AMOS 1
1
Damaskus, Gasa, Tirus, Edom naAmmoni tai xunganekwa
1Eendjovo daAmos, umwe womovafita veedi vomuTekoa, e di uda, tadi popi Israel momafiku aUssia, ohamba yaJuda nomomafiku aJerobeam yaJoas, ohamba yaIsrael, omido mbali, ekakamo ledu fimbo inali fika. 2Ndele ye ota ti: “Omwene ta ndunduma muSion ndele ta yelula ondaka yaye muJerusalem; oulifilo wovafita tau kukuta noxulo yaKarmel tai tene.”
3Omwene ota ti ngaha: “Omolwomatauluko atatu, naane aDamaskus, Ame ihandi ka alula ehandukilo. Osheshi vo ova xwifa Gilead noixwifo yoivela. 4Onghee hano handi ka tuma omundilo meumbo laHasael, ndele tau ka lungwinifa eengulu doupuna waBenhadad. 5Ndele Ame ohandi ka teyaula oiidilifo yaDamaskus ndele handi ka hanauna po oonakukalamo mefilu laAven, ndele ava ve nepangelodibo muBet-Eden novanhu vomuAram otava ka ya kuKir moukwatwa, Omwene ta ti.”
6Omwene ota ti ngaha: “Omolwomatauluko atatu, naane aGasa, ihandi ka alula ehandukilo. Osheshi vo ova twala oonakukalamo aveshe moukwatwa nove va yandjela Edom. 7Onghee hano Ame ohandi ka tuma omundilo mohotekuma yaGasa, ndele otau ka lungwinifa eengulu dasho doupuna. 8Ndele Ame ohandi ka mana po oonakukalamo muAsdod naava ve nepangelodibo muAskelon. Ndele Ame ohandi ka aneka eke lange kuEkron, ndele oshixupe shOvafilisti otashi ka kombwa po, Omwene Kalunga ta ti.”
9Omwene osho ta ti: “Omolwomatauluko atatu, naane aTirus, Ame ihandi ka alula ehandukilo. Osheshi vo ova yandja oonakukalamo aveshe kuEdom, ndele inava dimbulukwa oumwainafana. 10Onghee hano ohandi ka tuma omundilo mohotengulu yaTirus, ndele tau ka lungwinifa eengulu dasho doupuna.”
11Omwene osho ta ti: “Omolwomatauluko atatu, naane aEdom, Ame ihandi ka alula ehandukilo. Osheshi ye a taataa omumwaina neongamukonda, ndele ye a ekelashi onghenda, opo ehandu laye la kala la xwama alushe, ndele a diinina oupyuhandu waye fiyo alushe. 12Onghee hano Ame ohandi ka tumina Teman omundilo, ndele tau ka lungwinifa eengulu daBosra doupuna.”
13Omwene osho ta ti: “Omolwomatauluko atatu, naane ovana vaAmmoni, Ame ihandi ka alula ehandukilo. Osheshi ova tanda ovakainhu ovafimba vomuGilead, opo va tandavelife oshilongo shavo. 14Onghee hano ohandi ka tomeka ohotekuma yaRabba, ndele omundilo tau ka lungwinifa eengulu dasho doupuna, nonghuwo yolwoodi mefiku loita nomhepo idjuu mefiku loshikungulu shidjuu. 15Ndele ohamba yavo tai ka ya moukwatwa, oyo pamwe nomalenga ayo, Omwene ta ti.”
Currently Selected:
AMOS 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.