Luki 16
16
Əyïkosəra ə̂në tshə ma ərə də äwänə
1Jezu pâ ndje kə atrawaya nə̂ ye ə pa: «Ə̈bə̈ koshe kə sə də aərə ngbatshe sə̂ je ə̂në tshə sə̂ də ə̈bə̈ awobata aərə nə̂ ye. Bale, azü nâ ə pâ kə ətshə ə pa: “Awobata aərə nə sə kə ndɨ aərə nə̂ zə nə.” 2Bale, tshə ê ətshə ə pâ kə ətshə ə pa: “Əpʉ yekɔ də̂ mə dji də əɨrɨ zə rəkɔ? Yïsə̂ äwä ə̂në bə mbrə̂ də aərə nə̂ əmə nə kɔ kə əmə, mbrə ə̂në bə sə sə kə daka pə tə awobata aərə nə əmə ne!” 3Awobata aərə nə pâ mâ tə̂ lɔsu ye ə pa: “Ə̂në âgbɔ̂ əzü nə̂ əmə sə kə grɔ əmə tə̂ kosəra nə̂ ye nə kɔ, mə sə kə mbrə atâ â sə kɔ? Mə sə sə də awlra kə djo kəndɨ ne, kə e ətshe ndə ərə, gana nə mbrə əmə mbrə. 4Mə wûsə̂ ərə ə̂në mə sə kə mbrə nə kɔ gâ ye ndə kə pa azü wəra əmə tə ə̂rɔ̂nə lə anda nə̂ əndje alɔ ə̂në əndje grɔ əmə tə̂ kosəra nə̂ əmə nə.” 5Bale, tshə ê azü bale bale ə̂në ködä nə̂ âgbɔ̂ əzü nə̂ ye nə sə̂ lə kumu əndje kɔ. Tshə pâ kə angbʉlî əzü nə ə pa: “Ködä nə̂ âgbɔ̂ əzü nə̂ əmə sə lə kumu zə vəkɔ?” 6Tshə kîrə əpʉ kə ətshə ə pa: “Tuku kâdâ zazü bale.” Awobata aərə nə pâ kə ətshə ə pa: “Fraka ködä nə̂ zə kə səye, sə̈ gâ tʉ katshä ə tä morofo.” 7Tshə pâ kwatə̂ye kə ə̈bə̈ ata nə ə pa: “Əbə, ködä nə̂ zə sə vəkɔ?” Tshə kîrə əpʉ ə pa: “Sake ə̂lê gbandja zazü bishi də morofo.” Awobata aərə nə pâ kə ətshə ə pa: “Fraka ködä nə̂ zə kə səye, tä zazü bishi.” 8Âgbɔ̂ əzü nə̂ awobata aərə nə ə̂në tshə wusə̂ kə bata aərə wu tə ə̂rɔ̂nə ne kɔ, gâmba ətshə mbrə ə̂në tshə mâ ərə nə̂ ye tə̂ äwä kə tegbɔ kumu ye. Mbrə ə̂në azü tshepashɔ səye sə kə mbrə ərə kə angâ əndje tə̂ äwä kə tegbɔ kumu əndje ə rô azü nə̂ Ndjapä ə̂në əndje sə tə azü ə̂yîəwo kɔ.»
Ə̈bə̈ əzü lï lï ndə kə vrɔ Ndjapä gâ ndə ngendja äwä bale ne
9«Ənə̂ əmə, mə pa kə e, e kö aərə tshepashɔ səye ə mä gbɔbəngâ də nə də azü ndə kə pa alɔ ə̂në aərə nə â nglɔ̂ tə̂ e gâ ye, Ndjapä sə kə wəra e tə ə̂rɔ̂nə lə anda ə̂në ə sə kə sə pə piii kɔ. 10Əzü ə̂në tshə sə tə ə̂rɔ̂ awobata aaya aərə, tshə sə kə sə ndje tə ə̂rɔ̂ awobata əgbro aərə. Əzü ə̂në tshə sə sə tə ə̂rɔ̂ awobata aaya aərə ne, tshə sə sə kə sə ndje tə ə̂rɔ̂ awobata əgbro aərə ne. 11Rəkɔ, kədə e sə sə tə aə̂rɔ̂ aawobata aərə tshepashɔ səye ne, əde kə sə kə ko adjatra aərə nə kə e? 12Kədə e sə sə tə aə̂rɔ̂ aawobata aərə nə̂ ə̈bə̈ ata əzü ne, əde kə ko aərə ə̂në ə sə tə ənə̂ e kɔ kə e?
13«Ə̈bə̈ əyïkosəra bale lï lï ndə kə pa tshə ma kosəra kə aâgbɔ̂ azü bishi ne. Mbrə ə̂në tshelə ye sə kə yində ə̈bə̈ nə bale ə wəra tə̂ ye tə̂ bale nə wala tshə sə kə tɔ popo ə̈bə̈ nə bale â sə kə wu bale nə tə amba əzü lə ala ye. E lï lï ndə kə pa e vrɔ Ndjapä də ngendja äwä bale ne.»
Alabə̈ aəpʉ nə̂ Jezu
(Matiɔ 11.12-13; 5.31-32; Markə 10.11-12)
14Alɔ ə̂në Afariza djî ndje əpʉ ə̂në Jezu pâ kɔ, əndje mɔ̂ ətshə də amɔ mbrə ə̂në tshelə əndje yîndə ngendja wââ. 15Jezu pâ kə əndje ə pa: «E-e, e sə tə azü ə̂në e yində kə sə tə ə̂rɔ̂nə lə ala azü, bale, Ndjapä wûsə̂ aərə ə̂në ə sə tə̂ lɔsu e kɔ gâ ye. Mbrə ə̂në ərə ə̂në ə sə tə âgbɔ̂ ərə lə ala azü, Ndjapä wu ənə̂ ye tə əmbrʉ ərə lə ala ye.
16«Âgbɔ̂ əpʉ nə̂ Mayïzə də əpʉ nə̂ aawopandəma Ndjapä yîsə̂ äwä kə azü ʉrrr ndjɔ gâ tə̂ alɔ Zââ Batistə. Ə vɔ̂tə̂ nə tə̂ tshekɨ Zââ Batistə nə, əndje yîsə̂ Ə̂rɔ̂ Əpʉ Əgɔngerə nə̂ Ndjapä, â əzü bale bale sə kə mbrə awlra ndə kə li gâ lə nə. 17Tshelafɔ də ashɔ sə kə ro kʉ tə amba ərə, bale ə sə sə kə sə tə amba ərə ndə kə pa ə̈bə̈ djɔklɔ aya ə̈nü ngrowô lə âgbɔ̂ əpʉ ro ne.
18«Koshe ə̂në tshə grɔ əwɔ nə â za ə̈bə̈ ata nə, kandää, tshə mâ nyaka gâ ye. Koshe ə̂në tshə za ə̈bə̈ yashe ə̂në äkɔ̈ nə grɔ̂ ətshə gâ ye kɔ, kandää, ətshə ndje, tshə shô də əwɔ əzü gâ ye.»
Əyïrishi gâ ndə Lazarə
19«Ə̈bə̈ koshe tə əyïrishi sə̂ je, ə̂në tshə yî kʉtə̂ aə̂rɔ̂ aləba ə̂në ndogɔ nə gbɔ̂ tə bandanə kɔ. Alɔnɔ̂, tshə sə̂ kə zɨ kʉtə̂ ə̂rɔ̂ ərə ə sə̂ kʉ lə ə̂rû. 20Ə̈bə̈ əyïəyo ə̂në əɨrɨ ye kə də̂ Lazarə kɔ, ə̂në aəku zâ tshekotə̂ ye nɔ̂ kɔ, sə̂ kə sho alɔnɔ̂ gâ lə manda nə̂ əyïrishi səkɔ. 21Tshə sə̂ kəmə də əgo kə zɨ akutru arəgo ə̂në ə yɔ̂ gâ tʉ alɔ ə̂në əyïrishi nə sə̂ kə zɨ ərə nə kɔ, äwä kə sɔtə̂ nə gûta gû ne. Ayavrɔ ndje sə̂ kə na ə lâ tshela aəku nə̂ ye nə. 22Ndə ə̈bə̈ alɔ, əyïəyo nə tshû, atrawaya nə̂ Ndjapä zâ ətshə ə gû də ətshə mâ ngotə̂ Abraamo. Əyïrishi nə tshû ndje, əndje shî ətshə. 23Mâ ə̂sə̂ akuzu nə, əyïrishi nə wû əyo tə bandanə. Tshə lîshi gâ lafɔ ə wû Abraamo ngrʉ̂ gâ ndə Lazarə gâ ngotə̂ ye. 24Bale, tshə tâ râwâ ə pa: “Abä, Abraamo, wü əyo əmə ə wlä Lazarə ndə kə pa tshə yi mato kəna ye lə ə̂ngû ə ta gâ pâ tima əmə ndə kə pa ə zɨtɨ, mbrə ə̂në mə sə kə wu əyo tə bandanə lə ala əwo səye.” 25Bale, Abraamo nə pâ kə ətshə ə pa: “Əgblə, lï tshelə zə ə pa leme-e mâ pâ ashɔ, bə sɔ̂tə̂ aərə nə̂ zə gâ ye â Lazarə ənə̂ ye wû əyo. Kpəsəye, əyo nə̂ ye nglɔ̂ kotəye gâ ye, bale, əbə, bə sə kə wu əyo. 26Gâ pâ nə kwatəndje, ə̈bə̈ əgerə kudû ə̂në ə lî wââ kɔ sə lə takpa tə̂ əzə̂ də a-e â äwä ndə kə pa azü djoko ndə ä ə̂në əndje yində kə na gâ ndə e kɔ guta gu ne. Äwä ndje ndə kə pa ə̈bə̈ əzü djoko ndə e na gâ ndə ä guta gu ne.” 27Əyïrishi nə pâ: “Abä, Abraamo, rəkɔ, mə tegbɔ ə̈nü zə, wlä Lazarə mâ lə anda nə̂ abä əmə, 28mbrə ə̂në, mə sə də alaye əmə mindû. Tshə nä ə pä əpʉ kə əndje kanika əndje na na ndje gâ ə̂sə̂ kə wu əyo səye ne.” 29Abraamo nə kîrə əpʉ ə pa: “Alaye zə sə də afraka nə̂ Mayïzə də ənə̂ aawopandəma Ndjapä, əndje djï əpʉ nə̂ əndje!” 30Əyïrishi nə pâ: “Bale ne, abä Abraamo, kədə ə̈bə̈ əzü lə takpa tə̂ akuzu kə na gâ tə̂ əndje, əndje sə kə tshi äwä angbrɔ kə mbrə tə̂ əndje tʉ.” 31Abraamo nə pâ kə ətshə ə pa: “Kədə əndje dji əpʉ nə̂ Mayïzə də ənə̂ aawopandəma Ndjapä dji ne, əndje sə sə kə yində əpʉ nə̂ ə̈bə̈ əzü bale ne, əzü nə â sə̂ kəmə tə əzü ə̂në tshə shê lə takpa tə akuzu.”»
Currently Selected:
Luki 16: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
Luki 16
16
Əyïkosəra ə̂në tshə ma ərə də äwänə
1Jezu pâ ndje kə atrawaya nə̂ ye ə pa: «Ə̈bə̈ koshe kə sə də aərə ngbatshe sə̂ je ə̂në tshə sə̂ də ə̈bə̈ awobata aərə nə̂ ye. Bale, azü nâ ə pâ kə ətshə ə pa: “Awobata aərə nə sə kə ndɨ aərə nə̂ zə nə.” 2Bale, tshə ê ətshə ə pâ kə ətshə ə pa: “Əpʉ yekɔ də̂ mə dji də əɨrɨ zə rəkɔ? Yïsə̂ äwä ə̂në bə mbrə̂ də aərə nə̂ əmə nə kɔ kə əmə, mbrə ə̂në bə sə sə kə daka pə tə awobata aərə nə əmə ne!” 3Awobata aərə nə pâ mâ tə̂ lɔsu ye ə pa: “Ə̂në âgbɔ̂ əzü nə̂ əmə sə kə grɔ əmə tə̂ kosəra nə̂ ye nə kɔ, mə sə kə mbrə atâ â sə kɔ? Mə sə sə də awlra kə djo kəndɨ ne, kə e ətshe ndə ərə, gana nə mbrə əmə mbrə. 4Mə wûsə̂ ərə ə̂në mə sə kə mbrə nə kɔ gâ ye ndə kə pa azü wəra əmə tə ə̂rɔ̂nə lə anda nə̂ əndje alɔ ə̂në əndje grɔ əmə tə̂ kosəra nə̂ əmə nə.” 5Bale, tshə ê azü bale bale ə̂në ködä nə̂ âgbɔ̂ əzü nə̂ ye nə sə̂ lə kumu əndje kɔ. Tshə pâ kə angbʉlî əzü nə ə pa: “Ködä nə̂ âgbɔ̂ əzü nə̂ əmə sə lə kumu zə vəkɔ?” 6Tshə kîrə əpʉ kə ətshə ə pa: “Tuku kâdâ zazü bale.” Awobata aərə nə pâ kə ətshə ə pa: “Fraka ködä nə̂ zə kə səye, sə̈ gâ tʉ katshä ə tä morofo.” 7Tshə pâ kwatə̂ye kə ə̈bə̈ ata nə ə pa: “Əbə, ködä nə̂ zə sə vəkɔ?” Tshə kîrə əpʉ ə pa: “Sake ə̂lê gbandja zazü bishi də morofo.” Awobata aərə nə pâ kə ətshə ə pa: “Fraka ködä nə̂ zə kə səye, tä zazü bishi.” 8Âgbɔ̂ əzü nə̂ awobata aərə nə ə̂në tshə wusə̂ kə bata aərə wu tə ə̂rɔ̂nə ne kɔ, gâmba ətshə mbrə ə̂në tshə mâ ərə nə̂ ye tə̂ äwä kə tegbɔ kumu ye. Mbrə ə̂në azü tshepashɔ səye sə kə mbrə ərə kə angâ əndje tə̂ äwä kə tegbɔ kumu əndje ə rô azü nə̂ Ndjapä ə̂në əndje sə tə azü ə̂yîəwo kɔ.»
Ə̈bə̈ əzü lï lï ndə kə vrɔ Ndjapä gâ ndə ngendja äwä bale ne
9«Ənə̂ əmə, mə pa kə e, e kö aərə tshepashɔ səye ə mä gbɔbəngâ də nə də azü ndə kə pa alɔ ə̂në aərə nə â nglɔ̂ tə̂ e gâ ye, Ndjapä sə kə wəra e tə ə̂rɔ̂nə lə anda ə̂në ə sə kə sə pə piii kɔ. 10Əzü ə̂në tshə sə tə ə̂rɔ̂ awobata aaya aərə, tshə sə kə sə ndje tə ə̂rɔ̂ awobata əgbro aərə. Əzü ə̂në tshə sə sə tə ə̂rɔ̂ awobata aaya aərə ne, tshə sə sə kə sə ndje tə ə̂rɔ̂ awobata əgbro aərə ne. 11Rəkɔ, kədə e sə sə tə aə̂rɔ̂ aawobata aərə tshepashɔ səye ne, əde kə sə kə ko adjatra aərə nə kə e? 12Kədə e sə sə tə aə̂rɔ̂ aawobata aərə nə̂ ə̈bə̈ ata əzü ne, əde kə ko aərə ə̂në ə sə tə ənə̂ e kɔ kə e?
13«Ə̈bə̈ əyïkosəra bale lï lï ndə kə pa tshə ma kosəra kə aâgbɔ̂ azü bishi ne. Mbrə ə̂në tshelə ye sə kə yində ə̈bə̈ nə bale ə wəra tə̂ ye tə̂ bale nə wala tshə sə kə tɔ popo ə̈bə̈ nə bale â sə kə wu bale nə tə amba əzü lə ala ye. E lï lï ndə kə pa e vrɔ Ndjapä də ngendja äwä bale ne.»
Alabə̈ aəpʉ nə̂ Jezu
(Matiɔ 11.12-13; 5.31-32; Markə 10.11-12)
14Alɔ ə̂në Afariza djî ndje əpʉ ə̂në Jezu pâ kɔ, əndje mɔ̂ ətshə də amɔ mbrə ə̂në tshelə əndje yîndə ngendja wââ. 15Jezu pâ kə əndje ə pa: «E-e, e sə tə azü ə̂në e yində kə sə tə ə̂rɔ̂nə lə ala azü, bale, Ndjapä wûsə̂ aərə ə̂në ə sə tə̂ lɔsu e kɔ gâ ye. Mbrə ə̂në ərə ə̂në ə sə tə âgbɔ̂ ərə lə ala azü, Ndjapä wu ənə̂ ye tə əmbrʉ ərə lə ala ye.
16«Âgbɔ̂ əpʉ nə̂ Mayïzə də əpʉ nə̂ aawopandəma Ndjapä yîsə̂ äwä kə azü ʉrrr ndjɔ gâ tə̂ alɔ Zââ Batistə. Ə vɔ̂tə̂ nə tə̂ tshekɨ Zââ Batistə nə, əndje yîsə̂ Ə̂rɔ̂ Əpʉ Əgɔngerə nə̂ Ndjapä, â əzü bale bale sə kə mbrə awlra ndə kə li gâ lə nə. 17Tshelafɔ də ashɔ sə kə ro kʉ tə amba ərə, bale ə sə sə kə sə tə amba ərə ndə kə pa ə̈bə̈ djɔklɔ aya ə̈nü ngrowô lə âgbɔ̂ əpʉ ro ne.
18«Koshe ə̂në tshə grɔ əwɔ nə â za ə̈bə̈ ata nə, kandää, tshə mâ nyaka gâ ye. Koshe ə̂në tshə za ə̈bə̈ yashe ə̂në äkɔ̈ nə grɔ̂ ətshə gâ ye kɔ, kandää, ətshə ndje, tshə shô də əwɔ əzü gâ ye.»
Əyïrishi gâ ndə Lazarə
19«Ə̈bə̈ koshe tə əyïrishi sə̂ je, ə̂në tshə yî kʉtə̂ aə̂rɔ̂ aləba ə̂në ndogɔ nə gbɔ̂ tə bandanə kɔ. Alɔnɔ̂, tshə sə̂ kə zɨ kʉtə̂ ə̂rɔ̂ ərə ə sə̂ kʉ lə ə̂rû. 20Ə̈bə̈ əyïəyo ə̂në əɨrɨ ye kə də̂ Lazarə kɔ, ə̂në aəku zâ tshekotə̂ ye nɔ̂ kɔ, sə̂ kə sho alɔnɔ̂ gâ lə manda nə̂ əyïrishi səkɔ. 21Tshə sə̂ kəmə də əgo kə zɨ akutru arəgo ə̂në ə yɔ̂ gâ tʉ alɔ ə̂në əyïrishi nə sə̂ kə zɨ ərə nə kɔ, äwä kə sɔtə̂ nə gûta gû ne. Ayavrɔ ndje sə̂ kə na ə lâ tshela aəku nə̂ ye nə. 22Ndə ə̈bə̈ alɔ, əyïəyo nə tshû, atrawaya nə̂ Ndjapä zâ ətshə ə gû də ətshə mâ ngotə̂ Abraamo. Əyïrishi nə tshû ndje, əndje shî ətshə. 23Mâ ə̂sə̂ akuzu nə, əyïrishi nə wû əyo tə bandanə. Tshə lîshi gâ lafɔ ə wû Abraamo ngrʉ̂ gâ ndə Lazarə gâ ngotə̂ ye. 24Bale, tshə tâ râwâ ə pa: “Abä, Abraamo, wü əyo əmə ə wlä Lazarə ndə kə pa tshə yi mato kəna ye lə ə̂ngû ə ta gâ pâ tima əmə ndə kə pa ə zɨtɨ, mbrə ə̂në mə sə kə wu əyo tə bandanə lə ala əwo səye.” 25Bale, Abraamo nə pâ kə ətshə ə pa: “Əgblə, lï tshelə zə ə pa leme-e mâ pâ ashɔ, bə sɔ̂tə̂ aərə nə̂ zə gâ ye â Lazarə ənə̂ ye wû əyo. Kpəsəye, əyo nə̂ ye nglɔ̂ kotəye gâ ye, bale, əbə, bə sə kə wu əyo. 26Gâ pâ nə kwatəndje, ə̈bə̈ əgerə kudû ə̂në ə lî wââ kɔ sə lə takpa tə̂ əzə̂ də a-e â äwä ndə kə pa azü djoko ndə ä ə̂në əndje yində kə na gâ ndə e kɔ guta gu ne. Äwä ndje ndə kə pa ə̈bə̈ əzü djoko ndə e na gâ ndə ä guta gu ne.” 27Əyïrishi nə pâ: “Abä, Abraamo, rəkɔ, mə tegbɔ ə̈nü zə, wlä Lazarə mâ lə anda nə̂ abä əmə, 28mbrə ə̂në, mə sə də alaye əmə mindû. Tshə nä ə pä əpʉ kə əndje kanika əndje na na ndje gâ ə̂sə̂ kə wu əyo səye ne.” 29Abraamo nə kîrə əpʉ ə pa: “Alaye zə sə də afraka nə̂ Mayïzə də ənə̂ aawopandəma Ndjapä, əndje djï əpʉ nə̂ əndje!” 30Əyïrishi nə pâ: “Bale ne, abä Abraamo, kədə ə̈bə̈ əzü lə takpa tə̂ akuzu kə na gâ tə̂ əndje, əndje sə kə tshi äwä angbrɔ kə mbrə tə̂ əndje tʉ.” 31Abraamo nə pâ kə ətshə ə pa: “Kədə əndje dji əpʉ nə̂ Mayïzə də ənə̂ aawopandəma Ndjapä dji ne, əndje sə sə kə yində əpʉ nə̂ ə̈bə̈ əzü bale ne, əzü nə â sə̂ kəmə tə əzü ə̂në tshə shê lə takpa tə akuzu.”»
Currently Selected:
:
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation