Jo Eburania 13
13
Tic ame yomoro yi Obaŋa
1Medde wunu i marre kenwu kenwu acalo omego. 2#Age. 18.1-8; 19.1-3Wiwu kur wil i jolo wele, pien jo mogo a rik obedo i kodi cunnyono rik obin ogwoko omalaika i paccigi kun mom oŋeo. 3Po wunu pi jo a tye i buc kom bala itye wunu kedgi i buc kuno. Po wunu daŋ pi jo ame otimo cucu, kite acalo wun daŋ itye wunu i kom. 4Nyom myero jo luŋ ket iye kwogo, dok itanda a jo onyomere myero wor bed acil; pien Obaŋa bino ŋolo kop i kom otim tim me coco kede jo abalo nyomgi. 5#Lodo 31.6, 8; Yoc. 1.5Kur i bed wunu omar lim; jami ame itye wunu kede myero romwu, pien Obaŋa rik okobo ni, “Mom abino boli, mom abino weki ata.” 6#Jab. 118.6 En omio cunywa tek, kun okobo ni,
“Rwot en akony mera, mom abino bedo i lworo;
ŋo kara a dano twero tima kede?”
7Po wunu i kom otelwu acon, ame rik gin orabbiwu kop Obaŋa. Tam wunu pi kwogi kede gin aber ame oya iye, eka ite wapo wunu iyeegi. 8Yecu Kricito kite gire acel keken aworo, tin kede waŋ i waŋ. 9Kur imi wunu pwonnyogo apapat dok awelo rwenywu oko; ber kica Obaŋa en a mi cunywa teko, mom cemmogo ame jo ona iye daŋ mom onwoŋo iye konnyoro. 10Wan otye kede keno me lam ame otic i kema acon ca mom tye i twerroro me cem iye. 11#Olev. 16.27Pien leyi ame alamdog adwoŋ tero remogi i kabedo acil me bed gin ame oŋolo pi bal, komgi rik owaŋo oko teŋe i ŋe gony. 12Amannono daŋ Yecu rik oto teŋe i ŋe idogcel, me wek elony jo bed acil i remo mere en ikome. 13Doŋ pi man myero wan owot wunu baŋe oko i ŋe gony, kun okanyo wunu acae pire; 14pien kan wan mom otye i boma moro ame perakino, ento otye oyenyo boma a bino anyim. 15Ber doŋ omi wunu pakwa baŋ Obaŋa i kare luŋ acalo gin ame oŋolo me yalo Obaŋa, kun obeo wunu i baŋ Yecu; mano en pwoc ame omio i dogwa ka otuco nyiŋe. 16Kur wiwu wil i timo gin aber kede i poko gin itye wunu kede baŋ jo ocele, pien kodi mot aŋola acalo mannono yomoro yi Obaŋa.
17Winy wunu dog otelwu, dok imiye wunu i te locgi, pien gin tye a gwoko tipowu aboŋo weo acalo jo ame Obaŋa bino penyogi pi ticgi. Mi wunugi oti ticgi kede lelo, kun mom imiogi wunu peko, pien mano gire mom konyowu kadi acelloro.
18Kwa wunu Obaŋa pirwa, pien wan oŋeo ateni ni cunywa ler gire, kun omito tiyo gin a tye aber i kare luŋ.
19Amedo cukoro cunywu atek ni ikwa wunu Obaŋa, me ru dwoggo an baŋwu oyot.
Kwanyo winyo kede amot me agikki
20Obaŋa won kuc ame ocero Rwotwa Yecu Kricito i akina a jo oto, ame en akwat adwoŋ me rommi, pi remo me cikere ame perakino odoco, 21en Obaŋa myero omiwu gin luŋ abeco a mitte, me icob wunu gin a en mito; dok daŋ pi Yecu Kricito myero en ti kedwa gin a yomoro yie. Kwogo bed baŋ Yecu Kricito nakanaka. Amen.
22Omegona, akwaowu, di wunu cunywu i koppa ame acoo anonokkoroni ame acukoro kede cunywu. 23Myero iŋe wunu ni, ominwa Temoteo doŋ ogonyo oko; abino nenowu wan kede, ka ce en oru bino. 24Mot wunu otelwu luŋ, kede jo Obaŋa daŋ luŋ. Jowa ame oya i Itali omotowu.
25Winyo Obaŋa bed kedwu ducu.
Currently Selected:
Jo Eburania 13: La79
Highlight
Share
Copy
Want to have your highlights saved across all your devices? Sign up or sign in
Lango New Testament © Bible Society of Uganda, 1979.