Makətūbə̄ yā Jonas 1
1
Jonas a̰ȳ kɔ̄ɔ́ rɔ̄ Kɔ́ɔ̄ɓē tə́ yā kaw̄ sa̰y
1Ndɔ̄ kógə̄ḿ tə́ anī, Kɔ́ɔ̄ɓē əda Jonas kə́ ngōn̄ Amitay na:
2Ḭ́ḭ dɔɔ́ āw̄ ɓē bo kə́ Ninibə tə́. Ə́la ɓōĺ kem de kə́ kemeé gə̄ tə́ kə najə̄ ń toō: Yá̰a̰ rāāsí kə́ majaĺ gə̄ ní, Kɔ́ɔ̄ɓē a̰ā̰ asən kɔ̄ɔ́.
3Jonas ḭḭ dɔɔ́ əsō róbó, banī i yā ka̰ȳ kaw̄ Tarsis sa̰y kɔ̄ɔ́ rɔ̄ Kɔ́ɔ̄ɓē tə́. Ni ugə̄ Japa. Anī ənge to bo kógə̄ḿ kə́ a aw̄ kə̄ Tarsis. Ni əgā too ní ba al̄ kemeé, yā kaw̄ Tarsis naā tə́ kə ngé rāā kəla kem too bo ní tə́ gə̄, sa̰y kɔ̄ɔ́ ta kum Kɔ́ɔ̄ɓē tə́.
4Banī Kɔ́ɔ̄ɓē rāā adə̄ nél kógə̄ḿ kə́ əla kə ngangá ngá̰ý əsō dɔ bā bo tə́. Nél man̄ ní əla kə tɔ́gɔ́ ngá̰ý kə́ too bo a sāā i tɔ̄ɔ̄. 5Ɓōĺ rāā ngé rāā kəla kem toó gə̄, adə̄ nin̄ kógə̄ḿ kógə̄ḿ ní, náā nəkɔ́ ɓáa a əga i kɔŕ kə̄ dɔ nə́ɓā yān tə́. Nin̄ ɔyn̄ yá̰a̰ malang kə́ kem toó ɓōkə́n̄ kɔ̄ɔ́ kum bā tə́, yā kadə̄ to hɔɔ́lɔń. Dan ngeé ń noō tə́ ní, Jonas risə aw̄ gə́le to bo tə́ aké to a ɓīī kə́ gōn əsō kɔ̄ɔ́. 6Ngol ngé rāā kəla kem to bo ní tə́ gə̄ reē rɔ̄n tə́, ba ədan na:
A̰á̰, adə̄ ā ī-ɓīī i mbée a? Ḭ́ḭ dɔɔ́, ə́ga kɔŕ kə̄ dɔ nə́ɓā yāí tə́! Na majanī a gír̄ dɔjí tə́, yā kadə̄ j-a j-oyiī alé. 7Gō tə́ anī, ngé rāā kəla kem to boó gə̄ ədan̄ naā dɔ dáńdə́ tə́ na:
Ādə̄ jə-túgī wə̄lā yā gerə̄ń dɔ deē ń reē kə yá̰á̰ kə́ to kum kaȳ aĺ ń toō dɔjí tə́ ní. Nin̄ túgə̄n̄ wə̄lā anī, wə̄lā əhɔ i Jonas. 8Loo ń noō tə́ ngé rāā kəla kem to boó gə̄ ədan̄ Jonas na:
I ḭ̄ n ī-reē kə yá̰á̰ kə́ to kum kaȳ aĺ ń toō dɔjí tə́ ní. Yá̰á̰ ń ī-reē rāāá laā ní i rí a ə́dájí. Ḭ́ḭ i rá? Ḭ̄ i de kə́ ɓē kə́ rá tə́ ō, de kə́ dan nápar de kə́ rā gə̄ tə́ ō? 9Jonas tél ədadə́ na:
Mā i hebəro, ba i Kɔ́ɔ̄ɓē n m-ā m̄-rɔȳn ní. Adə̄ i Nə́ɓā kə́ nge ndi dɔ rā̰ tə́, kə́ nge rāā bā bo ō, dɔ nang ō. 10Gō tə́ anī, ni-ənīdə́ gotə najə̄ yān. Ɓōĺ rāā ngé rāā kəla kem to boó gə̄ ngá̰ý adə̄ ədan̄ Jonas na:
I rí kə́ beē n ī-rāā toó! Tām̄ ngɔlaā nin̄ gerə̄n̄ kadə̄ Jonas a a̰ȳ i Kɔ́ɔ̄ɓē yā kaw̄ sa̰y. Nin̄ dəjenən̄ najə̄ ədan̄ na:
11Yá̰á̰ ń kadə̄ jə-rāā seí tá yā kadə̄ bā bo tél a toń jəke kə gō gidəjí ní i rí? Tām̄ bəngál man̄ a ḭḭ i mbée kum kə̄ kété kété. 12Jonas tél əda ngé rāā kəla kem to boó gə̄ na:
Ún ə̄nīmī kum bā bo tə́. I tītə̄ ń noō tá bā bo a tél yā kəto jəke kə gō gidəsí. A̰á̰ā̰, m̄-ger̄ kadə̄ nél man̄ kə́ əla kə ngangá ngá̰ý ń toō a rɔ̄ɔ̄sí i najə̄ yāḿ mā tə́. 13Ngé rāā kəla kem too boó gə̄ nēlə̄n̄ too yā kaw̄ń ta gógə́ tə́, banī nin̄ asən̄ alé. Bəngál man̄ a ḭḭ i kum kə̄ kété kété. 14Nin̄-ndɔ̄ȳn̄ Kɔ́ɔ̄ɓē ədan̄ na:
Ɓɔ́ Kɔ́ɔ̄ɓē, ī-lōō rāājí kadə̄ j-oy najə̄ yā deē ń toō tə́! Tá de kə́ najə̄ gətóo dɔn tə́ ní, ī-lōō kəndā najə̄ yon dɔjí tə́ ō. Tɔdɔ̄ i ḭ̄ Kɔ́ɔ̄ɓē n ī-rāā yá̰á̰ ń kemií ndigə ní. 15Gō tə́ anī, nin̄ unən̄ Jonas ənīnən̄ kum bā bo tə́. Loo ń noō tə́ wōn̄g yā bā bo tetə. 16Gō tə́ anī, de gə̄ ní ɓōlə́n̄ ndíĺ Kɔ́ɔ̄ɓē ngá̰ý. Nin̄-tunə̄n̄ yá̰a̰ adə̄nən̄ ō, túbən̄ ənīn̄ ndūdə́ adə̄nən̄ ō.
Currently Selected:
Makətūbə̄ yā Jonas 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad