ᔪᐊᓇᓯᐅᑉ ᐊᒡᓚᖏᑦ 6
6
ᔩᓱᓯᐅᑉ ᓂᕆᑎᑦᓯᓂᖓ 5,000ᓂᒃ
ᒫᑎᐅᓯ 14:13-21; ᒫᑯᓯ 6:30-44; ᓘᑲᓯ 9:10-17
1ᑕᒪᑐᒪ ᑭᖑᕐᖓᒍᑦ ᔩᓱᓯ ᐃᑳᖅᐳᖅᑕᓯᐅᑉ ᒐᓕᓕᐊᑉ ᐊᑭᐊᓄᑦ (ᑍᔭᐅᔪᒧᑦ, ᑍᐱᐅᕆᐊᓯᐅᑉ ᐃᒪᖓᓂᒃ). 2ᐃᓄᒐᓴᒡᔪᐊᑦ ᒪᓕᒃᐹᑦ, ᓇᓗᓁᒃᑯᑕᕐᖕᓂᒃ ᑕᑯᓚᐅᕋᒥᒃ ᖃᓂᒪᔪᓂᒃ ᐋᖅᑭᒃᓯᑎᓪᓗᒍ. 3ᔩᓱᓯᓕ ᖃᖅᑲᒧᑦ ᒪᔪᕋᕋᒥ, ᖄᖓᓄᑦ ᐃᖏᑉᐳᖅ ᐃᓕᓐᓂᐊᖅᑎᓂ ᐃᓚᒋᓪᓗᒋᑦ. 4ᔫᑎᓪᓕ ᖄᖏᖅᑕᐅᕕᖕᒥᒃ ᓇᓪᓕᐅᓐᓂᖅᓯᐅᕐᕕᖓᑦ ᖃᒡᓕᓕᖅᐳᖅ. 5ᔩᓱᓯ ᑕᑯᓴᕋᒥ, ᑕᑯᕗᖅ ᐃᓄᒐᓴᒡᔪᐊᓂᒃ ᕾᓕᖅᑐᓂᒃ ᐃᒻᒥᓄᑦ, ᐱᓕᑉᐴᓯᒧᑦ ᐅᖃᖅᐳᖅ, “ᖃᓄᕐᓕ ᓂᐅᕕᕈᓐᓇᕐᖕᓂᐊᖅᐱᑖ ᐅᑯᐊ ᓂᕆᔭᒃᓴᖏᓐᓂᒃ?” 6ᔩᓱᓯ ᑍᒫᒃ ᐅᖃᖅᐳᖅ ᐱᓕᑉᐴᓯ ᖃᐅᔨᓴᕐᓗᓂᐅᒃ, ᖃᐅᔨᒪᒐᓗᐊᕐᓗᓂ ᖃᓄᐃᓕᐅᕈᓐᓇᕐᖕᓂᕐᖕᒥᓂᒃ.
7ᐱᓕᑉᐴᓯᐅᑉ ᑭᐅᕚ, “ᓯᐅᓪᕕᕆᓂᒃ 200 ᐅᖓᑖᓃᑦᑐᓂᒃ ᐊᑐᕆᐊᖃᕋᔭᖅᐳᒍᑦ ᑖᒃᑯᓂᖓ ᓂᕆᑎᑦᓯᓇᓱᒃᑯᑦᑕ ᒥᑭᔪᑯᓗᖕᒥᒡᓘᓐᓃᑦ ᐊᑐᓂᑦ ᐱᒐᓗᐊᖅᐸᑕ.”
8ᐃᓕᓐᓂᐊᖅᑎᖏᑕ ᐃᓚᖓᑦ, ᐋᓐᑐᕉ ᓮᒨᓂᐅᑉ ᐲᑦᑐᕉᓯᐅᑉ ᓄᑲᖓ, ᐅᖃᖅᐳᖅ, 9“ᐅᕙᓂ ᓄᑲᑉᐱᐊᖅᑕᖃᖅᐳᖅ ᓂᐊᖂᔭᓂᒃ ᑕᓪᓕᒪᓂᒃ ᐃᖃᓗᖕᓂᒡᓗ ᒪᕐᕉᖕᓂᒃ ᑕᖁᐊᖃᖅᑐᒥᒃ; ᑭᓯᐊᓂᓕ ᐃᓄᒋᐊᕌᓗᖕᓄᑦ ᑖᒃᑯᐊ ᓱᓇᐅᓐᖏᓚᑦ.”
