OVAEFESO 5
5
Okweenda kuyapuki kwOvakriste
1Ningeni hano ovahopaeleli vaKalunga ngaashi ovana ovaholike, 2nye mu kale nokweenda mohole ngaashi Kristus kwa li e mu hole nokwe liyandja molwetu oshali, eyambo, edimba liwa, la hokiwa kuKalunga.
3Ndelenee oluhaelo nakeshe tuu onyata youlunde ile olwisho inali tumbulwa nande vali mokati keni, ngaashi sha wapalela ovayapuki, 4neendjovo defifohoni nomashendjo oulai inali udika mo, ndelenee edi domapandulo. 5Osheshi nye omu shi shii nawa, nye mu shi wete, keshe omuhaeli ile omulinyateki noulunde, nomunalwisho, osheshi ou omulongeli woikalunga, ke noshitukulwa shefyuululo mouhamba waKristus nowaKalunga.
6Paha kale ou te mu pukifa neendjovo dongaho, osheshi omolwaai ehandu laKalunga otali hange ovana vokuhadulika; 7hano inamu kwatafana nayo pamwe naavo. 8Osheshi nale omwa li omulaulu, ndelenee paife mwa ninga ouyelele mOmwene. Kaleni nokweenda ngaashi ovana vouyelele, 9osheshi ouwa keshe nouyuki noshili, oyo oshiimati shOmhepo. 10Ndele shipashipeni eshi tashi wapalele Omwene, 11ndele inamu kala mu neendafano nande linini noilonga yomulaulu ihai imike, ndelenee oshipu mu i hanyene. 12Osheshi ohoni yongaho nokuli okutonga eshi tave shi longo meholeko. 13Ndelenee aishe ei tai ka pewa oushima eshi tai hololwa pouyelele, osheshi ashishe eshi tashi ka hololwa, osho ouyelele. 14Onghee ta ti:
“Penduka ove ou ho kofa, ndele nyumuka movafi,
Kristus ote ku minikile.”
15Litaleni hano nawa nhumbi hamu ende, hangaashi omalai, ndelenee ongaashi ovanaendunge; 16longifeni nawa efimbo, osheshi omafiku omai. 17Onghee hano inamu kala muhe neendunge, ndele shiiveni ehalo lOmwene olilipi. 18Inamu kolwa komaviinyu omo hamu di eliefo, ndelenee yadifweni kOmhepo; 19hokololelafaneni omapsalome nomalwiimbo opamhepo, nokwiimbila nokuhambelela Omwene momitima deni, 20nokupandula alushe Kalunga, Tate, omolwaaishe medina lOmwene Jesus Kristus, 21mu dulikafane keshe tuu komukwao mokutila Kristus.
Ehombolo lOvakriste
22Ovakainhu, dulikeni kovalumenhu veni ongaashi kOmwene. 23Osheshi omulumenhu oye omutwe womukainhu, ngaashi Kristus yo Oye omutwe weongalo, Ye Omuxupifi wolutu. 24Ndelenee ngaashi eongalo hali dulika kuKristus, osho tuu ngaha ovakainhu nava dulike kovalumenhu vavo moinima aishe.
25Onye ovalumenhu, holeni ovakainhu veni ngaashi Kristus e hole eongalo, nokwe liyandja molwalo, 26opo e li yapule noku li yelifa mekosho lomeva oneendjovo, 27opo a dule okukaleka ofika moipafi yaye mwene eongalo la yelifwa lihe nedilo ile eengonyoto ile oinima inai wapala, ndelenee li kale liyapuki nolihe noshipo. 28Osho ngaha novalumenhu ve nokuhola ovakainhu vavo ngaashi omalutu avo vene; oye ou e hole omukainhu waye, oye oku lihole ye mwene. 29Osheshi kape na ou ha tondo ombelela yaye mwene, ndelenee ohe i palula nohe i tekula, ngaashi Kristus ha tekula eongalo laye. 30Osheshi ofye oinhimbu yolutu laye noyombelela yaye nomakipa aye. 31“Onghee hano omulumenhu e nokufiya po xe naina nokulimangela komukainhu waye, vo vavali tava ningi omunhu umwe.” 32Oshiholekwa eshi oshinene, ndelenee ohandi tongo Kristus neongalo laye. 33Ndelenee keshe womunye na kale yo e hole omukainhu waye mwene ngaashi e lihole ye mwene, ndele omukainhu na fimaneke omulumenhu waye.
Currently Selected:
OVAEFESO 5: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.