San Juan 10
10
Ejempluꞌ curaleꞌ sanchi
1Che uni Jesuse:
―Neli nia luhua nú bene enu la chuꞌu enza ruꞌu puerta curaleꞌ sanchi sino que riuꞌu nzeꞌe enza rene neca nzeꞌe huanaꞌ nu rcachiꞌ nzeꞌe steneꞌ bee bene. 2Pero bene enu riuꞌu enza ruꞌu curale nzeꞌe siꞌ neca bene enu rriꞌiucu bee sanchi. 3Nu bene enu rriucu ruꞌu curaleꞌ beeí xaꞌla nzeꞌe ruꞌu curaleꞌ beeí para nú chuꞌu bene enu rriꞌiucu beeí nu chenu rixialla nú lee cada tucua beeí nuꞌlu beeí chilla. Nu rlualla beeí curale. 4Nu chenu ulaxu nú uchiuꞌu ye bee sanchiꞌlla che nzucululla lubeeí nu nzenala beeí liꞌilla, xne nuꞌlu beeí chilla. 5Pero la chenala beeí bene rene, sino que riecaxuꞌu beeí lu nzeꞌe, xne la chulu beeí chii nzeꞌe.
6Chenu ulaxu nú uni Jesuse ejemplu cuaꞌ liꞌibeei né riꞌi beei beyaꞌ xi rni nú uninu.
Jesuse neca xi neca tucu bene enu rriꞌiucu nzeꞌca bee sanchi
7Chequie uniaꞌla Jesuse lubee bene zeꞌe:
―Neli nia luhua, liꞌá neca xi neca ruꞌu curaleꞌ bee sanchi elu riuꞌu beeí. 8Ye bee bene enu rlutilá ubeꞌta luquelá liꞌá neca bee nzeꞌe xi neca huanaꞌ nu rcachiꞌ nzeꞌe steneꞌ bee bene pero bee enu neca bee benea né riꞌi caso beella bee nzeꞌe. 9Liꞌá neca xi neca puerta, nu bene enu chuꞌu ruꞌu puerta quieꞌ tsilaꞌa nzeꞌe, che nuꞌla modo nú chuꞌu nzeꞌe nu chiuꞌu nzeꞌe tucu nú rriꞌi bee sanchi, nú xelaꞌ beeí ixi acubeeí.
10’Huanaꞌ nzeꞌtatsia para nú rcachiꞌ nu ruuti nu rnitilui bene, pero liꞌá nzela para nú liꞌihua luꞌcuhua elunehuañi, elunehuañi nú leca xunga laxu. 11Liꞌá neca tucu bene enu rriꞌiucu nzeꞌca bee sanchiꞌ, nu tucu bene enu rriꞌiucu nzeꞌca bee sanchiꞌ para liꞌilla lecaxi riꞌi mase hasta nú atilla equie cuendaꞌ bee sanchiꞌlla. 12Pero enu riaxutsia rriucu beeí, chenu rlañiꞌ nzeꞌe nú nzeꞌta bichiu riecaxuꞌu nzeꞌe sanaꞌ arquiꞌ nzeꞌe beeí xne la neca nzeꞌe tucu bene enu rriꞌiucu nzeꞌca bee sanchi nu laca beeí sanchiꞌlla, che rucu bichiu beeí nu rtiꞌchialetse bichiu beeí. 13Bene cuaꞌ sanaꞌ arquiꞌlla beeí, xne riaxutsialla nequienulla beeí nu la riꞌilla caso beeí.
14-15’Liꞌá neca bene enu rriꞌiucu nzeꞌca bee sanchiꞌ, scua tucu nú nuꞌlu Paa liꞌá leꞌca scua nuꞌlua liꞌinu, leꞌca scua nuꞌlua bee sanchia nu liꞌibeeí nuꞌlu beeí liꞌá. Nu lecaxi riꞌi mase hasta nú atia equie cuendaꞌ beeí. 16Leꞌca rluꞌcua stexcuaꞌa bee sanchi enu la chucheꞌ liñi curale quieꞌ, rquiꞌña nú nzetucuaꞌa beeí, nu zucuꞌbeeí nú rnia, para nú acatucunecatse beeí nu tucutsia enu riꞌiucu beeí.
17’Pa Diose seca liꞌá xne rdete cuendaa liꞌá nú atia, para nú huañi zecaa stucu bese. 18Lecati riꞌi ana nú uti liꞌá, tunu liꞌá la zela nú atia, liꞌá rluꞌcua poder nu zela nú atia, nu huañi zecaa stucu bese xne scua unibiyaꞌ Paa lua.
