SAKARIA 1
1
Ekumaido lokulidilulula
1Momudo omutivali waDarius mohani onhihetatu ondjovo yOmwene ya hanga omuxunganeki Sakaria yaBerekia yaIddo, ndele tai ti: 2“Ooxokulu, Omwene okwa li e va uditile ehandu linene. 3Osho hano u noku va lombwela ngaha: ‘Omwene womatanga ovakwaita ta ti ngaha: Alukileni kwaame, Omwene womatanga ovakwaita osho ta ti, opo nee naame ohandi mu alukile, Omwene womatanga ovakwaita ota ti.’ 4Inamu kala ngaashi ooxokulu ovo va udifilwa kovaxunganeki vonale eshi va tya: Omwene womatanga ovakwaita osho ta ti: Lidilululeni nye mu aluke keendjila deni dii nokoilonga yeni ii. Ndelenee vo inava uda noinava pwilikina nge, Omwene ta ti. 5Ooxokulu ove li peni? Novaxunganeki otava kala tuu ve nomwenyo alushe? 6Ndelenee eendjovo dange neenghedimhango dange odo nde di lombwelele ovapiya vange ovaxunganeki, inadi hanga ngeno ooxokulu, opo nee ve lidilulula ndele tava ti: Ngaashi Omwene womatanga ovakwaita a diladila oku tu ningila paendjila detu nopailonga yetu, hano osho e tu ningila.”
Emoniko leenghambe
7Mefiku etimilongo mbali netine lohani onhimulongo naimwe nokutya, mohani Sebat, momudo omutivali waDarius, ondjovo yOmwene oye uya komuxunganeki Sakaria yaBerekia yaIddo, ndele tai ti:
8Oufiku ame onda mona emoniko: pa kala omulumenhu a londa onghambe yediya ya kala ofika momiti damirti mefilu. Konima yaye okwa kala eenghambe domadiya noditilyana noditoka. 9Ame onda pula: “Omwene, eshi otashi ti ngahelipi?” Nomweengeli ou a popya naame, okwa nyamukula nge, ta ti: “Ohandi ke ku ulikila osho tashi ti. 10Nomulumenhu ou a li a kala ofika mokati komiti damirti, okwa popya ndele ta ti: Ovo ovava va tumwa kOmwene va endaende edu alishe.” 11Opo nee vo ova nyamukula omweengeli wOmwene, ou a kala ofika mokati komiti damirti, ndele tava ti: “Fye otwa endaenda edu alishe, ndele tala, edu alishe la mwena, la tya filu.” 12Opo nee omweengeli wOmwene okwa nyamukula ndele ta ti: “Omwene womatanga ovakwaita, fiyo onaini to kala ngaha ito filonghenda Jerusalem noilando yaJuda, oyo we i handukila omido omilongo heyali nokuli?” 13Opo nee Omwene okwa nyamukula omweengeli, ou a popya naame, noku mu lombwela eendjovo diwa dehekeleko. 14Opo nee omweengeli, ou a popya naame, okwa lombwela nge, ndele ta ti: “Udifa u tye: Omwene womatanga ovakwaita ota ti ngaha: Ame ohandi fi ouladi okukondjela Jerusalem naSion nouladi unene. 15Ndelenee Ame onda handuka unene omolwoiwana ihe noshisho, ei Ame eshi nda handuka kanini, oya hapupalifa omupya. 16Onghee hano Omwene ta ti ngaha: Ame ohandi pungulukile kuJerusalem nefilonghenda. Otembeli yange tai ka tungululwa, Omwene womatanga ovakwaita ta ti. Noshiyelekifongodi tashi ka shilwa kombada yaJerusalem.” 17Udifa natango u tye: “Omwene womatanga ovakwaita osho ta ti: Oilando yange tai kala i yadi ndoo oinima iwa, nOmwene ta ka hekeleka vali Sion, ndele ta ka hoololulula Jerusalem.”
Emoniko leembinga nhee novahambwidi vane
18Ndele ame nda lyaamena ko nonda tala, pa li eembinga nhee. 19Opo nee nda tya komweengeli, ou a popifa nge: “Odo otadi ti shike?” Ndele ye okwa nyamukula nge: “Eembinga odo tuu odo de lihanifa Juda naIsrael naJerusalem.” 20Opo Omwene okwa ulikila nge ovahambwidi vane. 21Opo nee ame nda tya: “Vo ove uya okulonga shike?” Ndele ye okwa nyamukula ndele ta ti: “Eembinga odo tuu odo de lihanifa Juda, opo paha kale nande umwe ta yelula omutwe, ndele ovo ove uya oku va halwifa nokuumbila pedu eembinga doiwana, oyo ya yelula oluvinga lokukondjifa oshilongo shaJuda i shi halakanife po.”
Currently Selected:
SAKARIA 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.