UFILIMONI 1
1
Ukulotjhisa
1UPowula osibotjhwa sakaKrestu Jesu noThimothi umzalwana wethu, kuFilimoni isinini sethu esithandekako nosisebenzi kanye nathi; 2kudade u-Aphiya, ku-Arirhiphusi olibutho kanye nathi kanye nebandleni elingendlinakho:
3Akube kini umusa nokuthula okuvela kuZimu uBaba neKosini uJesu Krestu.
Ithando nokukholwa kwakaFilimoni
4Ngithokoza uZimu ngeenkhathi zoke lokha nangikukhumbula emithandazwenami 5ngombana ngiyezwa ngethando lakho nokukholwa onakho eKosini uJesu nakibo boke abacwengileko. 6Ngithandaza bona ubudlelwano bakho ekukholweni bube nepumelelo, ube nokuzwisisa okupheleleko ezintweni zoke esinazo kuKrestu. 7Ithando lakho lingilethele ithabo elimangazako nokukhuthazeka ngombana iinhliziyo zabacwengileko zivuselelekile ngawe, mzalwana.
UPowula ubawela u-Onesimu
8Ngalokho, nanyana nginesibindi kuKrestu sokukuyala bona wenze okufaneleko, 9nokho ngebanga lethando ngiyakuncenga. Nje-ke mina Powula njengomuntu osele amdala nosibotjhwa sakaKrestu Jesu njenganje, 10ngikubawa ngo-Onesimu indodanami engibe nguyise ngesikhathi sokubotjhwa kwami: 11Ngaphambilini gade angasilo isizo kuwe, kodwana manjesi sele alisizo kimi nakuwe.
12Nje-ke ngimthumela bona abuyele kuwe njengomuntu oyihliziywami. 13Bengithanda bona ahlale nami kobana angisize esikhundleni sakho ngesikhathi ngisesesibotjhwa ngebanga levangeli. 14Kodwana angithandi ukwenza ilitho ngaphandle kwemvumo yakho ukuze izenzo zakho ezihle zibe ngezokuzithandela kungabi yinto yokwenziswa.
15Mhlamunye kungebangelo ahlukana nawe isikhatjhana khona azakubuyiselwa kuwe unomphela, 16angaseselikhoboka kodwana sele angaphezu kwekhoboka, amfowethu othandeka khulukhulu kimi, alo, kangangani-ke kuwe enyameni neKosini.
17Nje-ke nangabe ungithatha njengomhlanganyeli nawe, mamukele njengombana bewuzakwamukela mina. 18Nangabe kukhona akone ngakho, namkha akubamba khona, kubalele kimi lokho. 19Iye, mina Powula, ngitlola ngesandla sami, ngithi: Ngizakuhlawula lokho! Bengingakathandi ukukukhumbuza bona wena ngokwakho ungibamba ubuwena. 20Iye mfowethu, ngenzela isisa ngebanga leKosi, uvuselele ihliziywami kuKrestu.
21Nginethemba ngokulalela kwakho, ngikutlolela lokhu ngisazi bona uzakwenza ngokungaphezu kwalokho engikubawako. 22Okhunye godu nakhu: Ngilungiselani ilawu labayeni ngombana nginethemba bona ngemithandazo yenu ngizakubuyiselwa kini.
Ukulayelisa
23U-Ephafrasi obotjhwe nami ngebanga lakaKrestu Jesu, uyanilotjhisa,
24ngokunjalo noMarkosi, u-Aristarirhusi, uDemasi noLukasi ababalingani bami.
25Sengathi umusa weKosi uJesu Krestu ungaba nani noke.
Currently Selected:
UFILIMONI 1: SND12
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 2012. Used with permission. All rights reserved.