LUCAS 8
8
Wnaa ne wun xyudar Jesus
1Zhich guin wa Jesus yra Ne chibtxup xpoxter Ne yra gyëz ne nak nes guin, nigle gyëznzhoo, nigle gyëzwin; wzëët Ne dizwen, laa we nga nak ne rkyeen Dëdyuzh. 2No zanal tebëd wnaa ne wneseyaken Ne no ne wboo Ne menzab lextoo. Lad men nga za Mli ne la Matlen ne wruu guedx menzab lextoo, 3no zanal Xwan ne nak xewnaa Chuza ne rnebééy lo xdxiin rrey-Herodes, no zanal Susan, no zanal ndalre wnaa ne run xyudar Ne kon logne rapendxee men.
Xkwent men ne rguu bni
(Mt. 13:1-9; Mr. 4:1-9)
4Ndal mén wruu te te gyëz chen kwii men Jesus. Lex chene wdop ndalyaa mén lo Ne, wzelo Ne wuu Ne zegnak te kwent lo men, re Ne:
5―Te dxe wruu te mén ne rguu bni, zalabni men zhobxtil. Chene kalaal meno, nuu we wyab nëz, wdee mén wgyichnii meno; lex wyab mgyin wu ma we. 6Nuuzego wyab lad gye; chene le we wlen, wbidxo por ne yëtet xkuup nga. 7Nuuzego wyab lad lbagyëts; le chene le we zaroo yrupo, wket lbagyëtso. 8Per nuuzego wyab ledne wen lyu. Wroo we, kesentyent wako, nuu we wak axtegue tebgwyuu zhob.
Wluzhse re Jesus yra diizree, wnii Ne ndípse, re Ne:
―Men ne rkagyedyag diiz, gon men neree ne rzëët noo.
Ne gan penak rzëët Jesus xdiiz Dëdyuzh zegnak te kwent
(Mt. 13:10-17; Mr. 4:10-12)
9Lex wnabdiiz yra xpén Jesus lo Ne gan pe rna kwent guin. 10Wke Ne re Ne:
―Laa de yra de, Dëdyuzh wniiz si ne gaknan de logne ngueedx ne rkyeen Ne, per le lo men stebëd men rzëët noo we zegnak te kwent, chen mase mazre rwii men, per nak men zegnak mén ne rwiidet; mase mazre ron men diiz, per ydeedet men kwento.
Le Jesus rzëët ne rna xkwent men ne rguu bni
(Mt. 13:18-23; Mr. 4:13-20)
11’Zeree rna kwentree: Zhobbni nak xdiiz Dëdyuzh. 12Le zhobbni ne wyab nëz nak zegnak mén ne ron xdiiz Dëdyuzh, per rdxiin Bzelo rboo we lextoo men chen ylaleedxdet meno chen yláádet men lo dol. 13Le zhobbni ne wyab lad gye nak zegnak mén ne ron xdiiz Dëdyuzh; rzhiilen men ron meno, per kom nak men zegnak ne yëtet ndal lu, rlaleedxdet meno xche; chene pe rzak men, rsalzaangue meno. 14Le zhobbni ne wyab lad lbagyëts nak zegnak mén ne ron xdiiz Dëdyuzh, per tsoowgue tsoowgue rdee men si rnitleedx meno, por ne za lextoo men yra ne nuu gyëzlyuree no por ne rlaan men ne ylaa men ne rlaan led men, rlaadetre men ne wen. 15Per le zhobbni ne wyab ledne wen lyu, nak zegnak mén ne ron xdiiz Dëdyuzh no ydeblextoo men rlaleedx meno, tebegue laa we nuu xtoo men, no rlaa men ne wen.
Xkwent bnii
(Mr. 4:21-25)
16’Rut rkaadet te bnii por ne ytsëë men lo we o por ne yzoob meno zhiin loon, sinke rzobgya meno chen yzenii we lo mén ne tee lenyuu. 17Zenga ke, bet ne ngueedx yët ne yrunyoodet, ni yët ne rak rlaanguel ne gaknandet mén, sinke sdxiin dxe ne gaknan méno.
18’Por neguin wen wenendxee gukagyedyag ne na noo lo de. Men ne che rukas xdiiz Dëdyuzh, laa Ne ylaa ne mazre tsukas meno; per le men ne rukasdeto, axtegue ne chendxee rukas men, tsukasdetre meno.
Wdxiin xnaa Jesus yra men bech Ne
(Mt. 12:46-50; Mr. 3:31-35)
19Wdxiin xnaa Jesus yra men bech Ne guex ledne zu Ne, per rakdet ybig men lo Ne por tant ndal mén ndxin. 20Orguin waluu mén diiz lo Ne, re men:
―Le xnaa de no le yra bech de zu fwer, rlaan men kwii men de.
21Lex wke Ne re Ne:
―Men ne ron xdiiz Dëdyuzh no rlaa meno, men guin nak xnaa noo no nak bech noo.
Wnegyakchi Jesus te meroo
(Mt. 8:23-27; Mr. 4:35-41)
22Te dxe wdee Jesus lenbark yra Ne xpén Ne, re Ne lo men:
―Yoo tekaa be stebkoo nis.
Lex za Ne yra Ne men. 23Or ne za men lo nis, waguees Ne. Tebegue wlen te meroo meduxtee lo nis; wzelo wdaa nis lenbark, le bark chexke zazebgyët. 24Orguin wa men wboo men mkaal lo Ne, re men:
―¡Maxter! ¡Maxter! ¡Le be zazebgyët!
Lex waxee Ne wakndux Ne lo meroo guin no le lo nis; wutsëgoo, nonchee chi wak. 25Lex re Ne lo yra xpén Ne:
―¿Gozh xgyelerlaleedx de naa?
Per kesentyent wdxe men yra men, rzee rzak men, rnabdizlsaa men, re men:
―¿Pezee nakleg ménree ne axtegue lo mee, axtegue lo nis rnebééy men, no rono xdiiz men?
Men-Gadara ne nuu menzab lextoo
(Mt. 8:28-34; Mr. 5:1-20)
26Wdxiin Jesus yra Ne xpén Ne lo xelyu men-Gadara ne nak stebkoo nis, ngali lyu ne la Galilea. 27Chene wruu Ne lenbark, wruu te mgyeey ne nak mengyëz guin, za men zatsëlo men Ne. Che wakxcheroo nuu menzab lextoo men. Rakdetre men xab men, ni nuudetre men yuu, sinke teblose lad baa ka men. 28Chene wii men Jesus, wobtsadii men, wzuzhib men lo Ne, lex ndípse wnii menzab ne nuu lextoo mgyeey guin, re menzab:
―¿Penak rgal de noo, Jesus XPee Dëdyuzhnzoon? Ynab noo lo de ne yzakzidet de noo.
29Re men zenga porke rkyeen Jesus ne yruu menzab lextoo men. Che wakxcheroo nuu menzab lextoo men; mase rliib mén nii nyatee men kon kaden chen bat tsadet men, per rtxugyaa men kaden; lex rkyenfwers menzab men ra men denbidx. 30Orguin wnabdiiz Jesus lo men, re Ne:
―¿Txu la de?
Wke men re men:
―Le noo la Legión.
Re men zenga porke ndalyaa nak menzab ne nuu lextoo men. 31Lex wnab menzab lo Ne ne yxaaldet Ne men lenpos ne kesentyent gyët. 32Kom nga txu gyeey guin ledne zu Jesus ndxin ndal kuch ka ma gwdu, lex wnab menzab lo Jesus ne ydee Ne si tee menzab lextoo yra kuch guin, lex wdee Ne si. 33Orguin wruu menzab lextoo mén guin, watee menzab lextoo yra kuch. Wzelo ma wzhoon maa wxenxtoo ma te ruyúú, wyab ma axtegue lo nis. Nga wobkyiky ma nis, wet maa.
34Chene wii yra mén ne rapkwent kuch guin neguin ne wak, orgueguin wzhoon men, lex wa men waluu men diiz lenlgyëz no le ledne ka mén den. 35Lex wruu yra mén za men wii neguin ne wak. Chene wdxiin men lo Ne, wii men le mén guin ne wruu menzab lextoo che zobchee lo Ne, che nak men xab men no che nde bnii xgyeryen men. Ne wii yra mén guin neguin, wdxe men. 36Yra mén ne wii neguin ne wak, laa men wuu diiz gan pezee wyaken mén guin ne wruu menzab lextoo. 37Lex wnab yra mén ne nuu nes Gadara lo Ne ne yruu Ne nga, porke kesentyent rdxe men. Lex wdee Ne lenbark sya Ne. 38Orguin wzelo mgyeey guin ne wruu menzab lextoo wnab men lo Ne ne ydee Ne si tsanal men Ne, per nadet Ne, re Ne lo men:
39―Guberee, gugya ruxyuu de, gu de diiz yra ne wlaa Dëdyuzh de.
Lex sya mgyeey guin, wuu men diiz ydendxee lenlgyëz neguin ne wlaa Jesus por laa men.
Xsaap Jairo no le wnaa ne wtee nya led xab Jesus
(Mt. 9:18-26; Mr. 5:21-43)
40Chene wberee Jesus stebkoo nis, kesentyent rzhiilen yra mén ne le Ne wberee porke che noze kambë́z men Ne. 41Lex wdxiin te mén ne la Jairo ne rnebééy lenydoo, wzuzhib men wnab men lo Ne ne tsa Ne ruxyuu men, 42porke rap men te xsaap men ne rap zeg chibtxup iz, mer mer guet nzeb. Ne za Ne nëz, kesentyent ndalyaa mén zanal Ne, noze reen men Ne.
43Lad yra mén guin za te wnaa ne rzhuun, che wzaa chibtxup iz ryab men ren, no che wluzh men yra ne rap men por ne ra men lo doctor; per ni te men wundet gan nneseyaken men. 44Wbig wnaa guin nes zhich Jesus, wtee nya men luzh xab Ne. Orgueguin wyaag men ren.
45Lex wnabdiiz Jesus, re Ne:
―¿Txuzh wgal led noo?
Kom yra mén re: “Ruttee”, wke Bëd yra Bëd xkompanyer Bëd, re Bëd:
―Maxter, noze reen mén de, noze rtxaap men de, no le de rnabdiiz gan txuzh wgal led de.
46Per wke Ne re Ne:
―Nuu mén wgal led noo, porke wyenen noo ne wruu xfwers noo.
47Chene wyenen wnaa guin ne wyenen Jesuso, wa men noze rzhiz men, wzuzhib men lo Ne. Lex wxalruu men nes lo yrandxee mén, gan penak wgal men luzh xab Ne no ne orgueguin wyaken men. 48Orguin re Ne lo men:
―Zhiina, por ne wlaleedx de noo, wyaken de. Zhaas gugya.
49Benak kanii Ne lo men, chene wdxiin te xpén Jairo, re men lo Jairo:
―Le xsaap de che wet. Gunendetre de lo Maxter.
50Per chene won No, re Ne lo Jairo:
―Ydxedet de; noze gulaleedx noo, syaken xsaap de.
51Chene wdxiin Ne ruxyuu Jairo, wdeedet Ne si ndenal ndal mén Ne lenyuu, nonchee Bëd no le Jacob no le Xwa no le xegwzan mëëd guin. 52Yrandxee mén ne ndxin baanske rlaa men, roon men por mëdgwnaa guin. Per re Ne lo men:
―Goondet de; wetet nzaap gwa, noze nexguees nzeb.
53Per lel wzhidxno yra mén guin Ne, porke nan men ne che wet nzeb. 54Lex wnëëz Ne nya nzaap guin, ndípse wnii Ne, re Ne lo nzeb:
―Nzebwin, gutsaxee.
55Orguin wban nzeb, waxeegue nzeb; lex wkyeen Ne ne ydee men ne gu nzeb. 56Kesentyent wzee wzak xegwzan nzeb, per re Ne lo men ne rut lo gudet men diizo.
Currently Selected:
LUCAS 8: zpi
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.