10ᔩᓱᓯᐅᑉ ᐅᖃᐅᑎᕔᑦ, “ᐃᓄᐃᑦ ᐃᖏᖁᓚᐅᖅᓯᐅᒃ,” ᑕᒪᓐᓇ ᓇᔪᖅᑕᖓᑦ ᓄᓇ ᐃᕕᒃᓱᒐᔮᖑᖕᒪᑦ; ᑕᕝᕙ ᐃᓄᓕᒫᑦ ᐃᖏᑉᐳᑦ, ᑖᒃᑯᐊ 5,000 ᖃᓂᒋᔮᓃᑉᐳᑦ. 11ᔩᓱᓯᐅᑉ ᓂᐊᖂᔧᑦ ᑎᒍᕔᑦ, ᖁᔭᓕᑦᔪᑎᒋᔭᕇᕋᒥᒋᓪᓗ, ᐃᒃᓯᕙᔪᓄᑦ ᑐᓂᐅᖃᖅᑕᐅᖁᕔᑦ; ᑍᒫᒃᑕᐅᖅ ᐃᖃᓗᐃᑦ ᖁᔭᓕᑦᔪᑎᒋᓪᓗᒋᑦ ᑐᓂᒋᕔᑦ, ᓈᒻᒪᒃᓯᓪᓗᑎᒃ ᓂᕆᕗᑦ. 12ᐊᕿᐊᑦᑐᖅᑐᐃᓐᓇᐅᖕᒪᑕ, ᐃᓕᓐᓂᐊᖅᑎᓂ ᐅᖃᐅᑎᕔᑦ, “ᐊᒥᐊᒃᑯᒋᔭᐅᔪᑦ ᑲᑎᖅᓱᖅᓯᐅᒃ, ᒥᑭᔪᒥᒡᓘᓐᓃᑦ ᑕᒪᐅᖓᑐᐃᓐᓈᑐᖃᖁᓇᒍ.” 13ᑕᕝᕙ ᐊᒥᐊᑯᓕᒫᓂᒃ ᑲᑎᑦᓯᒐᒥᒃ ᐃᕕᐅᔭᓂᒃ 12ᓂᒃ ᑕᑍᕗᑦ ᐊᒥᐊᒃᑯᒋᔭᐅᔪᓂᒃ ᓂᐊᖂᔭᓂᑦ ᑕᓪᓕᒪᓂᑦ, ᐃᓄᐃᑦ ᓂᕆᓚᐅᖅᑕᖏᓐᓂᑦ.
14ᐃᓄᐃᓪᓕ ᓇᓗᓁᒃᑯᑕᕐᖕᒥᒃ ᑕᑯᒐᒥᒃ, ᔩᓱᓯᐅᑉ ᐱᓇᓱᐊᖅᑕᖓᓂᒃ ᐅᖃᖅᐳᑦ, “ᑖᓐᓇ ᖁᓚᕐᖕᓇᕈᓐᓃᖅᐳᖅ ᓇᓚᐅᑦᑍᔪᖕᒪᑦ ᓯᓚᕐᔪᐊᕐᖕᒧᑦ ᑎᑭᓂᐊᖅᓯᒪᔪᖅ!” 15ᔩᓱᓯ ᖃᐅᔨᒐᒥ ᐃᓄᐃᑦ ᖃᓄᐃᓕᐅᕈᒪᓂᖏᓐᓂᒃ, ᑎᒍᓗᒍ ᐊᖓᔪᖅᑳᕐᔪᐊᓐᖑᖅᑎᑦᓯᓇᓱᐊᕈᒪᓕᕐᖕᒪᑕ ᐱᔪᒪᓐᖏᒐᓗᐊᖅᐸᑦ, ᑖᒃᑯᓇᓐᖓᑦ ᕿᒪᕉᑎᓪᓗᓂ ᖃᖅᑲᒧᑦ ᒪᔪᕋᖅᐳᖅ ᐃᓄᑑᓪᓗᓂ.
ᔩᓱᓯᐅᑉ ᐱᓱᖕᓂᖓ ᐃᒪᐅᑉ ᖄᖓᒍᑦ
ᒫᑎᐅᓯ 14:22-33; ᒫᑯᓯ 6:45-52
16ᐅᓐᓄᖕᒪᓪᓕ, ᔩᓱᓯᐅᑉ ᐃᓕᓐᓂᐊᖅᑎᖏᑦ ᑕᓯᕐᖕᒧᐊᖅᐳᑦ, 17ᐅᒥᐊᒧᑦ ᐃᑭᓪᓗᑎᒃ, ᐅᑎᕋᓱᐊᓕᖅᐳᑦ ᑲᐲᕐᓂᐊᒧᑦ. ᑖᖅᓯᖕᒪᑦ, ᔩᓱᓯᐅᑉ ᓱᓕ ᐅᐸᓚᐅᓐᖏᒻᒪᒋᑦ. 18ᐊᓄᕌᓕᖅᑐᐊᓘᖕᒪᑦ ᐃᒪᖅ ᒪᓪᓕᓕᖅᐳᖅ. 19ᐃᓕᓐᓂᐊᖅᑎᑦ ᐃᐳᓪᖢᑎᒃ ᐃᖏᕐᕋᓕᕋᓗᐊᖅᑎᓪᓗᒋᑦ ᐃᒻᒪᖄ ᐱᖓᓱᓂᒃ ᓯᑕᒪᓂᒡᓘᓐᓃᑦ ᒤᓕᓂᒃ, ᑕᑯᓕᖅᐳᑦ ᔩᓱᓯᒥᒃ ᐃᒪᐅᑉ ᖄᖓᒍᑦ ᐱᓱᒃᑐᒥᒃ ᐅᒥᐊᒧᑦ ᖃᒡᓕᓕᖅᑐᒥᒃ. ᑲᑉᐱᐊᓱᓕᖅᐳᑦ, 20ᔩᓱᓯᐅᑉ ᐅᖃᐅᑎᕔᑦ, “ᐅᕙᖓᐅᕗᖓ ᑲᑉᐱᐊᓱᒐᓯ!” 21ᑕᕝᕙ ᐅᒥᐊᒧᑦ ᐃᑭᖁᓕᖅᐹᑦ, ᐊᑯᓂᐅᖏᑦᑐᖅ ᓄᓇᒧᑦ ᑎᑭᑉᐳᑦ ᐅᐸᒐᓱᐊᖅᑕᒥᖕᓄᑦ.
ᐃᓄᐃᑦ ᕿᓂᕐᖕᓂᖓᑦ ᔩᓱᓯᒥᒃ
22ᖃᐅᑎᓪᓗᒍ ᐃᓄᒐᓴᒡᔪᐊᑦ ᑕᓯᐅᑉ ᐊᑭᐊᓃᑦᑐᑦ ᑕᑯᓕᖅᐳᑦ ᐅᒥᐊᖅ ᐊᑕᐅᓯᐅᖕᒪᑦ, ᖃᐅᔨᓚᐅᕐᓗᑎᒡᓗ ᔩᓱᓯ ᐅᒥᐊᒧᑦ ᐃᓕᓐᓂᐊᖅᑎᒥᓄᑦ ᐃᑭᖃᑕᐅᓚᐅᖏᒻᒪᑦ, ᐃᓕᓐᓂᐊᖅᑎᖏᓪᓕ ᐅᒥᐊᖅᑐᓯᓚᐅᕐᖕᒪᑕ ᑖᒃᑯᑑᓪᓗᑎᒃ. 23ᐅᒥᐊᓪᓕ ᐊᓯᖏᑦ, ᑍᐱᕆᐊᓯᒥᑦ ᐱᔪᑦ ᓄᓇᒧᑦ ᑐᓚᒋᐊᖅᑐᓕᖅᐳᑦ, ᐊᑕᓂᐅᑉ ᓂᐊᖂᔭᓂᒃ ᖁᔭᓕᑦᔪᑎᖃᓚᐅᕐᓗᓂ ᓂᕆᑎᑦᓯᕕᒋᓚᐅᖅᑕᖓᑕ ᖃᓂᒋᔮᓄᑦ. 24ᐃᓄᒐᓴᒡᔪᐊᓪᓕ ᖃᐅᔨᒐᒥᒃ ᔩᓱᓯ ᑕᕝᕙᓃᖏᒻᒪᑦ, ᐃᓕᓐᓂᐊᖅᑎᖏᓪᓗ ᑕᕝᕙᓃᒻᒥᓇᑎᒃ, ᐅᒥᐊᒧᑦ ᐃᑭᕗᑦ ᑲᐲᕐᓂᐊᒧᓪᓗ ᐅᒥᐊᖅᑐᓕᖅᐳᑦ, ᔩᓱᓯᒥᒃ ᕿᓂᕐᓗᑎᒃ.
ᔩᓱᓯᐅᑉ ᓂᐊᖂᔭᐅᓂᕋᕐᖕᓂᖓ ᐃᓅᓯᖅᑕᓕᒃ
25ᐃᓄᐃᑦ ᔩᓱᓯᒥᒃ ᓇᓂᓯᒐᒥᒃ ᑕᓯᐅᑉ ᐊᑭᐊᓂ, ᐅᖃᐅᑎᕚᑦ, “ᐊᔪᕆᖅᑐᐃᔩ, ᖃᖓ ᑕᒪᐅᓐᖓᖅᐲᑦ?”
26ᔩᓱᓯᐅᑉ ᑭᐅᕔᑦ, “ᓱᓕᔪᒥᒃ ᐅᖃᐅᑎᕙᑦᓯ; ᕿᓂᖅᐸᑦᓯᓐᖓ ᓇᓗᓁᒃᑯᑍᑦ ᑕᑯᓚᐅᖅᑕᓯ ᐱᑦᔪᑎᒋᓇᒋᑦ, ᓂᕆᓚᐅᕋᑦᓯᓕ ᓂᐊᖂᔭᓂᒃ ᐊᕿᐊᑦᑐᕐᓗᓯ ᐱᑦᔪᑎᖃᖅᐳᓯ. 27ᓂᕿᒃᓴᒥᒃ ᓄᖑᓴᕅᑦᑐᒥᒃ ᐱᓇᓱᐊᕐᖕᓂᐊᕋᓯ, ᓂᕿᒃᓴᒥᒡᓕ ᐱᓇᓱᐊᓕᕆᑦᓯ ᐃᓅᓯᖅᑖᕐᖕᓇᖅᑐᒥᒃ ᓄᖑᓱᐃᑦᑐᒧᑦ, ᐃᓅᑉ ᐃᕐᖕᓂᖓᑕ ᑐᓂᓂᐊᖅᑕᖓᓂᒃ ᐃᓕᑦᓯᓐᓄᑦ; ᑖᓐᓇ ᒎᑎᐅᑉ ᐊᑖᑕᐅᑉ ᓇᓗᓁᒃᑯᓯᖅᓯᒪᖕᒪᒍ ᓈᒻᒪᒃᓴᕐᖕᓂᕐᖕᒥᓂᒃ.”
28ᑕᕝᕙ ᐊᐱᕆᕚᑦ, “ᖃᓄᖅ ᐱᓇᓱᐊᖅᑐᒃᓴᐅᕕᑖ? ᒎᑎᐅᑉ ᐱᓇᓱᐊᖅᑕᐅᖁᔭᖓᓂᒃ ᐱᓇᓱᐊᕈᓐᓇᖁᓪᓗᑕ?”
29ᔩᓱᓯᐅᑉ ᑭᐅᕔᑦ, “ᑕᕝᕙ ᒎᑎᐅᑉ ᐃᒫᒃ ᐱᖁᕚᓯ; ᐅᒃᐱᖁᓪᓗᓯ ᑎᓕᔭᖓᓄᑦ.”
30ᑖᒃᑯᐊ ᑭᐅᕚᑦ, “ᑕᕝᕙ ᖃᓄᐃᑦᑐᒥᒃ ᓇᓗᓁᒃᑯᑕᖃᕐᖕᓂᐊᖅᐲᑦ ᐅᕙᒍᑦ ᑕᑯᓗᑕ, ᐃᓕᖕᓄᑦ ᐅᒃᐱᓕᖁᓪᓗᑕ? ᖃᓄᐃᓕᐅᕐᖕᓂᐊᖅᐲᑦ? 31#ᒨᓯᓯ ᐂᑉᐸᖏᑦ 16:4,15; ᐃᓐᖏᕈᑦ 78:24.ᓯᕗᓕᕗᑦ ᒫᓇᒥᒃ ᓂᕿᒃᓴᒥᒃ ᓂᕆᓚᐅᖅᐳᑦ ᐃᓄᖃᖏᑦᑐᒥ; ᐊᒡᓚᖕᓂ ᐅᖃᖅᓯᒪᖕᒪᑦ, ‘ᓂᐊᖂᔭᒥᒃ ᕿᓚᖕᒥᑦ ᐱᔪᒥᒃ ᓂᕆᑎᓚᐅᖅᐰᑦ.’”
32ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᒨᓯᓯᐅᑉ ᓂᐊᖂᔭᒥᒃ ᕿᓚᖕᒥᑦ ᐱᔪᒥᒃ ᑐᓂᓯᕕᒋᓚᐅᓐᖏᓛᓯ; ᐊᑖᑕᒪᓕ ᓂᐊᖂᔭᒥᒃ ᓂᕿᒃᓴᓪᓚᕆᖕᒥᒃ ᑐᓂᓯᕕᒋᕚᓯ ᕿᓚᖕᒥᑦ ᐱᔪᒥᒃ. 33ᑕᕝᕙ ᒎᑎᐅᑉ ᓂᐊᖂᔭᖁᑎᖓ ᑖᓐᓇᐅᕗᖅ ᕿᓚᖕᒥᑦ ᑎᑭᑦᑐᖅ, ᐃᓅᓯᕐᖕᒥᒡᓗ ᑐᓂᓯᔪᖅ ᓯᓚᕐᔪᐊᕐᖕᒥᐅᓄᑦ.”
34ᑖᒃᑯᐊ ᐅᖃᐅᑎᕚᑦ, “ᐊᑕᓃᖅ, ᓂᐊᖂᔭᒥᒃ ᑖᑦᓱᒥᖓ ᑐᓂᓯᕕᒋᑎᒍᑦ ᐱᖃᑦᑍᓇᕐᖕᓂᐊᖅᑕᑦᑎᓐᓂᒃ.”
35ᔩᓱᓯᐅᑉ ᐅᖃᐅᑎᕔᑦ, “ᐅᕙᖓ ᓂᐊᖂᔭᐅᕗᖓ ᐃᓅᓯᖃᕐᖕᓇᖅᑐᖅ; ᐅᕙᓐᓄᑦ ᕾᔪᖅ ᑳᓕᕐᖕᓂᐊᓐᖏᓚᖅ, ᐅᕙᓐᓄᓪᓗ ᐅᒃᐱᖅᑐᖅ ᐃᒥᕈᓚᐅᖅᓯᒪᓂᐊᓐᖏᓚᖅ. 36ᒫᓐᓇᓕ ᐅᖃᐅᑎᒐᓗᐊᕋᑦᓯ ᐅᕙᓐᓂᒡᓗ ᑕᑯᓯᒪᓕᕐᓗᓯ ᐅᒃᐱᕆᓐᖏᓚᑦᓯᓐᖓ. 37ᐊᑖᑕᒪ ᑐᓂᑦᔪᑎᒋᔭᓕᒫᖏᑦ ᐅᕙᓐᓄᐊᕐᖕᓂᐊᖅᐳᑦ, ᐅᕙᓐᓄᐊᖅᑐᓂᒡᓗ ᖁᔭᓈᖅᓯᓂᐊᓐᖏᓚᖓ. 38ᕿᓚᖕᒥᑦ ᑎᑭᓚᐅᕋᒪ, ᐱᔪᒪᔭᓐᓂᒃ ᐱᓇᓱᐊᕆᐊᖅᑐᕐᖕᓇᖓ, ᑖᑦᓱᒪᓕ ᑎᓕᔨᒪ ᐱᔪᒪᔭᖓᓂᒃ ᐱᓇᓱᐊᕆᐊᖅᑐᕐᓗᖓ. 39ᑖᑦᓱᒪ ᑎᓕᔨᒪ ᐱᔪᒪᔭᖓ ᑕᒪᑦᔭ, ᐅᕙᓐᓄᑦ ᑐᓂᓯᒪᔭᖏᓐᓂᒃ ᐊᓯᐅᔨᖁᓇᖓ, ᐆᒻᒪᖅᑎᑦᓯᖁᓪᓗᖓᓕ ᐅᓪᓗᐃᑦ ᑭᖑᓪᓕᖅᐹᖓᓐᓂ. 40ᑕᒪᑦᔭ ᐊᑖᑕᒪ ᐱᔪᒪᔭᖓ, ᐃᕐᖕᓂᖓᓂᒃ ᑕᑯᔪᓕᒫᑦ ᐅᒃᐱᓕᕐᓗᑎᒡᓗ ᑖᑦᓱᒧᖓ ᐃᓅᓯᕐᖕᒥᒃ ᓄᖑᓱᐃᑦᑐᒥᒃ ᐱᖃᖁᓪᓗᒋᑦ; ᐅᕙᖓᓗ ᐆᒻᒪᖅᑎᑦᓱᒫᖅᐸᕋ ᐅᓪᓗᐃᑦ ᑭᖑᓪᓕᖅᐹᖓᓐᓂ.”
41ᔫᑎᓪᓕ ᐊᑲᐅᒃᓴᕈᓐᓃᖅᐳᑦ ᑖᑦᓱᒥᖓ, ᐅᖃᕐᖕᓂᖓ ᐱᓪᓗᒍ, “ᐅᕙᖓ ᓂᐊᖂᔭᐅᕗᖓ ᕿᓚᖕᒥᑦ ᑎᑭᓯᒪᔪᖅ.” 42ᑕᕝᕙ ᐅᖃᖅᐳᑦ, “ᐅᓇ ᔩᓱᓯᐅᓐᖏᓛᖅ ᔫᓯᐱᐅᑉ ᐃᕐᖕᓂᖓ ᐊᑖᑕᖓ ᐊᓈᓇᖓᓗ ᖃᐅᔨᒪᖏᓚᕗᑦ? ᖃᓄᐃᒻᒪᓪᓕᐅᓇ ᐅᖃᓕᕆᕙ ‘ᕿᓚᖕᒥᑦ ᑎᑭᓯᒪᕗᖓ’?”