19Chenu ubeneꞌ bee bene Israel bee bedichiaꞌ quieꞌ, stucuaꞌla urene urene unibeei. 20Huaxi beei uni:
―¿Xinu rriꞌi casohua nucuaꞌ nu benechiquiꞌ nuꞌ arquiꞌ nucuaꞌ nu ichia lucu seca nucuaꞌ?
21Pero texcuaꞌa beei rni:
―Niꞌ tucu bene enu nuꞌ benechiquiꞌ arquiꞌ laca ni scua. ¿Xieꞌ aca tucu benechiquiꞌ riꞌi nú lañiꞌ bee bene enu niquieꞌ iꞌculu la?
Rle bee bene Israel lu Jesuse
22Tiembu iqui, chenu rriꞌi bee bene Israel eliñi Indu llene Jerusalén, 23se Jesuse enza liñi curdureꞌ indu zeꞌe elu lee curdureꞌ Salomón. 24Che uyabica bee bene Israel lunu nu unibeei lunu:
―¿Hasta xungaquie ixiuleꞌelu luru nú ti necalu? Neli uniꞌ luru tunu liꞌilu necalu Cristo.
25Nu uni Jesuse lubeei:
―Unilá luhua nú ti necaa pero liꞌihua la chili arquiꞌhua Liꞌá. 26Pero liꞌihua la chili arquiꞌhua liꞌá, lunú la acahua bee benea. Tucu nú unilá luhua. 27Bee bene enu neca bee benea nuꞌlu bee nzeꞌe chia nu liꞌá nuꞌlua bee nzeꞌe nu nzeꞌtanala bee nzeꞌe liꞌá. 28Liꞌá rdetea elunehuañi nú leca xunga laxu lubeella, nu lecaꞌ xunga nitilu beella, leꞌca lecati axi beella yaa. 29Xne Pa Diose, liꞌinu uliquiꞌnu beella lua, liꞌinu másela rluꞌcunu poder lu yeene nu lecati axi beella yanu. 30Liꞌá nu Pa Diose tucutsia necaru.
31Che unaꞌtseaꞌla bee bene Israel quiee nzetuꞌbeei liꞌinu. 32Chequie uni Jesuse lubeei:
―Huaxi beenú neca nzeꞌca uriꞌá luhua equie poder nú rluꞌcu Pa Diose, ¿ta luye bee nucuaꞌ, duꞌhua quiee liꞌá?
33Ucuaqui beei nú unibeei:
―La necane equie beenú neca nzeꞌca uriꞌilu, nú duꞌuru quiee liꞌilu. Duꞌuru quiee liꞌilu lunú la luꞌculu ulaꞌna lu Diose, xne rriꞌilu nú necalu Diose nu benetsialu.
34Nu uni Jesuse lubeei:
―Xieꞌlanu lu leyꞌhua rni: “Liꞌá unia nú liꞌihua necahua bee diose.” 35Nediyaꞌahua nú leca modo tsacuꞌ arquiaꞌahua lunú rni lu ichiꞌ Stichiaꞌ Diose. Nú liꞌinu ulualenu bee diose bee bene enu uyucu stichiaꞌnu. 36Nee tunu Pa Diose utsulanu liꞌá para nú nzelaa lu iliulabe quieꞌ. ¿Xinu rnihua nú la luꞌcua ulaꞌna lunu, lunú unia nú necaa lliꞌñinu? 37Tunu liꞌá la riꞌá tucu nú rni Pa Diose la chili arquiꞌhua liꞌá. 38Pero tunu rriꞌá tucu nú rninu mase la chili arquiꞌhua liꞌá, pero uyalí arquiꞌhua lunú rriꞌá, para nú riꞌihua beyaꞌ nú liꞌá nzua cuna Pa Diose nu liꞌinu nzunu cuna liꞌá.
39Hora zeꞌe stucuaꞌla bese uniarquiꞌ beei nú naꞌtse beei Jesuse, pero chu ulaꞌanu leta yaa beei nzanu.
40Nu che nza zecanu stucu chú reꞌcu Jordán, luguare elu rluti urinza Juan bee bene, nu uyaꞌnanu zeꞌe. 41Nu huaxi bee bene uya lunu, nu unibeei:
―Neli, nú né riꞌi Juan niꞌ tucu milagro. Pero ye lunú unilla equie cuendaꞌ bene quieꞌ, neli necane.
42Nu huaxi bee bene uyalí arquiꞌ Jesucristo luhuare zeꞌe.
Currently Selected:
San Juan 10: zpl
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.