Matiɔ 7
7
E wä ngbanga wä gâ pâ angâ e ne
(Luki 6.37-38,41-42)
1«E wä ngbanga wä gâ lə kumu azü ne, ka Ndjapä wa ngbanga wa gâ lə kumu e ne. 2Mbrə ə̂në, Ndjapä sə kə wa ngbanga gâ lə kumu e Lïndə̂ ngbanga ə̂në e wa gâ lə kumu azü kɔ. Ərə ə̂në e sə kə za ndə kə to də ərə kə angâ e kɔ də̂ Ndjapä sə kə za ndə kə to də ərə kə e. 3Mbrə yekɔ də̂ bə wu aya ebe ə̂në ə sə lə ala aye zə â wu ayɔ ə̂në ə sə lə ala zə kɔ wu ne kɔ? 4Mbrə yekɔ də̂ bə pa kə aye zə ə pa: “Kä ə kä mə ma aya ebe ə̂në ə sə lə ala zə kɔ”, əbə ə̂në bə wu ndje ayɔ ə̂në ə sə lə ala zə kɔ wu ne kɔ? 5Əbə, əyïama bishi, mä angbʉlînə ayɔ ə̂në ə sə lə ala zə kɔ gâ ye ka ə lishi tə ə̂rɔ̂nə ndə kə pa bə ma ebe ə̂në ə sə lə ala aye zə kɔ.
6«E kö kö ərə ə̂në ə sə kpî mbrə Ndjapä kɔ kə ayavrɔ ne. E kö kö ndje akədji nə̂ e wli gâ ətshi akɔsɔ ne. Də̂ ne, əndje sə kə dɔ tshelə nə də ə̈nü əndje ə sə kə do tə̂ əndje ndə kə wa e də əku.»
Əpʉ kə yu tshuku ərə kə Ndjapä
(Luki 11.9-13)
7«E yü tshuku ərə, əndje sə kə za kə e; e prä ərə, e sə kə sɔtə̂ nə; e ngë manda, əndje sə kə krɔ nə kə e. 8Mbrə ə̂në, əzü ə̂në tshə yu tshuku ərə, əndje sə kə za kə ətshə; əzü ə̂në tshə pra ərə, tshə sə kə sɔtə̂ nə; əzü ə̂në tshə nge manda, əndje sə kə krɔ nə kə ətshə. 9Abä əgblə əde lə takpa tə̂ e də̂ əgblə nə̂ ye yu ətshə tə̂ mapa â tshə sə kə za badja kə ətshə? 10Wala tshə â yu ətshə tə̂ giangû â tshə sə kə za əkrɔ kə ətshə? 11Kədə, e-e ə̂në e sə tə aəmbrʉ azü kɔ, e wusə̂ kə ko aə̂rɔ̂ aərə kə aneshe nə̂ e, Abä e ə̂në tshə sə mâ lafɔ kɔ lï lï ndə kə ko aə̂rɔ̂ aərə kə azü ə̂në əndje yu tshuku nə kə ətshə kɔ ə ro ne a?»
Ə̈ndö əpʉ lə âgbɔ̂ əpʉ
(Luki 6.31)
12«Ərə nɔ̂ ə̂në e yində nə ə pa azü mbrə kə e, e-e ndje, e mbrə̈ kʉtə̂ nə kə əndje. Mbrə ə̂në ərə ə̂në âgbɔ̂ əpʉ nə̂ Mayïzə də afraka nə̂ aawopandəma Ndjapä zâ ama ndə kə ma kɔ kə sə̂.»
Əpʉ aäwä bishi
(Luki 13.23-24)
13«E lï lə əngʉ manda, mbrə ə̂në əgerə tshelə manda də âgbɔ̂ äwä na də əzü gâ ə̂sə̂ kuzu. Azü ngbatshe kə za äwä səkɔ. 14Bale, əngʉ tshelə manda də äwä ə̂në ə sə teashe kɔ na də əzü gâ ə̂sə̂ sorô. Azü ə̂në əndje sə kə sɔtə̂ äwä səkɔ əndje ngba ngba ne.»
