2 SAMUEL 1
1
David ta kundana efyo laSaul nolaJonatan
1Ndele Saul eshi a fya naDavid eshi a aluka koita yokudenga Ovaamaleki, okwa kala omafiku avali muSiklag, 2mefiku etitatu omulumenhu umwe a dja monhanda kuSaul, e noikutu ya pombauka nedu komutwe waye. Ndele ye eshi e uya kuDavid, a wila poshi ndele te linyongamene. 3Ndele David ta ti kuye: “Oto di peni?” Ndele ye te mu nyamukula: “Ame nda ya onhapo monhanda yaIsrael.” 4David ta ti vali kuye: “Oshike sha ningwa ko? Hepaululile nge!” Opo nee ye te mu nyamukula: “Ovakwaita va dja onhapo molwoodi, novakwaita vahapu ova fya. Heeno, naSaul yo nomona waye Jonatan ova fya.” 5Ndele David ta pula omumati, ou e mu etela ondaka: “We shi shiiva ngahelipi, nokutya Saul nomona waye Jonatan va fya?” 6Opo nee omumati, ou e mu etela ondaka ta ti: “Ame onda hangika nde uya keemhunda daGilboa, ndele tala, Saul a yaamena keonga laye, fimbo omatemba oita novalondi veenghambe ve mu kondekela; 7ndele ye a keuka nokwa mona nge ndele ta ifana nge, naame nda tya: ‘Aame ou.’ 8Opo nee ye ta pula nge: ‘Oove lyelye?’ Ndele ame nde mu nyamukula: ‘Aame Omuamalek.’ 9Opo nee ye ta ti kwaame: ‘Ila kwaame u dipae nge, osheshi olutu la shila, nande ndi nomwenyo natango.’ 10Ndele ame nda ya kuye ndele nde mu dipaa, osheshi ndi mu wete, ita dulu vali okukala nomwenyo, eshi a wila po. Ndele oshishani shaye osho sha li komutwe waye noshivela shoshingoldo shokokwooko kwaye nde i kufa ko ndele nde i eta oku komwene wange.” 11Opo nee David a kwata oshikutu shaye ndele te shi pombaula. Nosho yo ovalumenhu aveshe ava va li puye. 12Ndele ova lila eenghali nokukwenauka ndele ve lidilika eendja fiyo onguloshi omolwaSaul nomolwomona waye omumati Jonatan nomolwoshiwana shOmwene nomolweumbo laIsrael, shaashi vo va dipawa keongamukonda. 13David ta pula vali komumati ou e mu etela ondaka ndele ta ti: “Ove owa dja peni?” Ndele ye okwa nyamukula ta ti: “Ame omona womulumenhu omunailongo, ame Omuamalek.” 14Ndele David ta ti kuye: “Ongahelipi? Ino tila okunana eke loye u dipae omuvaekwa wOmwene?” 15Opo nee David a ifana omumati umwe ndele ta ti: “Ehena oku. Mu nhukila!” Ndele ye e mu denga poshi nokwe mu dipaa. 16Ndele David okwe mu lombwela: “Ohonde yoye i li komutwe woye, osheshi okanya koye ondobwedi yoye, shaashi wa tya: ‘ame nda dipaa omuvaekwa wOmwene.’ ”
Eimbilokemo laDavid omolwaSaul naJonatan
17Opo nee David a tota eimbilokemo eli omolwaSaul nomolwomona waye Jonatan, 18ndele a yandja elombwelo, nokutya ovana vaJuda va longwe Oshiimbo shOuta. Tala, sho osha shangelwa mEmbo laJashar:
19“Akutu Israel, ovo va li efimano loye va dipaelwa koikulundudu yoye!
Ongahelipi ovaladi va wila po!
20Inamu shi hepaulula muGat,
inamu shi vilikila momapandavanda aAskelon,
ovana oukadona vOvafilisti vaha hafe,
ovana oukadona vaava inava pita etanda vaha kuwilile!
21“Eemhunda nye daGilboa!
Omume nodula ihe mu lokele.
Nomapya omo tamu di eeshali domayambo aha kale ko.
Osheshi oko oikelelifo yovaladi ya ekelwa shi
noshikelelifo shaSaul inashi lomonwa nomaadi.
22Outa waJonatan inau shekuna
ohonde yeendjashe nomungo wovaladi,
neongamukonda laSaul inali aluka hamakasha.
23“Saul naJonatan, ovaholafani novahokwafani
inava tukauka mokukala nomwenyo kwavo nomokufya kwavo.
Monhapo ve dule eenhwa,
meenghono ve dule eenghoshi!
24Lileni Saul, nye ovana oukadona vaIsrael,
oye e mu djaleka oikutu itilyana,
ndele e mu nyakitifa oulenga woshingoldo moikutu yeni.
25“Ovaladi va fila mo ngahelipi mokati kolwoodi!
Jonatan to nangala koikulundudu yoye wa dipawa!
26Omumwameme Jonatan, ame ohandi ku nyikile oluhodi!
Ame nda li ndi ku hole unene!
Ohole yoye ya li ikumwifa kwaame
i dule ohole yovakainhu.
27“Ovaladi va fila mo ngahelipi!
Oilwifo oya kana ngahelipi!”
Currently Selected:
2 SAMUEL 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.