43ᔩᓱᓯᐅᑉ ᑭᐅᕔᑦ, “ᐊᑲᐅᒃᓴᖏᓪᓗᓯ ᐃᓕᑦᓯᓐᓄᑦ ᐅᖃᖃᑦᑕᐅᑎᓐᖏᓚᐅᕆᑦᓯ. 44ᐅᕙᓐᓄᑦ ᕾᔪᖃᕈᓐᓇᓐᖏᓚᖅ ᐊᑖᑕᐅᑉ ᑎᓕᔨᒪ ᐅᕙᓐᓄᐊᖅᑎᖏᑉᐸᒍ; ᐅᕙᖓᓗ ᐆᒻᒪᖅᑎᑦᓱᒫᖅᐸᕋ ᐅᓪᓗᐃᑦ ᑭᖑᓪᓕᖅᐹᖓᓐᓂ. 45#ᐂᓮᐊᓯ 54:13.ᓇᓚᐅᑦᑍᔪᑎᒍᑦ ᑎᑎᕋᖅᓯᒪᕗᑦ, ‘ᑕᒪᕐᖕᒥᒃ ᐊᔪᕆᖅᑐᖅᑕᐅᔪᒫᖅᐳᑦ ᒎᑎᒧᑦ.’ ᓇᓪᓕᐊᑦ ᐊᑖᑕᒥᒃ ᑐᓴᖅᑐᖅ, ᑖᑦᓱᒪᓐᖓᓪᓗ ᐃᓕᓐᓂᐊᕐᓗᓂ ᑖᓐᓇ ᐅᕙᓐᓄᑦ ᕾᕗᖅ. 46ᐊᑖᑕᒥᒃ ᑕᑯᓚᐅᖅᓯᒪᔪᖃᓐᖏᓚᖅ; ᒎᑎᒥᓪᓕ ᐱᔫᑉ ᑭᓯᒥ ᐊᑖᑕ ᑕᑯᓯᒪᕚ. 47ᓱᓕᔪᒥᒃ, ᓱᓕᔪᒥᒃ ᐅᖃᐅᑎᕙᑦᓯ; ᐅᕙᓐᓄᑦ ᐅᒃᐱᖅᑐᖅ ᐃᓅᓯᖃᖅᐳᖅ ᓄᖑᓱᐃᑦᑐᒥᒃ. 48ᐅᕙᖓ ᐃᓅᓯᐅᑉ ᓂᐊᖂᔭᕆᕚᖓ. 49ᓯᕗᓕᓯ ᒫᓇᒥᒃ ᓂᕆᓚᐅᖅᐳᑦ ᐃᓄᖃᖏᑦᑐᒥ, ᑭᓯᐊᓂᓕ ᑐᖁᓚᐅᖅᐳᑦ. 50ᓂᐊᖂᔭᕐᓕ ᑖᓐᓇᐅᕗᖅ ᕿᓚᖕᒥᑦ ᑎᑭᑦᑐᖅ; ᓇᓪᓕᐊᑦ ᑕᕝᕙᓐᖓ ᓂᕆᔪᖅ ᑐᖁᖁᓇᒍ. 51ᐅᕙᖓ ᓂᐊᖂᔭᐅᕗᖓ ᐆᒪᔪᖅ ᕿᓚᖕᒥᑦ ᐱᓯᒪᔪᖅ; ᑭᓇᑐᐃᓐᓇᖅ ᑕᕝᕙᓐᖓᑦ ᓂᐊᖂᔭᑐᖅᑐᖅ, ᐃᓅᓯᖃᓕᕐᖕᓂᐊᖅᐳᖅ ᐃᓱᖃᖏᑦᑐᒧᑦ; ᓂᐊᖂᔭᕐᓗ ᑐᓂᓂᐊᖅᑕᕋ ᐃᓅᓯᖃᓕᖅᑎᑦᑎᔪᓇᖅᐳᖅ ᓯᓚᕐᔪᐊᕐᖕᒥᐅᓂᒃ, ᑖᓐᓇ ᑕᑉᕙ ᑎᒥᒐ.”
52ᑕᕝᕙ ᔫᑎᑦ ᐃᒻᒥᖕᓄᑦ ᐊᑭᕋᖅᑑᑎᓕᖅᐳᑦ, ᐅᖃᕐᓗᑎᒃ, “ᖃᓄᖅ ᐆᒪ ᑎᒥᒥᓂᒃ ᓂᕆᑎᑦᓱᒪᕚᑎᒎᑦ?”
53ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᐃᓅᑉ ᐃᕐᖕᓂᖓᑕ ᑎᒥᖓᓂᒃ ᓂᕆᖏᒃᑯᑦᓯ ᐊᐅᖓᓂᒡᓗ ᐃᒥᖏᒃᑯᑦᓯ, ᐃᓅᓯᖃᕈᓐᓇᓐᖏᓚᓯ ᐃᓗᑦᓯᓐᓃᑦᑐᒥᒃ. 54ᑎᒥᓐᓂᒃ ᓂᕆᔪᖅ ᐊᐅᓐᓂᒡᓗ ᐃᒥᖅᑐᖅ ᓄᖑᓱᐃᑦᑐᒥᒃ ᐃᓅᓯᖃᖅᐳᖅ, ᐅᕙᖓᓗ ᐆᒻᒪᖅᑎᑦᓱᒫᖅᐸᕋ ᐅᓪᓗᐃᑦ ᑭᖑᓪᓕᖅᐹᖓᓐᓂ. 55ᑎᒥᒐ ᓂᕿᒃᓴᓪᓚᕆᐅᕗᖅ, ᐊᐅᒐᓗ ᐃᒥᒃᓴᓪᓚᕆᐅᓪᓗᓂ. 56ᓇᓪᓕᐊᑦ ᑎᒥᓐᓂᒃ ᓂᕆᔪᖅ, ᐊᐅᓐᓂᒡᓗ ᐃᒥᕐᓗᓂ ᑖᓐᓇ ᐅᕙᓐᓃᑉᐳᖅ, ᐅᕙᖓᓗ ᑖᑦᓱᒪᓃᓪᓗᖓ. 57ᐊᑖᑕᐅᑉ ᐆᒪᔪᑉ ᑎᓕᓯᒪᖕᒪᖓ, ᐅᕙᖓᓗ ᐃᓅᕗᖓ ᐊᑖᑕᒐ ᐱᓪᓗᒍ, ᑍᒫᒃᑕᐅᖅ ᐅᕙᓐᓂᒃ ᓂᕆᔪᖅ ᐃᓅᓂᐊᖅᐳᖅ ᐅᕙᖓ ᐱᓪᓗᖓ. 58ᑖᓐᓇ ᓂᐊᖂᔭᖅ ᕿᓚᖕᒥᑦ ᑎᑭᑦᑐᖅ, ᓯᕗᓕᓯᓕ ᓂᕆᓚᐅᖅᑕᖓᑎᑑᓐᖏᓚᖅ ᓂᕆᒐᓗᐊᕋᒥᒃ ᑐᖁᓚᐅᖅᑐᑎᑐᑦ; ᓂᐊᖂᔭᒥᒡᓕ ᑖᑦᓱᒥᖓ ᓂᕆᔪᖅ ᐃᓅᓂᐊᖅᐳᖅ ᐃᓱᖃᖏᑦᑐᒧᑦ.”
59ᔩᓱᓯ ᑕᒪᒃᑯᓂᖓ ᐅᖃᐅᓯᖃᓚᐅᖅᐳᖅ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓐᓂ, ᑲᐲᕐᓂᐊᒦᑦᑐᒥ ᐊᔪᕆᖅᑐᐃᓪᓗᓂ.
ᐅᖃᐅᓰᑦ ᐃᓅᓯᕐᖕᒥᒃ ᓄᖑᓱᐃᑦᑐᒥᒃ
60ᔩᓱᓯᐅᑉ ᐃᓕᓐᓂᐊᖅᑎᖏᑦ ᐊᒥᓱᑦ, ᑕᒪᒃᑯᓂᖓ ᑐᓵᔪᑦ ᐅᖃᖅᐳᑦ, “ᐅᖃᐅᓰᑦ ᑖᒃᑯᐊ ᓇᓗᓇᓗᐊᖅᐳᑦ, ᑭᐊᓕ ᑐᑭᓯᔪᓐᓇᖅᐰᑦ?”
61ᔩᓱᓯ ᖃᐅᔨᒪᒐᒥ ᐃᓕᓐᓂᐊᖅᑎᖏᑦ ᐅᖃᐅᓯᕐᖕᓄᑦ ᑕᒪᒃᑯᓄᖓ ᐊᑲᐅᒃᓴᕈᓐᓃᕐᖕᒪᑕ, ᐅᖃᐅᑎᕔᑦ, “ᑕᒪᒃᑯᓄᖓ ᐅᖃᐅᓯᕐᖕᓄᑦ ᓴᐱᓕᖅᐱᓰ? 62ᖃᓄᕐᓕ ᐃᓱᒪᕕᓰ ᐃᓅᑉ ᐃᕐᖕᓂᖓ ᑕᑯᒐᔭᕈᑦᓯᐅᒃ ᖁᒻᒧᐊᓕᖅᑎᓪᓗᒍ ᓯᕗᕐᖓᓂ ᐃᓂᒋᓚᐅᖅᑕᒥᓄᑦ? 63ᐊᓂᕐᖕᓂᖅ ᐃᓅᓯᖅᑖᖅᑎᑦᓯᕗᖅ; ᑎᒥᐅᑉ ᐱᔪᓐᓇᕐᖕᓂᖓ ᐃᑲᔪᕈᓐᓇᓐᖏᓚᖅ ᑕᒪᑐᒧᖓ; ᐃᓕᑦᓯᓐᓄᑦ ᐅᖃᐅᓯᕆᔭᒃᑲ ᐊᓂᕐᖕᓂᐅᕗᑦ ᐃᓅᓯᐅᓪᓗᑎᒡᓗ. 64ᐊᑯᓐᓇᑦᓯᓐᓃᑦᑐᖃᖅᐳᕐᓕ ᐃᓚᒋᔭᑦᓯᓐᓂᒃ ᐅᒃᐱᕈᓱᖕᓂᖃᖏᑦᑐᒥᒃ.” ᔩᓱᓯ ᐱᒋᐊᕐᖕᓂᖓᓂᑦ ᖃᐅᔨᒪᑦᓯᐊᓚᐅᕐᖕᒪᑦ ᓇᓪᓕᐊᖑᖕᒪᖔᑦ ᐅᒃᐱᕈᓱᖏᑦᑐᖅ, ᓇᓪᓕᐊᑦᑕᓗ ᐱᔭᐅᒃᑲᕈᒫᕐᖕᒪᖔᒍ. 65ᔩᓱᓯ ᐅᖃᖅᐳᖅ, “ᑕᒪᓐᓇ ᐱᑦᔪᑎᒋᓪᓗᒍ ᐅᖃᐅᑎᓚᐅᖅᐸᑦᓯ ᐅᕙᓐᓄᐊᖅᑐᖃᕈᓐᓇᓐᖏᓚᖅ ᐊᑖᑕᒧᑦ ᐱᔪᒪᓂᖅᑖᖅᑎᑕᐅᖏᒃᑯᓂ.”
66ᑕᒪᓐᓇ ᐱᑦᔪᑎᒋᓪᓗᒍ ᔩᓱᓯᐅᑉ ᒪᓕᒃᑎᖏᑦ ᐊᒥᓱᑦ ᔩᓱᓯ ᖁᔭᓈᖅᐹᑦ ᐃᖏᕐᕋᖃᑎᒋᔪᒤᕐᓗᒍ. 67ᑕᕝᕙ ᔩᓱᓯᐅᑉ ᐃᓕᓐᓂᐊᖅᑎᓂ 12 ᐊᐱᕆᕔᑦ, “ᐃᓕᑦᓯᑦᑕᐅᖅ ᐅᕙᓐᓂᒃ ᕿᒤᔪᒪᕕᓰ?”
68 #
ᒫᑎᐅᓯ 16:16; ᒫᑯᓯ 8:29; ᓘᑲᓯ 9:20. ᓮᒨᓂ ᐲᑦᑐᕉᓯᐅᑉ ᑭᐅᕚ, “ᐊᑕᓃᖅ, ᑭᓇᒥᒡᓕ ᒪᓕᒐᒃᓴᖃᕐᓂᐊᕋᑦᑖ? ᐅᖃᐅᓯᖃᕈᓐᓇᖅᑐᑐᑎᓪᓗᑎᑦ ᐃᓅᓯᖃᕐᖕᓇᖅᑐᓂᒃ ᐃᓱᖃᖏᑦᑐᒧᑦ. 69ᐅᒃᐱᓕᕐᓗᑕᓗ ᖃᐅᔨᕗᒍᑦ ᒎᑎᐅᑉ ᐃᑦᔪᕐᖕᓁᑦᑐᖁᑎᒋᖕᒪᑎᑦ.”
70ᔩᓱᓯᐅᑉ ᑭᐅᕔᑦ, “ᐃᓕᑦᓯ 12ᓗᓯ ᓂᕈᐊᓚᐅᓐᖏᓚᑦᓯ? ᐃᓚᑦᓯᓕ ᐃᓚᖓᑦ ᓵᑖᓇᓯᐅᕗᖅ.” 71ᔫᑕᓯᒥᒃ ᐅᖃᐅᓯᖃᓚᐅᖅᐳᖅ ᓮᒨᓂ ᐃᔅᑲᕆᐊᑎᐅᑉ ᐃᕐᖕᓂᖓᓂᒃ, ᔫᑕᓯ ᔩᓱᓯᐅᑉ ᐃᓕᓐᓂᐊᖅᑎᖏᓐᓄᑦ 12ᓄᑦ ᐃᓚᒋᔭᐅᒐᓗᐊᕐᓗᓂ, ᑭᖑᓂᖓᒍᑦ ᔩᓱᓯᒥᒃ ᐱᔭᐅᑎᑦᓯᔪᒫᕐᖕᒪᑦ.
Currently Selected:
ᔪᐊᓇᓯᐅᑉ ᐊᒡᓚᖏᑦ 6: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.