Aafrɔ aawopandəma Ndjapä
(Luki 6.43-44)
15«Ala e në tə̂ aafrɔ aawopandəma Ndjapä. Əndje sə kə na gâ tə̂ e də akwa andalimi tə̂ əndje. Bale, djoko lə əndje, əndje sə tə aəmbrʉ atshɔndjɔ. 16E sə kə yerɔ əndje tə̂ äwä kə ma tə̂ əndje. Əndje kɔ ə̂lê vinyə lə ndukû əshi wala figə lə ayɔ əshi a? 17Ə̂rɔ̂ ayɔ le ə̂rɔ̂ leyɔ, bale, əmbrʉ ayɔ le ndje əmbrʉ leyɔ. 18Ə̂rɔ̂ ayɔ le əmbrʉ leyɔ le ne, əmbrʉ ayɔ le ndje ə̂rɔ̂ leyɔ le ne. 19Ayɔ nɔ̂ ə̂në ə le ə̂rɔ̂ leyɔ le ne kɔ, əndje sə kə de nə ə wli gâ ala əwo. 20Rəkɔ, e sə kə yerɔ aafrɔ aawopandəma Ndjapä tə̂ äwä kə ma tə̂ əndje.»
Djatra atrawaya
(Luki 6.46; 13.25-27)
21«Ə də̂ azü nɔ̂ ə̂në əndje pa kə əmə ə pa: “Âgbɔ̂ Əyïngerə, Âgbɔ̂ Əyïngerə!” kɔ kə sə kə li gâ lə Əgɔngerə tshelafɔ ne. Bale, kʉtə̂ azü ə̂në əndje sə kə ma ərə ə̂në tshelə Abä əmə mâ lafɔ kɔ yində nə kɔ kə sə â li. 22Tə̂ alɔ kə wa ngbanga nə̂ Ndjapä, azü ngbatshe sə kə pa kə əmə ə pa: “Âgbɔ̂ Əyïngerə, Âgbɔ̂ Əyïngerə! Ə də̂ də əɨrɨ zə də̂ ä pâ ndəma Ndjapä kɔ ne a? Də əɨrɨ zə də̂ ä grɔ̂ aafrɔ ayirə̂ kɔ ne a? Də əɨrɨ zə də̂ ä mâ aərə ə̈lü ngbatshe kɔ ne a?” 23Bale, mə sə kə pa kə əndje orâ ə pa: “Mə wusə̂ e wu bale ne; e gï tə̂ e ngrʉ̂ tə̂ əmə gashe, e-e də̂ azü kə ma nyaka!”»
Əpʉ kə ma anda gâ pâ əkpʉ
(Luki 6.47-49)
24«Rəkɔ, mə pa kə e, əzü nɔ̂ ə̂në tshə dji əpʉ sə̂ ə̂në mə pa kɔ â ma tə̂ ye Lïndə̂ nə, tshə sə mata əyï kə wusə̂ ərə ə̂në tshə mâ anda nə̂ ye gâ pâ əkpʉ. 25Yavrɨ nî, ə̂ngû sû ə zâ ətshe nɔ̂, əyi yî də âgbɔ̂ gbo anda nə. Bale, anda nə ngɔ̂ ngɔ̂ ne, mbrə ə̂në əndje mô anda nə gâ pâ əkpʉ. 26Bale, əzü nɔ̂ ə̂në tshə dji əpʉ sə̂ ə̂në mə pa kɔ, ə ma tə̂ ye ma Lïndə̂ nə ne, tshə sə mata ngo tə̂ ə̂në tshə mô anda nə̂ ye gâ pâ mindu. 27Yavrɨ nî, ə̂ngû sû ə zâ ətshe nɔ̂, əyi yî də âgbɔ̂ gbo anda nə, anda nə ngɔ̂ ə ndɨ̂ frəkpəte.»
Jezu yîsə̂ əpʉ də awlra
(Markə 1.22; Luki 4.32)
28«Mandânə ə̂në Jezu yîsə̂ əpʉ sə̂ ə̂në ə kâ gâ ye kɔ, kumu azü nə nɔ̂ kpê pâ əndu əndje mbrə kə yisə̂ əpʉ nə̂ ye nə. 29Mbrə ə̂në tshə yîsə̂ əpʉ nə tə əyïngerə, tshə yîsə̂ nə yî mata aawoyisə̂ âgbɔ̂ əpʉ nə̂ Mayïzə kə əndje nə ne.»
Currently Selected:
Matiɔ 7: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation