ᔪᐊᓇᓯᐅᑉ ᐊᒡᓚᖏᑦ 18
18
ᔩᓱᓯᐅᑉ ᑎᒍᔭᐅᓂᖓ
ᒫᑎᐅᓯ 26:47-56; ᒫᑯᓯ 14:43-50; ᓘᑲᓯ 22:47-53
1ᔩᓱᓯ ᑐᒃᓯᐊᕇᕋᒥ, ᐃᓕᓐᓂᐊᖅᑎᓂ ᐃᓚᒋᓪᓗᒋᑦ ᑕᕝᕙᓐᖓᑦ ᓅᑉᐳᑦ, ᑰᒃ ᑭᑦᑐᕌᓂ#18:1 ᑰᒐᓚᑉ ᐊᑎᖓ ᐃᑳᖅᐹᑦ, ᑕᕝᕙᓂ ᐱᕈᖅᓰᕕᒃᑕᖃᕐᖕᒪᑦ, ᐃᓕᓐᓂᐊᖅᑎᓂ ᐃᓚᒋᓪᓗᒋᑦ ᑕᕝᕗᓐᖓᖅᐳᑦ. 2ᔫᑕᓯᐅᓪᓕ, ᑖᑦᓱᒪ ᐱᔭᐅᑎᑦᓯᔨᖓᑕ, ᑖᓐᓇ ᐱᕈᖅᓰᕕᒃ ᖃᐅᔨᒪᕚ; ᔩᓱᓯ ᐃᓕᓐᓂᐊᖅᑎᓂ ᐃᓚᒋᓪᓗᒋᑦ ᑕᕝᕙᓂ ᑲᑎᖃᑦᑕᖅᓯᒪᖕᒪᑕ. 3ᑍᒤᒻᒪᑦ, ᔫᑕᓯ ᑕᕝᕗᖓ ᐱᕈᖅᓰᕕᖕᒧᐊᓕᖅᐳᖅ, ᐅᓇᑕᖅᑐᒃᓴᓂᒃ ᑐᒃᓯᐊᕐᕕᒡᔪᐊᓪᓗ ᖃᐅᔨᓴᖅᑎᖏᓐᓂᒃ ᐃᓚᖃᕐᓗᓂ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᑕ ᐹᕆᓯᓪᓗ ᑎᓕᓯᒪᔭᖏᓐᓂᒃ, ᓇᓂᕉᑎᖃᕐᓗᑎᒃ ᓇᓂᕈᐊᓕᔭᕐᓗᑎᒡᓗ ᓱᒋᐅᑦᓯᔭᕐᓗᑎᒡᓗ. 4ᔩᓱᓯᓕ, ᑕᒤᓐᓂᒃ ᖃᐅᔨᒪᒐᒥ ᐱᓂᐊᕐᕕᐅᓂᐊᕐᖕᓂᕐᖕᒥᓂᒃ, ᐸᕐᕆᐊᕐᓗᒋᑦ ᐅᖃᐅᑎᕔᑦ, “ᑭᓇᒦᒃ ᕿᓂᖅᐱᓯ?”
5ᑖᒃᑯᐊ ᑭᐅᕚᑦ, “ᔩᓱᓯ ᓈᓴᕇᑎᒥᐅᖅ.”
ᔩᓱᓯᐅᑉ ᐅᖃᐅᑎᕔᑦ, “ᑖᓐᓇᐅᕗᖓ.”
ᔫᑕᓯᐅᑉ ᐱᔭᐅᑎᑦᓯᔫᑉ ᐃᓄᐃᑦ ᑖᒃᑯᐊ ᓇᖏᖃᑎᒋᕔᑦ. 6ᔩᓱᓯᐅᓪᓕ ᐅᖃᐅᑎᖕᒪᒋᑦ, “ᑖᓐᓇᐅᕗᖓ,” ᑭᖑᑉᐱᐊᕋᒥᒃ ᓂᕕᖅᐳᑦ ᓄᓇᒧᑦ. 7ᑕᕝᕙ ᔩᓱᓯᐅᑉ ᐊᐱᕆᒃᑲᓐᓂᖅᐰᑦ, “ᑭᓇᒦᒃ ᕿᓂᖅᐱᓯ?”
ᑖᒃᑯᐊ ᐅᖃᖅᐳᑦ, “ᔩᓱᓯ ᓈᓴᕇᑎᒥᐅᖅ.”
8ᔩᓱᓯᐅᑉ ᑭᐅᕔᑦ, “ᐅᖃᐅᑎᔭᕇᖅᐸᑦᓯ ᑖᓐᓇᐅᕗᖓ; ᐅᕙᖓᑐᐊᖅ ᕿᓂᕈᑦᓯᓐᖓ, ᐅᑯᐊ ᐃᓚᒋᔭᒃᑲ ᑲᒪᒋᓇᒋᑦ ᐊᐅᓪᓚᕐᓕᑦ.” 9ᐅᖃᐅᓯᕆᓚᐅᖅᑕᖏᑦ ᓇᓚᐅᑦᓯᖁᓪᓗᒋᑦ ᐃᒤᓕᔪᑦ, “ᐅᕙᓐᓄᑦ ᑐᓂᓚᐅᖅᑕᕐᖕᓂᒃ ᐊᑕᐅᓯᕐᖕᒥᒡᓘᓐᓃᑦ ᐊᓯᐅᔪᖃᓐᖏᓚᖅ.”
10ᑕᕝᕙ ᓮᒨᓂ ᐲᑦᑐᕉᓯ, ᓴᕕᒡᔪᐊᖃᕋᒥ, ᐊᒧᓪᓗᓂᐅᒃ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᑦᑕ ᐱᔨᖓ ᐅᓕᒪᕐᓗᒍ ᓯᐅᑎᖓᑕ ᑕᓕᖅᐱᐊ ᓇᑲᑉᐹ. ᑖᓐᓇᓗ ᐱᔨ ᐊᑎᖃᖅᐳᖅ ᒪᐅᓪᑲᔅᒥᒃ. 11#ᒫᑎᐅᓯ 26:39; ᒫᑯᓯ 14:36; ᓘᑲᓯ 22:42.ᔩᓱᓯᐅᑉ ᐲᑦᑐᕉᓯ ᐅᖃᐅᑎᕚ, “ᓴᕕᒡᔪᐊᑦ ᑮᓁᓕᑕᖓᓄᑦ ᐴᓕᕈᒃ; ᑏᑐᑎᐅᑉ ᐃᒪᖓ ᐊᑖᑕᒪ ᐅᕙᓐᓄᑦ ᕾᑕᖓ ᐃᒥᕆᐊᖃᓐᖏᓚᕌ?”
ᔩᓱᓯᐅᑉ ᐋᓇᓯᒧᐊᕈᑦᔭᐅᓂᖓ
12ᑕᕝᕙ ᐅᓇᑕᖅᑐᒃᓮᑦ ᐊᖓᔪᖅᑳᖓᑦᑕ ᔫᑎᓪᓗ ᑐᒃᓯᐊᕐᕕᒡᔪᐊᕐᖕᒥ ᖃᐅᔨᓴᖅᑎᖏᑕ ᔩᓱᓯ ᑎᒍᕚᑦ ᕿᓚᒃᓱᕐᓗᒍ. 13ᓯᕗᓪᓕᕐᖕᒥᒡᓗ ᐋᓇᓯᒧᐊᕈᑎᕚᑦ; ᑬᐊᐹᓯᐅᑉ ᓴᑭᖓᓄᑦ, ᐊᕐᕌᒍᒥ ᑕᒪᑐᒪᓂ ᑐᓂᕐᕈᓯᖅᑎᑦᓯᔨᓄᑦ ᐊᖓᔪᖅᑳᖑᔫᑉ. 14#ᔪᐊᓇᓯ 11:49,50.ᑬᐊᐹᓯ ᑖᓐᓇᐅᕗᖅ ᔫᑎᑦ ᐊᖓᔪᖅᑳᖏᓐᓂᒃ ᐃᓱᒪᑖᖅᑎᑦᓯᓚᐅᖅᑐᖅ ᐃᓄᒃ ᐊᑕᐅᓯᖅ ᑐᖁᑕᐅᒃᐸᑦ ᐱᐅᓂᖅᓴᐅᒐᔭᕐᖕᓂᕋᕐᓗᓂᐅᒃ ᐃᓅᖃᑎᒌᓕᒫᑦ ᐱᑦᔪᑎᒋᓗᒋᑦ.
ᐲᑦᑐᕉᓯᐅᑉ ᒥᓯᐊᕈᑎᖃᕐᖕᓂᖓ ᔩᓱᓯᒥᒃ
ᒫᑎᐅᓯ 26:69-70; ᒫᑯᓯ 14:66-68; ᓘᑲᓯ 22:55-57
15ᓮᒨᓂᓕ ᐲᑦᑐᕉᓯ ᐃᓕᓐᓂᐊᖅᑎᐅᖃᑎᖓᓗ ᔩᓱᓯᒥᒃ ᒪᓕᒃᐴᒃ. ᐃᓕᓐᓂᐊᖅᑎᓗ ᐲᑦᑐᕉᓯᐅᑉ ᐊᓯᐊ ᖃᐅᔨᒪᔭᐅᒐᒥ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᓐᓄᑦ, ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᑦᑕ ᐃᒡᓗᖓᑕ ᓯᓚᑖᓄᑦ ᐊᕙᓗᓕᐅᖅᓯᒪᔫᒧᑦ ᐃᑎᖃᑕᐅᕗᖅ ᔩᓱᓯ ᐃᓚᒋᓪᓗᒍ, 16ᐲᑦᑐᕉᓯᓕ ᐃᑎᖅᑕᕐᕕᐅᑉ ᐅᒃᑯᐊᖓᑕ ᓯᓚᑖᓂ ᓇᖏᖅᐳᖅ. ᐃᓕᓐᓂᐊᖅᑎᓗ ᐊᓯᐊ ᖃᐅᔨᒪᔭᐅᔪᖅ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᓐᓄᑦ, ᐊᓂᒐᒥ ᐊᕐᖕᓇᒥᒃ ᐃᑎᖅᑕᕐᕕᐅᑉ ᐅᒃᑯᐊᖓᓂ ᑲᒪᔨᒥᒃ ᐅᖃᖃᑎᖃᓚᐅᕐᓗᓂ, ᐲᑦᑐᕉᓯ ᐃᑎᖅᑎᑉᐹ. 17ᑕᕝᕙ ᐊᕐᖕᓇᖅ ᐃᑎᖅᑕᕐᕕᐅᑉ ᐅᒃᑯᐊᖓᓂ ᑲᒪᔨ ᐲᑦᑐᕉᓯᒧᑦ ᐅᖃᖅᐳᖅ, “ᑖᑦᓱᒪ ᐃᓕᓐᓂᐊᖅᑎᖏᓐᓄᑦ ᐃᓚᒋᔭᐅᓐᖏᓚᑏᑦ?”
ᐲᑦᑐᕉᓯᐅᑉ ᑭᐅᕚ, “ᐃᓚᒋᔭᐅᓐᖏᓚᖓ.”
18ᓯᓚ ᓂᒡᓚᓱᓕᕐᖕᒪᑦ, ᐱᔩᑦ ᑐᒃᓯᐊᕐᕕᒡᔪᐊᕐᖕᒥᓗ ᖃᐅᔨᓴᖅᑏᑦ ᕿᔪᒃᓴᓂᒃ ᐃᑭᑦᓯᓚᐅᖅᐳᑦ ᐊᕙᑖᓂᓗ ᓇᖏᕐᓗᑎᒃ, ᐅᖅᑰᓯᑦᑎᕋᓱᐊᖅᐳᑦ; ᑕᕝᕙ ᐲᑦᑐᕉᓯ ᓇᖏᖃᑕᐅᓕᕆᕗᖅ, ᐃᑯᒪᔫᑉ ᓴᓂᐊᓂ ᐃᒻᒥᓂᒃ ᐅᖅᑰᓯᑦᑎᕋᓱᐊᕆᓪᓗᓂ.
ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᑦᑕ ᐊᐱᖅᓱᕐᖕᓂᖓ ᔩᓱᓯᒥᒃ
ᒫᑎᐅᓯ 26:59-66; ᒫᑯᓯ 14:55-64; ᓘᑲᓯ 22:66-71
19ᑐᓂᕐᕈᓯᖅᑎᑦᓯᔩᓪᓕ ᐊᖓᔪᖅᑳᖓᑦᑕ ᔩᓱᓯ ᐊᐱᖅᓱᖅᐹ ᐃᓕᓐᓂᐊᖅᑎᖏᑕ ᒥᒃᓵᓄᑦ ᐊᔪᕆᖅᑐᐃᖃᑦᑕᕐᖕᓂᖓᓂᒡᓗ. 20ᔩᓱᓯᐅᑉ ᑭᐅᕚ, “ᑍᒪᓐᖓᑦ ᐃᔨᖅᓯᒪᓇᖓ ᐃᓄᓕᒫᓄᑦ ᐅᖃᓪᓚᖃᑦᑕᓚᐅᖅᐳᖓ; ᐊᔪᕆᖅᑐᐃᖃᑦᑕᓚᐅᖅᐳᖓᓗ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖏᓐᓂ ᑐᒃᓯᐊᕐᕕᒡᔪᐊᒥᓗ, ᔫᑎᓕᒫᑦ ᑲᑎᕕᒋᕙᒃᑕᖏᓐᓂ; ᐃᔨᕋᖅᑐᕐᓗᖓ ᐅᖃᓪᓚᓚᐅᖅᓯᒪᓇᖓ. 21ᓱᓇᒥᒃ ᑐᑭᓯᕕᒋᔪᒪᕕᖔ? ᐃᓄᐃᑦ ᐊᐱᖅᓱᓚᐅᒃᑭᑦ ᐅᕙᓐᓂᒃ ᑐᓵᖃᖅᑕᓚᐅᖅᑐᑦ ᐅᖃᐅᓯᕆᖃᑦᑕᓚᐅᖅᑕᓐᓂᒃ; ᖃᐅᔨᒪᖕᒪᑕ ᖃᓄᖅ ᐅᖃᐅᓯᖃᖃᑦᑕᓚᐅᕐᖕᒪᖔᕐᖕᒪ.”
22ᔩᓱᓯ ᑍᒫᒃ ᐅᖃᕐᖕᒪᑦ, ᖃᐅᔨᓴᖅᑏᑦ ᐃᓚᖓᑦᑕ ᐅᓗᐊᖓᒍᑦ ᐸᑎᒃᓗᓂᐅᒃ ᐅᖃᐅᑎᕚ, “ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᑦ ᑍᒫᒃ ᑭᐅᒪᔭᒃᓴᕆᕕᐅᒃ?”
23ᔩᓱᓯᐅᑉ ᑭᐅᕚ, “ᓈᒻᒪᖏᑦᑐᒥᒃ ᐅᖃᕈᒪ, ᓇᓗᓁᖅᓯᔪᖃᓚᐅᕐᓕ ᖃᓄᖅ ᓱᓕᖏᒻᒪᖔᕐᖕᒪ; ᓱᓕᒍᒪᓕ ᐅᖃᐅᓯᕆᔭᓐᓂᒃ, ᓱᖕᒪᑦ ᐸᑎᒃᐱᖔ?”
24ᑕᕝᕙ ᐋᓇᓯᐅᑉ ᐊᓂᖁᓕᖅᐹ ᕿᓚᒃᑕᐅᓯᒪᑎᓪᓗᒍ ᑬᐊᐹᓯᒧᑦ ᐋᑕᐅᖁᕙ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᓐᓄᑦ.
ᐲᑦᑐᕉᓯᐅᑉ ᓴᒡᓗᑎᖃᒃᑲᓐᓂᕐᖕᓂᖓ ᔩᓱᓯᒥᒃ
ᒫᑎᐅᓯ 26:71-75; ᒫᑯᓯ 14:69-72; ᓘᑲᓯ 22:58-62
25ᓮᒨᓂ ᐲᑦᑐᕉᓯ ᓱᓕ ᐃᑯᐊᓚᑎᑕᐅᔫᑉ ᓴᓂᐊᓂ ᓇᖏᖅᐳᖅ ᐅᖅᑰᓯᑦᑎᕋᓱᐊᕐᓗᓂ. ᑕᕝᕙ ᐅᖃᐅᑎᕚᑦ, “ᑖᑦᓱᒪ ᐃᓕᓐᓂᐊᖅᑎᖏᑕ ᐃᓚᒋᓐᖏᓛᑏᑦ?”
ᐲᑦᑐᕉᓯ ᓱᓕᒐᓂ ᐅᖃᖅᐳᖅ, “ᐃᓚᒋᔭᐅᓐᖏᓚᖓ.”
26ᑐᓂᕐᕈᓯᖅᑎᑦᓯᔩᓪᓕ ᐊᖓᔪᖅᑳᖓᑦᑕ ᐱᔨᖏᑕ ᐃᓚᖓᑦ, ᐱᕈᖅᓰᕕᖕᒥ ᐲᑦᑐᕉᓯᐅᑉ ᓯᐅᑎᖓᒍᑦ ᓇᑲᖅᑲᐅᔭᖓᑕ ᐃᓚᖓᑦ, ᐅᖃᖅᐳᖅ. “ᑕᑯᖅᑲᐅᓐᖏᓚᒌᑦ ᑖᑦᓱᒥᖓ ᐃᓚᖃᖅᑎᓪᓗᑎᑦ ᐱᕈᖅᓰᕕᖕᒥ?”
27ᑕᕝᕙ ᐲᑦᑐᕉᓯ ᓱᓕᒐᓂ ᑭᐅᒋᕗᖅ; ᑕᕝᕔᓐᓇᕐᓗ ᐊᖑᑎᕕᐊᖅ ᓂᓪᓕᖅᐳᖅ.
ᔩᓱᓯᐅᑉ ᐋᑕᐅᓂᖓ ᐰᓛᑑᓯᒧᑦ
ᒫᑎᐅᓯ 27:1-2,11-14; ᒫᑯᓯ 15:1-5; ᓘᑲᓯ 23:1-5
28ᑕᕝᕙ ᔩᓱᓯ ᑬᐊᐹᓯᐅᑉ ᐃᒡᓗᖓᓂᑦ ᐋᑕᐅᓕᕆᕗᖅ ᕉᒪᒥᐅᑦ ᐊᐅᓚᑦᓯᔨᖓᑦᑕ ᐃᒡᓗᕐᔪᐊᖓᓄᑦ. ᐅᓪᓛᒻᒪᕆᐅᓕᖅᑎᓪᓗᒍ. ᔫᑎᓪᓕ ᐊᖓᔪᖅᑳᖏᑦ ᑕᕝᕗᖓ ᐃᑎᖃᑕᐅᓐᖏᓚᑦ, ᐅᒃᐱᕐᕈᓯᕆᔭᑎᒃ ᒪᓕᓗᒋᑦ ᓴᓗᒤᓕᑎᕈᒪᖏᓐᓇᒥᒃ, ᖄᖏᖅᑕᐅᕕᒃᓯᐅᕈᑎᐅᑉ ᓇᓪᓕᐅᓐᓂᓯᐅᖅᑕᐅᓂᖓᓂᒃ ᓂᕆᔪᓐᓇᖃᑕᐅᔪᒪᒐᒥᒃ. 29ᑕᕝᕙ ᐰᓛᑑᓯᐅᑉ ᐊᓂᕕᒋᓪᓗᒋᑦ ᐅᖃᐅᑎᕔᑦ, “ᓱᓇᒥᒃ ᐸᓯᒃᓯᕈᑎᖃᖅᐱᓰ ᐊᖑᒻᒧᑦ ᐆᒧᖓ?”
30ᑖᒃᑯᐊ ᑭᐅᕗᑦ, “ᐅᓇ ᐱᐅᖏᑦᑐᓕᔨᐅᖏᑉᐸᑦ, ᐃᓕᖕᓄᐊᕈᑎᒐᔭᓐᖏᑕᕗᑦ.”
31ᐰᓛᑑᓯᐅᑉ ᐅᖃᐅᑎᕔᑦ, “ᓇᖕᒥᓂᖅ ᑎᒍᓕᖅᓯᐅᒃ ᐃᖅᑲᖅᑐᕐᓗᒍ ᓇᖕᒥᓂᖅ ᐱᖁᔭᓯ ᒪᓕᒡᓗᒋᑦ.”
ᑕᕝᕙ ᔫᑎᑦ ᐅᖃᐅᑎᕚᑦ, “ᑐᖁᑦᓯᔪᒃᓴᐅᓐᖏᓚᒍᑦ ᑭᓇᒥᒡᓘᓐᓃᑦ.” 32#ᔪᐊᓇᓯ 3:14; 12:32.ᑕᒪᓐᓇ ᐱᓂᐊᕐᖕᓂᐅᓚᐅᖅᐳᖅ ᔩᓱᓯᐅᑉ ᐅᖃᐅᓯᕆᓚᐅᖅᑕᖏᑕ ᓇᓚᐅᑦᓯᓂᖏᑦ ᓴᖅᑭᑎᑕᐅᖁᓪᓗᒋᑦ ᖃᓄᐃᓕᐅᖅᑕᐅᓗᓂ ᑐᖁᑎᑕᐅᓛᕐᖕᒪᖔᕐᖕᒥ.
33ᐰᓛᑑᓯᓕ ᐃᒡᓗᕐᔪᐊᕐᖕᒧᑦ ᐃᑎᕐᖕᒥᒐᒥ ᔩᓱᓯ ᕾᖁᕚ, ᐅᖃᐅᑎᓪᓗᒍᓗ, “ᔫᑎᑦ ᐊᖓᔪᖅᑳᕐᔪᐊᕆᕚᑏᑦ?”
34ᔩᓱᓯᐅᑉ ᑭᐅᕚ, “ᐃᒻᒥᓂᒃ ᑍᒫᒃ ᑕᒪᑐᒥᖓ ᐅᖃᖅᐲᑦ ᐅᕝᕙᓗ ᐊᓯᖕᓂᑦ ᑕᒪᑐᒥᖓ ᐅᖃᐅᑦᔭᐅᓐᓂᖅᐱᑦ ᖃᓄᐃᑦᑑᖕᒪᖔᕐᖕᒪ?”
35ᐰᓛᑑᓯᐅᑉ ᑭᐅᕚ, “ᔫᑎᐅᓇᓱᒋᕕᖔ? ᓇᖕᒥᓂᖅ ᐃᓅᖃᑎᖕᓄᑦ ᑐᓂᕐᕈᓯᖅᑎᑦᓯᔩᓪᓗ ᐊᖓᔪᖅᑳᖏᓐᓄᑦ ᑎᒍᔭᐅᓪᓗᑎᑦ ᐅᕙᓐᓄᐊᖅᑕᐅᕗᑎᑦ; ᖃᓄᐃᓕᐅᓚᐅᕋᕕᑦ?”
36ᔩᓱᓯ ᑭᐅᕗᖅ, “ᐊᖓᔪᖅᑲᐅᕕᒐ ᓯᓚᕐᔪᐊᕐᖕᒥᑦ ᑕᒪᑐᒪᖓᑦ ᐱᓐᖏᓚᖅ; ᐊᖓᔪᖅᑲᐅᕕᒐ ᓯᓚᕐᔪᐊᕐᖕᒥᑦ ᑕᒪᑐᒪᖓᑦ ᐱᒃᐸᑦ, ᒪᓕᒃᑎᓐᓂᑦ ᐅᓇᑕᕈᑦᔭᐅᒐᔭᖅᐳᖅ, ᑎᒍᔭᐅᖁᓇᖓ ᔫᑎᑦ ᐊᖓᔪᖅᑳᖏᓐᓄᑦ; ᑍᒤᒻᒪᑦ, ᐊᖓᔪᖅᑲᐅᕕᒐ ᓯᓚᕐᔪᐊᕐᖕᒥᑦ ᑕᒪᑐᒪᖓᑦ ᐱᓐᖏᓚᖅ.”
37ᑕᕝᕙ ᐰᓛᑑᓯᐅᑉ ᐊᐱᕆᕚ, “ᑕᕝᕚ ᐊᖓᔪᖅᑳᕐᔪᐊᖑᕕᑦ?”
ᔩᓱᓯᐅᑉ ᑭᐅᕚ, “ᐃᕝᕕᑦ ᐊᖓᔪᖅᑳᕐᔪᐊᖑᓂᕋᖅᐸᕐᖕᒪ. ᑕᒪᓐᓇ ᐱᑦᔪᑎᒋᓪᓗᒍ ᐃᓅᓚᐅᖅᐳᖓ, ᓯᓚᕐᔪᐊᕐᖕᒧᓪᓗ ᑎᑭᓪᓗᖓ, ᓱᓕᔪᒥᒃ ᓇᓗᓁᖅᓯᔭᖅᑐᕐᓗᖓ. ᓱᓕᔪᒦᑦᑐᓕᒫᑦ ᑐᓴᖅᐹᖓ.”
38aᑕᕝᕙ ᐰᓛᑑᓯᐅᑉ ᐅᖃᐅᑎᕚ, “ᓱᓇᐅᕚ ᓱᓕᔪᖅ?”
ᔩᓱᓯᐅᑉ ᑐᖁᑕᒃᓴᕈᖅᑎᑕᐅᓂᖓ
ᒫᑎᐅᓯ 27:15-31; ᒫᑯᓯ 15:6-20; ᓘᑲᓯ 23:13-25
38bᐰᓛᑑᓯ ᑍᒫᒃ ᐅᖃᕇᕋᒥ, ᐊᓂᓪᓗᓂ ᔫᑎᓄᑦ ᐅᖃᖅᐳᖅ, “ᓱᒋᐊᖅᑕᐅᑦᔪᑎᒃᓴᖓᓂᒃ ᑖᑦᓱᒪ ᓇᓂᓯᓐᖏᓚᖓ. 39ᐱᐅᓯᓯᓕ ᒪᓕᒡᓗᒋᑦ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐱᔪᒪᔭᑦᓯᓐᓂᒃ ᐊᑕᐅᓯᕐᖕᒥᒃ ᐊᓂᑎᑦᓯᓲᖑᕗᖓ ᖄᖏᖅᑕᐅᕕᖕᒥᒃ ᓇᓪᓕᐅᓐᓂᖅᓯᐅᓕᕌᖓᑦᓯ; ᔫᑎᑦ ᐊᖓᔪᖅᑳᕐᔪᐊᖓᓐᓂᒃ ᐊᓂᑎᑦᓯᖁᕕᓯᓐᖔ?”
40ᑕᕝᕙ ᕾᒐᓛᓕᖅᐳᑦ, “ᑖᑦᓱᒥᖓᐅᖏᑦᑐᖅ, ᐸᕋᐹᓯᒥᒡᓕ!”
(ᐸᕋᐹᓯᓕ ᐱᕋᔭᐅᕗᖅ.)
Currently Selected:
ᔪᐊᓇᓯᐅᑉ ᐊᒡᓚᖏᑦ 18: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.