Filemon 1
1
1Omukanda hembu mau dhi kwaame Paulus, onkwatwa yaKristus Jesus, wo mau dhi wo nokomukwetu Timoteus.
Me sonekele Filemon omuhivilikwa, omuundapi pamo nant̯e, 2me sonekele wo omukwetu omukadhintu Appia nomukwavita omukwetu Arkippus neongalo ndyoka ndii ongana monganda yoye.#Kol. 4:17
3Et̯ilonkenda nouwa waKalunga Tate nowaMuhona Jesus Kristus ngau kale nan̯e.
Ohole neitavelo lyaFilemon
4Ame apehe momaalikano andje ndji mu thipaluka, he pandula Kalunga kandje, 5himba tee ohole yoye neitavelo ndyuu na lyo, hiuu hole Muhona Jesus nahiuu hole ovantu ovadhilikwa avehe. 6Me kumbu okutya eitavelo lyoye ndyoka ndyuu na lyo, olyo tu na lyo atuhe, ngali kale nodhonkono mokwiiwa ouwa auhe mbutu na wo muKristus. 7Mukwetu, ohole yoye ya mpa ehuluko enene, yo ya mpa wo ouvandhi, mena lyokutya omitima vyovantu ovadhilikwa vya tendelekwa kwoove.
Filemon ma kumbwa a tambule Onesimus
8Iya ame nandaku tiwa muKristus me ulu oku ku heela, u undape hitja thele okuundapwa, 9iya mena lyohole, me ku kumbu. Iya ame Paulus ndji li ngahi ndji li, mba kulupa, iya napano wo ndjinkwatwa yaKristus Jesus. 10Aame me ku kumbu poluvedhe lwaOnesimus, ondele yandje, ngumba eta kuKristus, tainkolo ndji li mounkwatwa.#Kol. 4:9 11Lukulu wa li ahe na tjilinga kwoove, iya napano u na otjilinga kwoove nokwaame.
12Me tjun̯a Onesimus kwoove, nomutima wandje mau ende pamo naye. 13Mba li ame hala a kale pwaame, a mpopile poluvedhe lwoye, tainkolo ndji li mounkwatwa hembu wondaka ombwa. 14Ame híme hala oku ku n̯in̯ikidha, opo ouwa woye ahamau dhi mokun̯in̯ikidhwa, iya u dhe mehalo ewa.
15Iya mpaeli nyahoka mwa li amwe liyapuka kanunu, iya ma ka tjuna, mu kale pamo apehe, 16kaa ka kala uke omupika, iya ma pon̯a omupika, ma kala omukwetu omuhivilikwa nguu holwe tjatjili kwaame, iya unene kwoove mountu nomuMuhona.
17Iya andaa wa ntala ngomukwen̯i naOnesimus mu tambula ngahi wa ntambula. 18Iya andaa u na hiee ku ninga ne ae na hiee ku lile, tji havela kwaame. 19Aame Paulus, mba soneke nokuwoko kwandje omwene: “Ame me ke vi thuta.” Hakutya me hala oku ku thipalukitha okutya, aame ndji na omwenyo woye, ove u na ongele yandje. 20Iinga, mukwetu, mpopila ndje mena lyaMuhona, u tendeleke omutima wandje muKristus.
21Me ku sonekele, ndji na eliun̯iko okutya mo ka ninga soka hime ku kumbu, mba iwa okutya mo ka ninga otjingi okupon̯a mpoka. 22Me ku heele uke okutya, ndongekedhelandje omala moyen̯i, mena lyokutya ndji na eliun̯iko mena lyomaalikano en̯i me ka tjun̯wa kun̯e.
Omaandelo
23Epafras, onkwatwa pamo naame mena lyaKristus Jesus me mu menekele po,#Kol. 1:7; 4:12 24naMarkus naAristarkus naDemas naLukas, ovaundapi pamo naame nawo wo, mave mu menekele po.#Ovil. 12:12,25; 13:13; 15:37-39; 19:29; 27:2; Kol. 4:10,14; 2 Tim. 4:10,11
25Et̯ilonkenda lyaMuhona Jesus Kristus ngali kale nan̯e.
Currently Selected:
Filemon 1: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.