Makətūbə̄ kə́ nge ko̰ jōó ń Pol ndang adə̄ Timote ní 4
4
1m̄-dəjeī kə ngangāá ngá̰ý ta kum Nə́ɓā tə́ ō, ta kum *Kərist Jeju nge gān̄g sarya yā ngé gə̄ ń ndin̄ kə kumdə́ ō, ngé gə̄ ń oyn̄ kɔ̄ɔ́ ō ní, Kərist ń a tél yā reē ō, a o̰o̰ ɓē ō ní, 2kadə̄ ɔ́jə de gə̄ najə̄ yā Nə́ɓā. Ī-na̰y kə̄ loo kɔjə tə́ ndɔ̄ kə́ majə tə́ gə̄gē, kə́ majaĺ tə́ gə̄gē. Ɔ́jə́də́ bátə́ ādə̄ gerə̄n̄ kum ō, ī-gɔŕyɔ̄də́ ō, ə́la go̰ kemdə́ tə́ ō. Ī-ndóōdə́ yá̰a̰ kə tə́gā ta kə́ ngá̰ý. 3Tɔdɔ̄ ndɔ̄ gə̄ a reēn̄ noó kadə̄ de gə̄ a ndigən̄ yá̰á̰ ndóō kə́ rɔ̄kum to̰ alé, ba a rāān̄ i yá̰á̰ ń kemdə́ gḛy ní. Adə̄ a ɔyn̄ ngé ndóōdə́ yá̰a̰ gə̄ kə́ kadə̄ a ndóōn̄də́ i yá̰á̰ ń nel̄də́ koō ní. 4Nin̄ a unən̄ mbīdə́ kɔ̄ɔ́ ta najə̄ kə́ rɔ̄kum tə́, ba a tūrə̄n̄ rɔ̄də́ i kə̄ rɔ̄ súū kə́ kɔr̄ gə̄ tə́. 5Ba ḭ̄ tā a ə́hɔ rɔ̄í dɔ yá̰a̰ gə̄ tə́ malang. Ī-tə́gā taí dan tápə̄ gə̄ tə́. Ī-rāā kəla kɔjə Najə̄ kə́ Majə, kəla ń Nə́ɓā adī ní.
6M-ə̄ndā dɔ rɔ̄ḿ danaá kɔ̄ɔ́ yā kadə̄ m-ādə̄ Nə́ɓā rɔ̄ḿ, adə̄ m̄-to i tītə̄ kasə *nduú kə́ yā tə́te dɔ *loo tun̄ yá̰a̰ tə́ beē. Kum mbang koyḿ asə kɔ̄ɔ́. 7m̄-rɔ̄ɔ̄ rɔ̄ɔ̄ kə́ majə, m̄-tɔ̄l̄ ta ngɔ̄də̄ yāḿ, m̄-ngɔ̄m̄ taā kem yāḿ. 8Ba ń toō ɓáa yá̰a̰ kəndā nja kə́ tām̄ yā tetə rɔ̄ɔ̄ tə́ to a ngóōm̄ noó: Yá̰á̰ ní i *jākā mbang yá̰a̰ rāā kə́ gōtə́ ń Kɔ́ɔ̄ɓē, nge gān̄g sarya kə́ gō tə́, a adə̄m̄ ndɔ̄ gān̄g sarya tə́ ní. A adə̄m̄ i mā ngóy alé, a adə̄ de gə̄ malang ń ta reēn nel̄də́ ngá̰ý á ndi a ngóōnən̄ ní ō.
Yá̰á̰ kə́ yā rāā gə̄ kə́ ta tɔ̄l̄ ta tə́
9Ī-sāā ta róbə reē láẃ rɔ̄ḿ tə́. 10Tām̄ Demas əya̰m̄ kɔ̄ɔ, tɔdɔ̄ yá̰á̰ kə́ dɔ nang tə́ kə́ ngɔlaā ń toō nelə̄n ngá̰ý, adə̄ ni-aw̄ Tesalonik. Tá Kəresa̰s aw̄ Galasi tə́ ō, Titə aw̄ Dalmati tə́ ō, 11ba i Luk ngóy n i seḿ ní. Ādə̄ Mark reē seí, tɔdɔ̄ ni a ɔsə kílə́ḿ tū kəla yāḿ gə̄ tə́. 12M-ə́la Tisik Epejə tə́. 13Loo ń ā ī-reē anī, kūbə̄ kūl̄ ń m-ə́ya̰ Təroas ɓē Karpus ní, ún jīí tə́ ī-reēń ādə̄m̄. Ɔ́y makətūbə̄ gə̄ ō, ba mandang ɓáa ɔ́y ndāŕ gə̄ ń ndangən̄ najə̄ tū tə́ ní.
14Alekjandər ń i kɔdə̄ kə́ nge koo yá̰á̰ ní, rāā yá̰á̰ kə́ majaĺ ngá̰ý seḿ. Ba Kɔ́ɔ̄ɓē a əgān kə̄rān. 15Ḭ̄ ə̄ndā kum kedə̄ dɔ rɔ̄í tə́ najə̄ yān tə́ ō, tɔdɔ̄ yá̰a̰ malang ń j-əda ní, ni-mbātə́ gōjí tə́ kə ngangāá ngá̰ý.
16Ndɔ̄ sarya yāḿ kə́ ta kəga dɔ tə́ ń m-ɔ̄rəń najə̄ dɔ rɔ̄ḿ tə́ ní, deē kógə̄ḿ kə́ rāā seḿ gətóo, banī de gə̄ malang əya̰mə̄n̄ kɔ̄ɔ́. Ādə̄ Nə́ɓā əhɔ gíŕ yá̰á̰ ń nin̄-rāān̄ ní alé. 17Banī Kɔ́ɔ̄ɓē ra rɔ̄ḿ tə́, ni-adə̄m̄ tɔ́gə adə̄ m-ɔ́jəń de gə̄ ń nin̄ i Jipə aĺ gə̄ ní najə̄ yān malang kə taá ō, ni ɔrə̄m̄ kɔ̄ɔ́ ta ɓɔl tə́ ō. 18Kɔ́ɔ̄ɓē a ɔrə̄m̄ kɔ̄ɔ́ kum yá̰a̰ malang kə́ majaĺ tə́ ō. Ni a ajəm̄ tām̄ yā Ɓē ko̰o̰ yān kə́ dɔ rā̰ tə́ ō. *Kɔsə gɔn i yān kə dɔ ɓāl̄ gə̄ ɓāl̄ gə̄! *Adə̄ i tītə̄ ń noō!
Lápə́ya kə́ ta tɔ̄l̄ ta tə́
19Ī-rāā Pərisil nin̄ kə Akilas lápə́ya, ī-rāā de kə́ kem kújə yā Onejipor tə́ gə̄ lápə́ya ō. 20Erastə na̰y Korḛntə. M-ə́ya̰ Təropim kem ɓē kə́ Milet tə́ i kə mo̰yo̰ó̰. 21Ī-sāā ta róbə reē láẃ kété no ɓar tə́.
Ebul ō, Pudens ō, Lin ō, Kəlodia ō, ngákó̰ó̰jí gə̄ malang ō ní, rāāīn̄ lápə́ya.
22Ādə̄ Kɔ́ɔ̄ɓē i naā tə́ kə ndílí.
Ādə̄ Nə́ɓā rāā kem majə sesí.
Currently Selected:
Makətūbə̄ kə́ nge ko̰ jōó ń Pol ndang adə̄ Timote ní 4: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad