1 Ts 1
1
Lep'iyenataĝanaĝac ñe'me Pablo
1Mach'e qo'mi, jayem Pablo, choqoñe'me Silvano, chayovida'a ñe'me Timoteo, qadamaic ami janemaĝama, da'me ami p'etaqadaiquipi jo'ne at'achaqadi' di'me noic Tesalónica, jo'ne yataqata ademii'teguet ñe'me Dios Qadet'a choqoñe'me Qadejaliaĝanec Jesucristo. 'Noota qom Dios ami yanema da'me anichoĝodenataguequi nataq'aen da'me at'emaĝaqui.
Pablo yanem da'me lamaic ñe'me Dios
2Nach'eda da'me janemaĝam qadamaic ñe'me Dios jouaĝat da'me ami chayovida'a da'me ja ami 'te japalaĝataqa'talo nale jauoqo ga'me qanetamenaĝac. 3Nataq'aen queda'me jouaqa'tot joñe'me Qadet'a Dios, nach'e eta't jenataqa'ta joda'me yataqata ja aĝañiñi jena'me jenjo' jo'ne adepi'i, da'me onaĝaic adoqopich'i nataq'aen da'me yataqata ami 'uañaĝayaqa nale te'me 'uo ga'me ami qoyachalo'te jo'ne ja no'en, qa'a jouaĝat da'me yataqata auache'ta joñe'me Jaliaĝanec Jesucristo. 4Ami yaqaya'olqa jo'ne Dios loqopitaqa'te, jayatenaq da'me naqaeñe ami yiyaĝanalo ca'li. 5Qa'a ca'li ami ja'aĝataĝama jena'me jenjo' 'noota, ja nach'edata da'me ch'e jojaqatac, dite da'me nach'e ena'am auec'achiñe joga'me jauoqo, da'me jaloĝonaq da'me lañoqotaĝanaĝac joñe'me Dios, nataq'aen da'me lajoĝonataĝanaĝac joñe'me Dios Lepaqal, nataq'aen da'me t'adaic lichoĝodenataĝanaĝac joñe'me. Qalaĝaja jena'me jenjo' joote auayachiñe ca'li ami jouaqatauelo, qama'le joote auec'achiñe da'me yataqata ami jecochaĝalo.
6Qama'le da'me ami, yataqata oquiyegue ca'li joga'me jauoqotac mach'e qat'onataĝanaĝac, nataq'aen joga'me 'lonataĝanaĝac joñe'me Jaliaĝanec, chayovida'a da'me auacoñiyeguet ga'me 'naqatac. Qama'le auachiyoĝotedaue joga'me adamaiqui jo'ne ami yanema ñe'me Dios Lepaqal da'me chiyaqaue ga'me adachoĝodequi. 7Qama'le naq'aeta da'me ami yelolo'te ca'li yema joga'me p'etaqadaiquipi 'me 'lachaqa't di'me aleua jo'ne Macedonia, chayovida'a jena'me jenjo' Acaya. 8Qama'le ami chiyaqauelo ga'me 'laqatac joñe'me Jaliaĝanec jo'ne male nelagaĝategue, male ja onolec di'me Macedonia nataq'aen na'me Acaya, male yema jena'me aleua qoyayaten, yataqata qoyayaten da'me eeta da'me auep'iiya'a joñe'me Dios, qama'le nayi male qaya'te qat'aqatac ta'le ami ja'aĝataqatac. 9Qa'a mach'egaua jogaa'me doje'y nale jovitaĝalo, uenate'talo da'me ami, ca'li aĝañiñi joga'me ca'li auep'iiya'alo, qama'le auec'achiya joñe'me Dios jo'ne ja 'nalegue choqoda'me yataqata eja, qaedi a'uonataĝañiuo'o joñe'me, 10choqoda'me auache'ta joñe'me Jesús da'me 'niyelaq, chiyaqa'ague jodi'me piyem, nach'eñe jo'ne Dios Lec'oĝot 'me mach'e Dios nec'alaĝachijeguem ca'li. Jesús nach'eñe qo'mi nec'alaĝatedegue qaedi ja qo'mi 'te nedalo'te da'me t'adaic ne'uaĝanague'j ga'me jiyaĝadipi jo'ne na'ta.
Currently Selected:
1 Ts 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina