Kəla rāā Ngámbang kəla gə̄ 19
19
Pol ugə̄ kem ɓē kə́ Epejə tə́
1Dan ń Apolos ndi Korḛntə ní, Pol ənda gō nang kə́ ḭḭ kə̄ dɔɔ́ gə̄ kə́ Aji tə́ gān̄g ba reē ugə̄ kem ɓē kə́ Epejə tə́. Ni-ənge ngé ndóō yá̰á̰ kə́rēý gə̄ noó. 2Anī dəjedə́ na:
Loo ń ī-taāī kem ní ə́ngeī *Ndíĺ kə́ Táĺ a? Nin̄-tél ədanən̄ na:
Kadə̄ Ndíĺ kə́ Táĺ na ndi noó gə̄gē ní jḭḭ j-oō najə̄n sḛ́ý aĺ bátə́! 3Loo ń noō tə́ Pol dəjedə́ na:
Ba rāān̄sí i *batém kə́ ba̰ý? Nin̄-tél ədanən̄ na:
I batém yā Ja̰a̰. 4Anī Pol ədadə́ na: *Batém ń Ja̰a̰ rāā de gə̄ ní i batém tūr̄ háĺ ō, ni-əda ngán *Israel gə̄ na kə taān̄ kem deē ń a rāā yā reē gōn tə́ ní ō, kumən na kə taān̄ na i kem Jeju. 5Dan ń nin̄-oōn̄ najə̄ gə̄ ń toō ní anī, nin̄-rāān̄də́ batém kə rī Kɔ́ɔ̄ɓē Jeju. 6Pol əndā jīn dɔdə́ tə́, anī *Ndíĺ kə́ Táĺ reē dɔdə́ tə́. Loo ń noō tə́ nin̄-ɔrə̄n̄ najə̄ kə ta kə́ tayā tayā gə̄ ō, ədan̄ najə̄ gə̄ ń Nə́ɓā əndā tadə́ tə́ ní ō. 7De gə̄ ní nin̄ malang asən̄ yá̰á̰ kə́ kutə gidə i jōó ń noō.
8Pol aw̄ kújə́ kán̄ naā yā *Jipə gə̄ tə́ ba ɔr̄ najə̄ kemeé kanjə̄ ɓōĺ nāā mətá. Ni-ɔr̄ i najə̄ kə́ dɔ *Ɓē ko̰o̰ yā Nə́ɓā tə́ ō, sāā i kɔsə ngóý ngé koō najə̄ kɔrə̄n gə̄ ō. 9Banī ngá̰ý gə̄ rāān̄ dɔ ngan̄g, mbātə́n̄ taā kem ba tə́dan̄ najə̄ kə́ majaĺ gə̄ dɔ róbə yā Kɔ́ɔ̄ɓē tə́ ta kum ngé kán̄ naā gə̄ tə́. Loo ń noō tə́ Pol əya̰də́ ba ɔy ngé ndóō yá̰a̰ gə̄ aw̄ sedə́. Ni ɔjədə́ najə̄ yā Nə́ɓā kə dɔ ndɔ̄ gə̄ kem kújə́ ndóō yá̰a̰ yā Tiranus tə́. 10Ni-rāā beé ɓāl̄ jōó, adə̄ de gə̄ malang kə́ gō nang kə́ Aji tə́, *Jipə gə̄ gə̄gē, Gərek gə̄ gə̄gē oōn̄ najə̄ yā Kɔ́ɔ̄ɓē.
Ngán Seba gə̄
11Nə́ɓā rāā yá̰á̰ kə́ yáā gə̄ kə́ to dáńg gə̄ kə ta kūl̄ Pol. 12Adə̄ de gə̄ unən̄ ta kūbə̄ kɔl̄ rɔ̄ yān, aláa kūbə̄ yān kə́ rang aw̄ ɔdən̄neé rɔ̄ ngé mo̰y gə̄ anī mo̰y əya̰də́ ō, ndíĺ kə́ majaĺ gə̄ teēn̄ kemdə́ tə́ kɔ̄ɔ́ ō. 13*Jipə kə́rēý gə̄ kə́ ngé kɔr̄ gō ɓē tə̄ɓań ndíĺ kə́ majaĺ gə̄ nāān̄ ɓāŕ rī Kɔ́ɔ̄ɓē Jeju dɔ ngé ndíĺ kə́ majaĺ gə̄ tə́ ō, nin̄-ədan̄ na:
Ī-teē kɔ̄ɔ́ kə ta kūl̄ rī Jeju ń Pol ɔjə najə̄ yān ní! 14De gə̄ ń rāān̄ yá̰á̰ ń noō ní i ngán *Jipə kə́ ngol *ngé tun̄ yá̰a̰ gə̄ ń rīn na i Seba ní. Nin̄ i deē sīrí. 15Ndíĺ kə́ majaĺ ní tél ədadə́ na:
m̄-ger̄ Jeju ō, m̄-ger̄ Pol ō, ba sḭḭ̄ i náā gə̄? 16Ba deē ń ndíĺ kə́ majaĺ i kemən tə́ ní udə dɔdə́ tə́ rāādə́ majaĺ ngá̰ý, tɔ́gən tɔȳ yādə́ malang. Nin̄-teēn̄ kújú kə ngɔ̄dɔ̄ɔ́ rɔ̄də́ karī ō, kə do gə̄ rɔ̄də́ tə́ ō. 17De kə́ Epejə gə̄ malang, *Jipə gə̄ ō, Gərek gə̄ ō, oōn̄ gotə yá̰á̰ ń noō ń rāā yá̰á̰ ní. Nin̄ malang ní ɓōĺ rāādə́ ō, de gə̄ tɔ̄ȳn̄ rī Kɔ́ɔ̄ɓē Jeju ō. 18De gə̄ ngá̰ý dan ngé taā kem gə̄ tə́ reē ɔrə̄n̄ gír majaĺ yādə́ gə̄ ō, teēn̄ kə gíŕ yá̰a̰ rāādə́ gə̄ kə̄ ndágá ō. 19De gə̄ ngá̰ý dan ngé rāā mbōlí gə̄ tə́ reēn̄ kə makətūbə̄ mbōlí yādə́ gēé, ba əlan hor dɔ tə́ ta kum de gə̄ tə́ malang. Dan ń tə́dan̄ gātə̄ makətūbə̄ gə̄ ní anī, asə sə́lē arjā̰a̰ 50 000. 20I tītə̄ ń noō n najə̄ yā Kɔ́ɔ̄ɓē taāń loo kum kə̄ kété kə tɔ́gɔ́ ō, ɔjəń tɔ́gən kə̄ ndágá ō ní.
Kósə de gə̄ əsōn̄ wōn̄g kem ɓē kə́ Epejə tə́
21Gō yá̰a̰ gə̄ ń noō ń rāān̄ yá̰á̰ tə́ ní, Pol ɔjə gír̄ teē gō nang kə́ Masedəwan tə́ ō, gō nang kə́ Akayi tə́ ō, yā kaw̄ń kə̄ *Jerusalem, ni-əda na:
Ré m-ūgə̄ nú anī, majə kadə̄ m-á̰a̰ ɓē kə́ Rom ō. 22Ni-əla de gə̄ jōó dan ngé gə̄ ń rāān̄ kəla seneé tə́ ní, adə̄ i Timote ō Erastə ō. Nin̄-aw̄n̄ Masedəwan kété, ba nəkɔ́ tá ndi gogə́ gō nang kə́ Aji tə́ sḛ́ý ɓáý. 23Yá̰á̰ kə́ a̰a̰ gō naā aĺ kə́ majaĺ ngá̰ý to kem ɓēé dɔ gō róbə́ yā Kɔ́ɔ̄ɓē tə́ dan ngeé ń noō tə́. 24Deē kógə̄ḿ ndi noó rīn na i Demetrius. Ni i kɔdə̄ nge nōō gində̄ arjā̰a̰. Ni a nōō gində̄ arjā̰a̰ a rāań ngáń kújə ɓesə̄ Artemis#19.24 Artemis i rī ɓesə̄ kə́ dəyá̰ kə́ nge kadə̄ de gə̄ ngán gə̄ kadə̄ ojən̄. kə́ dūú gə̄. Adə̄ kɔdə̄ gə̄ ń ni a adə̄də́ kəla ń noō ní əngen̄ yá̰á̰ ngá̰ý gírí.
25Ni-ɔsə dɔdə́ naā tə́ kə ngé gə̄ ń kəla yādə́ i kə́ tītə̄ yān ní ba ədadə́ na:
Madə́ḿ gə̄, ī-gerī kadə̄ jə-ndiī majə i kə ta kūl̄ kəla kɔdə̄ ń toō. 26Ba yá̰á̰ ń Pol ngeé ń noō rāā ní, sḭḭ̄ á̰a̰ī ō ōōī ō. Ni-əda na nə́ɓā gə̄ ń de gə̄ rāān̄ kə jīdə́ ní na i nə́ɓā gə̄ alé. Ni-ɔsə ngóy de gə̄, adə̄ de gə̄ ngá̰ý ndigən̄ najə̄ gōn tə́. I kem ɓē yājí kə́ Epejə tə́ laā ngóy alé, na̰y sḛ́ý beē kadə̄ i gō nang kə́ Aji tə́ malang. 27I kəla yājí ngóy n a nujə ní alé, ba Artemis ń i nə́ɓā kə́ dəyá̰ kə́ bo ní gə̄gē, najə̄ kújə yān a ɓār̄ to̰ alé! Loo ń noō tə́ nə́ɓā kə́ dəyá̰ ngeé ń toō ń de gə̄ malang kə́ gō nang kə́ Aji tə́ ō, kə́ dɔ nang tə́ laā ō a rɔȳn̄ ní, kɔsə gɔn yān a gətóo kɔ̄ɔ́!
28Loo ń nin̄-oōn̄ najə̄ gə̄ ń noō ní, wōn̄g asədə́ nák, adə̄ əgan̄ kɔŕ ədan̄ń na:
Artemis yā Epejə gə̄ i nə́ɓā kə́ bo! 29Najə̄ ní taā loo kem ɓēé malang, adə̄ de gə̄ bə̄gān̄ naā ta kaw̄ kə̄ loo kɔjə yá̰á̰ tə́, ba ndɔ́rə̄n̄ Gayus nin̄ kə Aristark ń i de kə́ Masedəwan tə́ gə̄ ní ō, i madə̄ mbā Pol gə̄ ní ō aw̄n̄ sedə́. 30Pol gḛy kaw̄ ra no kósə de gə̄ tə́ loo kán̄ naā ní tə́, banī ngé ndóō yá̰a̰ gə̄ ɔgə̄nən̄ kɔ̄ɔ́. 31Tá de kə́ bo kə́rēý gə̄ kə́ Aji tə́, kə́ nin̄ i madə̄ tan gə̄ əlan̄ rɔ̄n tə́ rāānən̄ ɓɔ́ kadə̄ kə lōō kaw̄ loo yá̰á̰ kə́ rāā yā kɔjəń yá̰á̰ gə̄ tə́ ɓáý to̰. 32Dan ngeé ń noō tə́ ní, yá̰a̰ a̰a̰ gō naā alé dan de gə̄ ń kánə̄n̄ naā tə́ ní. Ngé kə́rēý gə̄ əgan̄ kɔŕ ədan̄ń yá̰á̰ kə́rēý ō, madə̄də́ gə̄ əgan̄ kɔŕ ədan̄ń yá̰á̰ kə́ rang ō, ngá̰ý gə̄ gerə̄n̄ kum kán̄ naā ní aĺ ō. 33*Jipə gə̄ əndān̄ deē kógə̄ḿ kə́ rīn na i Alekjandər kété nodə́ tə́, adə̄ de kə́rēý gə̄ kə́ dan kósə de gə̄ tə́ ɔjənən̄ kum najə̄ ní. Tā anī Alekjandər wél̄ jīn ɔjəń kadə̄ n-gḛy kɔr̄ gír najə̄ ta kum kósə de gə̄ tə́. 34Ba dan ń nin̄-gerə̄n̄ kadə̄ Alekjandər i *Jipə anī, nin̄ malang ədan̄ kum najə̄ kə́ kógə̄ḿ beē ń toō asə kum mbang jōó, ədan̄ na:
Artemis yā Epejə gə̄ i nə́ɓā kə́ bo!
35Dan ń nge ndang makətūbə̄ mā̰ȳ de gə̄ adə̄ tél ran̄ jəke sḛ́ý anī, ədadə́ na:
Epejə gə̄, de gə̄ malang gerə̄n̄ kadə̄ ɓē kə́ Epejə i ɓē kə́ nge ngɔ̄m̄ kújə yā Artemis ń i nə́ɓā kə́ dəyá̰ kə́ bo ní ō, nge ngɔ̄m̄ ndílən kə́ ḭḭ dɔ rā̰ tə́ əsō ō. 36De kə́ asə nējə̄ nge ń noō gətóo. I beé ní, majə kadə̄ ī-tél ī-raī jəke ō, ī-lōōī kḭḭ rétə́ rāā yá̰á̰ kə́ kanjə̄ gír̄ ō. 37Tɔdɔ̄ sḭḭ̄ ī-reēī kə de gə̄ ń toō laā ba nin̄-ɓogən̄ yá̰á̰ kə́ kem kújə ɓesə̄ tə́ aĺ ō, tə́dan̄ najə̄ kə́ to ngonjə̄ gə̄ dɔ nə́ɓā kə́ dəyá̰ yājí tə́ aĺ ō. 38Ré Demetrius nin̄ kə ngé kəla yān gēé najə̄ i mbo̰ō̰də́ tə́ kə de kə́rēý anī, ndɔ̄ gān̄g sarya to laā ō, ngé ko̰o̰ ɓē gə̄ ndin̄ laā ō. Loo ń majə kadə̄ nin̄-aw̄ sekə́nən̄ tū tə́ ní n noó! 39Ré āwī kə yá̰á̰ kə́ rang kə́ yā dəje najə̄ dɔ tə́ ɓáý anī, a əndān̄ najə̄ ní naā tə́ i loo kán̄ naā kə́ kə gō róbəneé tə́. 40Kán̄ naā yājí kə́ ɓōólaā ń toō j-asiī kənge najə̄ tāmən tə́. Asə kadə̄ əndān̄ najə̄ sə̄lā de gə̄ kadə̄ mbātə́n̄ najə̄ ta ngār yājí gə̄ tə́ dɔjí tə́. Tɔdɔ̄ jḭḭ̄ j-awī kə najə̄ kógə̄ḿ kə́ yā kɔjəń kum kɔsə dɔ naā tə́ yājí ń toō alé. 41Dan ń ni-əda najə̄ ń toō oy anī, əya̰ de gə̄ ń kánə̄n̄ naā ní adə̄ aw̄n̄.
Currently Selected:
Kəla rāā Ngámbang kəla gə̄ 19: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad