DEUTERONOMION 32
32
1“Pwilikineni, omaulu, ame eshi handi popi,
nedu nali ude eendjovo domokanya kange.
2Elongo lange nali ndodele ngaashi odula,
neendjovo dange nadi kunguluke ngaashi omume,
ngaashi odula yomudimbi tai loko oxuluxulu
ndele ngaashi oshikungulu shodula kombada yoimeno.
3Osheshi ame handi udifa edina lOmwene.
Fimanekeni Kalunga ketu!
4“Ye emanya; oilonga yaye oya wana ya pwa.
Osheshi eendjila daye adishe do omatokolo.
Oye Kalunga koudiinini, ndele ehe nowadi.
Ye omuyuki nomunashili.
5Vo ove mu pwidukila.
Vo va li vehe fi ovana vaye, ndelenee oshififohoni,
epupi la lunduka nola pilauka.
6Osho ngaha hano ngeno to shi alulile Omwene,
ove oshiwana shilai shihe neendunge?
Ndishi Oye xo, ou e ku shita;
ndishi Oye e ku ninga, Ye e ku longekida?
7“Dimbulukwa omafiku omefimbo lonale,
diladila omido domapupi onale.
Pula kuxo, ye ote ke shi ku shiivifila,
nokovakulunhu voye, vo otave ke shi ku lombwela.
8Ou wOkombadambada,
eshi a tukulila oiwana oitukulwafyuululwa yavo,
Ye eshi a tongola ovana vovanhu,
opo nee Ye a taula eengaba doiwana,
di fike pomuvalu wOvaisraeli.
9Osheshi oshitukulwa shOmwene, osho oshiwana shaye,
heeno, Jakob, oye oshitukulwafyuululwa shaye.
10“Ye okwe mu mona mombuwa,
mofuka ya tilika i yadi okukwena.
Ye okwe mu tambula meameno laye nokwe mu kalela noshisho,
nokwe mu amena ngaashi omuni yeisho laye.
11Ngaashi onhwa tai tengelele oshihadi shayo
ndele tai tengelele kombada youdilona vayo oku va amena,
Ye e va tambula meameno laye
ndele te va humbata momavava aye.
12Omwene Oye aeke e mu endifa
ndele inapa kala nande oshikalunga shimwe puye.
13Oye okwe mu endifa koikulundudu yedu
ndele ye okwa lya oilya yomapya.
Ndele okwe mu nyamifa omaadi eenyiki memanya
nomaadi omomamanya makukutu,
14omaadi eengobe nomashini eedi,
pamwe nomakaadi oudjona needi deemhedi.
Eengobe deemhedi domuBasan noikombo
pamwe nounyenye woilya.
Ove wa nwa ohonde yeeviinyu, omaviinyu taa eta onhutu.
15“Opo nee Jesurun okwa ondoka nokwa umba omalunha,
ove wa ondoka, wa pama, wa nyina,
ndele ye okwa efa Kalunga, ou e mu ninga,
nokwa dina emanya laye lexupifo.
16Vo ova pendula ehandu laye mokulongela oikalunga imwe.
Ve mu handukifa omolwoixuna.
17Vo ova yambela eendemoni, do kadi fi Kalunga,
oikalunga ei inai shiivika kuvo,
oikalunga ipe, ya monika paife,
ei inai tilika kooxe.
18Ove ino dimbulukwa emanya olo le ku dala,
ndele wa dimbwa Kalunga ou e ku pa omwenyo.
19“Opo nee Omwene, eshi e shi mona, Ye okwe va ekelashi,
osheshi Ye a handukila ovana vaye ovamati noukadona.
20Ndele Ye okwa tile: ‘Ame nda hala oku va holeka oshipala shange.
Ame nda hala okutala exulilo lavo tali ka ninga la tya ngahelipi.
Osheshi vo oludi la nyonauka shili,
vo ovana muvo muhe na oudiinini.
21Vo ova pendula ouladi wange mwaashi shihe fi Kalunga.
Vo va handukifa nge molwoikalunga yavo yongaho.
Opo nee Ame ohandi ka pendula ouladi wavo
molwoshiwana shihe fi oshiwana,
noshiwana shihe neendunge, ohandi va handukifa.
22Osheshi omundilo wa tema mehandu lange,
ndele tau ka xwama fiyo omoshovafi shokoshi,
ndele tau ka lungwinifa edu alishe nouyadi walo
ndele tau ka tema omakanghameno eemhunda.
23“ ‘Ame ohandi ka ndubila kombada yavo oiponga.
Handi va yashe noikuti yange.
24Vo otava ka nooka kondjala
nokuxula po koupyu tau lungwinike
nokomaudu taa dipaa.
Ame ohandi ke va tumina omayoo oilyani
noudiyo waai tai alangata mondwi yedu.
25Eongamukonda tali dipaa pondje
nomeendjuwo domeni omahaluhalu,
ovamati ovanyasha noukadona,
okahanana kokomavele pamwe neenghwakutoka.
26Ngeno ndi tye: Ame nda hala oku mu fudila po,
nokudima po edimbulukifo leni mokati kovanhu,
27Ame ngeno inandi angala okuhandukifwa komutondadi,
ovatondadi vavo ngeno va pilikile eendjovo va tye:
Eke letu la yeluka nOmwene ina ninga sha mwaashishe eshi.’
28“Osheshi sho oshiwana shihe nomapukululo,
ndele muvo ka mu neendunge.
29Vo ngeno ovanaendunge, ngeno ve shi shiiva,
vo va diladile exulilo lavo.
30Umwe ta dulu ngahelipi okutaataa eyovi
ndele vavali okutaataa omayovi omulongo,
ongeenge emanya lavo inali va landifa po
nOmwene ngeenge ine va efa po.
31Osheshi emanya lavo kali li ngaashi emanya letu,
heeno, ovatondadi vetu vene, vo ovatokoli.
32Osheshi omuviinyu wavo wa dja momiviinyu domuSodom
nomoikokola yomuGomorra.
Eeviinyu davo odi noudiyo,
notadi imi omashila malula.
33Omaviinyu avo oudiyo weyoka,
nombili yavo oudiyo wefu.
34“Haame ngeno nde a tuvikila
a uvikilwa mo noshihako melimba lange?
35Ehandu olange, Ame ohandi futu
mefimbo tuu olo omhadi yavo tai punguluka.
Osheshi efiku lehanauno lavo oli li popepi,
ndele eshi she va sheyelwa tashi uya diva.
36Osheshi Omwene ota ka yukifa oshiwana shaye,
ndele ta ka kenukila ovapiya vaye,
Ye eshi ta mono nokutya, eenghono davo da pwa,
ndele inapa fyaala sha.
37Opo nee Ye ta ka tya: ‘Oikalunga yavo oi li peni,
nemanya ve li lineekela;
38ava va lya omakaadi omatomenoyambo avo
nova nwa omaviinyu oikunwayambo yavo?
Vo nava kale ofika noku mu kwafa,
opo va kale eameno kombada yavo.
39“ ‘Taleni hano, nokutya Aame tuu ou,
ndele kape na oshikalunga shimwe ponho yange.
Ame handi dipaa ndele Ame handi tula omwenyo.
Ame ohandi teyaula po, ndele Ame ohandi velula;
ndele pehe na nande umwe ta xupifa momake ange.
40Osheshi Ame ohandi ka yelula eke lange keulu
ndele handi ti, Oshili, ngaashi Ame handi kala
ndi nomwenyo fiyo alushe,
41Ame ngeenge nda upika eongamukonda lange tali taima
neke lange tali hovele okuwanifa etokolohandu lange,
Ame ohandi ka handukila ovanaita naame
nokukwatela ovatondadi vange onghone.
42Oikuti yange tai ka kolwa kohonde,
neongamukonda lange tali ka lya ombelela;
okohonde yomudipawa noyonghwate
okomitwe dovakulunhu vovatondadi vange.’
43“Kuwilileni nye oiwana, molwoshiwana shange,
osheshi Ye ota ka pula ohonde yovapiya vaye,
ndele ta ka handukila ovatondi vaye
nokukwatakanifa oshilongo shaye noshiwana shaye.”
44Ndele Moses e uya nokwa tonga eendjovo adishe deimbilo eli momatwi oshiwana, ye pamwe naJosua yaNun.
45Ndele Moses eshi a mana okupopya eendjovo adishe edi kOvaisraeli aveshe, 46ye okwe va lombwela: “Diinineni eendjovo adishe edi nde mu londwela nado nena eli, mu di lombwele ovana veni, va diinine shili eendjovo adishe domhango ei. 47Osheshi eendjovo edi kadi fi dongaho kunye, ndelenee odo oukalimwenyo weni, ndele molweendjovo edi tamu ka hapupalifa omafiku eni moshilongo omo tamu ka ya nokutauluka Jordan mu shi nangale.”
48Opo nee Omwene okwa lombwela Moses mefiku tuu olo ndele ta ti: 49“Londa komhunda ei yaAbarim, nokutya omhunda Nebo, ei i li medu laMoab, la shaama naJeriko, ndele tala edu laKaanan, olo handi ke li pa ovana vaIsrael efyuululo lavo. 50Ndele ove to ka fila komhunda oyo to i londo, ndele to ka ongelwa kovakwapata voye, ngaashi omumwanyoko Aron a fila komhunda yaHor, ndele okwa ongelwa kovakwapata vaye, 51shaashi nye mwa nyona kwaame mokati kovana vaIsrael pomeva eemhata muKades mombuwa yaSin, osheshi nye inamu yapula nge mokati kovana vaIsrael. 52To ka tala edu olo komesho yoye, ndelenee ito ka ya mo medu olo, Ame handi ke li yandja kovana vaIsrael.”
Currently Selected:
DEUTERONOMION 32: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.