Kəla rāā Ngámbang kəla gə̄ 28
28
Pol i dor̄ kə́ Maltə tə́
1Dan ń jə-teē ta yo tə́ anī, j-oō kadə̄ rī dor̄ ní na i Maltə. 2De kə́ tū tə́ gə̄ rāān̄ kem ndaa kə́ jóo toó deē a̰a̰ aĺ ɓáý sejí. Rāān̄ hor kə́ bo ba əhɔn̄jí kə̄ rɔ̄də́ tə́ malang kadə̄ jə-ndíbə̄, tɔdɔ̄ man̄ tetə ɓuk a edə i mbée ō, kūl̄ o̰o̰ ngá̰ý ō. 3Pol dḭḭ ngōō kīr̄ yā ɓōkə́ horoó anī, lī kakə́ḿ kógə̄ḿ kə́ kəngā hor teē seneé tū kīr̄ tə́ ɓír̄ gidə jīn tə́. 4Dan ń kɔ́ɔ̄ ɓē gə̄ a̰a̰n̄ kadə̄ lī ní naā jī Pol tə́ linding anī, ədan̄ naā dɔ dáńdə́ tə́ na:
Deē ń toō i de kə́ nge tɔ̄l̄ de gə̄ gáŕ, tām̄ ni teē ta yo kə́ maná tə́, banī ɓesə̄ Yá̰á̰ kə́ Gō tə́ ndigə kadə̄ ni ndi kə kumneé alé.
5Banī Pol tūtə̄ lī ní ənīn kum hor tə́ ō, rɔ̄n tōrə̄n sḛ́ý aĺ bátə́ ō. 6De gə̄ ní əndān̄ kemdə́ dɔ ka̰a̰n tə́ loo tágə̄ tə́, aláa loo ka̰a̰n tə́ loo teē kəsō koy tə́ kə̄ ta jī tə́ noō. Dan ń nin̄ ngóōn̄ dan i ngá̰ý ō, a̰a̰n̄ kadə̄ yá̰á̰ kógə̄ḿ kə́ rāān gətóo ō anī, tūrə̄n̄ ndūdə́, ədan̄ na Pol na i nə́ɓā kógə̄ḿ.
7Loo yā Pubəlius nge ko̰o̰ ɓē kə́ dor̄ ní tə́ i kadə loo ń jə-ra tū tə́ ní tə́ ngɔr. Ni-əhɔjí kə̄ rɔ̄n tə́ majə ō, adə̄jí loo jə-ton̄ ndɔ̄ mətá ō. 8Bɔbə̄ Pubəlius to dɔ tə̄rá tə́ kə mo̰y gajaá ō, kə mo̰y nden̄g mósó ō. Anī Pol aw̄ ka̰a̰n tə́. Ni-əndā jīn dɔn tə́ ndɔ̄yń Nə́ɓā anī, rɔ̄ dəngam ní ngáā. 9Loo ń ngé mo̰y kə́ dor̄ ní tə́ gə̄ a̰a̰n̄ beé anī reē əngen̄ Pol ō, anī rɔ̄də́ ngáā ō. 10Nin̄-rɔ̄ȳn̄jí ngá̰ý ō, ta kaw̄jí anī adə̄n̄jí sádə̄ gə̄ ngá̰ý ō.
Pol ugə̄ Rom
11Jə-ndi noó rāā nāā mətá tá kadə̄ j-ɔr̄ dɔɔ́ kə too bo kógə̄ḿ kə́ nāā kūl̄ gān̄g gírən loo ní tə́ ɓáý. To ní i too bo kə́ Aleksandəri, ba a ɓāŕnən̄ na i ɓesə̄ ndəngā gə̄. 12J-aw̄ j-əla too kum kā̰ā̰ kə́ Sirakujə tə́, ba jə-ndi noó ndɔ̄ mətá. 13J-ḭḭ noó ba j-əndā too bo kə gō kadə kóongó j-aw̄ j-ugə̄ Rejiyo. Teē kə ndɔ̄ kə́ noō anī néĺ kə́ dām̄ mbɔ́r ɓē kə́ geleé tə́ əla, adə̄ jə-rāā ndɔ̄ jōó anī j-ugə̄ Pujoles. 14J-ənge ngákó̰ó̰jí gə̄ kem ɓē ngeé ń noō tə́, adə̄ nin̄-əhɔn̄jí mbā ndɔ̄ sīrí. I beé n j-ugə̄ń Rom ní. 15Ngákó̰ó̰jí kə́ Rom gə̄ oōn̄ kōōjí adə̄ tə́nīn̄ tají bátə́ ugə̄n̄ loo gātə̄ kə́ Apyus tə́ ō, ta ngáń kújə́ kə́ mətá gə̄ ń a igən̄ yá̰a̰ kəsa ō kasə ō tū tə́ ní tə́ ō. Dan ń Pol a̰a̰də́ anī ndadə̄ Nə́ɓā ō, kemən tetə kə̄ nang tə́ ō. 16Dan ń j-ugə̄ Rom anī, adə̄n̄ Pol ndūdə́ kadə̄ ndi kem kújə yān tə́ kə kérneé naā tə́ kə áskar ń əndānən̄ tan tə́ ní.
Pol ɔjə najə̄ yā Nə́ɓā kem ɓē kə́ Rom tə́
17Rāā ndɔ̄ mətá gō tə́ anī, Pol ɓāŕ *Jipə kə́ bo bo gə̄ kə́ kem ɓē kə́ Rom tə́ ɓē looneé. Dan ń nin̄-ɔsən̄ dɔdə́ naā tə́ oy anī, ni ədadə́ na:
Ngákó̰ó̰ḿ gə̄, m̄-rāā yá̰á̰ kógə̄ḿ kə́ majaĺ kə gír deē yājí gēé aĺ ō, kə yá̰a̰ kāgə̄ ɓē yā kaají gēé aĺ ō. Banī əhɔmə̄n̄ *Jerusalem əlamə̄n̄ jī Rom gə̄ tə́. 18Dan ń nin̄-dəjemə̄n̄ najə̄ oy anī, gḛyn̄ kəya̰m̄ dɔɔ́. Tɔdɔ̄ nin̄-əngen̄ yá̰á̰ kógə̄ḿ dɔḿ tə́ kə́ asə kadə̄ deē gāngəń sarya yo dɔḿ tə́ alé. 19Banī *Jipə gə̄ tɔ́sə̄n̄ najə̄ kə̄ ndágá ba ɔdən̄ alé. I yá̰á̰ ń noō n ndḛḛ̄ kadə̄ m̄-reē kə sarya ní rɔ̄ *Sejar tə́ ní, ba yá̰á̰ kógə̄ḿ kə́ kadə̄ m̄-sekə́ń nápar deē yāḿ gə̄ gətóo. 20Adə̄ i tām̄ najə̄ ń noō tə́ n m̄-dəje kadə̄ m-á̰á̰sí ō, m-ɔ̄r̄ najə̄ sesí ō ní. Kə́ rɔ̄kum tə́ ɓáa ənīn̄ súĺ gə̄ ń toō jīḿ tə́ i najə̄ yā deē ń ngán *Israel gə̄ əndān̄ kemdə́ dɔn tə́ ní tə́.
21Nin̄-tél ədanən̄ na:
Jḭḭ laā j-ənge najə̄ kə́ ndang kə́ dɔí tə́ kə́ ḭḭ Jude aĺ ō, ngákó̰ó̰jí gə̄ ń ḭḭn̄ nú ní deē kógə̄ḿ dandə́ tə́ kə́ reē ədají kōōí, aláa ədají najə̄ kə́ majaĺ dɔí tə́ gətóo ō. 22Ba jḭḭ jə-gḛy kadə̄ īkɔ́ ə́dájí yá̰á̰ ń ī-gír̄ ní kə taí. Tɔdɔ̄ jə-ger̄ kadə̄ kə gō loo gə̄ malang ní, de gə̄ ndigən̄ najə̄ yā gír ɓūtə̄ yāí ń toō alé.
23Nin̄-oōn̄ naā kə Poló dɔ ndɔ̄ kógə̄ḿ tə́, ba reēn̄ ngá̰ý tɔȳ kə́ kété əngenən̄ kem kújə yān tə́ ndɔ̄ ngeé ń noō tə́. Ni-ɔr̄ najə̄ sedə́ dəloí bátə́ loo sɔl̄ dɔn tə́, ɔjədə́ najə̄ kə́ dɔ *Ɓē ko̰o̰ yā Nə́ɓā tə́ ō, sāā kəhɔdə́ kə najá kadə̄ taān̄ kem Jeju ō. Ni-əla gír sedə́ i dɔ *ndū najə̄ yā Moijə tə́ bátə́ teēń dɔ *ngé koō ta gə̄ tə́. 24Ngé kə́rēý gə̄ ń najə̄ ní əsō kemdə́ ní taān̄ kem Jeju ō, kə́ madə̄ gə̄ taān̄ kem aĺ ō. 25Dan ń nin̄ a tḭ̄ḭ̄n̄ i naā kanjə̄ ɓōkə́ ndūdə́ gō naā tə́ ní, Pol ədadə́ i najə̄ ń toō ngóy, əda na: 26Najə̄ ń *Ndíĺ kə́ Táĺ əndā ta Ijai *ngé koō ta tə́ adə̄ əda kaasí gə̄ ní i najə̄ kə́ rɔ̄kum!
Ni-əda na:
Āw̄ ə́ngé gír de gə̄ ń toō ba ə́dádə́:
Ā ōōī najə̄ kə mbīsí, banī ā ī-gerī kum alé.
Ā á̰a̰ī loo majə kə kumsí, banī ā á̰a̰ī yá̰a̰ alé.
27Tɔdɔ̄ gír de gə̄ ń toō ní kemdə́ ngan̄g ngóróró kɔ̄ɔ́.
Nin̄-utə̄n̄ mbīdə́ kɔ̄ɔ́ ō, kótə̄n̄ kumdə́ kɔ̄ɔ́ ō.
Kadə̄ kumdə́ a̰a̰ loo aĺ ō, mbīdə́ oō loo aĺ ō,
kemdə́ kə́ gerə̄ń najə̄ kógə̄ḿ aĺ ō,
yā kadə̄ kə n-tūrə̄n̄neé rɔ̄də́ kə̄ rɔ̄ḿ tə́ alé, na
sōgə́ rɔ̄də́ ngáā.
28Ní, ōōī majə: I de gə̄ kə́ nin̄ i *Jipə aĺ gə̄ n əlan̄ kə kajə kə́ Nə́ɓā a ajə de gēé ń toō adə̄n̄də́ ní. Nin̄ a oōn̄!
29Loo ń Pol əda Jipə gə̄ najə̄ ń noō anī, nin̄-aw̄n̄ ba gákə̄n̄ naā ngá̰ý dɔ dáńdə́ tə́#28.29 K. 29 ní, gətóo kem makətūbə̄ Kəla rāā kə́rēý gə̄ kə́ kété tə́ kə ta Gərek..
30Pol rāā ɓāl̄ jōó ta asə naā kem kújə́ ń ni-əhɔ tə́ ní. De gə̄ malang ń reēn̄ kəngen tə́ ní, ni-əhɔdə́ kə̄ rɔ̄n tə́ majə i kem kújə ngeé ń noō tə́. 31Ni-ənī kemən ɔjəń najə̄ kə́ dɔ *Ɓē ko̰o̰ yā Nə́ɓā tə́ kanjə̄ ɓōĺ ō, ndóoń de gə̄ najə̄ kə́ dɔ Kɔ́ɔ̄ɓē Jeju *Kərist tə́ kanjə̄ ɓōĺ ō, de kə́ ɔgə̄n gətóo ō.
Currently Selected:
Kəla rāā Ngámbang kəla gə̄ 28: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad