'en chik ruwech ri wineq roma ri rukamelabal. 5Y ri rajaw ri wákix kan chinuwech k'a yin xtukamisaj-wi; y ri sacerdote ri e ruk'ajol ri Aarón xtikik'ul k'a ri kik' y xtikichikaj chi kaji' ruxikin ri porobel ri k'o chuchi' ri wachoch; y keri' xtikisuj ri kik' chuwe. 6Y ri rajaw ri chikop k'o chi nrelesaj kan ri rutz'umal, y k'ari' nrelesaj ri rupan, y nuk'ajij ri ti'ij richin ri chikop. 7Y ri e sacerdote nikixupuj ri q'aq' ri k'o pa ruwi' ri porobel, y k'ari' nikiya-qa más si'. 8K'ari' nikicholajij pa ruwi' ri porobel ri ruch'akul ri chikop, ri rujolon y ri ruq'anal ri k'o chirij ri rixkolob. 9Y ri rajaw ri chikop xtuch'ej ri rixkolob y ri taq raqen ri ti chikop, y ja ri sacerdote xtiya'on-qa ronojel re' pa ruwi' ri porobel; y re' jun sipanik poron richin janila nijubulin chinuwech yin Jehová.
10Wi ta nuk'en-pe jun karne'l o jun tzuntzun, k'o chi achij ri kan tz'aqet. 11Y ri rajaw pa xaman chire ri porobel xtukamisaj ri chikop, y re' kan chinuwech yin xtuben-wi: y ri e sacerdote xtikichikaj ri kik' pa taq ruxikin ri porobel. 12K'ari' ri rajaw xtuk'ajij ri ti'ij, y jun chike ri sacerdote nucholajij pa ruwi' ri si' ri k'o pa ruwi' ri porobel, junan rik'in ri rujolon y ri ruq'anal ri k'o chirij ri rixkolob. 13Y ri rajaw ri chikop xtuch'ej ri rixkolob y ri taq raqen ri ti chikop, y ri sacerdote xtusuj y xtuporoj ronojel pa ruwi' ri porobel, y re' jare' ri sipanik poron richin nijubulin chinuwech yin.
14Y wi ri wineq nuya' chuwe jun aj-xik' chikop richin niporox, k'o chi nuk'en-pe jun paloma nim o jun ti ko'ol. 15Ri sacerdote xtuk'uaj ri ti aj-xik' chikop ri' rik'in ri porobel, k'ari' xtraq'ach'ij-el ri rujolon, y xtuporoj. Y xtuben chire chi xtibiyin ri rukik'el pa ruxikin ri porobel. 16Y xtrelesaj kan ri rusumal y ri ti ruwa-ruk'u'x, y re' xkeberuya' kan pa relebel-q'ij chire ri porobel ri akuchi k'o-wi ri chaj. 17K'ari' nuchop pa taq ruxik' y nuper-qa juba'. Y ri sacerdote xtuporoj pa ruwi' ri si' ri k'o pa ruwi' ri q'aq', jun sipanik poron richin nijubulin chinuwech, xcha' ri Jehová.
Currently Selected:
Lev 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.